4. Пачатак Другой сусветнай вайны, яе прычыны і характар.

Ужо праз тыдзень пасля знікнення з палітычнай карты Чэхаславакіі ўвага нацысцкага кіраўніцтва сканцэнтравалася на Польшчы. 11 красавіка 1939 г. Гітлер зацвердзіў план ваеннага захопу Польшчы – «план Вайс» (Белы), а 28 красавіка германскае кіраўніцтва аб’явіла аб дэнансацыі абавязкаў аб ненападзенні, заключаных паміж Польшчай і Германіяй у 1934 г. Да канца жніўня 1939 г. падрыхтоўка да нападзення на Польшчу была закончана і 31 жніўня 1939 г. Гітлер падпісаў адпаведную дырэктыву.

У ноч з 31 жніўня на 1 верасня 1939 г., калі ўся «ваенная машына» Германіі была гатова да рыўка на Польшчу, германскія спецслужбы правялі правакацыйную аперацыю «Гіммлер».Пераапранутыяў польскую форму эсэсаўцы і вязні канцэнтрацыйных лагераў, якія валодалі польскай мовай, «захапілі» радыёстанцыю ў германскім горадзе Глейвіц (цяпер польскі Глівіцэ). Непасрэднымкіраўнікомаперацыі з’яўляўсяштурмбанфюрэр СС А. Науйокс. Быццам бы з захопленай радыёстанцыі прагучаў зварот на польскай мове, у якім быў прызыў «аб’ядноўвацца і біць немцаў». Раніцай Гітлер звярнуўся да германскага народа і ўсю віну за развязванне ваеннага канфлікта ўсклаў на польскае кіраўніцтва.

1 верасня 1939 г. Германія абрушыла ўсю стальную моц вермахта на Польшчу. Англія і Францыя, звязаныя з Польшчай саюзнымі дагаворамі, 3 верасня 1939 г. аб’явілі вайну Германіі. У вайну ўступілі брытанскія дамініёны і калоніі: Аўстралія, Новая Зеландыя, Індыя, Канада, Паўднёва-Афрыканскі Саюз. Пачалася Другая сусветная вайна.

Асноўнай прычынай вайны з’явілася абвастрэнне супярэчнасцей і барацьба паміж буйнейшымі капіталістычнымі дзяржавамі за перадзел зон уплыву, што склаліся пасля Першай сусветнай вайны. Адзін ваенна-палітычны блок дзяржаў узначальвалі фашысцкія Германія і Італія і мілітарысцкая Японія, другі – Вялікабрытанія, Францыя і ЗША.

У савецкай гістарыяграфіі сцвярджалася, што Другая сусветная вайна, якая пачалася як вайна паміж дзвюма групоўкамі імперыялістычных дзяржаў за новы перадзел свету, мела спачатку захопніцкі, імперыялістычны характар (для правячых колаў усіх імперыялістычных дзяржаў) з элементамі справядлівай вайны для народаў, якія сталі ахвярамі агрэсіі (Польшча, Кітай і інш.); што паступова справядлівы характар вайны для народаў-ахвяр агрэсіі ўзмацняўся; што з нападзеннем Германіі на СССР уся вайна з боку антыгітлераўскай кааліцыі стала справядлівай, вызваленчай. У сучаснай гістарыяграфіі іншы раз сцвярджаецца, што незалежна ад суб’ектыўных мэт «уміратворцаў» Англіі, Францыі і іншых краін і стаяўшых за імі ўплывовых палітычных і ваенных колаў, для якіх гітлераўскі фашызм быў зручнай зброяй барацьбы з камунізмам, гэтая вайна не толькі для народаў, але і ўрадаў Польшчы, Англіі, Францыі і іншых ахвяр германскай агрэсіі была справядлівай з самага пачатку. Размова ішла не проста аб тэрытарыяльным перадзеле свету, перш-наперш калоній, як у Першую сусветную вайну. На гэты раз размова ішла аб незалежным існаванні і Польшчы, і Англіі, і Францыі, і іншых краін, якія гітлераўская Германія планавала захапіць і парабаваць.

У апошні час з’явіліся публікацыі былога афіцэра савецкай ваеннай разведкі, здрадніка Суворава (Рэзуна) «Ледакол», «Последняя республика (Почему Советский Союз проиграл Вторую мировую войну)», у якіх зроблена спроба шляхам выкарыстання неправераных крыніц (дакументаў) і падтасовак абвінаваціць савецкае кіраўніцтва і асабіста І.В. Сталіна ў развязванні Другой сусветнай вайны. З вялікай асалодай гэту фальшыўку тыражыруюць купленыя за грошы Захаду гісторыкі, публіцысты і журналісты з некаторых расійскіх сродкаў масавай інфармацыі. Мэта – дыскрэдытацыя сацыялізму як грамадска-палітычнай сістэмы: аказваецца, што Другую сусветную вайну развязаў не капіталізм, а сацыялізм… Чаму толькі не дадумаліся абвінаваціць сацыялізм у развязванні Першай сусветнай вайны?

Каб даказаць тое, што СССР развязаў Другую сусветную вайну, трэба адказаць па меншай меры на тры пытанні. Першае, наяўнасць палітычнага рашэння вышэйшага кіраўніцтва СССР (ЦК ВКП(б) і СНК СССР) аб развязванні Другой сусветнай вайны. Такіх дакументаў ніхто з гісторыкаў, палітыкаў і публіцыстаў не знайшоў, бо рашэнне аб развязванні вайны савецкім кіраўніцтвам ніколі не прымалася. Другое, наяўнасць адобранага і зацверджанага вышэйшым кіраўніцтвам СССР плана вядзення вайны. Любая краіна, якая пачынае вайну, мае план яе вядзення. Такога плана СССР аб пачатку і вядзенні Другой сусветнай вайны таксама няма. Трэцяе, наяўнасць плана пераводу эканомікі на ваенныя рэйкі, гэтак званай мілітарызацыі эканомікі. Такога плана напярэдадні сусветнай вайны ў СССР не было. Ён з’явіўся толькі пасля нападу на СССР фашысцкай Германіі.

Значыць, няма ніякіх дакументаў, якія б сведчылі аб падрыхтоўцы СССР да развязвання сусветнай вайны. Дакладна вядома адно: тое, што Другую сусветную вайну развязаў капіталізм, яго самы агрэсіўны авангард – Германія, Італія, Японія.

Груба фальсіфікуе пачатак Другой сусветнай вайны і беларускі гісторык З. Шыбека ў кнізе «Нарыс гісторыі Беларусі. 1795 – 2002». Адзін з раздзелаў яго кнігі называецца «Падпальшчыкі сусветнай вайны». З. Шыбека піша: «У той час, калі палякі абаранялі Варшаву, на Польскую дзяржаву напаў Іосіф Сталін. Так пачалася Другая сусветная вайна. Гітлер і Сталін выступілі ў ёй напачатку хаўруснікамі. Планаваўся адначасовы напад на Польшчу, але Чырвоная Армія ўвязла ў ваенны канфлікт з Японіяй. Дый Сталін марудзіў, каб усю віну за напад на Польшчу перакласці на Гітлера» (с.298 – 299).

Наступны падзагаловак З. Шыбека назваў так: «Ваенныя дзеянні «саюзнікаў» супраць Польшчы». У ім бяздоказна сцвярджаецца, што «для навядзення германскіх самалётаў савецкі ўрад дазволіў выкарыстоўваць радыёстанцыю ў Мінску. Таму БССР была ўцягнута ў Другую сусветную вайну не ў 1941 г., а ў 1939 г., прычым у саюзе з нацысцкай Германіяй». Далей аўтар піша, што «войскі вермахта … яшчэ да прыходу Чырвонай Арміі захапілі польскія землі на ўсход ад Варшавы, якія па дамоўленасці былі ў савецкай сферы ўплыву. Але сталіністы з гэтым змірыліся. Акупацыя цэнтральнай Польшчы не дазваляла б савецкую захопніцкую акцыю маскіраваць пад «выз-валенчы паход». Гэта акцыя дала б падставу саюзнікам Польшчы – Англіі і Францыі – абвясціць вайну абодвум агрэсарам: Германіі і СССР» (с. 299).

Нават школьнікі ведаюць, што Другую сусветную вайну пачала фашысцкая Германія нападзеннем на Польшчу 1 верасня 1939 г. Савецкі Саюз увёў свае войскі ў Заходнюю Беларусь і Заходнюю Украіну тады, калі Польская дзяржава была ўжо фактычна знішчана і навісла пагроза фашысцкага рабавання этнічных беларускіх і ўкраінскіх земляў. Кіраўніцтва СССР, зыходзячы са сваіх палітычных і ваенна-стратэгічных інтарэсаў, узяло пад сваю абарону насельніцтва Заходняй Беларусі і Заходняй Украіны і зрабіла ўсё для таго, каб да Савецкага Саюза былі далучаны землі са складу былой Расійскай імперыі, а пазней Савецкай Расіі, якія ў 1919 – 1921 гг. анексіравала буржуазная Польшча і якія па праву павінны былі знаходзіцца ў складзе БССР і УССР. Таму няма ніякіх падстаў называць Савецкі Саюз «падпальшчыкам сусветнай вайны», абвінавачваць СССР у развязванні Другой сусветнай вайны, а Сталіна і Гітлера называць хаўруснікамі. Гэта – па‑першае.

Па‑другое, Савецкі Саюз і фашысцкая Германія ніколі не былі саюзнікамі, хаўруснікамі, як памылкова сцвярджае З. Шыбека, які імкнецца дыскрэдытаваць сацыялізм як сістэму і паставіць знак роўнасці паміж сацыялізмам і фашызмам. У гэтай бруднай справе гэты аўтар не з’яўляецца піянерам. Ён перапісвае сёння тое, што напісалі былыя здраднікі, якія ў 1944 г. разам з фашыстамі ўцяклі на Захад, а таксама так званыя «саветолагі» розных колераў і адценняў. Ні ў дагаворы паміж СССР і Германіяй аб ненападзенні ад 23 жніўня 1939 г., ні ў дадатковым сакрэтным пратаколе да яго, як ужо указвалася, не ўтрымліваліся артыкулы аб узаемнай дапамозе, аб сумесных ваенных дзеяннях супраць дзяржаў, якія напалі б на адну з краін, падпісаўшых дагавор, ці супраць дзяржаў, якія знаходзіліся б ў стане вайны з Савецкім Саюзам ці фашысцкай Германіяй.

Па‑трэцяе, сапраўды, войскі вермахта захапілі польскія землі на ўсход ад Варшавы, якія па дамоўленасці ад 23 жніўня 1939 г. былі ў савецкай сферы ўплыву. Але «сталіністам» з гэтым не прыйшлося мірыцца, як памылкова сцвярджае аўтар, бо савецкае кіраўніцтва не прэтэндавала на ўласна польскія землі, яно ўзяло пад сваю абарону толькі тыя землі, якія сталі ахвярай польскай агрэсіі 1919 – 1920 гг. Вядома, што з самага пачатку нападзення Германіі на Польшчу кіраўніцтва рэйха падштурхоўвала Савецкі Саюз да ўступлення ў вайну. Але савецкае кіраўніцтва гэтага не зрабіла да таго часу, пакуль фашысты не акупіравалі ўсю ўласна польскую тэрыторыю. І толькі 17 верасня 1939 г. камандаванне Чырвонай Арміі атрымала загад перайсці дзяржаўную граніцу і пачаць вызваленчы паход у Заходнюю Беларусь і Заходнюю Украіну. І не трэба З. Шыбеку словы «вызваленчы паход» браць у двухкоссе, бо гэта быў сапраўды вызваленчы паход, які даў магчымасць уз’яднацца беларускаму і ўкраінскаму народам ў этнічных межах іх пражывання.

Усе краіны, якія аб’явілі вайну Германіі, баявых дзеянняў і неабходнай дапамогі Польшчы не аказалі. Нагадаем, што французская армія павінна была на 15-ы дзень пасля нападу Германіі на Польшчу перайсці ў наступленне. Ваенныя магчымасці Англіі і Францыі па недапушчэнні германскай агрэсіі былі больш чым значныя. Разам з Польшчай яны мелі: 172 дывізіі, каля 4 000 танкаў, звыш 7 600 самалётаў, да 36 000 гармат і мінамётаў. Германія мела толькі 103 дывізіі, 3 200 танкаў, звыш 4 000 самалётаў і 26 000 гармат і мінамётаў. Відавочна, пры рашучасці саюзнікаў іх удар на захадзе здолеў бы карэнным чынам змяніць ход ваенных падзей. У гэтай сувязі начальнік штаба аператыўнага кіраўніцтва ўзброеных сіл Германіі генерал-палкоўнік А. Йодль на Нюрнбергскім працэсе заявіў: «…если мы еще в 1939 г. не потерпели поражения, то это только потому, что примерно 110 французских и английских дивизий, стоявших во время нашей войны с Польшей на Западе против 23 германских дивизий, оставались совершенно бездеятельными».

Польскае кіраўніцтва спачатку паверыла, што з уступленнем у вайну брытанскія і французскія саюзнікі выканаюць свае абавязкі. Насельніцтва Польшчы з энтузіязмам сустрэла вестку аб рашэннях Англіі і Францыі ўступіць у вайну, грамадскасць разлічвала на саюзнікаў. Перш за ўсё Польшчы патрабавалася неадкладная падтрымка авіяцыяй. Але час ішоў, а саюзная авіяцыя ў польскім небе так і не з’явілася.

Германскія войскі ў складзе дзвюх армій «Поўнач» і «Поўдзень», якія напалі на Польшчу, налічвалі 1,6 млн чал., 2 800 танкаў, 2 000 самалётаў, звыш 100 караблёў, каля 6 000 гармат і мінамётаў, і былі аб’яднаныя ў 62 дывізіі, у тым ліку ў 7 танкавых і 4 матарызаваных. Ім процістаялі шэсць польскіх армій: «Модлін», «Памор’е», «Познань», «Лодзь», «Кракаў», «Карпаты», якія былі разгорнуты на мяжы з Германіяй, і адна армія «Прусы» – ў тыле, дзве аператыўныя групы: «Нарэў», «Вышкаў» і група «Піскор». Польскія войскі налічвалі каля 1 млн чал., 870 танкаў і танкетак, 4 300 гармат, 407 самалётаў і 13 ваенных караблёў і былі аб’яднаныя ў 39 дывізій, у тым ліку ў 16 кавалерыйскіх, 2 бронематарызаваныя і 3 горнастралковыя брыгады. Як відаць, суадносіны сіл былі на карысць немцаў: па пяхоце – 1,8 : 1, па артылерыі – 3 : 1, па танках – 4 : 1, па авіяцыі – 5 : 1. Да таго ж польскае камандаванне не паспела закончыць мабілізацыю і разгортванне арміі. Калі немцы мелі ў поўнай гатоўнасці 95 % сваіх сіл, то палякі – каля 49 %.

Нягледзячы на мужнае супраціўленне польскіх салдат і афіцэраў, германская армія, валодаючы вялікай ваеннай перавагай, акупіравала да 16 верасня большую частку тэрыторыі Польшчы і выйшла на «лінію Керзана» – прыкладную мяжу рассялення палякаў, з аднаго боку, і украінцаў і беларусаў – з другога, якая была вызначана Парыжскай мірнай канферэнцыяй яшчэ ў 1919 г. Польскі ўрад 16 верасня пакінуў краіну, эмігрыраваўшы ў Румынію, а затым у Лондан. Многія польскія патрыёты, якія засталіся вернымі прысяге, працягвалі змагацца, выконваючы свае вайсковыя абавязкі. Асабліва гераічна змагаліся абаронцы Варшавы, якія толькі 27 верасня капітулявалі. Агульнае становішча польскіх войск аказалася катастрафічным. У другой палове верасня польскай арміі як арганізаванага цэлага ўжо не існавала. Страты польскай арміі былі значнымі. Загінула каля 65 тыс. воінаў, прыкладна 140 тыс. былі параненыя, у германскім палоне апынулася каля 400 тыс. польскіх салдат і афіцэраў, у тым ліку 70 тыс. беларусаў.

У ходзе польскай кампаніі значнымі былі і германскія страты, якія склалі 16,4 тыс. забітымі, 27,6 тыс. параненымі, было знішчана 933 танкі і бронемашыны, 6 046 аўтамабіляў, 360 гармат і мінамётаў, каля 60 самалётаў. Некаторыя аналітыкі лічаць, што вынікі германскіх страт надоўга затрымалі пачатак германскага наступлення на Францыю.

Такім чынам, нападзеннем фашысцкай Германіі на Польшчу 1 верасня 1939 г. пачалася Другая сусветная вайна.