Залдағылар һөйләшеүе үҙ ағышында бара.

Шмультке. Был шыңшыуҙа Россияның тынмаҫ ҡарлы бурандары, ас бүреләр олоуы, бррр... Майор, башлағыҙ мин яратҡанды! Тик киҫәтәм: минең тешкә теймәҫлек башҡарығыҙ.

Вальтер. Сәлих әфәнде, һеҙҙең тауыш көр — йырҙы күтәреп алығыҙ. Тик, абайлағыҙ, яуыз рус әбей батшаһының исемен атамағыҙ!

Расцветали яблони и груши,

Поплыли туманы над рекой.

Сәлих (ҡушыла).

Выходила на берег Катюша...

Шмультке (пистолеттан түшәмгә атып). Ой! Тешем! Вальтер, аспирин! (Бөгөлөп төшә).

Вальтер (Сәлихкә). Әйттем дәһә, яуыз рус әбей батшаһының исемен атамаҫҡа, тип!

Шмультке. Ой! Вальтер, эсем бора!

Вальтер. Генерал, изге секундығыҙ һуҡты!

Тыштағы Ишмырҙа шул арала бауына булат балдаҡ тағылған тәмәке янсығын тәҙрәнән Сәлих тәңгәленә ырғыта.

Ишмырҙа. Булат балдаҡ, бар, тәгәрлә батырыңа!

Тышта тәҙрә янына фашистарҙың ҡарауыл башлығы йүгереп килә, “һенде һоһ!” тип аҡырып, автоматының төйҙәһе менән Ишмырҙаны йыға һуға.

Ҡарауыл башлығы (тәҙрәгә башын тығып аҡыра). Аһтуң! Рус диверсанты! Залға мина ташланы! Радиошнурлы мина! (Ситкә ташланып, ергә ята).

Шмультке (иҙәндәге тәмәке янсығына төртөп күрһәтеп). Радиомина! Вальтер, минең арттан! (Портфелен онотоп ҡалдырып, тышҡа ташлана).

Генерал менән майор, елтерәп сығып, ҡарауыл башлығы эргәһенә йығыла. Сәлих, иҙәндәге “мина”нан күҙен ала алмай, залда баҫып тора.

Сәлих (булат балдаҡ балҡыған янсыҡты алып). Булат балдаҡ! (Балдаҡты, ысҡындырып, бармағына кейә). Ҡайҙан килдең һин миңә, булат балдаҡ?! (Янсыҡҡа сигелгән яҙыуҙы уҡый). “Батырым Ишмырҙама — матурың Сафураңдан”. Их! Үҙебеҙҙең Ишмырҙа, үҙебеҙҙең Сафура!..

Тышта генерал аҡыра.

Шмультке. Вальтер, портфель!

Вальтер (башын ҡалҡытып). Штурмбанфюрер Хәмиди, портфелде сығарығыҙ!

Сәлих портфелде алып, икенсе ҡулында “шнурлы” тәмәке янсығын юғары күтәреп тотоп, яй ғына атлап сыға. Сәғәт секундтары дәһшәтле сылтылдай.

Шмультке. Аһтуң, радиомина!

Вальтер (пистолетын тоҫҡап). Сәлих әфәнде, туҡтағыҙ! (Сәлих туҡтай). Портфелде ергә ҡуйығыҙ! (Сәлих портфелде ҡуя). Радиоминаны ҡапҡа аша алып сығып китегеҙ, марш!

Сәлих. Тыңлайым, майор әфәнде. (Шәп-шәп атлап ҡапҡанан сығып китә. Ул киткән яҡта — шартлау).

Шмультке. Ауыр тупрағы еңел булһын ҡырағайҙың. (Ырғып тороп, портфеленә йәбешә; иҫһеҙ ятҡан Ишмырҙаға тибеп). Ошомо рус диверсанты?

Ҡалғандары ла ырғып тора.

Ҡарауыл башлығы. Эйе, тап үҙе, генерал әфәнде!

Вальтер. Болван, ул бит үҙең ҡуйып киткән часовой.

Ҡарауыл башлығы. Был часовой ул түгел, майор әфәнде, был — рус диверсанты. Күрегеҙ автоматын (алып бирә).

Шмультке (күҙҙәрен алартып). һыу һибеп айнытырға, допросҡа әҙерләргә.

Ҡарауыл башлығы. Үтәйем, генерал әфәнде.(Ишмырҙаны һөйрәкләп маташа).

Вальтер. Болван, ҡайҙа ҡарауыл?

Ҡарауыл башлығы. Ҡарауыл юҡ... майор әфәнде. Мин үҙ сиратымда күҙ элеп алғансы, ҡарауыл юҡҡа сыҡҡан.

Ишмырҙа ҡаты ыңғырашып, тороп ултыра; аяғына ла баҫа.

Шмультке (Ишмырҙа яғына ымлап). Тәүҙә һорарға, унан һуң дарға!

Вальтер. Дарға түгел, генерал, ә ватер-клозетҡа! Бәҙрәф хәшәрәттәренә баштүбән сумып тонсоҡһон.

Шмультке. Был да шәп аҡыл.