Ишмырҙа, Сафура сығып китәләр.

Ғәли (Урал менән Сәлисәгә). һөрһөп бөткән милләтселәр! (Уралға). Улың, халыҡ дошманы булып, 58-се статьяға эләгеүе етмәгән, инде килеп ейәнсәреңдең башын болартаһыңмы? Как ясный день асыҡ миңә! һәм ап-асыҡ булыр ул ОГПУ-ға! Мортазинсы башкиҫәрҙәр! Советтарға ҡаршы баш күтәрергә , яңы ғәскәр йыяһығыҙ?! (Бармаҡ янап). “Булат балдаҡ” йәшерен ойошмаһы...

Сәлисә. Телең ҡороғоро!..

Урал. Тфү, бәдбәхет!

Ғәли. Төштөммө эҙегеҙгә?! Ха-ха-ха! Ләкин... (ҡамыт аяҡтарын ҡайсылатып йөрөнә) ул ҡәҙәре ҡан эскес түгел мин дә, ғәфү итә лә беләмен... Сәлисә туташ хаҡына. Шулай. Эшегеҙҙе ОГПУ-ға еткермәй, шиты-крыты ҡылып ҡалдыра алам... булат балдаҡты үҙемә бирһәгеҙ әгәр.

Сәлисә (ҡуйынынан ҡыҙыл ҡумтаны сығарып). Алһын, тамағы тығылһын ҡоҙғондоң...

Урал. Туҡта, балам... (Ҡыҙыл ҡумтаны кире урынына һалдырта).

Ғәли (зәһәр көлөп, ҡосағын йәйеп). Кил, кил, Сәлисәкәй һылыуҡайым — балдағыңды үҙең менән ҡуша ғына кейергә ризаҡайым!

Сәлисә. Тфү!

Урал. Мөртәт!

Ғәли. Ха-ха-ха! Барыбер минеке булырһың!

Урал менән Сәлисә — бер яҡҡа, Ғәли икенсе тарафҡа олағалар. Һыу буйынан, сейле-бешеле көй Ғәләмәте һыҙғыра-һыҙғыра, Ким менеп килә. Ыҫтан яғынан Сәлисә тауышы.

Сәлисә. Ки-и-им, тим, Ки-и-им! Ҡайҙа олаҡтың?

Ким (шып-туҡтап, саҡ ҡына ҡолаҡ һала ла, ҡуш бармағын ауыҙына ҡабып, әсе һыҙғыра). Бында мин, апайым!

Сәлисә килеп етә, бошонҡо.

Сәлисә. Егеүле атың тора, үҙең юҡ. Тракторҙарға һыу кәрәк. Әллә ҡайҙа эт һуғарып йөрөйһөң.

Ким. Ҡамыт аяҡ вәкил осраны бая...

Сәлисә. Абау, ярамай улай, Ғәли Ғәлич, тип кенә әйт.

Ким. һе! Шул ҡамыт аяҡ миңә, күҙҙәрен май урлап ашаған бесәйҙәй мызылдатып: “Слушай, Значок, бынамын тигән ҡыҙыл һаплы еҙнәй бәкеһе алғың киләме?” — тигән буласы...

Сәлисә. Уф! (Йәшел үләнгә сүгәләп). Ултыр әле, ҡустыҡайым, яндарыма, ял булһын йәндәремә. (Ким дә ултыра, Сәлисә уны яурынынан ҡосаҡлай). Сәлих ағайыңды осратманыңмы?

Ким. Юҡ, осратмайым мин уны.

Сәлисә. Ниңә?

Сәлих. Ҡарттайым асыулана. (Үләнгә салҡан төшә).

Сәлисә (ҡустыһы йәнәшәһендә салҡан һуҙылып). Их! Күрәһеңме Көн сығышы яғындағы анауы яҡты йондоҙҙо?

Ким (ҡыуанып). Күрәм, күрәм! һин дә, тап миндәй, көпә-көндөҙ йондоҙ һанайһың икән, апайым!

Сәлисә. Саҡ ҡошона әүерелеп Күккә осҡан боронғо бәхетһеҙ малай, — ә “Астрономия” дәреслегендәге сағыу Сулпан-йондоҙ ул...

Ким (ырғып тороп, төртөп күрһәтә). Апай-апай, ана тора, йым-йым итеп, Көн байышындағы Күк ситендә Суҡ ҡошо — яҡты Зөһрә-йондоҙ! Ҡарттайым әйтә, ата-әсәһе ҡарғышынан Саҡ, Суҡҡа әйләнгәндәр, мәңге ҡауыша алмаясаҡтар, ти, улар. Күрәһеңме?

Сәлисә. Уф, күрәм... (Тора. Моңайып, Саҡ, Суҡ бәйетен көйләй).

Беребеҙ — уң яҡта, беребеҙ — һул яҡта,

Бергә булаһым килә шул саҡта...

Өйгән кәбәнде елдәр тарата,

Ҡауышам, тигәндә, ҡапыл таң ата...

Ким. Апайым... Ҡарттам әйтә...

Сәлисә (иҫен йыйып). Ярай, ҡустым, эш күп. МТС-ҡа юлланам. Өйгә һуғылыр ҙа әмәл юҡлыҡтан, һиңә бик ҙур бер үтенесем бар ине. Үтәрһеңме?

Ким (пионерҙарса салют биреп). һәр саҡ әҙер, апайым!

Сәлисә (булат балдаҡлы ҡыҙыл ҡумтаны тоттороп). Ошо ғәзиз аманатты,бер кемгә лә күрһәтмәй алып ҡайтып, әсәйем ҡулына тапшыр, түрҙәге һандыҡ төбөнә һалып ҡуйһын.

Ким. Бирнә һандығыңа!

Сәлисә (үҫмерҙең танауына ҡағылып). Салют!

Ким (булат балдаҡлы ҡыҙыл ҡумтаны салбар кеҫәһенә тығып). Салют! (Йүгерә).

Сәлисә (моңайып).

Мәҙрәсәләрҙә китап кәштәһе,

Саҡ менән Суҡтың бейетен ишетәһе... (Йөрәкһеп).

Их Сәлихем, Сәлихем, икебеҙҙең араларҙа ята шул ҡара упҡын!.. (Ике усы араһына башын ҡыҫып, йөрөнә). Ах был ҡәһәрле утыҙ етенсе йыл, утыҙ етенсе йыл... бер-беребеҙҙең баштарын ашауҙар... Атайым менән һинең атайың бер-береһен төрмәгә ултыртмаһа, шәүләләре арбыҙға ҡара упҡын һалмаҫ ине, ҡарттайым да исемеңде ишеткәндән ҡарғана башламаҫ ине... (Иламһырап). Булат балдаҡлы ҡыҙыл ҡумта ла хатта, Саҡ менән Суҡ араһын Ҡояш бүлгәндәй, бер-беребеҙҙән айыра... (Ашығып китеп бара).