Азык-төлек сәнәгате

Тәүлегенә 100 тоннадан артык кондитер эшләнмәләре әзерләүче "Заря" кондитер фабрикасы Россиянең алдынгы предприятияләре рәтенә керә. 1924 елның июнендә оешкан бу предприятие 1993 елда акционерлар җәмгыяте итеп үзгәртелә. Фабрикада үз илебездә җитештерелгән һәм чит илдә эшләнгән заманча җиһазлар файдаланыла. 200 дән артык төрдәге конфет, карамель, печенье, вафли, тортлар, шоколадка төрелгән җиләк-җимешләрне Татарстан халкы гына түгел, күрше регионнар да бик ярата.

Кондитер әйберләрен эшләү өчен китерелгән чимал Россия дәүләт стандарты аккредитацияләгән махсус үзәк лабораториядә контроль уза. Фабрикада маркетинг үсешенә зур игътибар бирелә; конкуренциягә каршы торырлык продукция җитештерүнең күләмен арттыру һәм яңа эшләнмәләр булдыру планлаштырыла.

Республикабызда берничә икмәк заводы халыкка хезмәт күрсәтә. Шулар арасында икенче номерлы завод арыш икмәгеннән алып оригиналь кондитер эшләнмәләренә кадәр сайлау мөмкинлеге тәкъдим итә. 180 ел буена билгеле булган Бородин яулары белән бәйләнешле хуш исле Бородин икмәге дә шушы заводта пешерелә. Бу икмәкне яуда һәлак булган геройларның монастырьдә яшәгән тол хатыннары хөрмәтенә үзенчәлекле тәм бирүче төрле үләннәр кушып эшләгәннәр.

Икмәк заводында камыр әйберләрне эшләү өчен яңа заманча технологияле «Ralot» җиһазлары урнаштырылган. Бу оешмада 500 дән артык кеше эшли.

1937 елдан эшләп килүче "Казан ит комбинаты" ачык акционерлык җәмгыятендә дә продукция заман таләпләренә җавап бирерлек һәм конкуренциягә каршы торырлык итеп җитештерелә. Ислам кануннарына туры килүче хәләл казылык, төрле ярымфабрикатлар, тушенкалар да биредә ясала. Бу комбинат, республикада беренчеләрдән булып менеджмент сыйфаты системасы буенча сертификация үтеп, халыкара базарга чыгу мөмкинлеге алды. Чимал һәм әзер продукция медик-биологик таләпләргә һәм санитар нормаларга тулысынча җавап бирә, алар комбинатның аккредитацияләнгән махсус лабораторияләрендә һәм Дәүләт санитария күзәтчелегендә тикшерү уза. Азык-төлек товарларыннан кала завод техник продукция дә җитештерә: хайваннар өчен коры азык, техник майлар һәм эндокрин-фермент чимал.

С ү з л е к

эшләнмә - изделие

заманча җиһаз - современное

оборудование

күрше - соседний

чимал - сырье

конкуренциягә каршы торырлык - конкурентоспособный

күләм - объем

хезмәт күрсәтү - обслуживание

арыш икмәге - ржаной хлеб

сайлау мөмкинлеге - выбор

тәм - вкус, привкус

ачык акционерлык җәмгыяте - открытое акционерное общество

канун - закон

халыкара базар - международный

рынок

күзәтчелек - надзор

Биремнәр

1. Текстны укыгыз.

2. Сорауларга җавап бирегез.

1) Татарстанда азык-төлек сәнәгатенең торышы нинди?

2) Сез нинди завод-фабрикалар турында беләсез?

3) Азык-төлек сәнәгате дәүләт тарафыннан контрольдә тотыламы?

4) Республикада җитештерелгән продукция конкуренциягә каршы торырлыкмы?

5) Сез кибетләрдә нинди продукция сатып аласыз?