Боротьба кня3ів мстислава удалого I данила романовича проти нападу на галичину угрів I поляків

(1226—1227 рр.)

Мьстислав же, по совете льстивых бояр Галичьких, вда дщерь свою меншую за королевича Андрея, и дасть ему Перемышль. Андрей же послушав лестиваго Семьюнка Чермьнаго, и бежа во Угры и нача воздвизати рать; бывши же зиме, прииде ко Перемышьлю, Юрьеви тогда тысящю удержащю, переда Перемышль и бежа сам ко Мьстиславу. Королеви же ставшю во Звенигороде, и посла вой свои к Галичю, сам бо не сме ехати к Галичю: поведахуть бо ему волхвы Угорьскыя, яко узревшу Галичь не быти ему живу; он же тоя ради вины не смея ити в Галичь, яко веряшеть волхвом. Днестру же наводнившюся, не могоша перейти. Мьстислав же выеха противу с полкы; онем же позоровавшим с, и ехаша Угре во станы своя: бе бо с королемь Пакослав с Ляхы. Оттуду же пойде король ко Теребовлю и взя Теребовль, и пойде к Тихомлю и взя Тихомль: оттуду же приде ко Кремянцю, и бися под Кремянцем, и много Угор избиша и раниша. Тогда же Мьстислав Судислава посла к зяти своему князю Данилу, рекый: “не отступай от мене”; оному же рекиво: “имам правду во сердци своемь”. Оттуду же приде король ко Звенигороду. Выеха же Мьстислав из Галича, Угре же выехаша противу ему со станов Королевых, Мьстислав же бися с ними и победи я: и гнаша по них до станов Королевых, секуще и; тогда же Мартиниша убиша, воеводу королева. Король же смятеся умом, и пойде и(з) земли борзо. Данилови же пришедшу ко Мьстиславу с братом Василком ко Городку, и Глеб с ними, а молвящим им “пойди, княже, на короля, по Лохти ходить”, Судислав же браняшеть ему, бе бо имеяшеть лесть во сердци своемь, не хотяще бо пагубы королеви, имеяше бо в немь надежу велику: беаше бо король изнемоглся. Льстькови же в то время идущу в помощь Данилови же бранящю ему не помогати королеви, оному наипаче хотящю. Данил же и Василко посласта люди своя к брату не дастя ему прити; оттуду же возвратився иде по свою землю: изнемогл бо ся бе ходив на войну. А король Угорьскы иде во Угры. Тогда же угони Изяслав со лестивым Жирославом, идоста с ним Угры. Потом же Судиславу льстящю подо Мьстиславом, рече ему: “княже! дай дщерь свою обрученную за королевича, и да ему Галичь: не можешь бо держати сам, а бояре не хотять тебе” Оному же не хотящю дати королевичю, наипаче хотящю дал Данилови, Глебови же Зеремеевичю и Судиславу претяща ему ж дати Данилови, реста бо ему: “аже даси королевичю, когда вое хощеши можеши ли взяти под ним; даси ли Данилови, в векы н твой будеть Галичь”. Галичаном бо хотящим Данила, оттуду ж послаша в речих, Мьстислав дасть Галичь королевичю Андрееви, а сам взя Понизье; оттуду иде к Торьцкому. Мьстислав же Немому давшу отчину свою князю Данилови, и сына своего поручив Ивана, Ивану уже умершю, и прия Луческ Ярослав, а Черторыеск Пиняне. В лето 6735. Начнемь же сказати бесчисленыя рати, и великыя труды, и частыя войны, и многия крамолы, и частая востания, и многия мятежи, измлада бо не бы има покоя. Седящу же Ярославу в Лучьске, еха Данил в Жидичин кланяться и молитися святому Николе, и зва и Ярослав к Лучьску; и реша ему бояре его: “приими Луческ, зде ими князя их”; оному же отвещавшу, “яко приходих зде молитву створити святому Николе и не могу того створити”, иде в Володимерь. Оттуду же, собравша рать, посласта на нь Андрея, Вячеслава, Гаврила, Ивана; оному же въехавшу, ят бысть с женою своею, ят же бысть Олексою Орешьком: бе бо борз конь под ним, угонив и, и я его до города; и затворишася Лучане. На утрея же приде Данил и Василко, и предашася Лучане; брат же да Висилкови Луческ и Пересопницю, Берестий же ему бе преже дал. Повоеваша Ятвязн около Берестия и угониста и из Володимеря, наехавшима же двеима Мондуничю Шутрови и Стегутови Зебровичю на полк, и убьен бысть Данилом и Вячеславом Шютр, а Стегут убьен бысть Шелвом. Бежащим же Ятвяземь, угони я Данил, Небра язвииетырми ранами, древо же вышибе копье из руку его; Василкови угонившу его, клик бысть велик: “брат ти биется назади”; оному же оставшу, обратися брату на помощь, оному же симь утекшу, а инии разбегошася. Мы же, се оставлеше, на преднее возрратимся. Данил же посла Демьяна ко тести своему, река ему: “не подобаеть Пиняном держати Черторыиска, яко не могу им терпети”. Демьянови же повестящу с ним: “сыну! сгреших не дав тобе Галича, но дав иноплеменьнику, Судислава льстца светом, обольсти бо мя; ажь бог восхочеть, пойдиве на ня, яз всажу Половци, а ты своими, аще бог дасть его нама, ты возми Галичь, а зя Понизье, а бог ти поможеть; а про Черторыеск прав еси”. Демьяну же приехавшу в великую суботу, наутрея же на велик день приехаста Данил и Василько ко Черторыйску, в понеделник на ночь обьседоста град; тогда же и конь Данилов застрелен бысть с города; наутрея же обьехаста град, Мирослав и Демьян рекоста: “яко предал бог враты наша в руку ваю”. Данил же повеле приступити ко граду, и взяша град их и князя их изъ (ъ) имаша. Потом же Мьстислав великый удатный князь умре: жадящю бо ему видити сына своего Данила, Глеб же Зеремеевичь, убежен бысть завистью, не пустяше его, оному же хотящю поручити дом свой и дети в руце его: бе бо имея до него любовь велику во сердце своемь. И потом же пустиста Ярослава и даста ему Перемиль и потомь Межибожие.

Історія України в документах і матеріалах.— Т. 1.—С. 159—160.