Қорғаушы қызметі

Егемен еліміздің мақсаты-құқықтық мемлекет құру. Мемлекеттің тірегі-заң. Заңсыз қоғам болу мүмкін емес. Сондықтан қоғамымызда қорғаушылардың міндеті ерекше. Әрбір қорғаушы Қазақстан Республикасының «Адвокатура туралы» заңы мен басқа заңдары басшылыққа ала жұмыс істейді. Қорғаушылардың мекемелерге, өндіріс орындарына, халыққа көрсететін қызметі үлкен, көмегі зор.

Қорғаушы заң кеңесшісі ретінде мекемелердің, өндіріс орындарының, жеке кәсіпорындардың, акционерлік қоғамдардың басшыларына қабылданған заңдарды түсіндіріп береді. Оларды қалай дұрыс пайдалану жолын көрсетеді. Сондықтан қорғаушы заңның әр саласын толық және жақсы меңгеру керек. Азаматтарға қорғаушы кеңес беріп, тиісті құжаттарды толтыруға көмектеседі.

Тапсырма: Сөйлемдерді талдаңыздар.

1. Республикамыздың қорғаушылары халқымыздың мүддесін қорғайды.

2. Қорғаушы сот процесінде айыпталушыны қорғайды.

3. Әрбір мекеменің өз саласында қорғаушы болады.

4. Жоғары оқу орындарында болашақ қорғаушыларды дайындайды.

5. Қорғаушы өз қызметінде тек заңға жүгінеді.

Тапсырма: Төмендегі қанатты сөздерді қолданып, әңгіме

құрастырыңыздар.

1. Әділет тілесе, атаңнан басып айыбын айт. (М.Әуезов)

2. Не әділ болса, сол мәңгілік (Д.Террари)

3. Мейірімді болу оңай, әділ болу қиын. (В.Гюго)

Тапсырма: Мәтінде айтылған ойға байланысты өз пікірлеріңізді

білдіріңіздер.

Омоним

Тұлғасы, дыбысталуы бір, бірақ мағынасы бір-бірінен алшақ сөздерді омоним дейміз. Мысалы: жаз деген сөздің мына сияқты омонимдік мағыналары бар:

1. Жылдың төрт мезгілінің бірінің атауы.

2. Жазу ісімен байланысты қимыл атауы.

3. Бүктелген нәрсені жаю мағынасында.

4. Адасу, айырылып қалу (көз жазып қалды)

5. Кінә, қателесу мәнінде (мен саған не жаздым?)

6. Аурудан айығу, тәуір болу (ол ауруынан жазылды)

Жаз сөзінің бұл мағыналарының араларында ешбір жақындық жоқ.

Бұлар-жаз сөзінің көп мағыналығы емес, омонимдік мағыналары. Көп мағыналы сөздер әр түрлі заттың атауы болғанмен, олардың арасында қандай да жақындық, ұқсастық болады, ал омоним сөздер арасында ондай мағыналық жақындық, ұқсастық болмайды. Бас деген сөздің көп мағыналығы мен омонимдік мағынасын былайша салыстыруға болады.

Көп мағыналық Омоним

Адамның басы Адамның басы

Таудың басы Аяғыңды жылдам бас

Судың басы Көрікті бас

Тапсырма: Мына сөздердің омонимдік мағыналарын анықтап, түсінік беріңіздер. Сөйлем құрастырыңыздар.

Ана, ара, ас, асық, бақ, без, бу, бар, ер, ерін, ес, ет, жат, жең, көш, күл, мақта, мін, нан, сана.

Даналық ойдан дән ізде

1. Ірі табыс алдын ала қарастырылып, жете ойластырылған ұсақ-түйектерден тұрады. (В.О.Ключевский)

2. Қай істің болсын өнуіне үш түрлі шарт бар. Ең әуелі ниет керек, одан соң күш керек, одан соң тәртіп керек. (М.Әуезов)

3. Табысты-адамның өмірінде қолы жеткен жағдаймен емес, табысқа жетудегі жеңген кедергілермен өлшеу ләзім. (Б.Вашингтон)

Сабақ №11. Лексикалық тақырып:Қазақстан-дүниежүзілік қауымдастықта

Грамматикалық тақырып:Cиноним

Тапсырма:Мәтінді оқып,аударыңыздар.

Әлем елдерімен терезесі тең

Тәуелсіздіктің бір белгісі-еліміздің дүние жүзіндегі басқа мемлекеттер тарапынан танылуы болса керек.Осыған орай, еліміздің сыртқы саясатын белгілейтін Қазақстан дипломатиясы ойдағыдай дамып,ол біздің мемлекеттің әлемдік қауымдастықтан өзінің лайықты орын алуына жақсы қызмет етті.

Тәуелсіз жас мемлекетіміз 1992 жылы 2 наурыз күні Біріккен Ұлттар Ұйымына мүше болып қабылданды.Республикамыздың көк байрағы әлем елдері туларының қатарына қадалды.Ел өмірінде жаңа кезең басталды.Қазақстан Республикасы өзінің тәуелсіздігін одан бұрынырақ жарияласа да,егеменді ел ретінде танылды.Әлемдік мемлекеттер қауымдастығы қатарына қосылу елдік еңсені көтеріп қана қоймай,қарым-қатынастың жаңа арнасын ашты.1992-1993 жылдары іс жүзінде әлемнің 100 елімен дипломатиялық қатынас орнатылды,ал тәуелсіз даму жылдарындағы қатынас орнатқан елдеріміздің жалпы саны 121 болды.Бүгінде Қазақстанның БҰҰ(Біріккен Ұлттар Ұйымы),ЮНЕСКО(БҰҰ-ның білім ғылым және мәдениет жөніндегі ұйымы),ЕҚЫУ(Еуропадағы қауіпсіздік және ынтымақтастық жөніндегі ұйым) секілді 64 халықаралық ұйымда өкілдігі бар.

Біздің еліміз басқа елдермен терезесін теңестіріп,тарихи дамудың жаңа бір арнасына түсті.Ол енді әлемдік мәселелерді шешуге араласады.

Қазақстан Республикасы өз болашағын әлемдік мемлекеттер қауымдастығына тығыз байланыстан көреді.Сол қауымдастықпен тығыз байланыс тәуелсіздігіміздің де, экономикалық, әлеуметтік дамуының да басты кепілдерінің бірі.Тәуелсіздіктің,дербестіктің еркін самалымен тыныстаған елдің орны қашанда сол өз теңдестерінің қатарында.

(«Егемен Қазақстан»)

Тапсырма:Төменде берілген сөз тіркестерін қатыстырып,сөйлемдер ойлап жазыңыздар.

Терезесі тең,еңсені көтеру,әлемдік қауымдастық,сыртқы саясат,егеменді ел,тәуелсіздіктің белгісі,лайықты орын алу,мүше болып қабылдану,көк байрақ,шын мәнінде,қарым-қатынастың жаңа арнасы,өтпелі кезең,іс жүзінде тәуелсіз даму жылдары,басты кепіл,тығыз байланыс.

Тапсырма:Сұрақтар төңерегінде пікір алысыңыздар.

1. «Тәуелсіздіктің белгісі» дегенді қалай түсінесіздер?

2. Тәуелсіз егеменді ел болу үшін қандай шарттар қажет деп санайсыздар?

3. Сізді қазір қандай әлемдік мәселелер толғандырады? Оларды шешудің қандай жолдарын ұсынасыз?