Агульнадыдактычныя патрабаванні да афармлення канспектаў заліковых урокаў

1. Прадмет, тэма, тып урока.

2. Мэты ўрока: навучальная, развіццёвая, выхаваўчая.

3. Абсталяванне ўрока і афармленне класнай дошкі.

4. План (структура) урока з указаннем прыблізнага размеркавання часу на кожны структурны кампанент урока.

5. Ход урока.

Выдзяляецца назва кожнага пункта плана і падрабязна раскрываецца яго змест: прыёмы правядзення арганізацыйнага моманту, метады і прыёмы асноўнай часткі ўрока, пытанні да вучняў, наглядныя дапаможнікі, формы арганізацыі дзейнасці дзяцей і кантролю выканання заданняў.

Пасля правядзення заліковага ўрока праводзіцца яго вусны падрабязны аналіз (самім практыкантам, настаўнікам, кіраўніком практыкі ад кафедры, студэнтамі падгрупы).Настаўнік і кіраўнік практыкі ад кафедры ацэньваюць урок у балах. Калі ўрок ацэньваецца не на 9 ‑ 10, настаўнік або кіраўнік практыкі ад кафедры ў кароткім запісе пасля канспекта ўрока ўказваюць яго асноўныя недахопы, адлюстроўваюць узровень валодання студэнтам педагагічнымі ведамі, уменнямі і навыкамі – веданне падручнікаў і праграм, валоданне асноўнымі метадамі, прыёмамі, сродкамі навучання, формы арганізацыі дзейнасці вучняў на ўроку, валоданне класам, агульная педагагічная культура, арганізацыйная зладжанасць урока.

Абавязкі студэнта-практыканта

Студэнт-практыкант абавязаны:

• працаваць у школе штодзённа не менш за 6 гадзін;

• штодзённа наведваць урокі і ўдзельнічаць у іх абмеркаванні;

• весці дзённік практыкі;

• падрыхтаваць і правесці пробныя і заліковыя урокі па беларускай мове або літаратуры (колькасць урокаў рэгламентуецца праграмай практыкі);

• падрыхтаваць і правесці пазакласнае выхаваўчае мерапрыемства па прадмеце;

• наведваць урокі студэнтаў-практыкантаў і ўдзельнічаць у іх абмеркаванні;

• удзельнічаць у выхаваўчых мерапрыемствах класа;

• выконваць усе заданні, прадугледжаныя праграмай практыкі;

• выконваць распараджэнні адміністрацыі школы і непасрэднага кіраўніка практыкі;

• падпарадкоўвацца правілам унутранага распарадку школы;

• удзельнічаць у курсавых сходах па арганізацыйна-метадычных пытаннях педагагічнай практыкі;

• своечасова аформіць і прадставіць справаздачную дакумендацыю кіраўніку практыкі ад кафедры.

Аавязкі кіраўніка практыкі ад кафедры

Кіраўнік практыкі ад кафедры ўдзельнічае ў курсавых сходах па арганізацыйна-метадычных пытаннях педагагічнай практыкі, размяркоўвае студэнтаў па класах, прысутнічае на ўроках, вучыць студэнтаў назіраць і фіксаваць розныя аспекты педагагічнай дзейнасці настаўніка, аналізуе наведаныя ўрокі настаўніка, правярае і зацвярджае планы-канспекты пробных і заліковага ўрокаў, аказвае дапамогу студэнтам пры падрыхтоўцы да пробных і заліковага ўрокаў.

Кіраўнік практыкі ад кафедры правярае педагагічныя дзённікі, знаёміцца з водзывамі настаўнікаў аб праходжанні практыкі студэнтамі, выстаўляе студэнтам дыферэнцыраваны залік па практыцы, здае кіраўніку практыкі ад факультэта справаздачу аб выніках практыкі.