Abulqasim Otepbergenov - Tanlamali shigarmalar 3
.pdfHaram-qarıshlardı jıynap, Tekte hámeldardı sıylap, Ózińdi arzanǵa satpa.
Kewilde gina, jamanlıq, Bolmasın hám qolı tarlıq, Tileseń bárhá amanlıq, Ózińdi arzanǵa satpa.
«Arzanǵa satpa»-nıń mánisi, Insannıń kópdur kemisi, Bolmasın námárttiń isi, Ózińdi arzanǵa satpa.
Alha-al arpalıs maydan, Múnkir qorıqpas Qudaydan, Jıraq bol ǵayrı bir oydan, Ózińdi arzanǵa satpa.
Eltiri tonnıń jaǵası, Kewil kewildiń qalası, Insannıń bolmas bahası, Ózińdi arzanǵa satpa.
Mánsapdarlardı sıylayıp, Ózińdi ábden qıynayıp, Haramnan dúnya jıynayıp, Ózińdi arzanǵa satpa.
Kúniń ushın jaltaqlayıp, Ózgeni sırtınan sayıp, Júrgeniń gúnadur, ayıp, Ózińdi arzanǵa satpa.
Húr basıńdı tómen alma, Námárt, nákeslerden bolma, Jábirdi kóp etip janǵa, Ózińdi arzanǵa satpa.
151
Isiń erdiń isi bolsın, Onnan ózge lázzet alsın, Keynińde jaqsı at qalsın, Ózińdi arzanǵa satpa.
Waqtan qunlı ne zat bar
Waqıt degen jániwar, Hár demine mıń tuwar, Berseńdaǵı keynine, Qayırılmay juwırar.
Hesh kim menen tirespey, Jıǵar hátte gúrespey, Hesh bir júyrik jetalmas, Qalar keyin ilespey.
«Alǵa, alǵa, alǵa!»-dep, Jábir jasap janǵa tek, Tawdan tómen qulaǵan, Seldey barar jalmap, jep.
Biyigińe, oyıńa,
Izzetińe, sıyıńa,
Qaramayın baradı,
Aza menen toyıńa.
Qıymılında ep barma? Mánzilinde shek barma? Barar júzin búrmesten, Kókirekte kek barma.
Ishte dártiń qozǵaydı, Tozdıradı, tozbaydı, Jalınsańda, albarıp, Qolın hárgiz sozbaydı.
08.11.2008-jıl.
152
Qayırılıpta baqpastan, Órter otın jaqpastan, Aldırmaydı, aladı, Miyrim degen yoq haslan.
Árwaqların shaqırıp, Arıslanday axırıp, Barar hár bir qádemde, Keń álemdi tar qılıp.
«Meniń isim háreket, Sizde bolsın bereket, Esapsız bir nárse joq,
Alǵan demiń ǵániymet!».
Deyip waqıt zarlaydı,
Jalın bolıp parlaydı,
Qam sút emgen bende bir,
Parqına hesh barmaydı.
Jalınıpta otırmas, Jalt-jult etken bir almas, «Qádirimidi bilmegen,
Deydi-máńkúr bir topas!».
Barlıq nárse tabılar, Kemis-qutıq jabılar, Tabılmas hám qol jetpes, Waqıttan qunlı ne zat bar?
Aspannıń óresimen dep oylama
19.11.2008-jıl.
Táp berdiń-aw, kóringenge baqırıp, Aspannıń eresimen dep oylama. Júrdiń eshek yańlı qattı aqırıp, Aspannıń ereimen dep oylama.
Dúnyanıń keynine kim qashan, shıqtı,
Aspan óresiz-aq turadı mıqlı,
153
Bunı birew bilmey, birewler uqtı, Aspannıń óresimen dep oylama.
Anań mánsap ushın tuwǵandayın tap, Jámietten aǵla boldı jeke máp, Búginligi mine bolıp tursań sap, Aspannıń óresimen dep oylama.
Patshaday tutımdı tutıp otırdıń, Taza bolǵan jili yańlı qutırdıń, Kópke jábir islep keyin utıldıń, Aspannıń óresimen dep oylama.
Allada burınnan qatań esap bar, Alasa tawlardıń basındaǵı qar, Bolsańdaǵı júk qaldırmas qara nar, Aspannıń óresimen dep oylama.
Aldıńa ózińniń xızmetkerińdi, Kirgizbediń, kózge jin bop kórindi, Sonnan-aq, kimligiń bizge bilindi, Aspannıń óresimen dep oylama.
Lawazımnan túspesteyin sezindiń, Umıttıń-aw bendeligiń ózińniń, «Há»-dewge barmastan mushıń gózendiń, Aspannıń óresimen dep oylama.
Tártip-intizamnıń ketkeni qashshan, Ahmaq xızmetkeriń mańlaydan atqan, Bul sır ashlmay jıl boyı jatqan, Aspannıń óresimen dep oylama.
Kúshli bolsań nege bilmeyseń sonı, Dalada baqırıp júripseń qurı, Diktator tek ǵana jámáát sorı, Aspannıń óresimen dep oylama.
154
Qaramadıń úlken menen kishige,
Isendiń tek lawazımlı isińe,
Bul kúnleriń enbedi hesh túsińe,
Aspannıń óresimen dep oylama.
Zulqarnaydan ullı jáhángir yoqdur,
Saqıpquran dálwet, mártebe baqdur,
Muxammed tiregibir qádir haqdur,
Aspannıń óresimen dep oylama.
Al sen bolsań Qudayıńdı bilmediń,
Birden alıp, birge berip órlediń,
Keyni ne boların oylap kórmediń,
Aspannıń óresimen dep oylama.
Banapart sawatlı, saldamlı bolǵan,
Kúsh penen Evropa yarımın alǵan,
Keyninde oldaǵı ońbayın qalǵan,
Aspannıń óresimen dep oylama.
Sen Nopolenıń qasında kimseń,
Temur tırnaǵına turmaysań bilseń,
Jer menen tep-tegis bolasań ólseń,
Aspannıń óresimen dep oylama.
Qırq jıl jarlılıq joq, qırq jıl baylıq,
Búginligi qaldıń qattı mayrılıp,
Menmen alar keyin usınday sıylıq,
Aspannıń óresimen dep oylama.
Jas alpıstan ótken soń
12-11-2008-jıl.
Jas alpıstan ótkennen soń, al endi, Qıyanqılıq etip búldirme eldi. Usı waqqa deyin qılǵan qılwalar, Zaw-zadıńa bir ómirge jetedi.
«Áwele iymanlı, áwel iymansız!».
155
Táwellege turmas qandayın jansız,
Tırnaqtıń astınan kir izlep bárhá,
Qay jerde daw bolsa sol jerde barsız.
Taqır jerden shań shıǵarıp atırsań,
Saǵalday saq, bayıwlıday baqılsań,
Oyqan salıp bolıp kóziń máshsheyip,
Hesh nárse bolmaǵan yańlı otırsań.
Ne jetpeydi bes kúnlik bul yalǵanda,
Tórińizden góriń juwıq qalǵanda,
Iyt minez, pitpegir degen peylińnen,
Jek kóredi hátte bala-shaǵańda.
Kiydirmeseń, ishtirmeseń ballarǵa,
Hayal sorlı esheyin bir jılarma,
Górge alıp keteseńbe jıyǵanıń,
Górde óziń jem bolasań marlarǵa.1
1.-Mar-Jılan.
Bir nárse dew sizge bizlerge uyat,
Keshirgil sóz bolsa aytılǵan zıyat,
Hárkimniń peyline qaray beredi,
Qayt raydan, kórmesińnen káramat.
Den sawlıq tabılmas izleseń emge,
Shúkirlik áylegil hár alǵan demge,
Insapqa kelmeseń, muǵallaq atıp,
Qarunday tep-tegis bolasań demde.2.
2.Qarun-Apsanawiy bay, sıqmarlıǵınan mal-janı menen jer jutqan.
Qanday káramattıń barın bilmediń,
Shayır aytar kewli sezgen,kórgenin,
Sendey sıqmar, teris qaytqan al endi,
Kórmedim hesh qashan ońıp júrgenin.
156
Jaqsılıq kelmese jamanlıq etpe, Qudayıń umıtıp, asqınlap ketpe, Bes kúnlik dúnyanıń yarımnan kóbi, Ketip bolǵan waqta iymansız ótpe.
Jańa jıl tilekleri
- - -jıl.
Assalam jańa jıl, jańa dáwirim, Elge qut bereket, dáwlet bolıp kel. Estirip báhárdiń jıllı sáwirin, Qádemiń keń taslap, tolıp-tasıp kel.
Ótip baratırǵan jıl boldı qanday, Qádirli-qásterli teberik nanday, Aylawǵa qosılǵan tulpar, ǵunnanday, Báygini ayırıp, ara ashıp kel.
Qaraqalpaq ushın eki mıń segiz, Mártilktiń, erliktiń úlgisi deńiz, Tabıslar tasqınlap, shadlıqlar egiz, Bolsın deseń Ámiw bolıp tasıp kel.
Suwsızlıq dártleri umıt bop ketsin, Ǵawasha gúllenip, daqıllar pitsin, Suwlar náwpir bolıp Aralǵa tússin, Quwanısh-shadlıqta shaǵlap yoshıp kel.
Bárkámal áwlatlar bolıp birinshi, Duyım-jurt quwanısh, alıp súyinshi, «Universiyada»-ǵa berip sen enshi, «Úmit ushqınları»-bolıp janıp kel.
Suwsızlıq jábirin kórmesin deseń, Qádem qutlı bolıp, órlesin deseń, Ámiwdiń ayaǵı gúllesin deseń, Pamirden biz ushın payıń alıp kel.
Aspan ashıq bolsın, buyǵubar bolsın,
157
Kewiller kewilge intizar bolsın, Elge Yaratqannıń ózi yar bolsın, Deyip jaqsı niet, baxıt bolıp kel.
Hár bir qádemińde tulpar shabısın, Kóreyik mártlerdiń, arı-namısın, Jeriw-kókke sıymay tursın tabısıń, Shómishti-qazandı mayǵa malıp kel.
Ótkenlerge, ketkenlerge salawat, Joq bolsın urıslar, tartıs, málamat, Tınıshlıqqa kelmes hesh bir káramat, Jer-kókke tınıshlıq tuwın alıp kel.
Sonday bir jıl bolsın este qalarlıq, Awıl-el aymaqlar bolsın amanlıq, Ámiw suwın bermey etpesin tarlıq, Kókte quyash bolıp, shuǵla shashıp kel.
Ǵawasha meylinshe tolsın suwlarǵa, Jaylaw tolıp ketsin qozı-qoylarǵa, Kóller mákán bolıp úyrek-quwlarǵa, Qısıń qarlı, báhár náwpir bolıp kel.
Ashılmaǵan jańalıqlar ashılsın, Tarıyx altın háriplerde basılsın, Hár bir kúniń tabıs bolıp qosılsın, Elge qut-bereket, dáwlet bolıp kel.
158