1Ветицясь:
Финно-угратне 4000 иеде икеле таго явсть угрань ды финно-пермань пельксэв.Угратнень эйстэ лиссть: хантытне(22000), манситне (14 млн.),конат ней эрить Ханты-Мансийской, Ямало-Ненецкой автономной округтнэсэ ды венгратне (14 млн.), конат эрить Венгриясо.
Шкань ютазь финно-пермань раськесь явовсь пермань, саамонь ды Рав чирень финнэнь раськев.
Пермань раськестэ мейле лиссть комитне (300 000), удмуртнэ (700000). Мейле явовсь саамской келесь.
Те кельсэнть кортыця ломантне эрить Кольской полуостровсо, Норвегиясо, Швециясо ды Финляндиясо.
2 Ветицясь:
А 2500 иеде седе икеле Рав чирень финнтнэ явовсть Рав чирень ды Балтиень раськев.
Рав чирень кельтне – эрзянь, мокшонь ды мариень.
Балтиянь раськестэ лиссть суомитне (финтнэ – 5млн.), конат ней эрить Финляндиясо, эстонецтнэ (1,5 млн.) – эрить Эстониясо, карелтнэ ((124000- эрить Россиясо, 40000 – Финляндиясо), ижортнэ (820 000), водтнэ (100 ломанть – эрить Ленинградской областьсэ), вепстнэ (16000 эрить Карелиясо, Ленинградской, Волгоградской областнесэ), ливтнэ (400000 эрить Латвиясо).
Эйкакшт, вана те «Раськень чувтонть» вельде минь мартонк ванынек, кодамо кувака ки ютась минек эрзянь келесь, зярс сон пачкодсь те шкас, кодат теевсть полавтовкст сонзэ марто.
1Ветицясь:
Пек умок, 2500 иеде икеле эрзятне ды мокшотне, кода арсить учёнойтне, ульнесть ве кельсэ кортыцякс, конантень ней мерить общемордовской кель. Но 8-це пингенть эйстэ саезь кезэрень келентень кармасть совамо лия раськень валт. Тенень лездасть шабра раськетнень марто вастневематне, монголо-татартнэнь самось. Кезэрень келесь полавтовсь, истя раштасть башка кельть: эрзянь ды мокшонь.
2 ловныцясь:
Россиясо, ансяк Россиясо,
Гайгезь гайги тиринь эрзянь келесь,
Сонзэ эйсэ кортат – ёжось касы,
Сонзэ эйсэ морат – ливти мелесь!
1Ветицясь:
Эрзянь келесь панжизе тенек умонь кезэрень шкатнес кенкшенть, сон сюлминзе сеть шкатнень неенсенть марто.
1 ловныцясь:
Монь эрзянь кель…
Тонь эйсэ ловсонь чине,
Моданть лембезэ,
Васенце эскельксэсь,
Яксинь,
Тонь валтнэнь свежа коштто лексезь,
Яксинь тиринь яннэва
Мон вишкине.
«Авай» - те валонть марто
Кедень венстнинь.
«Тетяй» - пижнинь,
Теке валонть танстензэ,
Лембензэ, валдочинзэ ды виензэ
Варчнинь кельбрясо.
Мон эрьвантень кецтнинь.
А вейке кель мон марсинь –
Эрьва кодат,
Но эрзянь кельде седе ванькс
А содан.
Александр Арапов.
2 ловныцясь:
Мазый, паро минек келесь,
Теке тундонь сэтьме валскесь,
Пургондыця од килеесь,
Цветэнь панжиця умарьксэсь.
Мазый, прок пурьгине чирькесь,
Маней шкане чинь налксемась,
Лей чиресэ цяпор тикшесь
Ды инзеень якстердемась.
Мазый, прок цёковонь морось,
Норовжорчонь чоледемась,
Ды виев сон, теке толось,
Теке пурьгинень зэрнемась.
Емельян Пятаев.
1 ловныцясь:
СЁЛМОВ ГАЙТТЬ.
Эрзянь кель, тиринь кель –
Валдо чи тон, шожда пель.
Валонь рисьметь, оймень гайтть…
Вай, зяро ёмавтыть валт:
Толкун, чахра, сирть, локсей,
Пурька, индере, селей.
Теке сёлмовт, мазый валтнэ
Чевгель, човаля, сэней…
Ды смустне сюлмазь коданя:
Кирине – кирькске – кирьксала…
Вельмевтьсынек стувтозь валтнэнь,
Раськень келень човалятнень.
Эх, кода ванськады келесь!
Кортазеви эрзянь велесь:
Байге, пусмо, тувонар,
Каштаз, пусмо, тюшоньбар…
Нина Кипайкина.