СЦЕНАРИЙ ПРАЗДНИКА
НА ЭРЗЯНСКОМ ЯЗЫКЕ
ДЛЯ УЧАЩИХСЯ НАЧАЛЬНЫХ КЛАССОВ
Оформление сцены: портрет А.П.Рябова; эрзянский орнамент; вышитое полотенце; хлеб-мёд; выставка эрзянской вышивки; выставка книг; выставка фотографий детей в эрзянских костюмах.
1 ветицясь:
Покшчинть панжсынек Серафима Марковна Люлякинань «Эрзянь кель» моросонть. Морадо, ялгат, весе мартонок!
"ЭРЗЯНЬ КЕЛЬ"
1. Монь чачтымим эрзянь ава,
Эрзянь масторсо касынь.
Эрзякс кортамо баславазь
Весе пингем, весе чинь.
МОРОЮТКОСЬ:
Эрзянь кель! Эрзянь кель!
Ашо килей, чуди лей,
Чольдердиця горнипов,
Гайсэ морыця цёков.
2. Эрзянь келесь эсь койсэнзэ
Мазый, эрявикс, питней.
Илядо стувто эйсэнзэ,
Путодо тензэ седей.
МОРОЮТКОСЬ:
3.Тиринь мастор! Вечкень велем!
Седеем кецтни тонь кис.
Пек мон вечкса эрзянь келем,
А стувтса меельце чис.
МОРОЮТКОСЬ:
1 Ветицясь:
Мазый, паро минек келесь,
Теке тундонь сэтьме валскесь,
Пургондыця од килеесь,
Цветэнь панжиця умарьксэсь.
Е.Пятаев
2 Ветицясь:
Зярос гайги эрзянь валось –
Семс монгак эрян,
Ялгатненень – шабратненень
«Шумбрачи» мерян.
Чачи келем кулындеряй,
Мерть – монгак кулан.
Сонтемензэ мон а эрян:
Мезекс маштован?
А. Лежиков
1 ветицясь:Вечкевикс ялгат, инжеть, эйкакшт, тонавтыцят ды сынст малавиксэст!
Комсь иеде ламоксть минек школасо ютавтови Эрзянь келень чись, кона ушодовкшнось 1994 иень чадыковонь 16 - це чистэ – Анатолий Павлович Рябовонь, эрзянь учёноенть ды васенце профессоронть 100 иень юбилеень чистэнзэ.
2 Ветицясь:
Вечкевикс ялгат! Ёвтнетяно тенк аламнешка те ине ломанденть.
Анатолий Павлович чачсь вейке тёжа кавксосядт вейксэньгемень нилеце иень (1894) чадыковонь 16-це чистэ Ицялбуень Ламбаськесэ сокиень кудосо. Тетязо бажась кастамс цёрастонзо священник. Ушодома школанть прядомадо мейле цёрыненть аравтызь тонавтнеме Починкань духовной училищав, теде мейле кучизь духовной семинарияв Нижнеев. Цёрыненть арасель мелезэ улемс священникекс. 1912 иестэ тетязо кулось. Анатолий кадызе семинариянть ды тусь тонавтнеме Нежин ошонь (Украина) институтов филологиянь факультетс. Прядызе 1917 иестэ.
1 Ветицясь:
1917 -1922 иетнестэ сон тонавты Омск ошсо, теде мейле кавто иеть важоди Нижнейсэ. 1924 иестэ тердезель Московов РСФСР-нь Наркомпросонь методистэкс. Тесэ сон лия учёнойтнень марто вейсэ ютавты эрзянь тонавтыцянь зярыя промкст, семинарт.
1930-це иестэ саезь сон эри ды важоди Сарансо: вети эрзянь кель агропединститутсо. 1934 – эрзянь ды мокшонь келень кафедрань прявт.
Ютавтсь кельтнень коряс зярыя конференцият(1933,1934,1935 иетнестэ). 1934 иестэ сонензэ максозель профессоронь лемесь. Ды те ульнесь алкуксонь профессор: сон содась 7 кельть! Газетань ламо статьятнеде башка, сонзэ весемеде содавикс важодевксэнзэ: «Эрзянь-рузонь валкс»(М., 1933), «Рузонь-эрзянь валкс» (М.,1931), «Эрзянь келень грамматика -1 пелькс. Морфология» (М.,1933), «Уроки эрзянского языка» (Саранск,1931) ды ламо лият. Покш путовкс тейсь А.П.Рябов литературань келень теемантень.
2 Ветицясь:
1937-це иестэ арестовизь, чумондызь «национализмасо», пек нарьгасть лангсонзо, натой ливтизь превстэ,
Ды 1938-це Владимир ялаксонзо марто вейсэ ледизь. Козонь калмазь, кияк а соды.
Рябовтнэнь чавизь. Но сынст валдо эрямост, сынст оймест эзть ёма.
1 Ветицясь:
Келесь – эрьва раськень питнейдеяк питней сюпавчи.
Кить минь? Косто саевинек тиринь моданть лангс? Мезесь сюлми минек финнтнэнь, венгратнень, эстонецтнэнь марто?
Неть кевкстематне панжовить истя.
Зярдо-бути кезэрень шкатнестэ арасельть а эрзят, а мокшот, а финт… Весе финно-угрань раськетне ульнесть вейке кельсэ кортыця ломанекс, конат лемдязельть уралонь раськекс. Эрясь те раськенсь 6000 иеде седе умок Уралонь пандтнэнь ды Обь леенть ютксо.
Мейле те вейке келесь кармась явовомо зярыя кельс. Те ульнесь 5000 иеде седе умок. Явомась мольсь стамбарнэ, ламо пингень перть.
2 Ветицясь:
Бути минь вансынек «Раськень чувтонть», васняяк уралонь раськесь явовсь кавтов: финно-угрань ды самодинь раськев.
Самодинь раськестэ мейле лиссть ненецтнэ (34000 ломанть),
Нганасантнэ (1200 ломанть), селькуптнэ (35000), энецтнэ (200). Неть кельтнесэ кортыця ломантне эрить ансяк Россиясо: Архангельской, Тюменской областнесэ, Красноярской крайсэ. Финно-угратнестэ лиссть суомитне(финнтнэ), мадьяртнэ (венгратне),эстонтнэ ды лия раськень ломантне, конат срадсть Равсто саезь Балтиянть видьс.