748*. Куэн тӱҥжат шӱйшашлык да,

Куэн парчажат шӱйшашлык.

Тиде капем-кылемже да

Йошкар рокеш шӱйшашлык.

Муралталын-шӱшкалталын

Эртыш рвезе ӱмырем.

Ынде кызыт мыйым таче

Ужаталын колтеда.

Мыланем йӱашат шерге огыл да,

Мыланем кочкашат шерге огыл.

Ой, пеш шерге, шергын шога

Тендан поро кумылда.

У березы и комель должен сгнить,

И ветви берёзы должны сгнить.

Моё это тело, когда я умру,

Должно в красной земле сгнить.

В песнях и свисте

Прошла моя молодость.

Теперь вот сегодня меня

Вы провожаете.

Мне и пить не дорого,

Мне и есть не дорого.

Ой, очень дорого, дорого стоит

Ваше доброе расположение.

749*. Мыйже колен колталам гын,

Ладыра ломбым шындыза.

Ладыра ломбын лышташыж ден

Мыйын мурем лӱҥгыза.

Кунам весела? - Тунам весела, -

Олыкышто шудо годым.

Олыкышто шудо годым, курык ӱмбал мӧрӧ годым,

Ош тӱняште пырля годым.

Ой, чеверын, чеверын да,

Эшеат ик гана чеверын.

Кугечылан, Семыклан ме толна да,

Петро ден Илинлан те мийыза!

Когда я умру,

Развесистую черёмуху посадите.

На листе той черёмухи

Насвистывайте мою песню.

Когда весело? - Весело тогда,

Когда время сенокоса.

Во время сенокоса, когда зреет клубника на холмах,

Когда мы вместе на белом свете.

Ох, до свиданья, прощайте,

Ещё раз прощайте.

Мы придём на Пасху и в Семик,

А вы приходите в Петров и Ильин день!

Шӱгарла ыресыште улшо солыкышто возымо муро.

Песня на полотенце, висящем на надмогильном кресте.

750. Ӱдыр-каче, пошкудо-шамыч,

Мыйым ужаташ погыныза.

Ош солыкеш мурем кодеш,

Тудым кажныже лудса.

Ош тӱня гыч мые кайышым,

Те чыланат кодыда.

Тендан дене мутланен ом керт,

Ойлышашем мурем каласа.

Тиде сакыме мур солыкем

Мардеж дене лойгалтеш.

Мыйын рвезе кап-кылемже

Шем рокешет уралтеш.

Уралтеш да кодалеш -

Ырес меҥге шогалталеш.

Только жал пеш:

Ош тӱняште илымем шуэш.

Авай, эргыч кайыш вет,

Армийыш огыл - вес тӱняш.

Армийыш кает гын, пӧртыл толат,

Рок йымаке пурымеке, тушак шӱят.

Уремыштат, пашаштат

Огыда уж тетла мыйым нигуштат.

Ужыда гын, ужыда омешда,

Кечывалым шонен коштмыланда.

Мыйын колышо кап-кылемжым

Урем мучко нумал лекса.

Пелендаже тетла ом лий,

Ида мондо - шарныза.

Чеверын, суртем, чеверын, ялем,

Чеверын, рвезе ӱмырем.

Чеверын, ешем, йолташ-шамычем,

Чеверын, пошкудо-шамычем!

Девушки и парни, соседи,

Проводить меня собирайтесь.

На белом полотенце остаётся моя песня,

Все её читайте.

С белым светом я простился,

Вы же все остаётесь.

С вами общаться я не могу,

Обо всём расскажет моя песня.

Это висящее полотенце с песней

Колышется на ветру.

Мое молодое тело

Засыплют чёрной землёй.

Засыплют и оставят,

Поставив крест.

Только жаль:

Хотелось пожить на белом свете.

Мамочка, сын твой ушёл,

Не в армию - на тот свет.

Пойдёшь в армию - вернёшься,

А попав под землю, там и сгниёшь.

Ни на улице, ни на работе,

Теперь нигде меня не увидите.

Если и увидите, то лишь во сне,

Думая обо мне днём.

Мое мёртвое тело

Понесите по улице.

С вами теперь меня не будет,

Не забывайте - помните.

Прощай, мой дом, прощай, деревня,

Прощай, моя молодость.

Прощайте, семья, друзья,

Прощайте, мои соседа!

РЕКРУТ МУРО-ВЛАК. РЕКРУТСКИЕ ПЕСНИ.

Рекрут-влак мурат. Поют рекруты.