494*. Изиракат капем уло да,

Кугуракат йӱкем уло.

Ӱлычын кӱшкӧ йоҥыжалтеш да,

Мален кийыше йолташем помыжалтеш.

Мемнан толмыланат ида сыре да,

Мемнан кайымыланат ида сыре.

Ӱстембалне чевер чесдам

Пытарен каялаш толын онал.

Куку муренат толын онал да,

Шӱшпык шӱшкенат толын онал.

Ик гана, кок гана уверым колтен улына,

Садлан верчын толын улына.

У меня невысокий рост,

Но громкий голос.

Раздаётся снизу вверх,

Мой спящий друг просыпается.

Нашему приезду не злитесь,

И нашему уходу не сердитесь.

Ваши вкусные угощения на столе

До конца съесть мы не пришли.

Под пение кукушки не пришли мы,

И под свист соловья мы не пришли.

Один раз, второй раз послали вы весть,

Поэтому мы пришли.

495*. Олыкышко воленам, пеледышым погенам,

Пеледышын пеледмыжым вучен иленам.

Эре тыйым шоненам, омешемат ужынам,

Лӱмынак унала толынам.

Эре тиде тувыржым чия манын ида ман, -

Йӧраталме тувыремжат тидак веле.

Эре тиде ялышке толеш манын ида ман, -

Йӧраталме родемжат тыштак веле.

Спустилась я на луг, собрала цветы,

Жила и ждала, пока цветы расцветут.

Всё время думала о тебе, даже видела во сне,

Специально пришла в гости.

Не говорите, что одеваю всегда это платье, -

Одно оно у меня любимое.

Не говорите, что приезжаю все время в эту деревню, -

Любимые мои родственники именно здесь.

496*. Тендан деке унала толаш

Ока тӱран шовырнам чийышна.

Мемнам сайын ончеда гын,

Адакат толаш сӧрена.

Чийыдыме шовырым чиенна да,

Чийыдыме тувырым чиенна.

Тендан ялыш миенна да

Палыдымым родым ыштенна.

Чтобы прийти к вам в гости,

Надели мы кафтаны с обшитыми мишурой краями.

Если будете хорошо за нами ухаживать,

Обещаем еще приехать.

Надели мы новые кафтаны,

Надели новые платья.

Приехали к вам в деревню

И сделали незнакомцев родственниками.

497*. Урем капкадат виш улмаш да,

Пӧрт омсадат почмо улмаш.

Мемнан толын пурымылан да

Ӱстембал чес да ямде улмаш.

И уличные ворота ваши открыты,

И дверь дома открыта.

К нашему приходу

Накрыт был и ваш стол.

498. Кужу пистер мучаштет

Мӱкш онет модылда.

Кугу нурет покшелнет

Кинде онет модылда.

Кӧрага-кӧрага суслыкшо

Калыкым лудылден вучалеш.

На краю длинного липняка

Играет владыка пчёл.

Посреди большого поля

Играет хозяин хлеба.

Пивная посуда

С почтением ждёт людей.

499. Орваже чылдарман, повозкаже суранан,

Кок тор алашам кычкальым -

Келшалеш гын, огеш гын?

Теат ме дечна кугу улыда,

Меат те дечда изи улына:

Мыланнаже муралаш келшалеш гын, огеш гын?

Телега украшена, повозка обшита кожей,

Запряг я двух гнедых меринов -

Годится ли, нет ли?

Вы старше нас,

А мы моложе вас:

Нам запеть уместно ли, нет ли?

500. Моско тиякет упшым тодеш,

Окан упшым тодеш.

Моско купечет лупшым пуна,

Порсын лупшым пуна.

Керек-мыняре йӱктеда-пукшеда гынат,

Шкенан суртымак шонена.

Московский дьяк шляпу плетёт,

Обшивая мишурой, шляпу плетёт.

Московский купец плеть плетёт,

Шёлковую плеть плетёт.

Сколько угодно вы нас поите-кормите,

Всё равно мы думаем о своём доме.

501. Ай, курык сай, курык сай,

Курык воктен корно сай.

Корно воктен так сай,

Таҥ ден йӱаш пурам сай.

Ах, гора хороша, гора хороша,

Около горы дорога хороша.

Около дороги друг хороший,

Хорошо с другом пиво пить.

502. Шернур марийын курыкшым

Тарайым вакшын кӱзышна.

Капка ончыко толын шогална,

Шинчыран пийда йӱкымдале.

Тошкалт мучашке пуралын шогална,

Изи агытанет йӱкымдале.

Пӧртӧнчыкет кӱзалын шогална,

Кӱ дечат пешкыде чучылдыш.

Пӧрт покшекет пуралын шогална,

Шикшын пушын койо.

Ӱстел покшекет пуралын шична,

Мамык дечат пушкыдын чучылдыш.

На гору сернурских марийцев,

Постелив кумач, поднялись.

Встали перед воротами,

Собака ваша на цепи залаяла.

Подошли мы к крыльцу,

Запел ваш петушок.

Поднялись в сени,

Показалось, твёрже камня.

Зашли мы в дом,

Дымно показалось.

А уселись мы за стол,

Мягче пуха показалось.

503. Кудо ончылнына апшатна уло,

Клат ончылнына кевытна уло,

Капка ончылнына кавакна уло:

Пел кӱсеныштына пелштоп арака,

Вес кӱсеныште кремгат пеле мӱгинде.

Чарка дене йӱшӧ огына ул,

Корка дене йӱшӧ улына.

Перед летней кухней есть у нас кузница,

Перед клетью есть у нас магазин,

Перед воротами есть у нас кабак:

В одном кармане у нас - полуштоф вина,

В другом кармане - полфунта пряников.

Не из рюмок мы пьющие,

А пьющие мы из ковша.

504. Кумкуданын кылтаже улам,

Нӱктын озымжо улам.

Кугу Тикынын сай ватыже улам,

Нӱктын йӧрдымӧ ӱдыржӧ улам.

Йӱаш тык йӱаш - пу аракам!

Я - сноп деревни Березники,

Я - озимь Нюхты.

Я - хорошая жена большого Тихона,

Я - негодная девушка Нюхты.

Пить так пить - давай водку!

505. Кормыжталам гын, тул лектеш,

Тошкалам гын, вӱд лектеш.

Меже муралтен колтена гын,

Шинча гычда вӱд лектеш.

Если зажму ладони, огонь появится,

Если наступлю, вода выльется.

Если мы запоём,

Из глаз ваших слёзы пойдут.

506. Корнын кужужым шинчем ыле гын,

Шем алашам кычкем ыле.

Таҥын моторжым шинчем ыле гын,

Шем агытаным шӱшкылам ыле.

Сийжын токшым шинчем ыле гын,

Марием шынден кондем ыле.

Если бы я знала, что дорога длинна,

Запрягла бы чёрного мерина.

Если бы я знала, что друг красив,

Зарубила бы чёрного петуха.

Если бы я знала, что угощений так много,

Привезла бы с собой мужа.

507. Ыресан оксат - ик оксат,

Ойыпан оксат - ик оксат.

Ужгамат чияш ок кӱл,

Мыжерымат чияш ок кӱл:

Ик корка сырада веле кӱлеш.

Монета с крестом - одна монета,

Монета с изображением - одна монета.

И шубу одевать не нужно,

И кафтан одевать не нужно:

Нужен лишь один ковш вашего пива.

508. Шудо вуйышто шудышырчык муралта,

Шудо вуетлан оҥайже лиеш.

Куэ вуйыштет шӱшпыкет муралта,

Куэ вуетлан оҥайже лиеш.

Ломбо вуйыштет кукуэт муралта,

Ломбо вуетлан оҥайже лийже.

Меже муралтен колтена гын,

Тыланда оҥайже лийже.

На верхушке травы кузнечик поёт,

Чтобы верхушкам трав забавно было.

На верхушке берёзы соловей поёт,

Чтобы вершине берёзы потешно было.

На верхушке черёмухи кукушка поёт,

Чтобы верхушке черёмухи потешно было.

Если мы запоём,

Пусть вам весело будет.

509. Элнет кожлат - кугу кожлат,

Кукужо мура гын, келшалеш.

Тройка ямшыкын лӱмжӧ кугу,

Оҥгыржо мура гын, келшалеш.

Тиде пайремын лӱмжӧ кугу,

Межат мурена гын, келшалеш.

Илетский лес - большой лес,

Нравится, если поёт кукушка.

У ямщика тройки имя великое,

Нравится, если звенит колокольчик.

У этого праздника имя великое,

Нравится, если мы запоём.

510. Капка ончыкет шуына да

Йошкар агытаным тарватышна.

Кудывечышкет пурышна да

Ош агытаным тарватышна.

Пӧртӧнчыл мучашкет шуна да

Акый ден курскайым тарватышна.

Пӧрт кӧргышкет пурышна да

Тулар ден тулачым тарватышна.

Ӱстелтӧрышкет шична да

Пелштоп аракам тарватышна.

Дошли мы до твоих ворот,

Потревожили красного петуха.

Зашли мы в твой двор,

Потревожили белого петуха.

Дошли мы до твоего крыльца,

Растревожили сестру с зятем.

Вошли мы в твой дом,

Растревожили сваху со сватом.

Уселись мы за стол,

Притронулись к полуштофу вина.

511. Иктыт-коктыт куэрет,

Шӱдӧ коло лышташет.

Лышташ йымал коляже

Корак чоным йӱлалтара.

Кугу шинча Микалыжым

Пелштоп арака ондала.

Раз-два, березняк,

Сто двадцать листиков.

Под листьями мышка

Волнует душу ворона.

Большеглазого Михаила

Обманывает полуштоф водки.

512. Йошкар ужгам ӱмбалнем да,

Шем шараварем пулвуйыштем.

Ой, таҥем-шамычем да,

Айда йӱлден колтена!

Красная шуба на мне,

Чёрные шаровары на моих коленях.

Ой, друзья мои,

Давайте выпьем!

513. Тошкалтыш мучаш йошкар агытанже

Совокак пелак шӱльым йодылдалеш.

Вӱта кӧргӧ йошкар алашаже

Путак пелак шӱльым йодылдалеш.

Мемнан унаже саканак пелак аракам йодылдалеш,

Мемнан таҥже тентак пелак оксам йодылдалеш.

Ала пуэм гын, ала огым гын.

Мемнан йошкар ӧршыжӧ

Пырчак пелак нӧшмым йодылдалеш.

Мемнан таҥже часак пелак веле вучалал шогалеш.

Межат саканак пелак веле вучалал шогена.

Рыжий петух у крыльца

Просит полтора совка овса.

Рыжий мерин в хлеву

Просит полтора пуда овса.

Наш гость просит полтора стакана вина,

Наш друг просит полтора рубля денег.

Может, дам, а может, не дам.

Наш красный снегирь

Просит полтора зёрнышка.

Наш друг стоит и ждёт лишь полтора часа.

И мы стоим, ожидая полтора стакана вина.

514. Шӱшпык шӱшка, куку мура

Полан саска коклаште.

Меже муралтен колтена

Тулар-тулаче коклаште.

Соловей свистит, кукушка поёт

Среди ягод калины.

Мы же поём

Среди сватьев.

515*. Аман шочмаш верешыже

Олмапуэт шочале.

Аван шочмаш верешыже

Эҥыжвондет шочале.

Олмапужын олмаже улына,

Эҥыжвондын эҥыжше улына.

Ачийын-авийын игыже улына,

Изайын-еҥгайын унаже улына.

На месте, где родился отец,

Выросла яблоня.

На месте, где родилась мать,

Малиновый куст вырос.

Мы - яблоки яблони,

Мы - ягоды с малинового куста.

Мы - дети отца-матери,

Мы - гости брата с невесткой.

516. Йогышо вӱдын йолжо уке,

Шинчыше вӱдын шинчаже уке;

Пӱрӧ печкежын печетше уке,

Сыра коркажын чаракше уке.

Мемнан умшажын лымже уке, -

Эре йӱеш, эре мура.

У текущей воды нет ног,

У стоячей воды нет глаз;

У бочки браги нет печати,

У ковша пива нет преграды.

У рта нашего нет устали, -

Всё время пьёт, всё время поёт.

517. Кӱляш кӱнчылат - ош кӱнчылат,

Лукталал шинчаш мо йӧсӧ?

Ваштар тогыман машинажым

Тошкалал шинчаш мо йӧсӧ?

Йӱашат ямде, кочкашат ямде,

Муралтен шинчаш мо йӧсӧ.

Пряжа из кудели - белая пряжа,

Что трудного вынести и сесть?

У прялки с кленовым ободом

Что трудного, наступая, сидеть?

И выпивка готова, и еда готова,

Что трудного сидеть и петь?

518. Айда, алаша, ашатал,

Айда, алаша, ашатал,

Вӱргене-лай таганет

Йылт-йалт лийын коймешке.

Айда, йолташ, муралте,

Айда, йолташ, муралте,

Мемнан йӱкшат тывечше

Ял мучашке йоҥгалтше.

Давай, мерин, беги рысью,

Давай, мерин, беги рысью,

Твои медные подковы

Пока не засверкают.

Давай, дружок, спой,

Давай, дружок, спой,

Чтобы голос наш отсюда

Был слышен до конца деревни.

519. Кумло вичураш йыдалым чийышым,

Витле кокыраш ыштырым пидым.

Полтинник потам ӱштальым,

Кок шӱдыраш сывыным чийышым.

Озан кумыл - кашташте,

Мемнан кумыл - ӱстел ӱмбалне.

Обула я лапти десятикопеечные,

Обмотала онучи пятнадцатикопеечные.

Подпоясалась кушаком за полтинник.

Надела кафтан за пятьдесят семь копеек.

Хозяева на седьмом небе от радости,

Наша же радость - в застолье.

520. Кудывечышкет ончальымат -

Уремын-уремын койдале.

Уремышкет ончальымат -

Пасуан-пасуан койдале.

Пасуышкет ончальымат -

Олыкан-олыкан койдале.

Олыкышкет ончальымат -

Ломберан-шопкеран койдале.

Тендан олык, мемнан ломбо,

Мемнан ломбыжо пеледеш.

Мемнан ломбыжо ок пелед гын,

Куштырак олыкдан ямже?

Меже муралтал огына колто гын,

Куштырак пайремдан ямже?

Посмотрел я во двор -

Улицы показались.

Посмотрел я на улицу -

Поля показались.

Посмотрел я на поле -

Луга показались.

Посмотрел я на луга -

Черёмушники-осинники показались.

Ваш луг, наша черёмуха,

Наша черёмуха цветёт.

Если наша черёмуха не расцветёт,

Где же красота вашего луга?

Если мы не запоём,

Где же прелесть вашего праздника?

521. Айдыза мурен колтена,

Айдыза шӱшкен колтена.

Ик мучаш гыч вес мучашке

Рыжге-рыжге шоктыжо.

Мален кийыше помыжалтше,

Тӱгӧ лектын колыштшо.

Давайте-ка споём,

Давайте свистнем.

С одного конца улицы до другого

Пусть звонко звучат голоса.

Спящий пусть проснётся,

Выйдя на улицу, пусть слушает.

522. Тений ургыктымо йошкар кӱрыклан

Изишак ваяжым кучалшаш.

Индат йӱна, индат кочна,

Изишак койышнам ончыкталшаш.

К сшитой нынче красной шубе

Надо пришить оторочку.

Вот мы и наелись, вот и напились,

Покажем теперь свою удаль.

523*. Мемнан чодыражат пеш мӱндырнӧ -

Ужар вуйжо веле коеш.

Мемнан олыкшат пеш мӱндырнӧ -

Пеледыш вуйжо веле коеш.

Мемнан родыжат пеш мӱндырнӧ -

Сай саламым колталын.

Сай саламым колтымешке

Пырля йӱын-кочкына.

Наш лес очень далёк -

Видна лишь его зелёная вершина.

И луга наши очень далеки -

Видны лишь головки цветов.

Наши родственники очень далеки -

Послали нам добрый привет.

Потому, что послали нам приглашение,

Теперь вместе мы за столом.

524. Ачий пуэн, капым пуэн,

Авий пуэн, койышым пуэн,

Изай пуэн, алашам пуэн,

Еҥгай колтен, капкам почын колтен.

Агул воштет лекна,

Тӱмыр йӱк ден лекна.

Пасу воштет кайышна,

Шӱвыр йӱк ден кайышна.

Чодыра гоч кайышна,

Йыҥгыр йӱк ден кайышна.

Капка ончыкет толын шуына,

Алашан койышым ончыктышна.

Кудывечышкет пурышна,

Шкенан койышым ончыктышна.

Шелыкышкет пурышна,

Чесдан койышым ончышна.

Мемнан ынде кодын

Ковыртаташ, койышланаш.

Батюшка дал, тело дал,

Матушка дала, характер дала.

Брат дал, мерина дал,

Невестка отправила, открыв ворота, отправила.

Вышли мы через деревню,

С боем барабана вышли.

Пошли через поле,

С мелодией волынки пошли.

Пошли мы через лес,

Со звуками колокольчиков пошли.

Подошли мы к твоим воротам,

Показали норов нашего мерина.

Вошли в твой двор,

Свой нрав показали.

Подошли мы к праздничному столу,

Наблюдали за вашими угощениями.

Теперь нам осталось

Красоваться и щеголять.

525. Шӱшпык гае туларна толын,

Ой, молан огыл шӱшкалташ?

Куку гае тулачына толын,

Ой, молан огыл муралташ?

Меже тендам вучышна да

Капкам лектын вашлийна.

Ӱстелтӧрыш шындышна да

Изин-кугун веле койна.

Словно соловей, сват наш приехал,

Ах, почему бы нам не засвистеть?

Словно кукушка, сваха наша приехала,

Ах, почему бы нам не запеть?

Мы ждали вас,

Вышли за ворота встречать.

Усадили вас за стол

И хлопочем, стараясь угодить.

526. Мӱндыр кӱдыртышет кӱдыртале,

Умыр мардеж пуале.

Умыр мардеж пуалмеке,

Умыр пылет кӱзале.

Умыр пылже кӱзымеке,

Умыр йӱржӧ йӱрале.

Умыр йӱржӧ йӱрмеке,

Мландын шерже темале.

Мландын шерже теммеке,

Мемнан шержат темале.

Мемнан шерже теммеке,

Мемнан кочмо-йӱмӧ шуаш ушныжо.

Дальний гром прогремел,

Подул тёплый тихий ветерок.

После тёплого ветерка

Тихая туча надвинулась.

Как пришла тихая туча,

Так полил тёплый дождь.

После тёплого дождя

Земля насытилась.

После того, как насытилась земля,

И мы получили удовольствие.

После нашего удовольствия

Пусть наше угощение полезным будет.

527. Куку мурымым колмыда шуэш гын,

Пӧрт кутанешет куэрым шындыза.

Шӱшпык шӱшкымым колмыда шуэш гын,

Пакча шеҥгелан ломберым шындыза.

Мемнан мурымынам колмыда шуэш гын,

Капка ончык лектын шогалза.

Мемнан койышым ончымыда шуэш гын,

Черпыт аракам луктын шындыза.

Если хотите услышать пение кукушки,

Посадите за домом березняк.

Если хотите услышать свист соловья,

За огородом посадите черёмушник.

Если хотите услышать наше пение,

Выходите за ворота.

Если хотите посмотреть на наш нрав,

Выставляйте четверть вина на стол.

528*. Олыкышто ик лукышто

Шудо солаш пеш кодын.

Родылакем ден, чукайлак ден

Ик мут ойлышаш кодын.

Шкенан чывылак, шкенан агытан

Шкенан пакчаште йылым погат.

Шкенан ӱдыр-влак, шкенан Пиля-мари

Шкенан ялыште йӱына-кочкына.

В одном месте на лугу

Косить осталось очень много.

С моими милыми родственниками

Осталось немного поговорить.

Свои курицы, свой петух

В своём огороде собирают дождевых червей.

Свои девушки, свои биляморские парни

В своей деревне пьём-едим.

529*. Айста лучо муралтен колтена да,

Айста лучо шӱшкалтен колтена.

Шуко еҥын шуко мутшым колышт илаш тӱҥална гын,

Ырвезыла ӱмырнаят эртен кая.

Ӱстел йолдаят нылыт улмаш,

Ӱстембал шовычдаят клёнко улмаш.

Мемнан толын пурмыланна

Чевер чесдаят ямде улмаш.

Лумынак мураш толын улына да,

Лӱмынак шӱшкаш толын улына.

Лажъял гычын Шуаръялыш

Лӱмынак унала толын улына.

Меже кузе мурена гын,

Тежат тугак муралза.

Меже кузе толын улына гын,

Тежат тугак миялза.

Давайте лучше споём,

Давайте лучше посвистим.

Если будем жить, слушая слова людей,

Наша молодость пройдёт.

Ножек у вашего стола четыре, оказывается,

Скатерть на столе клеёнчатая, оказывается.

К нашему приходу

Готовы, оказывается, ваши угощения.

Специально попеть мы пришли,

Специально посвистеть мы пришли.

Из Лажъяла в Шуаръял

Специально в гости мы пришли.

Как мы поём,

Вы также пойте.

Как мы к вам приехали,

Вы также к нам приезжайте.

530*. Олмапужым шындальым, вӱдшымат оптальым,

Ик олмажым налдалам гын, мо лиеш?

Йӱлдалынат темынам, кочкылденат темынам,

Ик мурыжым муралтем гын, мо лиеш?

Шем агытан деч йодылдалын ончем,

Ала почшым пӱчкын пуа да?

Шӱжарем деч йодылдалын ончем,

Ала ик стаканжым йӱкта ыле?

Посадил я яблоню, поливал её,

Если возьму одно яблоко, что будет?

Напился я, наелся я,

Если спою одну песню, что будет?

Попробую спросить у чёрного петуха,

Даст ли отрезать себе хвост?

Попробую спросить у сестрёнки,

Угостит ли хоть одним стаканом вина?

531*. Порсын солыкын йолваже улам,

Теҥгеаш шальын чурийже улам.

Ачан-аван игыже улам,

Изан-еҥган унаже улам.

От шёлкового платка я - кисточка,

У рублёвой шали я - лицевая сторона.

Я - дитя родителей

И гостья у брата с невесткой.

532*. Муралтен колтем гынат, шкет улам да,

Шӱшкалтен колтем гынат, шкет улам.

Муро йӱкем колышталын,

Ваштарешем налаш лекше иктат уке.

Вӱдым конден, чайым шынден,

Кӧм йӱктышашем уло?

Эрат-касат пашам ыштен,

Кӧлан йӧршашем уло?

Ӱштембал йолетат тӱран улмаш,

Ӱштембал шовычетат йолван улмаш.

Темдан толын пурмыланда

Ӱштембал чевер чесет ямде улмаш.

Хоть и запою, всё равно одна я,

Хоть и засвищу, всё одна.

Слушая моё пение,

Нет никого, кто бы вышел меня встречать.

Принеся воду и поставив чай,

Кого мне напоить?

Работая с утра до вечера,

Кому я нужна?

Ножки-то у стола с резьбой, оказывается,

На столе скатерть с кистями, оказывается.

К вашему приходу

На столе готовы вкусные угощения, оказывается.