Pened kobanefe vpakluba valemik nedänik

Nüm: 26. Wisskirchen i. Ts' (Deutän), 1934, yulula d. 22id.

O Volapükaflens palestümöl!

Kodedü kobikam ela “Volapükaklub valemik Nedänik” tü del 28id yulula, Volapükans fol vilaga: ‘Weisskirchen im Tanaus’ potons oles glidis ladöfikün e vipons kobanefe benoseki gudikün. Ünü dels anik tidabuk Volapükik pro Deutänans opubon, e spelobs das suno olabobs Volapükaklubi Deutänik ad yufön olis pö propagid e slopükam pro pük jönik obas. Ols valik benosedolsös tidabuki at as blöf flenama, dat ofägobs ad pübön bukis nulik! Bu valikos binolsös nefeniks pö slopükam limanas nulik! Volapük obas muton kömön ini län alik, ini zif alik, ini vilagül smalikün. Komipolsöd pro din dialik obas!

Ko lestüm,

ds. d. o.

nemü ons: ‘JOHANN SCHMIDT’

‘Weisskirchen im Taunus’

Se Volapükagased pro Nedänapükans. 1934. Pad: 32.

Nuns

Fredo nunobs is, das tidabuk Vpa pro Deutänapükans (“Lehrbuch der Weltsprache Volapük”) fa ‘Johann Schmidt’ nu blümon. Ninädon bevü votikos konotis e fabis anikis in Vp. Kanobs komandön Volapükane alik remi buka at, e spelobs ladöfo, das i Vpans no-Deutänik osivons lebuki at.

Buk at kanon pasivön de lautan (in ‘Weiszkirchen im Taunus’) tä m. Deut. 1,20 a samäd 1; tä m. Deut. 3,30 a samäds 3; tä m. Deut. 5,10 a samäds 5, e de ‘Dr. Arie de Jong’ (in ‘Zeist’) tä fl. Ned. 0,80 a samäd.

Pö kobikam valemik Vpakluba valemik Nedänik pecälom as stimaliman:

söl: ‘A. A. Moll v. Santbergen’ in ‘Den Haag, Hazelaarstraat’ 71,

e pedävalom as vipresidan pla söl: ‘A. A. Moll van Santbergen’, kel eseditom se lecifef:

söl: ‘H. Bakker’ in ‘Voorburg, Laan van Leeuwensteijn’ 86.

Evedons limans Vpakluba valemik Nedänik:

söl: ‘J. G. M. Reynders, Jr.’ in ‘Den Haag, Segboreklaan’ 23,

läd: ‘C. H. Reynders-Evertsz’ in ‘Den Haag, Segboreklaan’ 23.

Peselons ünü foldil 2id yela: 1934 Vpamäks 600.

Spelobs ad lasumön ini nüm mälid jäfidota dalebüdi cifala dö statuds ela “Fed Volapükaklubas”.

Se Volapükagased pro Nedänapükans. Yel: 1934. Pads: 33—34.

Dalebüd Cifala de 1934, Yunul 1, Nüm: 3

Fölölo desini in büad obik de 1934, yanul, 1 pemäniotöli,

lebumölo fovo su vobod fa lecifef ela “Volapükaklub valemik Nedänik” peprimöl (Logolöd yegedi: “Diläd valemik feda Volapükaklubas” in nüm: 1 yeloda: 1 ela “Volapükagased pro Nedänapükans”!), e

demölo statudis e nomemi konömik Volapükakluba ebo änu penemöla, statudis e nomemi kelikis, soäsä pelautons pö kobikam valemik tü d. 22id tobula yela: 1932 oka, baivögob löliko,

lonob me penäd at statudis sököl ela “Fed Volapükaklubas”.

Dalebüd at ponotükon büo in “Volapükagased pro Nedänapükans”, e pötatimo i in “Zänagased Volapüka”, ven gased lätik podabükon.

Statuds ela “fed volapükaklubas”

I. Nem.

§ 1. Volapükaklubs netik valik balons okis ad fed valemik bal labü nem: “Fed Volapükaklubas”.

II. Topät.

§ 2. Topät cifala (ä zänabüra Volapüka) binon topät calöfik feda Volapükaklubas.

III. Dät füna.

§ 3. Del 31id mäzula yela: 1932: dät, tü kel lecifef Volapükakluba valemik Nedänik efünon medü nun tefü Volapükaklub bevünetik valemik labü nem: “Diläd valemik feda Volapükaklubas” in num 1id yeloda balid Volapükagased pro Nedänapükans, palecedon as dät füna feda Volapükaklubas.