6.7. Машиналарды жинақтан соң сынау

Дайын болған машиналар МЕСТ талаптарына және машинаның техникалық шарттарына сәйкес сынақтан өткізілуі тиіс. Олар бекітілген бағдарламалар мен әдістемелер бойынша белгілі тәртіппен жүргізіледі. Ал жүк көтеру машиналары Мемтехбақылау бекіткен Ережелер талаптары бойынша тексеріледі.

Машиналарды сынаудың төмендегідей түрлері бар [20]: алдын ала тәжірибелік үлгідегі; қабылдағыш тәжірибелік үлгідегі; қабылдап-тапсыру; периодты; біліктілікті; типтік және сертификациялық.

Алдын ала қабылдау сынақтарына тәжірибелік үлгі түседі, ал қабылдап-тапсыру сынақтарына әрбір сериялы шығарылатын машина түседі. Периодты сынаққа сериялы шығарылатын машинаның біреуі және ол үш жылда бір рет түсіп, тексеріледі.

Біліктілікті сынаққа МЕСТ-та қарастырылған бекіту партиясындағы машинаның бірі түседі. Ал типтік сынақтар конструкторлық құжаттамада сапа көрсеткішіне әсер ететін өзгерістер пайда болғанда жүргізіледі.

Қабылдап-тапсыру сынақтарына көзбен бақылау, жүктемесіз сынау, жүктемемен сынау, қауіпсіздік аспаптарына сынау және жүріс жабдықтарын сынау және т.б. кіреді.

Көзбен бақылау кезінде жинау жұмыстарының сапасы және конструкторлық құжаттамаға сәйкес машина жиынтығы тексеріледі.

Жүктемесіз сынақ жүргізу кезінде жеке және бірігіп жұмыс істеудегі барлық механизмдер тексеріледі. Машина жүйесінің (электрлік, гидравликалық және пневматикалық) дұрыс жиналуы, біріктірілген гидрожүйелерде жұмыс майының ақпауы, біріктірілген пневможүйеде ауаның шығып кетпеуі тексеріледі. Машинаның барлық механизмдерін кезекпен сынауды жүргізеді, сонан соң кинематикалық сұлбаға сәйкес әртүрлі операциялар біріктіріледі.

Машинаны жүктемемен сынау және машинадағы көрсетілген техникалық шарттар талаптарына сәйкес жүргізілуі тиіс.

Жүккөтеру машиналарының қауіпсіздік аспаптарын сынау кезінде жүккөтерімділік шектеуден (жүк моментінен) басқасын ретке келтіреді. Қауіпсіздік аспаптарына жүкқармау органдарының көтерілу биіктігін, олардың шығымы мен жүк көтеру машинасының бұрылуын конструкторлық талаптарға сай шектеп отырады. Жүккөтерімділікті шектегіш пен шектік жүкті шектегішті сынау машинаны жүктік сынақтан өткізгеннен соң жүргізіледі.

Машинаның жүру бөлігінің жұмыс істеу мүмкіндігін тексерудегі жүрістік сынақтар жүктемесіз өткізіледі. Бұл кезде машина қозғалысының жылдамдығы мен бағытын өзгерту мүмкіндігі тексеріледі.

Сынақтар нәтижелерін актпен рәсімдейді, сонымен бірге оны машина паспортына жазады.

Бақылау сұрақтары

1. Жинау операцияларын техникалық нормалаудың ерекшеліктері неде?

2. Жинаудың ұйымдастыру түрлері қандай?

3. Ағынды және ағынды емес жинаудың арасындағы айырмашылық неде?

4. Жинаудың технологиялық сұлбасын құрудың принципін түсіндіріңіз.

5. Машина механизмдерін жинаудың негізгі технологиялық талаптарын атаңыз.

6. Сырғанау және тербелу мойынтіректі машина детальдарын жинау қалай жүргізіледі?

7. Престелген тісті дөңгелектердің соққысын тексеру қалай жүргізіледі?

8. Шынжырлы берілістерді жинау кезінде қандай негізгі техникалық талаптар сақталуы тиіс?

9. Крандар мен экскаваторлардың тіректік-бұрылу құрылғыларын қалай жинайды?

10. Жинақ бірліктерін технологиялық сынақтардан қалай өткізеді?

7-тарау. РОБОТТАЛҒАН ӨНДІРІС ТЕХНОЛОГИЯСЫ