Арсены цур

Турчы сæрмæ ‘рцауындзæг æрдæг мæй¹,

Мигъты малы нал ары фæндаг.

О, куыд ‘рæгмæ бон кæны, куыд ‘рæгмæ,

Сау фыдæхсæв, аскъуыйа дæ таг!..

Мигъы аууон арæныл фæхъуызы,

Хъахъхъæнджытæ — дурдзæвдтытау сагъд.

Бæстæ бандзыг... Мур сыбыртт нæ хъуысы;

Арв нытталынг, — у цыма цæсткъахт.

Бæлæстæ æнкъард æнгас æвдисынц, —

Ахæстытау арæнæй кæсынц.

Дымгæ сын адджын пъатæ нæ сисы, —

Салдæтты цыргъ джебогъæй тæрсы...

Къæдзæхтыл тæрсгæ-ризгæ куы ‘рхизы

‘Хсæвæй бонмæ Къуары дон сывдæг,

Уæд йæ хъæрæй къæйтæ дæр нырризынц,

Арф ком дæр ын нал вæййы къуындæг.

Ахæстонæй рацæуæг лæгау æм

Цины цæссыг фегуыры æваст,

Рахæссы фынккалгæ урс фæйлауæн,

Рог уылæнтæн сытынг вæййы хъазт, —

Аба кæнынц донбылгæрон дуртæн,

Дидинтимæ сисынц сусæг дзырд;

Мæнæ, цыма, хъал сабитæ худгæ

Разгъорынц сæ мады фæдыл цырд.

Къуар тындзы æлхынцъæрфыгæй размæ,

Раппары фæлмас уылæнмæ дзырд, —

Райс, зæгъгæ, дæ къах, къæбæда, размæл,

Æмæ та фынккалгæ згъоры цырд.

Ис цыдæр æмбæхст фыдæх йæ фынчы,

Турчы зæххæй сусæг рис хæссы;

Кæд, мыййаг, нымд хъарæг у йæ чыр-чыр!

Кæд, мыййаг, æгасæй у цæссыг!

Йе ‘рхæндæг ниуд зæрдæ тоны мæстæй,

Хъуысы дзы æфхæрд лæджы кæрзын.

Хъуысы дзы лæгъстæмхæццæ ныхæстæ, —

Цыма куры стонг саби кæрдзын...

Сауыгъди йæ сæрмæ мигъты ‘рдæг мæй,

Тугамæхст тæтæйраг цирхъау раст.

О, куыд ‘рæгмæ бон кæны, куыд ‘рæгмæ,

Сау фыдæхсæв, атъæпп уай æваст!..

Рæстæг, рæстæг, иу чысыл ма атывдз:

Цæй, цы дæ рæхысбастау æндзыг?!

Уæртæ талынг ахæстоны бадынц, —

Нæу нымæг сæ домбай риуты зынг;

Тагъд кæд Турчы уыцы ‘взыгъд лæппутæн

Сгуылф кæнид сæ зæрдæты цъæх арт;

Атониккой ахæстоны къултæ,

Тар æхсæв хъæлтæ фæхауид дард...

Чидæр зарæг самыдта хæрз цадæг,

Дард кæмдæр æндон хъæлæс нæры,

Уый Назим Хикмет фыссы йæ кадæг —

Тайы ‘рдæг мæй, бон дзир-дзур кæны...

1957 аз, г. Ахалкалак

Сæумæрайсом

Кавказы сæрмæ тайы мæй цырагъау,

Йæ фæстаг тынтæй Терчы малы хъазы.

Цахæмдæр ‘нахуыр, диссаджы сырх маргъау,

Сæуæхсид арвыл айтыгъта йæ базыр.

Фæсабыр дуне... Фескъуыдтой æмхуызон

Сæ сусу-бусу тар хъæды бæлæстæ;

Раст афтæ ма фыдуаг дымгæ куы схъызы,

Уæд уый размæ фегуыппæг вæййы бæстæ...

Ссс... Сабыр... Сабыр... нал хъуысы сыбыртт дæр...

Дæ риуыгъын фæсабыр кæн, мæ зæрдæ...

Цард гуыры: — хæлынц дидинты къуыбыртæ...

Мæ хъустыл уайынц ног зарæджы зæлтæ...

Рæстæгмæ ‘рфынæй дидинæгыл уддзæф,

Æрбадт хæтæг мигъ сау айнæг къæдзæхыл.

Рæхджы зынгхур йæ дзыхыдзаг ныххуддзæн

Æмæ та сыстдзæн царды тымыгъ зæххыл.

1956 аз

Мæ фæдонмæ

Истори у тыгъд быдыр — мигътæй асæст,

Куы байрæзай, йæ фæндæггыл куы бафтай,

Æваст цыма æрвферттывды фат асаст, —

Нæ Иры фæд фæтары уыдзæн афтæ.

Æмæ-иу дарддæр архив уæгъды ма змæнт,

Хъуына чингуытыл ма снывæнд дæ фæндтæ.

Дæ фыдæл кæд æдзух лæгæрста размæ,

Уæддæр ын рохуат бамбæрзта йæ фæдтæ.

Цы кæна, цæй, уый чингуытæм кæм æвдæлд,

Æдзух йæ къухы кард æлвæстæй дардта,

Фыдтохы-иу йæ сау туджы куы сæвдылд,

Йæ фыртмæ-иу æй уæд фæдзæхстæй радта...

Уыд сабийæн йæ нывæрзæн дæр хъама,

Уыд тохмæ сидт йæ алолайы зарæг;

Йæ авдæнæй йæ сау ингæнмæ хъуамæ

Уыдаид уый рæстудæй мастæвзарæг.

Зæххыл рæстдзинад агуырдтой сæ кардæй

Иры цæхæрцæст, удуæлдай лæппутæ;

Куы фæмард доны Ос-Бæгъатыр сайдæй,

Хæххон кæсаг уæдæй у тугдæппытæ.

Фæцу, кæмдæр ивгъуыд æнусты тары

Йæ хъысмæтимæ сахъ Алан кæм фæхыл,

Зæрдæдзæфæй уый саудалынг мæйдары

Утæхсæнгæнгæ къæдзæхтыл кæм фæхылд,

Уыдзæнис уым йæ райдайæн дæ балцæн,

Ыстæй дын тугвæд амондзæнис дарддæр,

Нæртон гуырды сæрибарагур кард дæм

Æнусты тарæй, саст мæйау, рухс дардзæн.

Кæндзæнис дын æнкъард зарæг æхсæрдзæн,

Дæ сæрмæ мигъты ленк кæндзæн фæлурс мæй;

Ирон адæмы тугвæд дæ æркæндзæн

Коммунæйы цæхæркалгæ æнусмæ.

1958 аз