«Правда Роська»

1) Убьеть муж мужа, то мьстить брату брата, или сынови отца, любо отцю сына, или брату чаду, любо сестрину сынови; аще не будеть кто мьстя, то 40 гривенъ за голову; аще будеть русинъ, любо гридинъ, любо купчина, любо ябетникъ, любо мечникъ, аще изъгои будеть, любо словенинъ, то 40 гривенъ положити за нь.

2) Или будеть кровавъ или синь надъраженъ, то не искати ему видока человеку тому; аще не будеть на немъ знамениа никоторого же, то ли приидеть видокъ; аще ли не можеть, ту тому конець; оже ли себе не можеть мьстити, то взяти ему за обиду 3 гривне, а летцю мъзда.

3) Аще ли кто кого ударить батогомъ, любо жердью, любо пястью, или чашею, или рогомъ, или тылеснию, то 12 гривне; аще сего не постигнуть, то платити ему, то ту конець.

4) Аще утнеть мечемъ, не вынемъ а его, либо рукоятью, то 12 гривне за обиду.

5) Оже ли утнеть руку, и отпадеть рука, либо усохнеть, то 40 гривнъ. Аще будеть нога целаили начьнеть храмати, тогда чада смирять.

6) Аще ли перстъ утнеть который любо, 3 гривны за обиду.

7) А во усе 12 гривне, а в бороде 12 гривне.

8) Оже ли кто вынезь мечь, а не тнеть, то тъи гривну положить.

9) Аще ли ринеть муж мужа любо от себе, любо к собе, 3 гривне, и пилона два выведеть; или будеть варягъ или колбягъ, то на роту

10) Аще ли челядинъ съкрыется любо у варяга, любо у кольбяга его за три дни не выведуть, а познають и в третий день, то изымати ему свои челядинъ, а 3 гривне за обиду.

11) Аще кто поедеть на чюжемъ коне, не прошавъ его, то положити 3 гривне.

12) Аще поиметь кто чюжь конь, любо оружие, любо порть, а по­знаете въ своемь миру, то взяти ему свое, а 3 гривне за обиду.

13) Аще познаеть кто, не емлеть его, то не рци ему: мое, нъ рци ему тако: пойди на свод, где еси взялъ; или не поидеть, то поручни- ка за пять днии.

14) Аже где възыщеть на друзе проче, а он ся запирати почнеть, то ити ему на изводъ пред 12 человека (вар.: мужа); да аще будеть обидя не вдаль будетъ, достойно ему свои скотъ, а за обиду 3 гривне.

15) Аще кто челядинъ пояти хощеть, познавъ свои, то къ оному вести, у кого то будеть купилъ, а той ся ведеть ко другому, даже доидеть до третьего, то рци третьему: вдаи ты мне свои челядинъ а ты своего скота ищи при видоце.

16) Или холопъ ударить свободна мужа, а бежить въ хоромъ, а госнодинъ начнеть не дати его, то холопа пояти, да платить госпо-динъ за нь 12 гривне; а за тымъ, где его налезуть удареныи той мужь, да бьють его.

17) А иже изломить копье, любо щитъ, любо портъ, а начнетъ хо-тсти его деръжати у себе, то приати скота у него; а иже есть изло-милъ, аще ли начнеть приметати, то скотомъ ему заплатити, колико далъ будеть на немъ.

Укладено за: Хрестоматия по истории СССР с древнейшихи времен до конца ХVІІІ века: Пособие для учителя / Сост. П.П. Епифанов, О.П. Епифанова.- 2-е изд., дораб.- М.: Просвещение, 1989.- С.19-20.

Додаток 8