85 Қонақ үй кәсіпорындарының қызметкерлері үшін қандай талаптар қойылады?

Еліміздің мемлекеттік стандартында қонақ күту индустриясына қатысты талаптар анықталып, оларды жүзеге асыру ережелері белгіленген. Бұл ережелерде қонақ үй қызметкерлеріне қойылатын талаптар да назардан тыс қалмаған. Осыған сәйкес барлық қызмет көрсетуші персонал кәсіби дайындықтан өтуі тиіс және дайындық дәрежесі көрсетілетін қызметке сай болуы тиіс.

Қызметкерлердің шет тілдерін білу саласында да арнайы талаптар қойылады. 1 және 2 санатындағы қонақ үйлерде қабылдау және орналастыру қызметінің жұмыскеріне бір тілді білу жеткілікті (осы аймақтағы қонақ үй кешендеріндегі қонақтардың жиі пайдаланатын тіл). 3 жұлдызды қонақ үйлер санатындағы тұрғындармен тілдесетін персоналға халықаралық тілдесудің екі тілін орташа деңгейде білуі қажет. 4 жұлдыз санатындағы қонақ үйлер үшін талаптар жоғарыда айтылғандармен бірдей, бірақ тіл білу деңгейі жоғарырақ. 5 жұлдыз санатындағы қонақ үйлерге кем дегенде үш тілді білу талабы қойылады. 3-5 жұлдызды қонақ үйлердің қабылдау қызметі екі-үш тілден аудару қызметімен қамтылуы тиіс.

Қонақ үйлерінің барлық санаттары үшін персонал қонақжай, тұрғынның өтінішін орындауға дайын тұратын, барлық тұрғындарға қатысты сабырлық танытатын болуы тиіс, сонымен қоса, қызметкерлерде қонақтармен тікелей жұмыс істеуге рұқсат беретін, медициналық тексерістен өткендігін дәлелдейтін сертификат болуы тиіс. Қонақ үйлердің барлық санаттарында қонақтармен жұмыс атқаратын персонал бекітілген формалық киім киіп және аты-жөні жазылған белгі тағуы керек. Форма әрдайым таза және жинақы болуы міндетті. Кез келген cанаттағы қонақ үй кәсіпорындарында персоналдың жеке демалу мен тамақтануына арнайы жағдайлар жасалуы тиіс.

86 Қонақ үйлер үшін қандай қоғамдық бөлмелер қажет?

Әр іскерлік қонақ үйге іс-әрекет белсенділігін жоғарлату және қызметтерін стандарт негізінде бекітілген сапалық көрсеткіштерге сәйкестендіру мақсатында қызметтік талаптар қойылады. Олар:

- спортпен айналысу және демалысқа арнаған көгалдандырылған аймақтардың болуы (егер қонақ үй әкімшілік, қоғамдық және басқа да орталықтардың қасында жақын орналасса көгалдандыру міндетті емес);

- нөмірлер қорында бір орындық нөмірлердің басымды болуы;

- күндізгі жұмысқа арналған, шағын жиналыстар өткізуге мүмкіндік беретін ірі бөлмелі кабинеттердің болуы;

- бөлмеде міндетті түрде «жұмыс зонасы» болуы;

- жайлы жұмысқа жағдай жасау мақсатында бөлмелерді сыртқы орта ықпалынан максималды деңгейде оқшаулау (мысалы, терезелерді герметизациялау және т.б.).

Іскерлік қонақ үйлерде қызметтік талаптардан басқа қоғамдық жайларды ұйымдастыруға қатысты қонақтар талаптары да ескеріледі, соның ішінде:

- келіссөздер, жиналыстар, көрмелер жүргізуге арналған жайлардың рәсімделуі;

- көп мақсатты және даладан кіретін қосымша есігі бар мәслихаттарға (банкеттерге, конференцияларға және т.б.) арналған залдардың болуы;

- телеграф, телетайп, телефакс жәнет.б. құралдардың жұмыс істеуі;

- қаржылық операцияларды жүргізуге көмек беретін қызметтердің болуы (банк, сақтандыру және т.б фирмалар бөлімшелерінің болуы);

- көшірме, сканер, компьютер техникасы бар хатшылар қызметіне арналған бөлмелердің болуы.