ЗАЦВЕРДЖАНА

на пасяджэнні кафедры беларускай мовы

“____” ________________ 20 ____ г. № _____

Загадчык кафедры ____________ В.Л.Варановіч

Правілы афармлення дыпломных і курсавых прац

студэнтамі 2 – 6 курсаў

спецыяльнасці 1-210501 “Беларуская філалогія”

філалагічнага факультэта

УА “Гродзенскі дзяржаўны ўніверсітэт імя Янкі Купалы”

1 Структурныя элементы навуковай працы

Структурнымі элементамі навуковай працы з'яўляюцца:

– тытульная старонка;

– змест;

– нарматыўныя спасылкі;

– азначэнні;

– абазначэнні і скарачэнні;

– уводзіны;

– асноўная частка;

– заключэнне;

– спіс выкарыстаных крыніц;

– дадаткі.

Шэраг элементаў працы («Нарматыўныя спасылкі», «Азначэнні», «Абазначэнні і скарачэнні», «Дадаткі») могуць у Вашай працы адсутнічаць, аднак астатнія з'яўляюцца абавязковымі.

2 ПАТРАБАВАННІ ДА ЗМЕСТУ НАВУКОВАЙ ПРАЦЫ

2.1 Тытульная старонка

2.1.1 Тытульная старонка з'яўляецца першай старонкай працы.

Прыклад афармлення тытульнай старонкі пададзены ў Дадатках 1 і 2.

2.2 Змест

Змест уключае ўводзіны, найменні ўсіх раздзелаў, падраздзелаў, пунктаў (калі яны маюць назву), заключэнне, спіс выкарыстаных крыніц і назвы дадаткаў з указаннем нумароў старонак, з якіх пачынаюцца гэтыя элементы працы.

2.3 Абазначэнні і скарачэнні

2.3.1 Структурны элемент «Абазначэнні і скарачэнні» змяшчае пералік абазначэнняў і скарачэнняў, якія выкарыстоўваюцца ў дадзенай працы.

2.3.2 Запіс абазначэнняў і скарачэнняў праводзяць у парадку прывядзення іх у тэксце працы з неабходнай расшыфроўкай і тлумачэннямі.

2.3.3 Дапускаецца азначэнні, абазначэнні і скарачэнні прыводзіць у адным структурным элеменце «Азначэнні, абазначэнні і скарачэнні».

2.4 Уводзіны

Уводзіны павінны змяшчаць ацэнку сучаснага стану навуковай праблемы, падставу і зыходныя дадзеныя для распрацоўкі тэмы. Ва ўводзінах павінны быць паказаны актуальнасць і навізна тэмы дадзенай працы.

2.5 Асноўная частка

У асноўнай частцы прыводзяць дадзеныя, якія адлюстроўваюць сутнасць, методыку і асноўныя вынікі выкананай працы.

2.6 Заключэнне

Заключэнне павінна змяшчаць:

– кароткія высновы па выніках выканання працы;

– ацэнку паўнаты рашэнняў пастаўленых задач;

– ацэнку эфектыўнасці ўкаранення;

– ацэнку навуковага ўзроўню выкананай працы ў параўнанні з лепшымі дасягненнямі ў гэтай галіне.

2.7 Спіс выкарыстаных крыніц

Спіс павінен змяшчаць звесткі пра крыніцы, выкарыстаныя пры выкананні працы. Звесткі аб крыніцах прыводзяцца ў адпаведнасці з патрабаваннямі ДАСТ 7.1.

2.8 Дадаткі

У дадаткі рэкамендуецца ўключаць матэрыялы, звязаныя з выкананай працай, якія па якіх-небудзь прычынах не могуць быць уключаныя ў асноўную частку.

3 ПРАВІЛЫ АФАРМЛЕННЯ ПРАЦЫ

3.1 Агульныя патрабаванні

3.1.1 Выкладанне тэксту і афармленне працы выконваюць у адпаведнасці з ДАСТ 2.105. Старонкі тэксту і ўключаныя ў працу ілюстрацыі і табліцы павінны адпавядаць фармату А4.

3.1.2 Праца павінна быць выканана друкаваным спосабам з выкарыстаннем камп’ютара і прынтара на адным баку ліста белай паперы фармату А4 (210'297 мм) праз паўтара інтэрвала. Колер шрыфта павінен быць чорным, вышыня літар, лічбаў і іншых знакаў – не менш за 1,8 мм (кегль не менш за 12). Тэкст працы трэба друкаваць, захоўваючы наступныя памеры палёў: правае – 10 мм, верхняе, левае і ніжняе – 20 мм.

3.1.3 Памылкі друку, абдрукоўкі і графічныя недакладнасці, выяўленыя ў працэсе падрыхтоўкі працы, дапускаецца выпраўляць падчысткай або зафарбоўваннем белай фарбай і нанясеннем на тым жа месцы выпраўленага тэксту (графікі) машынапісным спосабам або чорнымі чарніламі, пастай або тушшу – рукапісным спосабам.