19. Банк қызметінің өмірлік цикл моделі

Банк қызметінің өмірлік циклы 4 кезеңді қамтиды: нарыққа ену, өсу, кемелдену, құлдырау.

Қызметтің нарыққа енуі банктің қызметті ең алғаш бағытталған нарыққа ұсынуынан басталады. Бұл кезде қызметті тұтынудың өсу жылдамдығы бәсең болады және түсетін пайда көлемі аз болады. Сол себепті клиенттерді тарту мақсатында маркетингке, қызметті жарнамалауға қаражат көп бөлінеді, сәйкесінше қызметтің бағасы жоғары болады.

Өсу кезеңі қызметті тұтынудың өсуімен сипатталады, пайда максималды деңгейге жетеді. Бұл сатыда банк қызметті тұтыну аумағын кеңейтуге тырысады, жаңа нарықтарды іздей бастайды. Нәтижесінде пайда көбейеді және жаңа клиенттер қосылады. Банк барынша осы кезеңге ұзартуға тырысады.

Кемелдену өсудің бәсеңдеуімен, кейде оның мүлде тоқтауымен сипатталады. Бұның бірнеше себептері болады: біріншіден, кемелденуге қарай тұтынушының қажеттіліктері өзгеруі мүмкін; екіншіден, бұл қызмет түрінің орнына басқа жетілдірілген қызмет келуі мүмкін; үшіншіден, банктің бәсекелестікке шыдамауы ықтимал; төртіншіден, қызмет банк үшін жеткілікті дәрежеде рентабельді болмауы мүмкін.

Құлдырау кезеңі тұтыну көлемінің төмендеуі мен пайданың азаюымен сипатталады. Банк құлдырауды тоқтату мақсатында өз қызметіне талдау жасайды, сол арқылы жағдайды қалпына келтіруге тырысады. Бірақ банк не істесе де құлдырау кезеңі жалғасады және банкке жаңа қызмет түрін ойлап табуға тура келеді.

Банк қызметінің өмірлік цикл моделі

20. Радиодағы банктік жарнама ерекшеліктері.

Жарнама банктің қызметі жайлы ақпаратты тұтынушыларға жеткізу әдісі. Жарнаманың көптеген түрлері бар, соның ішінде радиодағы жарнамаға тоқталсақ. Радиодағы банктік жарнаманың басты артықшылығы – Барлық өңірлерге тәулік бойы таралуы және бағдарламалардың әртүрлілігі. Сонымен қатар радионы барлық жерде: үйде де, көлікте де, көшеде де тыңдайды. Сол себепті радиобағдарламадағы жарнама басқа жарнама түрлеріне қарағанда тұтынушылар аудиториясын көп қамтиды. Радиожарнаманы жасау жылдам, әрі қол жетімді. Бірақ жарнаманың бұл түрінің өзіндік кемшіліктері де бар. Адам ақпараттың 90%н көру арқылы қабылдайды, ал радиодағы жарнаманы қабылдауға көз қатыспайды. Сонымен қатар мұндай жарнама клиентпен кері байланыс орнатуды қиындатады. Көп жағдайда жарнамада айтылған ақпараттарды жазып алу үшін қажетті қалам, қаламсап, қағаз қол астында бола бермейді.

Радиодағы банктік жарнаманың тиімділігін арттыру үшін келесідей ұсыныстарды қолданған жөн:

• Жарнаманың тыңдаушылардың қиялдарына әсер етуін қамтамасыз ету керек;

• Белгілі бір өнім немесе қызмет түрінің жарнамасын есте қаларлықтай әуенмен әсемдеңіз;

• Жарнаманың идеясы анық, әрі нақты болуы қажет;

• Тыңдаушыны бірден қызықтыратындай болуы қажет, әйтпесе тыңдаушы басқы радиобағдарламаға ауыстыруы мүмкін;

• Радиожарнамаға атақты адамдардың даусын қосу керек;

• Жарнаманы праймуақыт кезінде, яғни тыңдаушылар көп болған мезетте жіберсеңіз, нәтиже айтарлықтай жақсы болады;

• Радиожарнама мен қатар сол өнімнің теледидардағы жарнамасы жүріп жатса, екеуінде де бірдей әуен, бірдей мазмұн, бірдей кейіпкерлер болуы шарт;

• Радиобағдарламаны жазылған мазмұны арқылы бағалауға болмайды, оған баға беру үшін радиожарнаманы тыңдап көру қажет.