Міністэрства культуры Рэспублікі Беларусь

УА “Беларускі дзяржаўны універсітэт культуры і мастацтваў”

Рэжысура метадычныя указанні па напісанню курсавых і дыпломных работ

для студэнтаў вышэйшых навучальных устаноў

дзённай і завочнай формаў навучання

па спецыяльнасці 1-18 01 01 “Народная творчасць”,

спецыялізацыі 1-18 01 01-03 “Тэатральная творчасць”

Мінск 2007

Метадычныя ўказанні распрацаваны

Голікавай Л.Ф., кандыдатам мастацтвазнаўства, дацэнтам, загадчыкам кафедры тэатральнай творчасці Беларускага дзяржаўнага ўніверсітэта культуры і мастацтваў

Алекснінай І.А., кандыдатам мастацтвазнаўства, дацэнтам, дацэнтам кафедры тэатральнай творчасці Беларускага дзяржаўнага ўніверсітэта культуры і мастацтваў

Зацверджана на Савеце факультэта традыцыйнай беларускай культуры і сучаснага мастацтва 23.10.2007г., пратакол № 2.

Рэцэнзенты:

Рэкамендаваны вучэбна-метадычнай Радай Беларускага дзяржаўнага універсітэта культры і мастацтваў

У метадычных указаннях для спецыялізацыі “Народная творчасць” (“Тэатральная”) раскрываецца працэс падрыхтоўкі і напісання курсавой работы па тэарэтычных і тэарэтыка-практычных напрамках, а таксама дыпломнай работы (рэжысёрскага пастановачнага плана спектакля), даюцца ўзоры неабходных дакументаў, бібліяграфічнага апісання выкарыстанай літаратуры, прыклады афармлення дадаткаў.

Для студэнтаў дзённай і завочнай формы навучання.

УСТУП

Сучасныя патрабаванні да спецыялістаў у галіне культуры і мастацтваў ва ўмовах шматузроўневай падрыхтоўкі вымагае асаблівай увагі да напісання такіх кваліфікацыйна-атэстацыйных работ будучых рэжысёраў, якімі з’яўляюцца курсавыя праекты як папярэдні крок да напісання дыплопных работ. Яны сведчаць аб якасці падрыхтоўкі студэнта, так як ў іх адлюстроўваюцца не толькі спецыяльныя (практычныя) веды, але і агульны ўзровень падрыхтаванасці да абранай прафесіі рэжысёра, арганізатара тэатральнай творчасці, выкладчыка тэатральных дысцыплін. У гэтых работах студэнт мае магчымасць прадэманстраваць і рэаліаваць цалкам свае творчыя і навуковыя магчымасці.

Вучэбна-даследчая праца студэнтаў кафедры тэатральнай творчасці не абмяжоўваецца напісаннем артыкулаў і выступленнем на спецыяльнай студэнцка-аспіранцкай штогадовай навукова-практычнай канферэнцыі, вынікі якой дэпаніруюцца або публікуюцца ў друку, а лепшыя работы рэкамендуюцца да ўдзелу ў Рэспубліканскім конкурсе студэнцкіх навуковых работ. Важнай часткай вучэбна-даследчай работы застаюцца менавіта курсавыя праекты.

На кафедры тэатральнай творчасці яны выконваюцца на 2 і 5 (ФТБК і СМ) і 4 (ФЗН) курсах. У адпаведнасці са спецыфікай абранай прафесіі, студэнт-рэжысёр мае права выбраць тэму курсавой работы або ў чыста тэарэтычным напрамку (гісторыі і тэорыі нацыянальнага /сусветнага/ тэатральнага мастацтва), або тэарэтычна-практычным (напісанне рэжысёрскага пастановачнага плана, абранага для пастаноўкі спектакля або ўрыўка з яго). У апошнім выпадку курсавая работа будзе складацца з двух асноўных этапаў: тэарэтычная распрацоўка эксплікацыі спектакля і практычнае яго ўвасабленне (або пастаноўка урыўка з абранай для аналізу п’есы).

У абоіх выпадках праца над курсавым праектам набывае адметнае значэнне, паколькі раскрывае не толькі ўзровень падрыхтаванасці студэнта да працы над драматургічным тэкстам, але і адлюстроўвае здольнасці студэнта да навуковага мыслення, асэнсавання творчых працэсаў, якія адбываюцца ў сучасным грамадстве і тэатральным мастацтве, уменню дакладна фармуліраваць і выказваць свае думкі і погляды, валодаць прафесійнай і навуковай мовай.

У курсавых праектах падводзяцца своеасаблівыя вынікі атрыманых студэнтамі ведаў як падчас лекцыйных, практычных, індывідуальных заняткаў з педагогам-рэжысёрам, так і іх самастойнай работы, што вельмі важна для авалодання рэжысёрскай прафесіяй.

Дыпломная работа – асабістая творчая і практычная дзейнасць выпускнікоў, у якой тэарэтычныя і практычныя веды, набытыя студэнтамі падчас аўдыторных заняткаў, самастойнай работы здзяйсняюцца ў практычных умовах функцыяніравання творчага калектыву тэатра, цэнтраў эстэтычнага выхавання, навучальных устаноў.

Тэмы дыпломных работ павінны быць актуальнымі і адпавядаць сучаснаму стану і перспектывам развіцця нацыянальнай тэатральнай культуры, улічваць маральна-эстэтычныя патрабаванні грамадства, несці пэўны ідэйна-мастацкі змест. Пажадана, каб дыпломная работа арганічна ўваходзіла ў вытворчыя планы баз практыкі – устаноў культуры і адукацыі, навучальна-эстэтычных цэнтраў, г.зн. была звязана з вытворчасцю.

Патрабаванні да напісання курсавой работы