Судьяға, прокурорға, тергеушіге, алдын ала анықтауды жүргізуші адамға, сот приставына, соттың атқарушысына қатысты жала жабу (343-бап)

Қылмыстың тікелей объектісі-сот, прокуратура, тергеу, алдын ала анықтау органдарының дұрыс қызметі. Қосымша тікелей объект заңда көрсетілген жәбірленушілердің ар-намысы, адамгершілігі. Жәбірленушілердің тізімі заңның өзінде көрсетілген, олар –судьялар, присяжной заседательдер (343-баптың 1-тармағы), прокурор, тергеуші, алдын ала анықтауды жүргізуші адам, сот приставы, соттың атқарушы (343-баптың 2-тармағы). Қылмыстың объективтік жағы істің немесе материалдардың сотта қаралуымен байланысты судьяға қатысты жала жабу (343-баптың 1-тармағы) Алдын ала тергеу жүргізумен не үкімнің орындалуымен, соттың шешімімен немесе өзге сот актісімен байланысты прокурорға, тергеушіге, алдын ала анықтауды жүргізуші адамға, сот приставына, соттың атқарушысына қатысты жасалған дәл сол әрекет (343-баптың 2-тармағы). Басқа адамның ар-намысы мен қадір-қасиетіне нұқсан келтіретін немесе оның беделін түсіретін көрінеу жалған мәліметтер тарату жала жабу деп танылады (Қылмыстық Кодекстің 129-бабы). Судьяға, присяжной заседательге, прокурорға, тергеушіге, алдын ала анықтауды жүргізуші адамға, сот приставына, соттың атқарушысына жала жабу олардың сотта іс қарауына, тергеу, алдын ала анықтама жүргізуін, үкімін орындауына байланысты орын алады, жала жабу мәліметтері көпшілік алдында таратылуы (мысалы сот залында) немесе басқа бір адамға айтылуы мүмкін. Жала жабу әр түрлі болады, мысалы судьяны, присяжной заседательді, басқа да сот талқылауына қатысушыларды іс бойынша пара алды деп лақап тарату, жәбірленушілердің моральға жат мінез-құлықтары жөнінде өсек тарату т.с.с. Қылмыс формальдық құрамға жатады. Қылмыс жәбірленуші жөніндегі көрінеу жалған мәліметтерді таратқан уақыттан бастап аяқталған деп танылады. Қылмыс субъективтік жағынан тек тікелей қасақаналықпен жүзеге асырылады. Қылмыстың субъектісі 16-ға толған кез келген адам.

Айғақтарды бұрмалау (348-бап)

Бұрыңғы Қылмыстық кодекстерде мұндай бап болған емес. Адамдарды жаппай қуғын-сүргінге салу кезеңдерінде бұл қылмыс кең өріс алды, айғақтарды көрінеу бұрмалаудың салдарынан сан мыңдаған адамдар жазықсыз жалаға тартылады. Мұндай қылмыстың қоғамға қауіптілігі сол айғақтарды бұрмалау нәтижесінде әділетсіз шешім, үкім, басқа маңызды іс жүргізу актілерінің шығарылуына жол берілді. Қылмыстың тікелей объектісі анықтама, тергеу, сот, прокуратура органдарының дұрыс қызметі. Қосымша тікелей объект жәбірленушінің, айыпкердің, сотталушының, жауапкердің, талапкердің заңды мүдделері. Қылмыстың заты-айғақтар, оған әр түрлі құжаттар, заттай айғақтар, сарапшылардың қорытындысы, куәнің, жәбірленушінің, сезіктінің, айыпкердің жауаптары, әр түрлі тергеу амалдарының хаттамалары жатады. Қылмыстың объективтік жағы азаматтық іс бойынша іске қатысушы адамның немесе оның өкілінің айғақтарды бұрмалауы арқылы көрініс табады. Айғақтарды бұрмалаудың тәсілі әр түрлі болады: құжаттарды қолдан жасау, оған өзгерістер енгізу, заттай айғақтарды айырбастау, жалған дәлелдемелер келтіру, талап арыздарға өзгерістер енгізу, жауап беру хаттамаларын ауыстыру, жалған куәлар дайындау т.с.с. Қылмыстық іс бойынша алдын ала анықтау жүргізуші адамның тергеушінің, прокурордың іс жүргізу әрекеттеріне қатысушы маманның немесе қорғаушының айғақтарды бұрмалауы үшін жауаптылық Қылмыстық кодекстің 348-бабының 2-тармағында көзделген.Мұндай бұрмалаудың салдарынан әділетсіз үкім немесе қылмыстық істі қысқарту жөнінде заңсыз қаулы шығарылуы мүмкін. Қылмыстық кодекстің 348-бабының 1,2-тармақтарындағы қылмыс формальдық құрамға жатады және олар айғақтарды бұрмалаған сәттен бастап аяқталған деп танылады. Қылмыстың құрамы болу үшін бұрмаланған айғақтар негізінде әділетсіз үкім, шешім немесе басқадай іс жүргізу актілерінің орын алуы шарт емес. Қылмыс субъективтік жағынан тікелей қасақаналықпен істеледі. Қылмыстың субъектісі Қылмыстық Кодекстің 348-бабының 1-тармағы бойынша-азаматтық іске қатысушылар: талапкер, жауапкер және олардың өкілдері, Қылмыстық Кодекстің 348-бабының 2-тармағы бойынша алдын ала анықтама жүргізуші адам, тергеуші, прокурор, іс жүргізу әрекеттеріне қатысушы маман, қорғаушы.