Дунейы артист.

Нæ дуджы номдзыд дирижер, культурæйы архайæг, дунейы артист Гергиты Валерий райгуырд 1953-æм азы. Дзæуджыхъæуы аивæдты училище каст куы фæци, уæд бацыд Ленинграды Римский-Корсаковы номыл консерваторимæ. Абон уый у Мариины театры директор æмæ аивадон разамонæг, лæвæрд ын æрцыдысты кадджын нæмттæ «Уæрæсейы адæмон артист» æмæ «Дунейы артист».

Гергиты Валери мыггагмæ бабаста æртæ кадджын номы: Мæскуы, Санкт-Петербург æмæ Дзæуджыхъæуы. Валерийы курдиат у æнæхъæн наукæ. Уый ирдæй равдыста, сфæлдыстадон Олимпмæ кæй кæны æрмæст стыр курдиат æмæ титаны куыст. Йæ номимæ баст сты Уæрæсейы æмæ фæсарæнты егъау фестивальтæ, Уæрæсейы æмæ Петербурджы хъуыстгонддæр театры æнтыстдзинæдтæ, уæлахизон оперон премьерæтæ. Дунейы æмæ йæ райгуырæн Ирыстоны дæр Валерийæн стыр аргъ кæнынц.

Валерий бирæ уарзы йæ фыдæлты зæхх. Йæ 50 азы бон сбæрæг кодта Дзæуджыхъæуы. Уый Ирыстонæй фæстæмæ куы цыд, уæд загъта: «Фæнды мæ Дзæуджыхъæуы культурон-музыкалон центр саразын. Цæмæй ардæм алы бон дæр цæуой уазджытæ, нæ хæлæрттæ, музыкалон аивады ирддæр «стъалытæ» æмæ та баууæндой рагон таурæгъыл, Кавказ Хуыцауы æвзæрст бæстæ кæй у».

Валерийæн ис бинонтæ: мад, ус, дыууæ фырты, чызг æмæ дыууæ хойы.

Номдзыд - прославленный, знаменитый

Разамонæг - руководитель

Мыггагмæ бабаста - навеки связал

Сфæлдыстадон - творческий

Курдиат - талант

Егъау - крупный,большой

Æнтыстдзинæдтæ - достижения, успехи

Аргъ кæнын - ценить