Панöм нинкöм

Старик мунö ныв ордö гöститны. Сивъяс — прос котома, киас — бедь.

Мунас, мунас — панöм нинкöм аддзас, котомкаö пуктас да одзлань оськалö. А нылыс кытöн и олö, не öтiк лун колас мунны.

Рытöн локтас деревняö, узьны юасьö. А сылiсь юалöны:

— Öтнат я тэ?

— Öтнам, öтнам.

— Но, узь инö.

Старик нинкöмсö лабич увтö чапкас, котомкасö ― юрöдзас и пишкö-узьö.

Асывнас кöзяйка чышкисьны пондас, аддзас панöм нинкöмсö да горын лонтас.

Старик чеччас, юыштас-сёйыштас да мунны лöсьöтчö. А нинкöмыс лабич увтас абу.

— Нинкöмöс кин нö босьтiс? Вайö-ко!

Кöзяйка висьталас:

— Ме сiйö горын сотi.

Старик корö:

— Кöть кысь вайö! Од сетö — джагöтча.

— Сотi да кысь сета?

― Сэк курича вайö!

Сетас кöзяйка стариклö курича. Старик одзлань оськалö да сьылыштлö:

Панöм нинкöмöс

Вежи курича вылö,

Öт-та!

Рытнас мöдiк деревняö локтас, корсьö узьны.

— Öтнат я тэ?

— Ми кыкöн — мекöт курича.

— Но, лэдз куричатö дзодзоггез дынö, ачыт керкуись лабич вылö вод.

Ой чулалас, старик пондас куричасö босьтны, а сiйö дзодзоггес торкöмась. Старик курича местö корас дзодзогöс, сылö сетасö дзодзогсö, и сiя одзлань оськалö да сьылыштлö:

Нинкöм — курича вылö,

Курича — дзодзог вылö,

Öт-та!

Куимöт деревняö корсьö узьны, сылiсь юасьöны:

— Öтнат я?

— Ми кыкöн — мекöт дзодзог.

— Йöрт дзодзогтö гидö, ачыт керкуись лабич вылö вод. Ашынас пырас дзодзогысла, а сiйö баляэс торкöмась, и старик дзодзогыс понда босьтас баран. Мунö одзлань да сьылыштлö:

Нинкöм — курича вылö,

Курича — дзодзог вылö,

Дзодзог — баран вылö,

Öт-та!

Нёльöт деревняын корсьö узьны, сылiсь юалöны:

— Öтнат я тэ?

— Ми кыкöн — мекöт баран.

— Лэдз барантö картаö, ачыт керкуись лабич вылö вод. Ашынас старик пырас баранысла, а барансö öшкаэз торкöмась. И босьтас бараныс понда öшка.

Мунö одзлань да сьылыштлö:

Нинкöм — курича вылö,

Курича — дзодзог вылö,

Дзодзог — баран вылö,

Баран — öшка вылö,

Öт-та!

Витöт деревняын корсьö узьны, сылiсь юалöны:

— Öтнат я тэ?

— Ми кыкöн — мекöт öшка.

— Коль öшкатö вöлыскöт, ачыт керкуись лабич вылö вод.

Старик сiдз и керас.

Ашынас пырас öшкаысла, а öшкасö вöлыс зуралöм да коксö чегöтöм. И старик öшкаыс понда босьтас вöв.

Мунö вöв вылын да гажöн сьылыштлö:

Нинкöм — курича вылö,

Курича — дзодзог вылö,

Дзодзог — баран вылö,

Баран — öшка вылö,

Öшка — вöв вылö,

Öт-та!

Мунас, мунас, аддзас чапкöм додь. Додяс куйлöны сийöс-сермöт да дуга. Кöть умöлик додьыс, да сё жö не вöв спина вылын пукавны лоас — доддялас вöвсö.

Чапкыштас додяс лыс, чегöтас шать, сувтас пидзöс вылас додяс да рöк-рöк мунö одзлань, ачыс сьылыштлö:

Швычкö шатёк,

Рöктö вöлок,

Дзуртö додёк.

Ны-ко-о!

Ыб вылын пантасьö кöч, шуö:

— Но и басöка сьылан, старик! Ме бы сьыла жö, пуксьöт додят!

— Пуксьы.

Рöктöны да кыкöн сьылöны:

Швычкö шатёк,

Рöктö вöлок,

Дзуртö додёк,

Ны-ко-о!

Вöр дорын пантасьö руч.

— Но и басöка сьылат! Ме бы сьыла жö, пуксьöтö менö!

— Пуксьы!

Мунöны да куимöн сьылöны:

Швычкö шатёк,

Рöктö вöлок,

Дзуртö додёк,

Ны-ко-о!

Вöрын пантасьö кöин.

— Но и басöка сьылат! Ме бы сьыла жö, пуксьöтö менö.

— Пуксьы!

Мунöны да нёльöн сьылöны:

Швычкö шатёк,

Рöктö вöлок,

Дзуртö додёк,

Ны-ко-о!

Дзиб вöрын пантасьö ош, шуö:

— Но и басöка сьылат! Ме бы сьыла жö, пуксьöтö менö!

— Пуксьы!

Мунöны да витöн ни сьылöны:

Швычкö шатёк,

Рöктö вöлок,

Дзуртö додёк,

Ны-ко-о!

Туйвежöдз локтасö, пондасö кежны бокись туй вылö, да додь öжныс чегас. Старик и шуö:

— Тэ, кöч, медчож, пырав вöрас да додь öж вай. Кöч ваяс нинпу шать.

— Эта оз лöсяв, — шуö старик. — Ноко тэ, руч, котрась да буржыкö вай.

Руч ваяс пипу шать.

— Эта оз лöсяв, — шуö старик. — Ноко тэ, кöин, ветлы да буржыкö вай.

Кöин ваяс ньывпу бедь.

— Эта оз лöсяв, — шуö старик. — Ноко тэ, ош, кызжыкö вай.

Ош ваяс кöз йыв.

— И эта оз лöсяв, — шуö старик. — Ковсяс аслым ветлыны.

Мунас старик додь öжсö кошшыны, а сы коста руч, кöин да ош косяласö вöвсö, яйсö сёясö, а лыэсö кучикас бöр сюясö, кучиксö додь öжжес коласö сувтöтасö да пыкöталасö — бытьтö вöв сулалö, — асьныс пышшасö.

Старик локтас да пондас вöвсö юскыны — сiя гиль-голь киссяс.

Вот тэныт и —

Швычкö шатёк,

Рöктö вöлок,

Дзуртö додёк!

Тпру-у-у!

Аддзас старик бур бедь да и мунас нылыс ордö гöститнытö подöн.