Соборный приговор 1584 г. Об отмене тарханов29

Благоволением Бога и Отца, и споспешением Сына³⁰, и содейством Святаго Духа, в Троицы славимаго Бога нашего и во единстве поклоняемого милостию, пречистый и преблагословенные владычицы нашия богородицы молитвами, и вели­ких чудотворцев молитвами, повелением, благоворнаго царя и великого князя Феодора Ивановича всеа Русии, мы прео­священный Деонисей митрополит всеа Русии, архиепископ Великаго Новагорода и Пскова Александр … [далее перечислены 36 имен высших церковных иерархов] собрахомся в преименитом граде Москве некоих ради царских вещей, пачеж и о настоящаго ради греха всего христьянства, что Божьим судом великий государь, блаженные памяти благочестивый царь и великий князь Иван Васильевич всеа Русии, во иноцех Иона³¹, оставль земное царство, отъиде в небесное царство; а по благосло­венью отца своего, великий государь, благочестивый царь и великий князь Феодор Иванович, всеа Русии самодержец взем скифетр Росиискаго царствия, советоваху с отцом свои и богомольцом, с преосвященным Деонисьем митрополитом, и со всем освященным собором, и со всеми бояры и со всем синклитом³²: како совокупишася на христьяны туркове и агаряне³³ и литовской король, и все области немецкие, и распыхахуся дивиим образом, гордостию дмяшеся, хотяху потребити православие. И мы сих ради со благочестивым царем нашим поболехом зелне, и многая попеченья о сем благочестивый же царь наш Феодор Иванович всеа Русии с своими бояры и со всем своим синклитом сотвори, якоже довлеет его царской власти.

В сих же и в нас внесена быша некая, яко возложеная, яже по священным епископиям и по святым монастырем в пустошь изнуряютца ради пьянственаго и непотребнаго слабого жития многообразие, многая жив запустения приидоша.

И якоже убо по монастырем сия запустеваху, а х тому от мирских живущее прилагаху, не токмо ж по благословней вине, но и с ухищрением и тяжею, и прибытка никоегож несть, но развее токмо по монастырем в пустошь изнуряетца на пьянственныя и на иные проторы, яже не токмо иноком, но и мирским свыше потребы не подобает творити. И сия убо по монастырем в пустошь изнуряхуся паче потребы, а воинственому чину от сего оскудение приходит велие.

И преж убо о сем, блаженные памяти при благочестивом царе и великом князе Иване Васильевиче, а во иноцех Ионе, и сыне его, блаженные памяти царевиче князе Иване, и при освященном Антоние митрополите всеа Русии, и всего освященнаго собора и всего царского синклита, уложена была сице³⁴, и на утвержение грамоту написавше, утвердиша в лете семь тысящь восмьдесят осмаго году, генваря в пятый на десятый день [15 января 1580]: что с того году и с того дни митрополиту, и архиепископом, и владыкам и монастырем вотчин не покупати, и по душе³⁵ ни по ком вотчин в монастыри не имати, для воинского оскуденья, что воинство велие прииде во оскудение; и тое бы грамоту переписати и укрепити по тому ж.

Другое ж и о том советоваху и утвердихом, с повелением благочестиваго царя и великого князя Феодора Ивановича всеа Русии, смиренный Деонисий митрополит со всем освященным собором и со всем царским синклитом, о тарханех, чтоб вперед тарха­ном не быти; что земли митрополичи, и архиепископли, и владычни³⁶ и монастырские в тарханех³⁷ и с тех никакие царские дани и земских розметов не платят, а воинство служилые люди те их земли оплачивают: и сего ради многое запустение за воинскими людми в вотчинах их и в поместьях, платячи за тарханы; а крестьяне, вышед из-за служилых людей, живут за тарханы во лготе, и от того великая тощета воинским людем прииде.

И сего ради, для великих нуж и тощеты воинским людем, по совету благочестиваго царя и великого князя Феодора Ивановича всеа Русии, мы преосвященный Деонисей митрополит всеа Русии, и со всем освященным собором, и со всеми бояры и со всем царским синклитом, уложихом сице: да церкви Божия и священный места без мятежа будут, а воин­ской чин на брань противу врагов креста Христова ополчатца крепце, и сице устроихом и утвердихом по тому ж, как отец его, государь блаженные памяти царь и великий князь Иван Васильевич всеа Русии, и сын его, блаженные памяти царевич князь Иван Иванович, утвердили прежнюю грамоту: елико есть земель и земляных угодий, и елико недвижимых вещей, еже есть села и деревни, и пожни и сеножати, что до сего даная, с лета семь тысящь восмьдесят осмаго, генваря месяца пятогонадесять дня [15 января 1580 г.], и возложенная богови в митрополие, и в епископиях и по монастырем, да ничтоже претворяетца, и из митропольи, и из епископьи и из монастырей не исходит, и вотчины никоторым судом ни тяжею у митрополита, и у владык и у монастыря с того лета не емлют и не выкупают; хоти которое место и не утвержено крепостьми³⁸, и у того монастыря не выкупить; и вперед с манастыри о вотчинах не тягатися, а в монастыри вотчин не давати.

Также от сего году, лета семь тысящь девятьдесят третьяго, месяца сентября перваго числа [1 сентября 1584 г.], на время, до государева царева и великого князя Феодора Ивановича всеа Русии указу, для воинского чину и оскудения, тарханы, отставити, покаместа земли поустроитца, и помочь во всем учинитца царским осмотрением; а платить тарханом всякие царские подати и земские розметы всяким тарханом от священных, и боярским и княженецким, со всеми людми ровно всей земле, как тарханом, так и всяким служилым людем, и тамга³⁹ тарханом и всяким людем во то время до государева указу платить, хто ни почнет торговать, чтоб воинство конечно во оскудение от того не было.

И вотчинником вотчин своих вперед, по прежней грамоте и по нынешней, по душам не давати, а давати за них в монастыри денги, которое село чево судит, а село имать вотчинником; а будет у кого роду не будет ближнего, и та вотчина имати на государя, а денги за нее платити ис казны, чтоб в службу служилым людем земли прибавливати.

А митрополиту, и владыкам и монастырем земель не покупати, и закладной⁴⁰ не держати.

А хто после сего уложенья купит землю в которой монастырь, или закладня учнет за собою который монастырь держати: и те земли имати на государя безденежно; а которые ныне закладни за митрополитом, и за владыками и за монастыри, и те земли поимати на государя; а в денгах ведает Бог да государь, как своих богомолцов пожалует.

А вперед кияженецких вотчин в монастыри не имати; а хто возмет без государского ведома, и те вотчины взяти на государя безденежно.

А которые монастыри покупили княженецкие вотчины, и те вотчины взяти на государя; а в денгах ведает Бог да государь, как своих богомолцов пожалует.

А вперед митрополиту, и владыкам и монастырем земель не прибавливати некоторыми делы; жити им на тех землях; что ныне за ними, с того лета, как приговор был преж сего, и ныне с лета семь тысящь восмьдесят осмаго, генваря месяца пятогонадесять дня [15 января 1580].

А всякие царские дани платить всяким тарханом от священных, и от бояр и от князей с слу­жилыми людми ровно до государева указу. И в закладчикех за собою торговых людей, с которых идет царские дани, как от священных, так от мирских царского синклита, не держати.

А которое место убогое, земли будет мало, или не будет: и он бьет челом государю, и государь с митрополитом соборне и з бояры приговоря, и устроят тот монастырь землею, как будет пригоже, как бы ему мочно прожити. А на большое утверждение царь и великий князь Феодор Иванович всеа Русии к сей грамоте печать свою приложил. А митрополит Деонисей всеа Русии к сей грамоте печать свою привесил, а руку свою подписал. А архиепископы и епископы печати свои привесили, и руки свои подписали; а архимариты, и игумены и старцы руки свои приложили.