1161772304_Tipikon

В среду 6-я седмицы по пасце:

На Утрени, начало творит священник: Слава святей, и единосущней: по обычаю, с кадилом, и со стихи, яко изобразися на вечерни, и потом глаголет настоятель, или чтец: Слава в вышних богу: и шестопсалмие по обычаю. На Бог господь, тропарь воскресн, глас 5: Собезначальное слово: дважды. Слава, и ныне, богородичен его. и обычныя кафисмы. По 1-й кафисме седальны воскресны. Слава, и ныне, богородичен, и чтение Иоанна. По 2- й кафисме седален слепаго. воскресение христово: и псалом 50. Каноны три: Пасхи со ирмосом, на 6, и слепаго на 4, и предпразднства вознесения, на 4. Катавасиа: спасителю богу: По 3-й песни, кондак и икос слепаго, и седален, глас 1. Подобны: Гроб твой: Воочил еси Христе: Слава, и ныне: Родился еси: По 6-й песни, кондак пасхи: Аще и во гроб: и икос, и пролог. На 9-й песни, честнейшую не поем: но поем припевы пасхи. К тропарем же канонов слепаго и предпразднства, глаголем стихи песней. Катавасиа: Тя паче ума: Светилен пасхи: Плотию уснув: дважды. и слепаго: умныя мои очи: На хвалитех стихиры на 8: и слепаго на 4, глас 2: Слепый родивыйся: Таже стихиры пасхи с припевы их. Слава, и ныне, глас 5: воскресния день: и Христос воскресе: якоже указася на вечерни, и славословие великое. Таже, тропарь, глас 5: Собезначальное слово: Слава, и ныне, богородичен его. ектении, и отпуст без креста, и святаго на отпусте поминает, егоже будет день. и час 1-й в притворе. На 1-м часе, глаголем псалмы обычныя. На Слава, глаголем тропарь: Собезначальное слово: И ныне, богородичен: Что тя наречем: По трисвятом кондак: Душевныма очима: и конечный отпуст, по обычаю, и прочее. Часы пред литургиею глаголем трипсалмнии. Начало литургии, якоже на самую пасху. На Литургии, изобразительная, и блаженна от канона песнь 3 и 6. По входе тропарь, Собезначальное слово: Слава, кондак слепаго: И ныне, пасхи, Аще и во гроб: и прочее. Прокимен пасхи, Сей день, егоже сотвори господь: Аллилуиа пасхи. Апостол и евангелие дне, и прочая служба воскресна вся. Причастный, Тело христово: глаголем же и псалом 33, благословлю Господа: Таже иерей творит отпуст пасхи со крестом. и прочее все поем, конец литургии, якоже указася на самую пасху: и тако отдается праздник святаго и живоноснаго Христова воскресния. На трапезе бывает братии утешение великое, сиречь, елеем, рыбою и вином.

Вчетверток 6-я седмицы по пасце, Вознесение Господа Бога нашего Иисуса Христа.

Всреду вечера, глаголем час девятый трипсалмный. и до недели 8-я, во всяком церковном пении. На малей вечерни, на Господи воззвах, стихиры праздника на 4, глас 6: Господь вознесеся на небеса: Слава, и ныне, глас тойже, Господи апостоли яко видеша тя: Прокимен дне. На стиховне стихиры, глас 1: Возшед на небеса: с припевы их. 1-й, Вси языцы восплещите руками: 2-й, Взыде Бог в воскликновении: Слава, и ныне, глас 2: Родился еси: Таже, Ныне отпущаеши: Трисвятое, и по Отче наш: Тропарь, глас 4: Вознеслся еси во славе Христе Боже наш, радость сотворивый учеником обетованием святаго духа, извещенным им бывшим благословением: яко ты еси сын Божий, избавитель мира.

Таже, ектениа малая, и отпуст. На Велицей Вечерни, по предначинательном псалме кафисмы не глаголем. На Господи воззвах, ставим стихов 10: и поем стихиры праздника. самогласны 5, повторяюще я, глас 6: Господь вознесеся на небеса: Слава, и ныне, глас тойже, Недр отеческих не разлучься: Вход. Свете тихий: Прокимен дне, и чтения праздника, 3. 1-е, пророчества исаиина: Тако глаголет господь: будет в последняя дни: 2-е, Тогоже пророчества: Тако глаголет господь: поидите и внидите враты моими: 3-е, пророчества захариина: Тако глаголет господь: се день грядет господень: На литии стихиры самогласны праздника, глас 1: Возшед на небеса: Слава, и ныне, глас 4: Господи,

таинство еже от веков: На стиховне стихиры самогласны, глас 2: Родился еси яко сам восхотел еси: с припевы, иже писаны на малей вечерни. Слава, и ныне, глас 6: Взыде Бог В воскликновении: Таже, Ныне отпущаеши: и трисвятое. На благословении хлебов тропарь праздника, глас 4: Вознеслся еси во славе: трижды. И чтение великое в деяниих святых апостол. А идеже несть всенощнаго: по Ныне отпущаеши, тропарь праздника, единожды. На повечерии, по Достойно, кондак праздника. Полунощницу поем по обычаю с кафисмою. По 1-м трисвятом, вместо, Се жених: глаголем тропарь праздника. По 2-м трисвятом, вместо, Помяни Господи яко благ: глаголем кондак праздника. Таже, Господи помилуй, 12, и отпуст. молитвы же, Помяни Господи в надежди: не глаголем.

В четверток.

утрени начало по обычаю: и абие чтец глаголет: Приидите поклонимся: трижды. и обычныя два псалма, 19 и 20: и шестопсалмие. На Бог господь, тропарь праздника: Вознеслся еси во славе: трижды. и обычныя кафисмы две, и седальны праздника. Полиелей праздника, и седален. И чтение праздника: похвальная словеса, творение кир андреа, или прочих. Степенна, 1-й антифон 4-го гласа. Прокимен, глас 4: Взыде Бог в воскликновении: Стих: Вси языцы восплещите руками: Всякое дыхание: евангелие марка, зачало 71: воскрес Иисус заутра в первую субботу: воскресение христово: единожды. псалом 50. Стихира праздника, глас 6: Днесь на небесех горния силы: и прочее. Каноны праздника два: 1-й, творение кир Иоанна монаха, глас 5: ирмосы по дважды, тропари на 6. Другий, глас 4, творение кир иосифа, со ирмосом на 6. Катавасиа, божественным покровен: оба лика вкупе: По 3-й песни седален праздника, глас 8. Подобен, Премудрости: Всед на облаки небесныя: Слава, и ныне, тойже, и чтение праздника. По 6-й песни,

Кондак, глас 6: еже о нас исполнив смотрение, и яже на земли соединив небесным, вознеслся еси во славе Христе Боже, никакоже отлучаяся, но пребывая неотступный, и вопия любящим тя: аз есмь с вами, и никтоже на вы.

И икос, и чтем синаксарий. На 9-й песни, честнейшую не поем, но поем припевы праздника. По 9-й же песни катавасиа, Радуйся царице: Таже светилен праздника, учеником зрящим тя: трижды. На хвалитех стихиры на 4, глас 1. Подобен: небесных чинов: Ангельски иже в мире торжествуим: Слава, и ныне, глас 2: Родился еси яко сам восхотел еси: Славословие великое. Тропарь праздника, и ектении, и отпуст. Дается и святый елей братии, и поучение студитово, и час 1-й в притворе. Тропарь и кондак праздника: и совершенный отпуст.

На Литургии: Антифон 1, псалом 46, глас 2: Вси языцы восплещите руками, воскликните Богу гласом радования. молитвами Богородицы, спасе спаси нас. Стих 2: яко Господь вышний страшен, царь велий по всей земли. молитвами Богородицы: Стих 3: Покори люди нам, и языки под ноги наша. молитвами Богородицы: Стих 4: Взыде Бог в воскликновении, Господь во гласе трубне. молитвами Богородицы: Слава, и ныне: молитвами Богородицы: Антифон 2, псалом 47, глас 2: Велий господь, и хвален зело, во граде бога нашего, в горе святей его. спаси ны сыне Божий, вознесыйся во славе, поющия ти: Аллилуиа. Стих 2: Горы сионския, ребра северова, град царя великаго. спаси ны сыне Божий: Стих 3: Бог в тяжестех его знаемь есть, егда заступает и. спаси ны сыне Божий: Стих 4: яко се царие земстии собрашася, снидошася вкупе. спаси ны сыне Божий: Слава, и ныне, единородный сыне: Антифон 3, псалом 48, глас 4: услышите сия вси языцы, внушите вси живущии по вселенней. Таже тропарь, глас тойже: Вознеслся еси во славе Христе Боже наш: Стих 2: Земнороднии же и сынове человечестии, вкупе богат и убог. Тропарь, Вознеслся еси во славе: Стих 3: уста моя возглаголют премудрость, и поучение сердца моего разум. Тропарь, Вознеслся еси во славе: Стих 4: Приклоню в притчу ухо мое, отверзу во псалтири ганание мое. Тропарь: Вознеслся еси во славе: Таже диакон,

Премудрость, прости: Мы же Входное: Взыде Бог в воскликновении, Господь во гласе трубне. Тропарь: Вознеслся еси во славе: Слава, и ныне, кондак, еже о нас исполнив смотрение: Таже трисвятое: Прокимен, глас 6. Вознесися на небеса Боже, и по всей земли слава твоя: Стих: Готово сердце мое Боже, готово сердце мое. Апостол: деяний зачало 1: Первое убо слово сотворих: Аллилуиа, глас 2: Взыде Бог в воскликновении: Стих: Вси языцы восплещите руками: евангелие луки, зачало 114: воскрес Иисус от мертвых, и ста посреде ученик своих: За Достойно поем и до отдания: ирмос, Тя паче ума: Причастен: Взыде Бог в воскликновении, Господь во гласе трубне. Аллилуиа. На трапезе велие утешение братии.

В четверток вечера, вознесения.

Кафисмы не глаголем. Аще ли где всенощнаго не было, кафисму глаголем рядовую. На Господи воззвах: стихиры праздника самогласны 3, и минеи святаго 3. Слава, святаго, аще имать: И ныне, праздника, Аще же ни: Слава, и ныне, праздника, глас 2: Родился еси: Вход. Прокимен великий, глас 6: Бог наш на небеси и на земли, вся елика восхоте сотвори. Стих: Во исходе израилеве от египта, дому иаковля: Стих: Море виде и побеже: Стих: Что ти есть море, яко побегло еси? И паки, Бог наш на небеси и на земли: ектении, Рцем вси: и Исполним вечернюю молитву: На стиховне стихиры праздника, глас 2. Подобен, егда от древа: Глаголет иже всяческая исполняяй: С припевы праздника. Слава, и ныне, глас 6: На горах святых: Тропарь праздника, Вознеслся еси: и отпуст. [Смотри] Службу минеи рядоваго святаго, случившагося в праздник вознесения, поем на повечерии.

[Смотри] Ведати же есть: яко празднуется служба владычняго праздника до пятка пятдесятницы: блаженны же глаголем от канонов праздника.

В пяток вознесения на Утрени.

На Бог господь, тропарь праздника, трижды. Кафисмы обычныя две, и седальны праздника, и чтение. Канон праздника, ирмосы по дважды, тропари на 6: [един по единому пременяюще на всяк день глаголем:] и минеи на 4. По 3-й песни, кондак и икос святаго, и седален его: Слава, и ныне, праздника. По 6-й песни, кондак и икос праздника. По 9-й песни, светилен праздника: Слава, святаго, аще имать: И ныне, праздника. Аще ли ни, Слава, и ныне, праздника. На стиховне, стихиры праздника: Слава, и ныне, праздника. И прочее утрени. На Литургии, блаженна от канона праздника, песнь 1-я, со ирмосом на

6.

В субботу 6-я недели На Литургии.

Праздника песнь 3, на 6. Прокимен праздника: Вознесися на небеса Боже: Апостол деяний, зачало 43: Во едину от суббот собравшимся учеником: Аллилуиа, праздника: евангелие Иоанна, зачало 48: Глаголы, яже аз глаголю вам: Причастен праздника.

Неделя 7-я, святых трех сот 18 богоносных отец, иже в никеи.

На Велицей Вечерни, блажен муж: кафисма вся. На Господи воззвах, ставим стихов 10: и поем стихиры воскресны 3, глас 6: и вознесения 3: и отцев 4, глас 6. Подобен: отчаянная: Слава, глас тойже, самогласен: Таинственныя днесь духа трубы: И ныне: Кто тебе не ублажит: Вход. Прокимен: Господь воцарися, со стихи его: и чтения отцев 3. На литии стихира праздника, глас 1: Возшед на небеса: Слава, отцев, глас 3: Апостольских преданий: И ныне, праздника, глас 6: Господи смотрения совершив таинство: На стиховне стихиры воскресны по алфавиту. Слава, отцев, глас 4: Молебную память днесь: И ныне,

праздника, глас тойже: Господи таинство еже от веков: Таже, Ныне отпущаеши: Трисвятое, и по Отче наш: Тропарь отцев, глас 8: Препрославлен еси Христе Боже наш, светила на земли отцы наши основавый, и теми ко истинней вере вся ны наставивый, многоблагоутробне слава тебе. Дважды.

И праздника, единожды: и благословение хлебов, и чтение деяний святых апостол. [Смотри] Аще ли несть бдения, тропарь воскресн: Ангельския силы: Слава, отцев. И ныне, вознесения. На повечерии, кондак отцев: Слава, и ныне, вознесения. На Утрени, на Бог господь, тропарь воскресн, глас 6: Ангельския силы: дважды. Слава, отцев. И ныне, праздника, вознесения. По кафисмах седальны воскресны с богородичны их, и чтение во евангелии толковом Иоанна, емуже начало: По празднице преславнаго вознесения Господа нашего Иисуса Христа: Непорочны с тропари: Ангельский собор: И впакои гласа. Степенна, и прокимен гласа: Всякое дыхание: евангелие воскресно Иоанна, зачало 67: явися Иисус учеником своим востав от мертвых: Таже, воскресение христово: псалом 50, и прочее обычное. Канон воскресн гласа: со ирмосом на 4: и вознесения на 4: и отцев на 6. Катавасиа: божественным покровен: По 3-й песни кондак и икос вознесения: и седален отцев, глас 4. Подобен: Скоро предвари: Светила пресветлая: Слава, другий, глас тойже. Подобен: Вознесыйся: Никейский светлый град: И ныне, вознесения. По 6- песни,

Кондак отцев, глас 8. Подобен: яко начатки: Апостол проповедание, и отец догматы, церкви едину веру запечатлеша: яже и ризу носящи истины, исткану от еже свыше богословия, исправляет и славит благочестия великое таинство.

И икос. На 9-й песни поем, честнейшую: Светилен воскресн. Слава, отцев. И ныне, праздника. На хвалитех стихиры воскресны 4, и отцев 3, повторяюще 1-ю, глас 6. Подобен: Всю отложивше: Все собравше душевное художество: Слава, глас 8: святых отец лик: И ныне: Преблагословенна еси Богородице Дево: Славословие великое. Тропарь воскресн точию. ектении, и отпуст, и исхождение в притвор. Слава, и ныне, стихира евангельская, глас 6: По еже во ад сошествии: И поучение студитово. и час 1-й. На 1-м часе тропарь воскресн: Слава, праздника: И ныне богородичен часов. По трисвятом кондак праздника. На 3-м часе, тропарь воскресн. Слава, отцев. И ныне, богородичен часов. По трисвятом кондак отцев. Такожде и на прочих часех, тропарь и кондак праздника, и отцев, глаголем пременяюще. На Литургии, блаженна гласа, на 4: и праздника песнь 4-я, на 4: и отцев песнь 6-я, на 4. По входе глаголем тропарь воскресн, таже вознесения и отцев: Слава, кондак отцев. И ныне, вознесения. Прокимен, глас 4, песнь отцев: благословен еси Господи Боже отец наших: Стих: яко праведен еси о всех: Апостол: деяний зачало 44: Суди павел мимо ити ефес: Аллилуиа, глас 1: Бог богов Господь глагола, и призва землю: Стих: Соберите ему преподобныя его. евангелие Иоанна, зачало 56: Возвед Иисус очи свои на небо: Причастен: Хвалите Господа с небес: Другий: Радуйтеся праведнии о господе:

В туюжде неделю вечера:

На Господи воззвах, поем стихиры на 6: отцев, 3, глас 6. Подобен, отчаянная: Из чрева родился еси прежде денницы: и минеи святаго 3. Слава, отцев, глас 6: Таинственныя днесь духа трубы: И ныне, праздника, глас тойже: На горах святых: Прокимен дне. На стиховне стихиры отцев, глас 6. Подобен: Всю отложивше: с припевы их. Слава, глас 3: Апостольских преданий: И ныне, праздника, глас 6: Взыде Бог в воскликновении: Тропарь отцев. Слава, святаго, аще есть: Аще ли ни, Слава, и ныне, праздника. и отдается последование святых отцев.

В понедельник 6 недели на Утрени:

На Бог господь, тропарь вознесения, трижды. Кафисмы две, и седальны праздника. Канон праздника, со ирмосом на 8: ирмосы по дважды: и минеи на 4. На стиховне стихиры праздника, и прочее. [Смотри] На Литургии, блаженна от канона праздника, песнь 5, во вторник 6, в среду 6, в четверток 8.

В четверток вечера 6-я седмицы отдание вознесения.

На Господи воззвах, и все последование, поем праздника, неизменно, якоже и в господьственный день вознесения, кроме чтений, и полиелеа: на вечерни же, и на Утрени, и На Литургии, блаженна праздника, песнь 9, обоих канонов на 8. По входе тропарь праздника. Слава, и ныне: кондак. Прокимен, Аллилуиа, и причастен праздника: апостол же, и евангелие дне. [Смотри] Службу же минеи поем на повечерии.

В пяток вечера пятдесятницы, память совершаем всех от века усопших благочестивых христиан, отец и братий наших.

И поем всю службу о усопших вечер и утро, якоже предызъявися в субботу мясопустную, во всем подобне.

Неделя святыя пентикостии.

На Велицей Вечерни, обычное стихословие: На Господи воззвах, ставим стихов 10: и поем стихиры самогласны, глас 1: Пятдесятницу празднуим: Ины стихиры, глас 2: Видехом свет истинный: Слава, и ныне, глас 8: Приидите людие, триипостасному божеству поклонимся: Вход. Свете тихий: прокимен дне, и чтения праздника 3: 1-е, Числ: Рече Господь к моисею: собери ми седмьдесят мужей: 2-е, пророчества иоилева: Тако глаголет господь: чада сионова радуйтеся: 3-е, пророчества иезекиилева: Тако глаголет господь: прииму вас от язык: На литии, стихиры самогласны 3, глас 2: Во пророцех возвестил еси нам путь спасения: Слава, и ныне, глас 8: егда духа твоего послал еси Господи: На стиховне стихиры самогласны глас 6: Не разумеюще языцы Господи: Припевы писаны на малей вечерни. Слава, и ныне, глас 8: языцы иногда размесишася: Тропарь праздника, глас 8: благословен еси Христе Боже наш. трижды. и благословение хлебов. И чтение деяний святых апостол. [Смотри] Аще ли не будет бдения: По Ныне отпущаеши, тропарь праздника, единожды. На повечерии, по Достойно и по трисвятом

кондак праздника. Полунощницу поем по обычаю. Канон глаголем троичен во октоихе гласа. На Утрени, на Бог

господь, тропарь праздника, трижды: и обычныя кафисмы две. и седальны праздника. и чтение в толковании Иоанна, слово 8: В последний день: на двое. Полиелей и седален праздника, и чтение в богослове. Степенна, 1-й антифон 4-го гласа. Прокимен, глас тойже: дух твой благий наставит мя на землю праву. Стих: Господи услыши молитву мою: Всякое дыхание: евангелие Иоанна, зачало 65: Сущу позде: Конец: И имже держите, держатся. воскресение христово, не глаголем: но абие псалом 50. Слава, молитвами апостолов: И ныне, молитвами Богородицы: Таже стих: Помилуй мя Боже: стихира, глас 6: царю небесный: Канона праздника два, Первый кир космы, глас 6: Другий, глас 4, творение кир Иоанна. ирмосы обою канонов по дважды: тропари на 12. последи же един лик, первый ирмос: и другий лик, другий ирмос. По 3-й песни, седален праздника: Слава, и ныне, тойже. По 6-й песни,

Кондак, глас 8: егда снизшед языки слия, разделяше языки вышний: егда же огненныя языки раздаяше, в соединение вся призва, и согласно славим всесвятаго духа.

И икос. и синаксарий. На 9-й песни, честнейшую не поем. Светилен, подобен: Ибо звездами: Всесвятый душе: дважды. Слава, и ныне, другий: Свет отец: На хвалитех

стихиры, на 6: глас 4. самогласен: Преславная днесь: Слава, и ныне, глас 6: царю небесный: Славословие великое. Тропарь праздника. ектении, и отпуст, и час 1-й. На 1-м часе, тропарь праздника. По трисвятом кондак праздника, и конечный отпуст.

На Литургии: Антифон 1, псалом 18, глас 2: небеса поведают славу божию. молитвами Богородицы, спасе спаси нас. И другий лик тойже стих: небеса поведают славу божию, творение же руку его возвещает твердь. молитвами Богородицы: Стих 2: День дни отрыгает глагол, и нощь нощи возвещает разум. молитвами Богородицы: Стих 3: Во всю землю изыде вещание их, и в концы вселенныя глаголы их. молитвами Богородицы: Слава, и ныне, молитвами Богородицы: Антифон 2, псалом 19, глас тойже. Стих 1: услышит тя Господь в день печали. спаси ны утешителю благий, поющия ти: аллилуиа. Другая страна, тойже стих: услышит тя Господь в день печали, защитит тя имя бога иаковля. спаси ны утешителю благий: Стих 2: Послет ти помощь от святаго, и от сиона заступит тя. спаси ны утешителю благий: Стих 3: Даст ти Господь по сердцу твоему, и весь совет твой исполнит. спаси ны утешителю благий: Слава, и ныне, единородный сыне: Антифон 3, псалом 20, глас 8. Стих 1: Господи, силою твоею возвеселится царь. Тропарь, глас тойже: благословен еси Христе Боже наш: Другий лик: тойже стих: Господи, силою твоею возвеселится царь, и о спасении твоем возрадуется зело. Тропарь: благословен еси Христе Боже наш: Стих 2: Желание сердца его дал еси ему, и хотения устну его неси лишил его. Тропарь: благословен еси Христе Боже наш: Стих 3: яко предварил еси его благословением благостынным, положил еси на главе его венец от камене честна. Тропарь: благословен еси Христе Боже наш: Входное: Вознесися Господи силою твоею, воспоем и поем силы твоя. Таже тропарь: благословен еси Христе Боже наш: Слава, и ныне, кондак: егда снизшед языки слия: Вместо же трисвятаго: елицы во Христа крестистеся: Прокимен, глас 8: Во всю землю изыде вещание их: и до отдания. Стих: небеса поведают славу божию: Апостол деяний, зачало 3: егда скончавашася дние пятдесятницы: Аллилуиа, глас 1: Словом господним небеса утвердишася: Стих: В небесе призре господь: евангелие Иоанна, зачало 27: В последний день великий праздника: За Достойно поем ирмос: Радуйся царице: и до отдания. Причастен: дух твой благий наставит мя на землю праву. Аллилуиа, трижды. И по отпусте литургии глаголется девятый час по обычаю.

В неделю вечера святыя 50-цы.

Знаменует ранее последования ради коленопреклонения, начинает иерей: благословен Бог наш: и глаголет учиненный чтец: царю небесный: и предначинательный псалом. Таже, ектениа великая. На Господи воззвах, стихиры праздника на 6, глас 4, самогласны: Преславная днесь: повторяюще. Вход с кадилом. Свете тихий: Прокимен великий, глас 6: Кто Бог велий, яко Бог нашъ? ты еси Бог творяй чудеса. Стих 1: Сказал еси в людех силу твою. Стих 2: И рех ныне начах, сия измена десницы вышняго. Стих 3: Помянух дела господня, яко помяну от начала чудеса твоя. И паки: Кто Бог велий: Таже возглашает иерей, или диакон: Паки и паки приклоньше колена, господу помолимся. И мы, Господи помилуй, трижды. Нам же приклоньшим колена на землю, и непокровенным сущим, чтет иерей молитвы во олтаре велегласно на люди: Пречисте, нескверне: По скончании же первыя молитвы, диакон глаголет: Заступи, спаси, помилуй, возстави и сохрани нас Боже, твоею благодатию. и Господи помилуй. единожды. Пресвятую, пречистую: и прочее. Таже иерей, возглас молитвы: Твое бо есть еже миловати, и спасати нас: Посем иерей, или диакон глаголет ектению: Рцем вси: и прочее обычно. иерей возглас: яко милостив и человеколюбец Бог еси: и абие диакон: Паки и паки приклоньше колена, господу помолимся. Мы же, Господи помилуй, трижды. и приклоняем колена по предписанному, чтет иерей 2-ю молитву во услышание всех: Господи Иисусе Христе Боже наш, мир твой подавый человеком: По совершении ея, диакон глаголет: Заступи, спаси, помилуй,

возстави и сохрани нас Боже, твоею благодатию. Пресвятую, пречистую: иерей возглас молитвы: благоволением и благостию единороднаго сына твоего: Таже, Сподоби Господи в вечер сей: и посем глаголет диакон: Паки и паки приклоньше колена, господу помолимся. И нам такожде колена приклоньшим, иерей чтет 3-ю молитву: Приснотекущий, животный: Таже присовокупляет ины две, писаны в триоди. По скончании же молитв, диакон глаголет: Заступи, спаси, помилуй, возстави и сохрани нас Боже, твоею благодатию. Пресвятую, пречистую: иерей возглас: Ты бо еси упокоение душ и телес наших: Посем диакон глаголет: Исполним вечернюю молитву: иерей возглас: яко благ и человеколюбец: Мир всем. Диакон: Главы наша господеви приклоним. иерей молитву втай обычную, Таже возглас: Буди держава: И посем сошедшеся оба лика на среде, поем на стиховне стихиры праздника, глас 3: Ныне в знамение всем: с припевы их. Слава, и ныне, глас 8: Приидите людие, триипостасному божеству поклонимся: Посемъ? Ныне отпущаеши: Трисвятое, и по Отче наш: тропарь, глас 8: благословен еси Христе Боже наш: и отпуст. [Смотри] На повечерии, поем канон святаго духа, глас 1, творение феофаново, ирмосы по дважды: Тропари на 4. припев в каноне: Слава тебе Боже наш, слава тебе. По 9-й песни, вместо Достойно, поем ирмос тойже. по трисвятом кондак праздника.

В понедельник святаго духа на полунощнице.

По 1-м трисвятом глаголем тропарь праздника. По 2-м трисвятом кондак праздника. Господи помилуй, 12, и отпуст. молитвы же, Помяни Господи: не глаголем. На Утрени, на Бог Господь тропарь праздника трижды. и обычныя кафисмы, и седальны праздника, и чтение праздника. Канон праздника, глас 6, со ирмосом на 8: Другий, глас 4, со ирмосом на 6: Катавасиа: божественным покровен: оба лика вкупе. По 3-й песни, седален праздника. По 6-й песни кондак и икос праздника, и синаксарий. честнейшую не поем. По 9-й песни светилен праздника, дважды: Другий, единожды. На хвалитех стихиры праздника самогласны, глас 2, на 4. Слава, и ныне, глас 8: языцы иногда размесишася: Славословие великое. Тропарь праздника. ектении и отпуст глаголем праздника: Иже в виде огненных язык: и час 1-й. На Литургии, блаженна от канона праздника, песнь 3, и 6. Таже иерей, или диакон: Премудрость, прости. Мы же входное: Вознесися Господи силою твоею, воспоем и поем силы твоя. Тропарь: благословен еси Христе Боже наш: Слава, и ныне, кондак: егда снизшед: Трисвятое. Прокимен, глас 6: спаси Господи люди твоя, и благослови достояние твое. Стих: К тебе Господи воззову, Боже мой: Апостол к ефесеем, зачало 229: яко чада света ходите: Аллилуиа, глас 2: Помилуй мя Боже, по велицей милости твоей: Стих: Не отвержи мене от лица твоего: евангелие матфеа, зачало 75: Блюдите, да не презрите единаго малых сих: Причастен: дух твой благий наставит мя на землю праву. Аллилуиа, трижды.

[Смотри] Знай и сие: яко службы святых прилучившихся в субботу грядущую, и в неделю всех святых, поем единаго напреди, а другаго в настоящий пяток, на повечерии.

[Смотри] Ведомо же буди: яко седмица сия святыя пентикостии, разрешаема есть на сыр, рыбы, вино и елей, упражняются же и междочасия часов, и иже в повечериях певаемый канон пресвятыя Богородицы. Во вторник, На Литургии блаженна от канона праздника, обоих творцов, песнь 1-я, на 6. В среду, 4-я: В четверток, 5-я: В пяток, 6-я, 8-я: В субботу, зри ниже сего.

В пяток вечера, кафисма рядовая.

На Господи воззвах, и вся служба праздника, кроме паремий, и входа, якоже указася на отдание вознесения Христова. Такожде и в сию субботу 8-ную, на Утрени, служба вся

праздника, кроме полиелеа и степенны, и евангелиа: точию канон праздника, со ирмосом на 8: ирмос по дважды: другий со ирмосом на 6: ирмос по дважды. Катавасиа, ирмос 2-го канона: божественным покровен: оба лика вкупе. Славословие великое: и ектении, и отпуст. На отпусте поминает иерей святаго, егоже есть день. и час 1-й. На часех, тропарь, и кондак праздника, и конечный отпуст. На Литургии, блаженна праздника, песнь 9, обоих канонов, на 8. По входе тропарь праздника: Слава, и ныне: кондак. Трисвятое. Прокимен, и Аллилуиа праздника. Апостол дне, к римляном, зачало 79: Павел раб Иисус христов: евангелие матфеа, зачало 15: Просящему у тебе дай: Причастен праздника: дух твой благий наставит мя на землю праву.

Неделя всех святых.

На малей вечерни, стихиры воскресны, глас 8, на 4: Слава, глас 6: мученков божественный лик: И ныне, богородичен, глас 8: Како тя ублажим Богородице: На стиховне стихира воскресна, и Богородицы. Слава, и ныне, богородичен. По Ныне отпущаеши, и по Отче наш. тропарь воскресн: Слава, и ныне, богородичен. ектениа, и отпуст. На Велицей Вечерни, по обычном псалме, блажен муж, кафисма вся. На Господи воззвах, ставим стихов 10: и поем стихиры глас 8, воскресны 3, и анатолиевы 3, и всех святых 4: глас 6. Подобен: Всю отложивше: духовнии ветии: Слава, глас тойже: мученк божественный лик:

Иныне, богородичен: царь небесный: Вход. Свете тихий: прокимен дне: Господь воцарися. Чтения 3. 1-е, пророчества исаиина: Тако глаголет господь, вси языцы собрашася вкупе: 2-е, Премудрости соломони: праведных души в руце божии: 3-е: Премудрости соломони: праведницы во веки живут: На литии стихира храма, и самогласны всех святых, глас 1: Веры согласием: Слава, глас 5: Нынешнему торжеству: И ныне, богородичен: Храм и дверь еси: Аще ли несть бдения, На Господи воззвах стихиры воскресны 3, и анатолиев 1, и святых на 6: Подобен: Всю отложивше: На стиховне стихиры воскресны, глас 8, с припевы их. Слава, глас 6: Приидите вернии: И ныне, богородичен: Творец и избавитель мой: По трисвятом тропарь: Богородице Дево радуйся: дважды.

Исвятых тропарь, глас 4: Иже во всем мире мученк твоих, яко багряницею и виссом, кровьми церковь твоя украсившися, теми вопиет ти Христе Боже: людем твоим щедроты твоя низпосли, мир жительству твоему даруй, и душам нашим велию милость. единожды.

Иблагословение хлебов, и чтение послания соборнаго иаковля. [Смотри] [от сея же недели начинаем чести на утренях недельных седмь посланий соборных, и 14 посланий святаго апостола павла. Откровение Иоанна богослова. Чтем же их на бдениих недельных, прежде иных чтений, до великия святыя недели пасхи. В 50-цу же всю деяния святых апостол чтем в неделях, якоже предписася. [Смотри] от сего же бдения начинаем чести толкования Иоанна златоустаго, евангелие еже от матфеа, от 13 слова первыя книги. Оставшая же богослова чтем во 12 днех по христове рождестве. В весь же месяц сей, и вторый, совершаем обе книги толковательныя, 1-ю и 2-ю, на чтениих утренних, до исхода месяца августа: кроме егда прилучится житие некоего святаго, тогда оставляем, и чтем житие святаго.] На Утрени, на Бог господь, тропарь воскресн, глас 8: С высоты снизшел еси: дважды. Слава, святых, глас 4: Иже во всем мире мученк твоих: И ныне, богородичен: еже от века утаеное: и обычныя кафисмы, и седальны воскресны с богородичны их, и чтение во евангелии толковом. Непорочны, и тропари: Ангельский собор: впакои гласа. Степенна, и прокимен гласа: Всякое дыхание: евангелие матфеа, воскресно 1-е, утреннее, зачало 116: единиинадесять ученицы: [Смотри] [от сего убо дне, утренняя евангелиа воскресна начинаем чести по ряду.] воскресение христово: псалом 50. Слава, молитвами апостолов: И ныне, молитвами Богородицы: Стихира, глас 6: воскрес Иисус от гроба. Канон октоиха, глас 8, воскресн, со ирмосом на 4: и крестобогородичен на два, и

Богородицы на два: и всех святых на 6, глас тойже. Катавасиа: отверзу уста моя: По 3-й песни седален, глас 8. Подобен: Премудрости слова: Праотец отец: Слава тойже. И ныне, богородичен, и чтение. По 6-й песни,

Кондак, глас 8: яко начатки естества, насадителю твари, вселенная приносит ти Господи богоносныя мученки: тех молитвами в мире глубоце, церковь твою, жительство твое Богородицею соблюди многомилостиве.

Иикос. и чтем синаксарий. На 9-й песни, поем честнейшую: свят Господь Бог наш: поем в настоящий глас. Светилен воскресн. Слава, святых: И ныне, богородичен их. На хвалитех, Всякое дыхание: ставим стихов 50. и поем стихиры воскресны 4: и анатолиев 1: и святых 3: глас 4. Подобен: яко добля: святыя Господь иже на земли удиви: Припев: Воззваша праведнии: Со пророки апостолы: 2-й: Дивен Бог во святых своих: Иже землю онебесившии: Слава, стихира утренняя евангельская 1, глас 1: На гору учеником идущим:

Иныне, Преблагословенна еси: Славословие великое. По трисвятом тропарь воскресн точию. ектении, и отпуст, и час 1-й в притворе, и поучение студитово, и совершенный отпуст. На Литургии, блаженна воскресна гласа на 4: и от канона святых, песнь 6-я, на 4: Прокимен, глас 8: Помолитеся и воздадите господеви Богу нашему. И святых глас 4: Дивен Бог во святых своих: Апостол ко евреем, зачало 330: святии вси, иже верою победиша царствия: Аллилуиа, глас 4: Воззваша праведнии: Стих: Многи скорби праведным: евангелие матфеа, зачало 38: Всяк иже исповесть мя пред человеки: Причастен: Хвалите Господа с небес: Другий: Радуйтеся праведнии о господе: На трапезе утешение братии, готовящимся к постному подвигу.

[Смотри] Подобает ведати: Аще храм всех святых: На малей и Велицей Вечерни, и на Утрени, и На Литургии, подобне поем, якоже случится в неделю великаго святаго, емуже бывает бдение, точию на Утрени поем полиелей. По полиелеи: Величаем вас, апостоли, мученцы, пророцы и вси святии, и чтим святую память вашу: вы бо молите о нас Христа бога нашего. псалом избранный: блажен муж бояйся Господа: И седален святым, писан в каноне, по 3-й песни. Степенна гласа. Прокимен, и Всякое дыхание: евангелие святым. воскресение христово: и псалом 50. Слава: молитвами всех святых: И ныне, молитвами Богородицы: Вместо, воскрес Иисус: стихира всем святым: кую волиши. Канон воскресн со ирмосом на 4: и Богородице: на два: и святым на 8: и прочее якоже предписася.

Глава 51. Начало святаго поста святых славных и всехвальных апостол.

В немже должни есмы во всякой седмице сохранити 3 дни, постящеся понедельник, среду и пяток: и ясти в 9-й час сухоядения, [по вечерни.] И в 1-й убо день, сиесть: в понедельник, по памяти всех святых, аще несть празднуемаго святаго памяти, поем Аллилуиа на глас октоиха, и троичны гласа, творяще и поклоны по чину святыя 40-цы. Глаголем же и кафисмы две обычныя, третию на вечерни: такожде и часы с междочасием их, и изобразительная.

И о сем всем зри церковнаго последования, постов же и разрешений в ноемврии.

Глава 52. О отпустительных тропарях и кондаках,

како глаголати в седмичныя дни, кроме предпразднства и попразднства, и великих святых, имущих бдение или полиелей, во весь год: на вечернях, и повечериях, и на Утрени на Бог господь, и по благо есть, и на часех, и На Литургии по входе.

Внеделю вечера, По Ныне отпущаеши, и по трисвятом, глаголем тропарь святаго: Слава, и ныне, богородичен, по гласу тропаря от меньших. Аще ли случатся два святых, и имеют оба тропари, и глаголем прежде тропарь святаго перваго. Слава, другаго святаго: И ныне, богородичен от меньших, по гласу другаго тропаря.

Втуюжде неделю, на повечерии, По Достойно, и по трисвятом, глаголем тропарь храма Христова, или Богородицы, потом дне, небесных воинств: таже храма святаго: посем: Боже отец наших: и Иже во всем мире: Слава: кондак, Со святыми упокой: И ныне, молитвами Господи всех святых: [Смотри] Аще же несть храма Христова, и Богородицы, глаголем прежде тропарь дне, небесных воинств: и храма святаго: посем, Боже отец наших: и Иже во всем мире: Слава, Со святыми упокой: И ныне, молитвами Господи: В понедельник на Утрени, На Бог господь, глаголем тропарь святаго, дважды: Слава, и ныне, богородичен, от меньших, по гласу тропаря святаго. [Смотри] Аще случится другий святый имеяй тропарь, И глаголем тропарь перваго святаго: дважды. Слава, другаго святаго: И ныне, богородичен, по гласу другаго тропаря, от меньших. По благо есть, тропарь глаголем, якоже указася в неделю вечера.

На часех глаголем, Тропарь, святаго. И ныне, богородичен часов. По трисвятом, кондак святаго. Сице на всех часех тропари и кондаки глаголем. [Смотри] Аще случится другий святый имеяй тропарь и кондак: И глаголем на 1-м часе тропарь 1-го святаго, Слава, другаго святаго: И ныне, богородичен часов. По Отче наш: кондак 1-го святаго. На 3-м часе, тропарь глаголем 1-го святаго: Слава, другаго святаго: И ныне, богородичен часов. По Отче наш: кондак другаго святаго. Такожде и на прочих часех глаголем тропари: Кондаки же глаголем пременяюще. [Смотри] Аще ли другий святый не имать кондака, и глаголем кондак по Отче наш: единаго святаго на всех часех.

[Смотри] На Литургии по входе, Глаголем тропарь храма Христова, или Богородицы, и дне: небесных воинств: посем тропарь святаго рядоваго. Аще ли будет другий святый имеяй тропарь, глаголем тропарь и другаго святаго. Посем кондак храма Христова и дне, Архистратизи божии: таже святаго рядоваго. Аще ли будет другий святый имеяй кондак, глаголем и другаго святаго: Слава, Со святыми упокой: И ныне, храма Богородицы. [Смотри] Аще ли где несть храма Богородицы, И ныне, храма Христова. [Смотри] А идеже несть храма Христова, и Богородицы, глаголем по входе тропари сице, прежде тропарь дне: небесных воинств: и храма святаго. таже святаго рядоваго, и другаго святаго, аще есть. Таже кондак дне, и кондак храма святаго, и святаго рядоваго. Слава, Со святыми упокой: И ныне, Богородицы, Предстательство христиан: А идеже несть литургии, Глаголем на часех, по ослаби, остави, по Отче наш, кондак храма Христова, и дне: таже святаго рядоваго, и другаго святаго, аще есть: Слава, Со святыми упокой: И ныне, храма Богородицы. [Смотри] А идеже несть храма Богородицы, глаголем кондак дне, Архистратизи: и храма святаго, и святаго рядоваго, и другаго святаго. Слава, Со святыми упокой: И ныне, храма Христова. [Смотри] А идеже несть храма Христова, и Богородицы, глаголем, И ныне, Предстательство христиан:

В понедельник вечера.

По Ныне отпущаеши, и по трисвятом глаголем тропарь святаго. Слава, и ныне, богородичен по гласу тропаря святаго. [Смотри] Аще ли случатся два святых, имуще два