Programmalıq injiniringge kirisiw / 4-ameliy PI_K
.pdf
4-ámeliy sabaq. Paydalanıw boyınsha kórsetpe jazıw. Talaplardı anıqlaw hám qáwiplerdi basqarıw.
Jumıstıń maqseti: Bul ámeliy jumıstıń maqseti studentlerge programmalıq támiynat ushın paydalanıw boyınsha kórsetpe jazıw kónlikpelerin qáliplestiriw, talaplardı anıqlaw procesin úyreniw hám qáwiplerdi basqarıw strategiyaların ámeliy túrde qollanıwdı úyretiw bolıp tabıladı. Studentler óz qolı menen talaplardı anıqlaw hám qáwiplerdi basqarıw boyınsha hújjetlerdi tayarlawdı úyrenedi.
Ámeliy bólim
Paydalanıw boyınsha kórsetpe jazıw
Programmalıq támiynat sistemaları ushın paydalanıw boyınsha kórsetpe - bul sistemanı paydalanıwshılar ushın arnalǵan zárúr hújjet. Ol sistemanıń funkcional múmkinshilikleri, paydalanıw tártibi hám qıyın jaǵdaylardı sheshiw jolları haqqında tolıq maǵlıwmat beredi.
Paydalanıw boyınsha kórsetpe jazıwdıń tiykarǵı basqıshları:
1.Maqsetli auditoriyanı anıqlaw. Paydalanıw boyınsha kórsetpe qanday paydalanıwshılarǵa arnalǵanın anıqlaw kerek (mısalı, jańa paydalanıwshılar, tájiriybeli paydalanıwshılar, administratorlar).
2.Sistemanıń ulıwma táriypi. Programmalıq támiynattıń maqseti, tiykarǵı funkciyaları hám jumıs islew principleri haqqında qısqasha maǵlıwmat beriw.
3.Sistemanı ornatıw hám konfiguraciyalaw. Programmalıq támiynattı ornatıw hám dáslepki konfiguraciyalaw boyınsha izbe-iz kórsetpeler.
4.Tiykarǵı funkciyalar menen jumıs islew. Hár bir funkciyanıń qollanılıwı, tiykarǵı menyuler, ekranlar hám paydalanıwshı interfeysiniń elementleri boyınsha tolıq maǵlıwmat.
5.Jumıs scenariyleri. Sistemanıń tiykarǵı jumıs scenariyleri hám olardı orınlawdıń izbe-iz basqıshları.
6.Qátelerdi tabıw hám saplastırıw. Ulıwma qáteler, olardıń sebepleri hám saplastırıw usılları haqqında maǵlıwmat.
7.Texnikalıq qollap-quwatlaw. Paydalanıwshılarǵa járdem beriw ushın baylanıs maǵlıwmatları hám resurslar.
Paydalanıw boyınsha kórsetpe jazıwda tiykarǵı itibar beriw kerek bolǵan áhmiyetli aspektler:
Túsiniklilik. Hújjet túsinikli, qısqa hám anıq bolıwı kerek.
Strukturalıq. Maǵlıwmat logikalıq tártipte hám sistemalastırılǵan formada beriliwi kerek.
Vizualizaciya. Súwretler, diagrammalar hám skrinshotlar paydalanıw kerek.
Izlew qolaylılıǵı. Mazmun, indeks hám túsindirme sózlik sıyaqlı elementler kerek.
Talaplardı anıqlaw. Talaplardı anıqlaw - bul programmalıq támiynattı islep shıǵıwdaǵı eń áhmiyetli basqıshlardıń biri. Bul processte sistemaǵa qoyılatuǵın funkcional hám funkcional emes talaplar anıqlanadı.
Talaplardı anıqlawdıń tiykarǵı basqıshları:
1.Mápli táreplerdi anıqlaw. Programmalıq támiynattı paydalanatuǵın hám oǵan qızıǵıwshılıq bildiretuǵın barlıq tárepler (klientler, paydalanıwshılar, sistemanı islep shıǵıwshılar, t.b.) anıqlanadı.
2.Talaplardı jıynaw. Intervyu, sorawnamalar, baqlaw hám másláhátlesiwler arqalı talaplar jıynaladı.
3.Talaplardı analizlew. Jıynalǵan talaplar analizlenedi, qarama-qarsılıqlar anıqlanadı hám saplastırıladı.
4.Talaplardı hújjetlestiriw. Talaplar anıq formada jazıladı hám sistemalastırıladı.
5.Talaplardı verifikaciyalaw. Talaplardıń durıslıǵı hám tolıqlıǵı tekseriledi.
6.Talaplardı basqarıw. Talaplardıń ózgeriwi basqarıladı hám izlenedi. Talaplardı anıqlawda qollanılatuǵın texnikalar:
Intervyu. Mápli tárepler menen jeke soraw-juwap ótkeriw.
Sorawnamalar. Standart sorawnamalar arqalı maǵlıwmat jıynaw.
Baqlaw. Paydalanıwshılardıń jumısın baqlaw arqalı talaplardı anıqlaw.
Másláhátlesiwler. Ekspertler menen másláhátlesiw.
Prototiplew. Dáslepki prototipler islew hám olardı bahalaw.
3.Qáwiplerdi basqarıw
Qáwiplerdi basqarıw - bul programmalıq támiynattı islep shıǵıw processinde payda bolıwı múmkin bolǵan mashqalalardı aldın-ala kóriw hám olardı sheshiw boyınsha jumıs alıp barıwdı óz ishine aladı.
Qáwiplerdi basqarıwdıń tiykarǵı basqıshları:
1.Qáwiplerdi anıqlaw. Joybar barısında payda bolıwı múmkin bolǵan barlıq qáwipler anıqlanadı.
2.Qáwiplerdi analizlew. Hár bir qáwiptiń áhmiyetliligi (tásir etiw dárejesi) hám itimallıǵı bahalanadı.
3.Qáwiplerdi prioritetlew. Qáwipler olardıń áhmiyetliligi hám itimallıǵı tiykarında prioritetlestiriledi.
4.Qáwiplerge juwap beriw strategiyaların islep shıǵıw. Hár bir qáwip ushın juwap beriw strategiyası islep shıǵıladı:
o Izbegat - qáwipti aldın alıw.
o Peredavat - qáwipti basqa tárepke ótkeriw.
o Snijat - qáwiptiń itimallıǵın yamasa tásirin azaytıw.
oPrinimat - qáwipti qabıl etiw hám onıń nátiyjelerine tayar bolıw.
5.Qáwiplerdi qadaǵalaw. Qáwipler turaqlı túrde qadaǵalanadı hám kerek bolǵan jaǵdayda sharalar kóriledi.
Qáwiplerdi basqarıw hújjetlestiriw:
Qáwiplerdi reestri. Barlıq anıqlanǵan qáwipler, olardıń áhmiyetliligi, itimallıǵı hám juwap beriw strategiyaları kirgizilgen reestr islenedi.
Qáwiplerdi qadaǵalaw planı. Qáwiplerdi qadaǵalaw hám olarǵa juwap beriw planı islep shıǵıladı.
Qáwiplerdi esabat beriw. Qáwiplerdiń jaǵdayı haqqında turaqlı esabat beriw sisteması islep shıǵıladı.
Máseleniń qoyılıwı, ámeliy tapsırmalar
Tapsırma 1: Paydalanıw boyınsha kórsetpe jazıw
Ózińiz tańlaǵan programmalıq támiynat ushın paydalanıw boyınsha kórsetpe jazıń. Kórsetpede tómendegi bólimler bolıwı kerek:
1.Sistemanıń ulıwma táriypi
2.Sistemanı ornatıw hám konfiguraciyalaw
3.Tiykarǵı funkciyalar menen jumıs islew
4.Qátelerdi tabıw hám saplastırıw
Kórsetpe kompyuter boyınsha arnawlı bilimleri joq paydalanıwshılarǵa túsinikli bolıwı kerek. Kórsetpede skrinshotlar hám diagrammalar paydalanıń.
Tapsırma 2: Talaplardı anıqlaw
Mobil qosımsha ushın talaplardı anıqlaw processin ótkeriń. Qosımshanıń temasın ózińiz tańlań (mısalı, finans esabın júrgiziw, sawda, sociallıq tarmaq, t.b.).
Tómendegi basqıshlardı orınlań:
1.Mápli táreplerdi anıqlań
2.Talaplardı jıynaw ushın 10 sorawdan ibarat intervyu sorawların tayarlań
3.Funkcional hám funkcional emes talaplardı anıqlań (keminde 10 funkcional, 5 funkcional emes talap)
4.Talaplardı hújjetlestiriń (tiykarǵı talaplar hújjetin jazıń)
Tapsırma 3: Qáwiplerdi basqarıw
Programmalıq támiynat joybarı ushın qáwiplerdi basqarıw jobasın islep shıǵıń. Joybardıń temasın ózińiz tańlań.
Tómendegi basqıshlardı orınlań:
1.Keminde 10 potencial qáwipti anıqlań
2.Hár bir qáwiptiń áhmiyetliligin hám itimallıǵın bahalań (1-5 shkalası boyınsha)
3.Qáwiplerdi prioritetlestiriń
4.Hár bir qáwip ushın juwap beriw strategiyasın islep shıǵıń
5.Qáwiplerdiń reestrin isleń (keste formasında)
Jumıstı orınlawda alınǵan nátiyjelerdi analizleń hám qısqasha juwmaq jazıń.