Keńesbay Raxmanov - Laqqılar emlewxanada

Alpamıs: Jeti jıl oqıdım.

Palım: Qayaqta?

Alpamıs: Vot sledovatel nashelsya! Shkolda!

Palım: Keyin oqımadıń ba?

Alpamıs: Oqıtpadı.

Palım: Kim?

Alpamıs: Milсiya, prokuror, sud, tyurma!!

Nurmash: O, sorlap qalǵan basımız! Usı balanıń túrin jaman kórip edim-aw!

Doxodbay: Qaltıray bermesh, Nurmash aǵa.

Nurmash: Qaltıramay ne qılayın, áskeriy gospitalda jatqanday gideń nárenjan adamlarmız. Ishimizdegi iyge tartarı Dáwen, ol da bir qanǵıp ketse qarnı ash bolǵanda aylanadı.

Doxodbay: Alpamıs, túrmege qalay tústiń?

Alpamıs: Prosto! Aqsha kerek boldı. Túnde bir adamnan sigaret soradıq. Ne kuryashiymen dedi. Ne vri dedik. Sigaretiń bolmasa pul ber dedik. Ol bergisi kelmedi. Keyin… Da potom, Tolik nojki menen arqasınan urdı. Qaltasın qaradıq, v samom dele aqshası joq eken, qolındaǵı saatın sheship aldıq. Sóytip qashıp kettik.

Palım: Ákeńniń pulı joq pa edi?

Alpamıs: Papamstrogiy adam! Ermeydi. Ne qılasań deydi. Al, biziń ishkimiz, shekkimiz keledi. Prosto oxota!

Palım: Araqtı úlken jigit bolǵanda ishkende ne qıladı?

Alpamıs: Posle pensii chto li?

Doxodbay: Izin ayta ber, Alpamıs.

Alpamıs: Úsh ayǵa shekem nikte ne znal. Bir kúnleri úyge bir adam qıdırıp keldi. Meni kóriwden vse soznaniesin joǵalttı. Papam skoriy shaqırıp, zorǵa ózine keltirdi. Bizlerdiń sol pıshaqlap ketken adamımız papamnıń karipanı bolıp shıqtı. Vot chudo! Meni tanıp qalǵan eken. Ol kisi papama «sen ushın prostil» dep edi, papam ne slushal. Sol waqta miliсiyaǵa xabarlap qamatıp jiberdi!

Palım: Papań adam eken!

Alpamıs: Kakoy saǵan adam! Fashist on! Ol adam bolsa óz balasın qamata ma?

Palım: Men ákeń bolǵanımda attırar edim!!!

Alpamıs: Chego, chego?!

Doxodbay: Alpamıs gáp sende eken, aytaber.

Alpamıs: Tyurmadan kelgende papam aman keldiń be dep te aytpadı. Mamam tek pappam joqta sóylesedi. Aqıl beredi, kak tı starik!

Palım: Anańnıń aqılın aldıń ba?

Alpamıs: Net! Davnım-davno kórispegen kentler tap boldı. Eshe interesnaya jizn baslandı. Tanсa, diskoteka, vodka, dengi, narkomaniya… /basın uslawı menen Dáwen kiredi/

Dáwen: Háy, jarası qurımaǵır-ay, záxárdey ashıp ketti ǵoy! /medsestra qızǵa/ haw qarındasım seni vrachlarıń tappay, zer-zebil bolp izlep júrǵoy.

Medsestra qız: Bay-buu, mańlayım! Mına balanıń gápin tıńlaman dep irkilip qalıppan-aw! /ketedi/

Dáwen: Buǵanda jan enip, til pitti me?

Nurmash: Tshsh! Sorlı… Jańaǵı pıshaqlanıp atırǵanlar sennen de zor kisiler.

Dáwen: Qayaqta?

Nurmash: Mına balanıń gápin tıńla.

Dáwen: Ne deydi? Shetinen qırıp pa? Qarajan menen ayqasatuǵın jerine keldi me? /kúlki/

Doxodbay: Zindannan jańa shıktı. /kúlki/

Dáwen: Endi Barshının izlep ketetuǵın shıǵar? /kúlki/

Palım: Alpamıs, ayta ber qaraǵım.

Alpamıs: Odnajdı nochyu, mamanıń isleytuǵın magazinine tústik.

Palım: Wax-x, óz qorańa shapqan ekenseń-dá!

Alpamıs: Miliсiya on kúnnen keyin poymali. Endi mamam qamatıp jiberdi.

Palım: Mamań da aqıllı adam eken!

Alpamıs: Saǵan bári aqıllı! Zonadan kelsem, meni úyge kirgizbedi. Sonnan sosedtiń úyinde bir qondım. Sosedtiń liсeyde oqıytuǵın qızı usı awılda paxtada eken. Úyinen adresin aldımda, srazu izlep keldim. Ol qızdı jaqsı kóretuǵın edim.

Dáwen: Áne, aytpadım ba, Barshının ishlewge shıqtı! /kúlki/

Palım: Áńgimeni bólmese, Dáuen inim.

Dáwen: Palım aǵa sen tap jıraw tıńlaǵanday bolıp atırsań ǵoy! /kúlki/

Alpamıs: Durak tı!

Dáwen: Men be?

Alpamıs: Da, tı! Sen!

Dáwen: Mına juwernemek ne qıladı? Basıńdı julıp qolıńa bereyin be?

Alpamıs:/ornınan turıp/ Davay poprobuy!

Dáwen: Kel-kel! Jer tarttırıp jibereyin!

Nurmash: Dáwen bala boldıń ba, qoyaǵoy jora!

Palım: Qısqart, áy, Dáwen! Endi birr kemisiń tóbeles pe edi?

Dáwen: Qurttay bolıp, gápi ótip baratır-aw! Ákesindey adamǵa durak degeni nesi?

Alpamıs: Ákemdi de, anamdı da ayamayman!

Dáwen: Júdá, qarq bolarsań! Olardıń jazıǵı seni dúniyaǵa ákelgeni me? Qayaqtan tap boldıq bul xuliganǵa?!

Nurmash: Ayttım, sol kátti shıǵarıp taslayıq dep… Uyıǵan qatıqtay jatır edik, gúbige salıp piskendey etti bizdi.

Doxodbay: /kúlip /Mayıńdı alajaq shıǵar!

Palım: Alpamıs! Otır, balam, otır. Bulardıń gápine itibar bermey, dástanıńdı dawam ete ber.

Alpamıs:/otıradı/ Sol qızdı tawıp alıp, Gulnara júr ketemiz dedim. Sen qálegen jaqqa dedim men. Tı chto, sumashedshiy ded iol. Men qolınan uslap pojenimsya dedim. Ol bpqırıp jiberdi. Men súyredim. Potom odnokursnikları jıynalıp qaldı. Vam chto nado?, ketińler, Gulnara moya deppen. Gulnara meni qutqarıńlar dep jıladı. Bir bala kelip meni uslayjaq bolıp edi, ya dal emu v mordu! Uletel kak shlyapa! Dalshe ne bolǵanın bilmeymen.

Palım: Gulnara da aqıllı qız eken.

Alpamıs: Saǵan starıy, shakal, bári aqıllı krome menya!

Palım: Solay. Endi ne qılasań? Úyiń jok. Ata-anań júzińe kórmeydi, Gulnara da saǵan qaytip qaramaydı.

Alpamıs: Ne znayu.

Palım: Neshe jastasań?

Alpamıs: On toǵızda.

Palım: On toǵız xor bolǵan jas. Men on jeti jasımda ata-anamnıń joklıǵın bildirmey, bir inimdi, eki qarındasımdı baǵıw ushın kúni-túni miynet ettim… Al,

sen bolsań… eki ret túrmege qamalǵansań. Keleshegiń túndey qarańǵı. Maqsetiń joq. Soqırsań.

Alpamıs: Nege soqır?

Palım: Maqsetiń bolmasa, soqır bolmay neseń? Emlenip shıqqannan keyin qayaqqa bararıńdı bilmeyseń. Seni taǵı túrme kútip tur.

Alpamıs: Chert s nim! Maǵan vse ravno. Tam legche jit.

Palım: Sen olay etpe, Alpamısjan. Úyńe qaytıp bar. Ákeńnen anańnan keshirim sora, jalın. Bárin qoydım de. Adam bolaman, jumıs tawıp beriń ya oqıtıń de. Sizlerge sawat kerek. Sawatıń bolmasa adamǵa da, qudayǵa da, jámiyetke de keregin bolmay qaladı. Ele jassań.

Alpamıs: Ata-anam keshirmeydi.

Palım: Olardıń sennen basqa balları bar ma?

Alpamıs: Bar, samıy starshıy men.

Palım: Ákeń qayaqta isleydi?

Alpamıs: Bilmeymen, vrode nachalnik, slujebnıy mashını bar ǵo.

Palım: Meniń aqılımdı al, balam, ómirge kelgennen keyin adam balası óz baxıtın tabıwǵa talpınıwı kerek. Oylan! On toǵız jas, úlken jas. Jaslıqtıń dárwazasında tursań. Ol saǵan túrmeniń dárwazası bolıp kórinbewi dárkár. Ol sen ushın jańa ómirdiń, jańa baxıttıń bosaǵası bolsın! Túsinikli me?

Alpamıs: Nu ladno! Uyıqlayman. /bastırınıp jatıp qaladı/

Dáwen: Aqılıńdı basıńa shaynap jaq degeni bul, Palım aǵa.

Nurmash: Há, usı balanıń jasın maǵan berer me edi!

Dáwen: Ne qılar ediń? Dáriyanı terisine aǵızasań ba?

Nurmash: Ózim bilemen ne qılatuǵınımdı.

Doxodbay: Darıldatıp kislota aǵızıp qoyatuǵın shıǵar. /kúlki/

Palım: Dáwen, baǵanaǵı gápmńdi dawamlamaysań ba?

Dáwen: Qayerine kelip edi?

Doxodbay: Qızdı aman-esen úine quwıstırdıń ǵoy. Pisip qurıp qalǵan eken aǵa.

Nurmash: Buyırmasa, ne qılsın!

Dáwen: Soń sorastırıp kórsem, ol qızdı da baydan qaytıp kelgen dep, hayalı ólgen birew alıptı-aw! /kúlki/

Palım: Qayta seniki abıraylı edi ǵoy. Háy, baxtı kelispegen nashar-áy!

Dáwen: Sóytip, kempirdi-ám óltirdik pe?

Palım: Awa, ketti ǵoy ol bishara da ya ǵarrıǵa, ya kelinge jalshımay.

Dáwen: Bir kúnleri bazarlap Shımbayǵa barmayın ba? Quwırdaqqa toyıp, piywesuyue iship, qaytayın dep avtobusqa otırdım. Keshqurın bolǵan soń ishinde adam da az eken. Bir kelinshektiń qasına barıp otırdım. Avtobus qozǵalǵan soń jańaǵı kelinshek gáp tawıp otırshı dep juwan sanımnan shımshıp aldı-áy!

Nurmash: Háy-háy! Páy sol meniń sanım bolanda! /kúlki/

Dáwen: Kel shımshıǵan jerin jalatayın! /kúlki/

Doxodbay: Awzıńdaǵı jaralarıń jazılar ma eken! /kúlki/

Palım: Ayta ber bul jón shımshıw emes ǵoy.

Dáwen: Sonnan, bala, bul kelinshek meni tanıytuǵın shıǵar dep júzine qarasam, yaq, bináy ómirimde kórmegen nasharım. Awıllar qay jerde dep soradım. Awılım ne qılasań dep naz etedi ǵoy-áy, jańaǵı. Biz de attan basın jazdırıp jiberdik. Qay jede túseseń desem, sen túsken jerde deydi. Qullası kálám úyge ertip ákelip, apańsat hayallı boldıqta qaldıq.

Nurmash: Jolı bolǵan jigittiń jeńgesi shıǵar aldınan.

Palım: Házir sonıń menen turasań ba?

Dáwen: /kúlki/ Turǵanda qanday! Aradan jigirmalaǵan kwn ótip edi, miliсioner menen bir kisi kelip tur. Miliuioner jańaǵı kisige hayalımdı kórsetip, usı ma dep soradı. Anaw kisi awa dedi. Men ele neniń ne ekenine túsinbey ańqayıp turman. Miliсioner maǵan qarap: birewdiń hayalın áketiwge uyalmaysań ba deydi. Hawhaw deymen men, naǵılǵan birewdiń hayalı? Miliсioner: oyındı qoy, hayal mına kisiniki deydi. Men hayalıma qarayman. Ol lalı shıǵıp, jer shuqlap otır. Bayım joq dep izime erip kelgen soń hayal etip otırman dedim. Solay ma ya zorladı ma dep miliсioner hayalıma qaradı. Ózim keldim dedi hayalım.

Palım: Ástaupırla bala, sonna zorladı degende ayaǵıń aspannan keteyin dep tur eken ǵoy. Ya gúwań joq.

Dáwen: Awa! Miliсioner jaqsı jigit eken. Ózi kelipti, hayal endi bul jigitke tiyisli, biz saǵan zorlap qosa almaymız dep ol qasındaǵı kisige qaradı. Ol kisi gúderin úzgendey aqırǵı ret qáne, qatın, usı jerde qalasań ba ya meniń menen keteseń be? Dep edi, janaǵı hayaldıń aytqan gápine qara! /kuli aladı/ Aası seniń menen ketsem kete beryin, ballardı da saǵınıp kettim deydi! /kúlki kóteriledi/

Nurmash: Wa-xa-xa! Bir bálesi bolmasa, shúdigárda netken quyrıq!

Wayx-wax! Qattı kúlemen dep awzımdaǵı jaralarım ashıp ketti-aw

Palım: Kelistirmese isińdi, bılamıq sındırar tisińdi. Al, ayta ber.

Dáwen: Hayaldan ayrılǵan soń úydiń ishi ayıwdıń uyasınday bolıp taǵı úińireyip qaldı. Hayaldan nesiybemdi qurtqan táǵdirime nalıp kórpege súńgiymen hár aqsham. Quday da ne qılsın eki ret qız áperdi, bir ret birewdiń qatının áperdi. Ákeń de óyte almas. /kúlki/ Bir kúnleri buzılıstım. Kempirden qalǵan jalgız tuyaqtı stıp, bárine araq aldım. Dártimdi umıtayın dep jaydıń esigin tas qılıp qulıplap, araqtı ishe berdim. Qulap qalaman, oyanıwdan taı ishemen. Jaqtı jáhánde ne bolıp, ne qoyıp atıranın umıttım. Neshe kún, neshe túnn ótti bilmeymen. Jaz kúnleri edi. Taqıyatastaǵı emlewxanada esime kelsem, qar jawıp tur eken ǵoy.

Palım: Naǵız ertek boldı-aw bul.

Dáwen: Taqıyatastan qaytıp kiyatırıp, ári oylanaman, beri oylanaman billmeymen, sol aralıq yadımda joq, uyqıdan tap házir oyanǵandayman.

Doxodbay: Onday da bola ma eken?

Nurmash: Jın ursa sonday bolatuǵın shıǵar…

Dáwen: Jın urdı ma ya araq urdı ma, bilmeymen. Mına vrachlarıń yamana ekenáy, bilmeymen nápbále ishtirgenin, araqtıń shiyshesin kórgennen loqsıp jibere beretuǵın bálege ushıradım. Awılǵa kelsem, hámme meniń menen tayaq taslam jerde turıp xabarlasadı. Ásirese, mayda ballardan kúydim. Tóbem kóriniwden: Dáwen jilli kiyatır! Qash! Dep hámmesi zıp beredi. Tutıp alayın, baqırayın, qorqıtayın desem, jilli atım ábden raslanıp keter dep qorqaman. Bir kúni keńsege barsam, ondaǵılar zooparkte biytanıs haywandı kórgendey maǵan tikreyisip qaraydı. Direktor kabinetinen bir jaqqa shıǵıp baratır eken, assalawma áleykum! dep sozǵan qolıma barmaǵınıń ushın tiygizer tiygizbestan, dúzelip keldiń be? dedi. Dúzeldik ǵoy jumıs-pumıs sorap keldim desem, sen túwe esi durıslarǵa da tappay atırmız, atızda isley ber, sen tek sol jerge sıyasań dedi de ketip qaldı. Bir arım keldi, bir jılaǵım keldi. Úndemedim. Jılasam, jın haqıyqat urǵan eken dep júre me bul jurt.

Palım: Awa-de! Eldiń awzın jabıwǵa elli gári bóz kerek.

Nurmash: Sen de, bala, ne qıyametlerdi kóripseń.

Dáwen: Ele nesin kóripseń, qıl taqqan soń ǵańqıldaydı. Bul Dáwen jilliniń qatınnan awzı pispedi.

Palım: Dúniyadan taq ótiw de qıyın ǵoy.

Doxodbay: Qoy onıń jolı armaǵan.

Dáwen: Taǵı da jıllar ótti. Qıstıń kúnleri Nókiske qıdırıp barmayın ba? Kafede jalǵız otır edim, qaısma jılmańlaǵan birew keldi. Birge awqatlandıq. O leki júz gramm konya aldırıp edim, men ishpeytuǵın bolǵan soń bárin ózi ishti. Tap meniń

tuwısqanımday ashlısıp sóylesip, hayalım joq ekenin bimlgen soń bir baldızım bar, sonı saǵan áperemen dedi.

Nurmash: Saǵan-aq qolay túse berdi ǵoy.

Dáwen: Quwanǵanımnan onıń iship jegenine ózim tóledim. Shıqqan soń ertip bir

úyge ákeldi. Úyde bir aqquba kelinshekten basqa jan joq. Sulıw! Sulıwınan jılıwı degendi umıtıp ketippen. Jańaǵı gózzal sırtta júrgende meniń jeńgem bolıp kelgen kisi: qalay ugay ma? Dep soradı. Qatqan eken aǵa! Dep bas barmaǵımdı shoshayıttım. Ol baja bolamız dep qolımdı qısıp qoydı. Sonnan keyin ol: inim, seni bir tuwısqanımday kórip qalıp edim, jaǵdayıńa qarayın, meniń qolıma bir baspaqtıń pulın ákelip salsań baldızımdı qoynıńnan tawıp ala ber dedi. Onıń menen sharta kelistim.

Nurmash: Qudayım-ay, jańaǵıday gózzal ushın bir baspaqtıń pulı jır ma? Bizler onı bir aqshamına jumsar edik.

Doxodbay: Páy, Nurmash aǵa-ey! Hámme sendey skladshı ma?

Palım: Gápti bólmeń jigitler. Súytip Nurmash tıshqan jumsap otır ma? /kúlki/

Doxodbay: Skladqa revizor kelse, aldı menen tıshqannıń inin sanap shıadı deydi

ǵoy. /kúlki/

Nurmash: Seniń-aq tappaytınıń joq Doxodbay.

Doxodbay: Sóytip tıshqannıń inlerin bólisetuǵın qusaydı. /kúlki/

Dáwen: Bólisken qalay? Inlerdiń awzında pıshıqtay ańlıp otırameken? /kúlki/

Doxodbay: Tıshqanlardıń uyasına kúnine neshe ret qatnaytuǵının esaplaydı. /kúlki/ Sóytip, skladtaǵı kemis – qutıqtıń bárin tıshqanlardıń moynına salıp, akt jasaydı eken. /kúlki/

Palım: Ras pa Nurmash?

Dáwen: Gellesin keskende aytar ma ras dep!

Nurmash: Doxodbay ayta beredi.

Palım: Al, onda, Dáwen ertegińdi dawam et.

Dáwen: Jańaǵı kisi kelinshekke qarap: « Ayran soraǵan shelegin jasırmas degen, baldızım, jezdeńdi sıylasań bir jumıs penen kelip otırmız» dedi. Kelinshek ayta ber degendey tómen qarap otır. Bul duniyaǵa kelgen soń dedi jańaǵı kisi, adam balası oynap-kúlip, zawqı-sapa súrip ótkeriw kerek. Sende bir talabıń kelispey júrgen nashar ediń, quday seniń qashanǵı jalǵız basıńdı shoshaytıp qoya bersin, teńiń dep mına Dáwletnazardı ákelip otırman. Teń-teńi menen, tezek qabı menen degen dedi…

Palım: Tóreli kisi eken paqır.

Nurmash: Dáwendi qashanǵı shırlatsın quday!

Dáwen: Seniń gápińdi jıqpayman oy, jezde , saǵan unaǵan kisi maǵanda unaydı dedi. Quwanıp kettim. Al, Dáwletnazar, búginnen baslap baja boldıq, baǵanaǵı aytqanımdı pálen kúni, pálen waqıtta jetkerseń, baldızımdı izińe ertemen, wassalam! Baxıtlı bolıń! Dep pátiyasın berdi. Ayaqtıń astınan qatın tapqanıma quwanıp awılǵa shaptım. Úyde kók tiyin joq. Dárriw Erkindariyadaǵı fermer dayıma bardım da, saldım shataqtı. Bul jilli qırıp keter dep arshasınan eki baspaqtıń pulın shıǵarıp berdi!

Nurmash: Áne, istiń kelisiwine qara!

Doxodbay: Eki qatınnıń pulın alıpsań-dá!

Dáwen: Ayaǵım ayaǵıma tiymey Nókistegi wádelesken úyge keldim. Bayaǵı kisi qolıma ayday qarap otır eken.

Palım: Iyman júzli adam eken, wádesinen tayıp keteme dep qáwipsinip otır edim.

Dáwen: Aqshanıń teń jarıp qolına bastım! Úiń janǵır, tap mennen qarız aqshasın alǵanday sanap aldı-ey!

Palım: Pısıqta pısıq. Tawıp alsań da sanap al degen ǵoy.

Dáwen: Hayaldı úyge ákeldim. Qalǵan puldı qolına tapsırdım. Qatar jigitler hayaldı kórip: Dáwen seni jın uran sayın sulıw qatınlar ósh bolıp baratır-áy dep basqılaydı. Qońsılardan bir ılaq tawıp soyıp, araq sharabın moldan berip sıyladım.

Sokta oynap otırıwǵa adam shaqırtayın ba desem, bajam aldırmadı. Eki bastan men araq ishpeymen. Hayalım azlap ishedi eken, bajam menen bir shiysheni bólisip ishti de qoydı. Bajanaı kútemen dep sharshadım ba, uyqı kelip esney berdim. Sóytip túnniń állenemirinde úshewimiz úsh jerge tósek salıp jatıp qaldıq. Tańǵa jaqın túsimnen shorshıp oyansam…

Doxodbay: Yauqıldatıp atır de ! /kúlki/

Dáwen: Qıbır etken ses joq. Hayalımnıń ornın sıypasam, kórpeden basqa zat ilinbedi. Bajamnıń ornı da bos. Svetti jaǵıp jiberdim. Kiyimleri de joq. Sonnan sırtqa juwırıwım bar ǵoy. Qapını ashıp jibergenimdi bilemen, basıma bir nárse tars ete qaldı. Qanatımdı jaya quladım. Sonnan kózimdi ashsam sizlerdiń arańızda ekenmen ǵoy!

Nurmash: Eki baspaqtıń pulı da atamnıń ayaq ushına ketti deyseń!

Doxodbay: Al, Palım aǵa, kúni menen maqtap otırǵan adamıńnıń qılǵan qıyqańı!

Palım: O, ishkeni boyına taramaǵır!

Nurmash: Olar naǵız oferisler eken. Olardı tutıp beriw kerek!

Palım: Neshe adamdı jalpaǵına salǵanın kim biledi! Uyiniń adresin bilseń tutuıp beriw kerek!

Nurmash: Tutqan menen aqshańdı al almaysań.

Dáwen: Nege?

Nurmash: Gúwań joq.

Dáwen: Táwir bolǵannan keyin bir táwekel kórermen.

Palım: Esitpegen elde kóp degen. Táwir bola ber, Dáwen inim, saǵan ózim bir hayal tawıp beremen.

Doxodbay: Sen neshe mıń sorar ekenseń? /kúlki/

Nurmash: Eplep-seplep mashının tikeytip alajaq ǵoy. /kúlki/

Dáwen: Endi awzım pisti, Palım aǵa, awzı kúygen úrlep ishedi degendey…

Palım: Saǵan bir tiyinsiz hayal áperemen…

Dáwen: Qaydem, aǵa pulı arzannıń sorpası tatımay júrse taǵı… Bir tiyinsiz-ám alıp kórdik ǵoy.

Palım: Bul pisentli jerdiń qızı. Awa dey ber!

Dáwen: /quwanıp/ Yaqshı aǵa, qız tayın bolsa, biz tayın! /kúlki/

P E R D E

II-AKT, ÚSHINSHI KARTINA

Sol palata, sol adamlar. Azanǵı máhál.

Palım: JigitlerY Búgin qaysı kún?

Dáwen: Ákeńe quran shıǵartayın dep pe ediń. Búgin piyshembi.

Palım: Qabaǵım tartıp turǵoy, quwanarman ba deymen?

Doxodbay: Qaysı qabaǵıń Palım aǵa?

Palım: Shep jaqtaǵı.

Dáwen: /kúlip/ Shep qabaǵıń tartsa quwanıp, sen ne qatınsań ba? /kúlki/

Palım: Bul jerde jatqalı ne ekenimizdi de umıtıp kettik, Dáwenjan-ay. Tek, úydegi jeńgeń izimizden kelgende ǵana ózimizdiń erkek ekenimiz yadımızǵa túsir, qoqırayıp qoyamız. /kúlki/

Nurmash: /ornınan turıp/ Seniń hayalıń táwir-aw, tez-tezden qatnap turadı. Al, biziki, birotala gúderin úzdime deymen.

Doxodbay: Qorqpa aǵa, akkumlyatorıń otıǵanday bolsa, taǵı kislota quyarsań da! /kúlki/

Dáwen: Palım aǵanıń qatınınıń iaqtaytuǵın jeri shamalı-aw. Tap, bul jaqta bayı bosanıp atırǵanday tasıytuǵını sút, burısh. /kúlki/

Alpamıs: S utro smex xo-xo-xo! Ne ponimayu!

Dáwen: Endi ne? S utro smex bolmay, way-way salıp shıǵamız ba? /kúlki/

Medsestra kelinshek: Házir bas vrachımız obxod jasaydı. Warqıldasa bermey tınısh jatıń.

Doxodbay: Warqıldaspasaq kún ótpeyjaq jeńge.

Dáwen: Ey, warqıldasqanda seniń kólińniń suwın ılayladıq pa?

Medsestra kelinshek: Shamań jetse ılaylaysań-da, bolmasa sennen baqatosqınnan basqa ne shıǵar deyseń! /kúlki/

Nurmash: Qatırdıń, Máriyam!

Doxodbay: Biziń Dáwen aǵanı azan menen qalpaqtay ushırdıń-aw!

Medsestra kelinshek: Tınıshlanıń, kiyatır. /bas vrach penen, emlewshi vrach kiredi/

Bas vrach: Assalawma áleykumler!

Jatırǵanlar: Wa alekum assalam! Assalawma áleykum!