Keńesbay Raxmanov - Laqqılar emlewxanada

Keńesbay Raxmanov

Laqqılar emlewxanada

Eki aktlı, tórt kartinalı komediya

Waqıya biziń kúnlerimizde awıllıq emlewxanada bolıp ótedi.

Jańa variantı

1977-jıl Tashkent

1993-jıl Nókis

Waqıyaǵa qatnasıwshılar:

1.Palım – ayaǵı asıwlı adam, jası 50 lerde

2.Dáwen - bası tańıwlı adam, jası 43 lerde

3.Nurmash – araq dep kislota iship jibergen adam, jası 43-44 lerde 4.Doxodbay – traktorın izeykeshke awdarǵan jigit, jası 25lerde 5.Alpamıs - qolı moynına asıwlı jigit, jası 17-lerde

6.Medsestra kelinshek – jası 30-larda 7.Medsestra qız –jası 18-19-larda 8.Vrach jigit – jası 25-lerde

9.Bas vrach – jası 40-larda

10.Palsánem – Palımnıń hayalı, jası 43-lerde 11.Gúlbiy – Doxodbaydıń anası, jası 60-larda 12.Ziybagúl – Nurmashtıń hayalı, jası 35-lerde.

I-AKT, BIRINSHI KARTINA

Emlewxananıń travmatologiya bólimindegi jetinshi palata. Palata ishinde bes koyka. Birinshi koykada ayaǵın joqarıǵa asıp qoyǵan adam, ekinshisinde aaq dep kislota iship qoyǵan adam, úshmnshmsinde traktorın izeykeshke awdarǵan jigit, tórtinshisinde basın tańıp qoyǵan adam jatır. Házirshe besinshi koyka bos. Perde ashılǵanda hámme óz orınlarında jatır. Tınıspa mezgildiń waqtı. Palatadaǵı nawqaslar uyqıda. Qorıldı esitiledi.

Ayaǵın asıp qoyǵan adam: (sandıraqlaydı) Ayıp mende emes, ayıp mende emes, jol-daasss milit-milit – itsionerrr!!! / miliсiyanıń úshpelegidey bolıp ısqırıp jiberedi/ GAI Way!! Pax, mashınım mashın-aq edi! Wa-wa!! Wa-waa-waaa !!!

Traktorın izeykeshke awdarǵan jigit: / shorshıp oyanıp/ Pay mańlayımız qurıp qalǵan eken! Eshekten basqa súykenbeytuǵın stolba usınıń mashınına tap bolǵanın qáyterseń!

Bası tańıwlı adam:/ esnep oyanadı/ Háy – háy -háy, tús kórip atır ekenmen! Nege

ǵańǵırlasa beresiz, tuu –a, ?

Traktorın izeykeshke awdarǵan jigit: Ey, mına ayaǵı asıwlı otaǵası mashınım dep sandıoaqlay beredi.

Bası tańıwlı adam: Wáy, onıń gápin qoysa! Mańlayında kózi bar adam joldıń shetindegi stolba menen dúgiseme? Onı joldıń ortasına kómip qoysa, bir sári…

Traktorın izeykeshke awdarǵan jigit: Bunı da ayıplawǵa bolmaydı-au aǵa. Gúnanıń bári ishine qaray jutılıp ketkir nasbayıda!

Bası tańıwlı adam: Nasbayıda? Men jaǵın esitken joq edim.

Traktorın izeykeshke awdarǵan jigit: Bul otaǵamız mashının 120 menen zıńǵıtıp kiyatırıp, awzındaǵı nasbayın túkirmekshi bolıp óz betindegi esikten basın sırtqa shıǵarıwı barǵoy. Túp-túp dep atır eken, bir waqta ǵars ete qalıptı. Arjaǵı esinde joq. Shırqıratıp usı jerge ákeldi.

Bası tańıwlı adam: , sorlı! Onsha nasbaydıń izine túse berip, ákeńdi óltirip pe edi ol? Bir qazan maydı bir qumalaq shiritedi degen qıylı bolıptı de!

Ayaǵın asıp qoyǵan adam:/oyanıp/ Taǵı meniń ústimnen gúze sındırıp atırsız ba? Sındırıń! Sındırıń! Eshek joytpaǵannıń bári aqıllı.

Bası tańıwlı adam: Nasbaydı túkirip zayalaǵansha jutıp jibere bermeyseń be jora?

Ayaǵın asıp qoyǵan adam: Aldımda stolbanıń qaqayıp turǵanın qáydem bileyin?

Traktorın izeykeshke awdarǵan jigit: Ele de stolba aldıńa shıǵıp , mashinańdı irkip, janıńdı saqlap qalǵan, otaǵası, bolmasa ıldıyǵa keteseń ǵoy gumpaya-gump bolıp…

Ayaǵın asıp qoyǵan adam: Jwdá! Qarq! Sol stolbań mashınımnıń mańlayınan sıypap irkip qalǵan shıǵar. Wax ayaǵım!

Bası tańıwlı adam: Xesh gáp, jora! Mashın degen konserva qutınıń qańıltırınan islengen ǵoy. Táwir bolıp baraǵan soń shókkishtiń astına alıp, bir mezgilde zawıttan shıqqanday etip alasań!

Traktorın izeykeshke awdarǵan jigit: Seniń aytıwıńa qaraǵanda onı qaladaǵı pech soǵatuǵın ustalar-ám dúzete alatuǵın boldıǵo.

Ayaǵın asıp qoyǵan adam: Kelistrip júdá! Bası awırmaǵannıń quday menen ne isi bar? Sizlerge oyın kerek, maǵan mashın. On jıllıqta sovxoz bayraqqa berip ediaw! Wax-wax…

Bası tańıwlı adam: On jıl bolsa ákeńniń haqısı qalmaǵan ekenǵoy.

Ayaǵın asıp qoyǵan adam: On jıl bolǵanı menen shılt jańa edi-aw, shılt jańa!

Traktorın izeykeshke awdarǵan jigit: On jıllıq mashın qalay shılt jańa boladı? Ya kiseńe salıp jwretuǵın ba ediń?

Bası tańıwlı adam: Sebep penen nasıbaydı qoyatuǵın bolıpsań da!

Traktorın izeykeshke awdarǵan jigit:Bir nasıbay qoyıwıń bir mashınǵa túsip tursa!

Ayaǵın asıp qoyǵan adam: Qoymayman! Usı barǵoy, óshegiskenim, óshegisken!

Bası tańıwlı adam: Bizge ne, nasıbaydı dorba menen awzıńa ildirip qoy! Biraq endigiden bılay onı atsań, qaptalıńda stolbası joq jollarda atarsań-dá.

Traktorın izeykeshke awdarǵan jigit: Sóytpese, bul otaǵasınıń naıbay atıp atırǵanın kórgen stolbalar juwırısıp aldınan shıǵa beredi-dá!

Bası tańıwlı adam: Aldınan juwırısıp shıǵa berip, stolbalar onnan nasıbay sorar deppe ediń?/ kúlisedi/

Ayaǵın asıp qoyǵan adam: Bala armiyadan kelgen soń mashındı soǵan tapsıraman ǵoy.

Bası tańıwlı adam: Óytip , ol util sırága nachalnik bolıp keler deymiseń? /taǵı kúlki/ Onnansha sen onı qurdasqa tapsır, tawıqlarına ketek qıp alsın! /olar kúlisedi/

Traktorın izeykeshke awdarǵan jigit: Pa qımbat ketektiń ishinde tuwılǵan máyeklerde iri bolatuǵın shıǵar? /kúlki/

Ayaǵın asıp qoyǵan adam: Mına joramızdıń tańıwlı basınday boladı! /kúlki/

Bası tańıwlı adam: Onda, jora, ayaǵıńdı awırsınıp way-way salıp atırsańba desek, tawıqlarıńdı ayap wa-way salıp atır ekenseń-dá! /kúlki kóteriledi/

Traktorın izeykeshke awdarǵan jigit: Tawıqlarıń ǵurıq basqan menen ol máyeklerden shóje shıǵaǵoymas… Jeńgey qoynına alıp jastpasa! …/kúlki/

Ayaǵın asıp qoyǵan adam: Ne qılsa da erk ózinde, qoynı bosap qaldıǵoy!

Bası tańıwlı adam: Sen barǵanda kórpesiniń ishi shúykildesken shóje bolıp ketpese, ne qılar deyseń?! Sol shúykildini esitken sovxoz basshıları hayalıńnıń qoynınan tawıq ferma ashıp júrmesin! /kúlki/

Traktorın izeykeshke awdarǵan jigit: Olay bolsa, otaǵası, shóje satıp mashinanı jańadan alarsań-dá! Góneńdi temirshige súyrep júreseń be, olda hár shókkish urıwına pálen mıń soraydı! /kúlki/

Bası tańıwlı adam: Onda shókkishtiń tarsıldısın sanap tura bereseń-dá! /kúlki/

Ayaǵın asıp qoyǵan adam: /gápti basqa jaqqa burıp/ Mına jigitten ház etip atırǵan adam joq. Gáp-sózge qulaǵın túrmeydi. Vrachlar uyıqla dese, silesi qatadı da qaladı. Meniń ǵoy, sizlerden mańlayım ashılmay tur, namazshamnıń shımshıǵınday jırq-jırq! Jırq-jırq!!

Traktorın izeykeshke awdarǵan jigit: Araq dep kislota iship jiberseń, sen de, gúm bolarsań aǵa!

Bası tańıwlı adam: Xaw, bul ele sóytken be?

Traktorın izeykeshke awdarǵan jigit: Sen bul jerge jaqında kelgen soń ele esitpegen ekenseń-aw! Way-booooy, úsh aydan berli jatır deydi. Bul bishara, sovxozda skladshı bolıp isleydi eken. Bir otırıspadan más bolıp úyine keledi.

Ishken adamdı óziń bileseń, áytewir bir urtlamı kemis boladı da turadı. Sonnan

úine kelip, qalǵan-qutqan shiyshelerdi izlestirmey me? Hayalınan araq barma dep sorawǵa qorqadı. Bundayda más bolıp kelgenińde qaysı hayal: má mınanı iship jabıs! deydi? Sonnan, bul hayalınıń kóziniń tasasın alıp, bir shiysheni tawıp aladı, ishinde júz grammday bar eken! Jigitiń quwanǵanınan… artıp jiberedi ǵoy! Bir qarasa usı jerde jatır!

Bası tańıwlı adam: He ne bolıp qalǵan?

Traktorın izeykeshke awdarǵan jigit: Ne bolıp qalǵan deyseń-aw! Kislota iship qoyǵan!

Bası tańıwlı adam: Way-boow! Adamnıń janı tas boladı eken-aw? Tiygen jerin kúlge aylagdıratuǵın kislotanı ishiw?! Sáddáq!!

Traktorın izeykeshke awdarǵan jigit: Áy, sorama, tas-tastan qalǵanǵoy. Urtlay sala, qaytıp tókken, bolmasa ólediǵo. Sonıń ózinde házige shekem durıslap awkat jey almaydı. Sóyleyin dese de kelistire almaydı, awzındaǵı jaraları awıratuǵın bolsa kerek.

Bası tańıwlı adam:Seniń ne keseliń bar, usı? Sen de qurı tiliń bolmasa, kátke baylap qoyǵanday ornıńnan jıljımaysańǵoy?

Ayaǵın asıp qoyǵan adam: Ey, bunıki de, awǵan talǵanǵa kúledi degendey bir gáp….

Traktorın izeykeshke awdarǵan jigit: Awılda bir ǵarrı ólip, sonıń xizmetiniń salpıldısında ek tún boı uyqıdan qaldım. Ushinshi kúni túnde telejkam menen punktke paxta ákettim. Al, bala, tań aldındaǵı uyqı jaman yuoladı eken ǵoy! Kózimdi uwqalap, traktorımdı aydap kiyatırman, kózimdi qansha uwqalasamda uyıqlap ketippen. Jolda hákisine izeykeshtiń basınan edi. Mına aqsaqaldikindey irkip qalatuǵın stolba da joq. Sonnan ne bolǵanın bilmyemen, qıyqıw salıp izeykeshtiń ultanına ketippen.

Bası tańıwlı adam: Way-booo…/ishin tartıp/ Aman qalǵanıńdı ayt.

Traktorın izeykeshke awdarǵan jigit: Traktor shalq ortasına túsken onıń astında jambasım qalıptı. Meniń baxtıma izimde traktor menen 3-4 adam kiyatır eken, onıń ústine izeykeshtiń ultanında da nawa suw bolmaǵan. Házirgi izeykeshler suwdı jaqtıra bermeydi ǵoy. Jańaǵı adamlar áp-sátte traktordıń astınan shıǵarıp alıp, usı jerge tabıs etipti.

Bası tańıwlı adam: Onda qıyın bolǵan eken, inim, qızlar shımshıyǵoysa jan tapsırasań ǵoy! /kúlki/

Traktorın izeykeshke awdarǵan jigit: Qızlar shımshıp óltirse, ármansız bolar edim-aw! /kúlki/

Ayaǵın asıp qoyǵan adam: Jarıq bas jora, tanıspadıq-ám, atıń kim boladı?

Bası tańıwlı adam: Dáwen.

Ayaǵın asıp qoyǵan adam: Dáwen. Dáwen… Usı sovxozdansańba?

Bası tańıwlı adam: Awa, besinshi bólimnen.

Ayaǵın asıp qoyǵan adam: Dáwen bolǵanda qay Dáwen?...

Bası tańıwlı adam: Dáwen jilli dep esitiwiń bar ma?

Ayaǵın asıp qoyǵan adam: Uo-ooy, naǵıb durıslı adam menen jata qoydım dep edim-aw! Bul bolniсaǵa aljasıp kelip qalmadıń ba?

Bası tańıwlı adam: Gileń jilliler usımanda jatır dep ákeldi ǵoy! /kúlki/

Ayaǵın asıp qoyǵan adam: Áy, seniń jasıń mennen qalay eken usı? Meniń jılım jılqı boladı.

Bası tańıwlı adam: Onda kisney bermey jat, aǵa! /kúlki/ Meniń jılım -buzawbas!

Ayaǵın asıp qoyǵan adam: Jilliniń shaqı bolama degen usı-dá! /kúlki/ Jıldıń esabında buzawbas barma? Neshege keldiń?

Bası tańıwlı adam: Qırıq úshke.

Ayaǵın asıp qoyǵan adam: Qırıq úshke? Uo-ooy, qoya ǵoy onda. Meniń qatınım menen jaslı ekenseń ǵoy, inim.

Bası tańıwlı adam: Sen áden qurttıń ǵoy aǵa. Óziń menen jora bolarmız ba desek, qatınıń ienen jora bolap shıqtıq-aw! /hámmesi kúledi/

Traktorın izeykeshke awdarǵan jigit: Tiyimli joranı jańa taptıń, Dáwen aǵa kóz aydın! /kúlki/

Ayaǵın asıp qoyǵan adam: Xaw, biziń qatınnıń jorası, ne jumıs isleyseń?

Bası tańıwlı adam: Buyırǵanıńdı isley beremen, aǵa. Mayrılıp atırǵanıńdı jeńgeyge bildirmeyin, áytewir. /kúledi/ Ózińniń atıńdı aytpadıń ǵoy?

Ayaǵın asıp qoyǵan adam: Palım.

Bası tańıwlı adam: Palım. Palım… Palım bolǵanda « Anna awıl» daǵı brigad bolıp júre beretuǵın Palım tıpırlamay ma?

Ayaǵın asıp qoyǵan adam: Xabarıń bar eken ǵoy?

Traktorın izeykeshke awdarǵan jigit: Awıl boyınsha tıpırlamay birew bolsa, xabarı bolmay ne qıladı?

Bası tańıwlı adam: Saǵan kóz tiygen ǵoy, Palım aǵa, tıpırlap-tıpırlap ayaqtan ayrılıp jatırǵanıń mınaw.

Ayaǵın asıp qoyǵan adam: Kelisip qalmasa bul ayaq tıpırlawın qoymaydı ǵoy.

Awıldıń jumısı tıpırlatpay-em qoymas.

Bası tańıwlı adam: Mına jıyın-terimniń waǵında tıpırlay almay jatqanıń qıyın bolǵan eken.

Ayaǵın asıp qoyǵan adam: Sorama! Altı ay jazı menen miynetin etip, etip, terimge kelgende shırqırap buyaqqa kettik.

Bası tańıwlı adam: Ey, hesh gáp! Tıpırlamay shákirtleriń kóp bolsa, paxtanı jerde qaldırmaydı ǵoy. Xázirgi mashınlar da suwırıp tartıp, atızda bir qana qaldırajaq emes. Wayımlay bermey, ayaǵıń menen juldız gózlep arqayın jata ber. Mashınıń qanday edi?

Ayaǵın asıp qoyǵan adam: «Moskvich» ǵoy. Shılt jańa, ushıp turǵan qıylınan edi!

Bası tańıwlı adam: Pay, neteseń-áy, jańaǵı stolbanıń túbinee kelgende aspanǵa qaray ushırıp jibere qoymaǵan ekenseń-dá! /kúlki/

Traktorın izeykeshke awdarǵan jigit: Ózi tıpırlaq adamǵa ushıpturǵan mashın tap bolǵan soń… ele de kosmosqa qaray ketip qalmaǵanıńdı ayta ber. /kúlki/

Bası tańıwlı adam: /kátinde otıradı/ Keshte televizorǵa pildey úńilip otırsaq, Palım kosmnavttı kóremiz dep! /kúlki/

Araq dep kislota iship jibergen adam: Tixiy chasta da tınıshlıq bermedińler-aw.

Bası tańıwlı adam: Ey, jorajan-áy, baqshanıń ballarınday uyıqlay beredi ekenseń. Túni menen qarawıllıqqa turasań ba? Ómirińde bir ret kislota iship bolniсaǵa túse qoyǵan ekenseń, oynap-kúlip jatayıq-tá!

Araq dep kislota iship jibergen adam: Kúlsem, awzımnıń ishindegi jaralar awıradı-aw.

Bası tańıwlı adam: Iytke sarı may jaqpaydı degendey, pax qatırdıń-aw! Kúlki jaqpaydı eken dep, seni jılatıp otırǵanday shamamız joq. Xalıń jetkenshe kúl, jarań awıratuǵın bolsa ırjıy da jata ber. Bul jerde heshkimnen kúlki plan talap etip atırǵan joq.

Ayaǵın asıp qoyǵan adam: Meniń halımda quday—quday menen, Nurmashjan-

áy. Bul gips degen qurıp ketkiriń ayaǵımdı qıshıtıp, órtenip baratır Mına Dáwen jilliniń basn jarıp, biziń qasımızǵa jetkergenlerge raxmet! /kúlki/

Bası tańıwlı adam: Bul meniń kewlimdi soraǵanıń ba, tıpırlamay aǵa? Bunıń gápin qoy, Nuramash, aspanǵa ushıp baratırǵanda ilinip qalǵan! /kúlki/

Araq dep kislota iship jibergen adam: Áytewir de kózi ilinip ketse : «Meni stolba qurttı! Stolba !!» dep qıshqırıwı bálent-aw. Bunı stolbaǵa baylap qoyıp, qatını sabadı ma eken dep oylap edim. /kúlki/

Bası tańıwlı adam: Palwaniyaz aǵash quyrıqtıń eshegindey deyseń! Sózimiz awır bolmasın, Palwaniyaz aǵa paqır agronom bolıp júrgende ǵawashanıń ishinde otlar júrgen bir eshekti tutıp alıp, stolbaǵa qulaǵınan shegelep qoyıptı. Joldan jeńil mashina menen ótip baratırǵan bir aqsaqal bunı kórip, irkiledi de, Palwaniyazdan « Anaw eshek ne qılıp tur?» dep ájeplenip soraptı. Sonda aǵash quyrıq : « Ey, aqsaqal, bul eshek joqarıdan ǵawashaǵa túse bereyik pe degen telefonogramma kútip tur.» degen eken. /kúlki háwij aladı/

Traktorın izeykeshke awdarǵan jigit: Palım aǵa, barmısań, ańqıratuǵın retiń keldi ǵoy.

Bası tańıwlı adam: /kúlip/ Saw waqtında shıǵar ańqırıp júrgeni, endi awzına dorba ildirgendey gúm bolǵan joq pa? /kúlki/

Ayaǵın asıp qoyǵan adam: Ele de ańqırǵanday shamam bar, qorqpa!

Bası tańıwlı adam: Xaslına tartsań, ańqırasań ǵoy! /kúlki kúsheyedi/ Stolbalar saw bolsa, seniń ańqırǵanıńnan adam qorıqpaydı. /kúlki/ Gúrresin joytqan

mashanıń ańqırǵanınday dawısıń shıyqıldap shıǵatuǵın shıǵar? /kúlki/ Medsestra kelinshek bet-awızı jara, qolı moynına asılǵan jas jigitti ertip keledi.

Medsestra kelinshek: Maymıl oynatıp atırsız ba onsha kúlip?

Traktorın izeykeshke awdarǵan jigit: Awa, jeńge, Palım aǵanıń ústinde oynatıp atır. /kúlki/

Medsestra kelinshek: Tınıshlıqtı saqlań! /ákelgen jas jigitke / Mine, usı koykada jatasań. /shıǵıp ketedi/

Bası tańıwlı adam: Bul qaysı fronttan?

Qolı moynına asılǵan jas jigit: Chego?!

Ayaǵın asıp qoyǵan adam: Qoya ǵoy, Dáwen-áy, arbanı awdarıpalar.

Traktorın izeykeshke awdarǵan jigit: Sol arbanı awdarıp kelip otır ma deymen? /kúlki/ Betiniń ústinde biyik ókshe tuflilar menen tanсa oynaǵandayǵo. /kúlki/

Qolı moynına asılǵan jas jigit: Sizlerge ne, сirk chto li? /kátine otıradı/ Konchay te erundu! Adamǵa otdıx kerek!

Araq dep kislota iship jibergen adam: Sorlap qalǵan ekenbiz. Páy, sol kátti sırtqa shıǵarıp taslaw kerek edi.

Ayaǵın asıp qoyǵan adam: Óytip, bul, úyiń be jora, birin shıǵarıp, birin kirgize beretuǵın.

Bası tańıwlı adam: Ele de biziń baxtımızǵa bir qoldan mayrılǵan eken. Eki qolı saw bolsa tutıp jeydi.

Ayaǵın asıp qoyǵan adam: Qoramızǵa qasqır shapqanday etpese bolǵanı ǵoy!

/ Qolı moynına asılǵan jas jigitke / Jaysha keldiń be balam? /qalǵanları mırsıldap kúledi/

Qolı moynına asılǵan jas jigit: Kakoy saǵan jaysha? /qolın kórsetedi/ Vot chto?!

Bası tańıwlı adam: Qıyın bolǵan eken, inishek. Jıǵılıp qaldıń ba?

Qolı moynına asılǵan jas jigit: Kakoy saǵan jıǵılıp qaldıń ba? Podralis! Olar kóp edi.

Traktorın izeykeshke awdarǵan jigit: Kóp bolsa, jónińe kete bermeyseń be? Jalǵız ǵarǵanıń úni shıǵama?

Qolı moynına asılǵan jas jigit: Kto ǵarǵa? Kakoy ǵarǵa? Óziń ǵarǵa!

Ayaǵın asıp qoyǵan adam: Al, traktorshı inim, saǵan bir laskap tabılmay atır edi. Táwir boldı-aw mına balanıń kelgeni. Qara ǵarǵamısań, ala ǵarǵamısań? /kúlki/

Bası tańıwlı adam: Kók ǵarǵa shıǵar, kórpeniń astınan hár waq bir kórinedi ǵoy. /kúlki/

Qolı moynına asılǵan jas jigit: Kúliń! Kúliń! Maǵan ne do smexa! /kátinde oranıp jatıp qaladı/

Araq dep kislota iship jibergen adam: Jigitler, jas balanı qısındıra bermeń.

Tóbelesip, sharshap kelgen shıǵar, azıraq dem alsın.

Ayaǵın asıp qoyǵan adam: Yapırmay, bala, jurtqa janı qayǵı bolıp júrgende, bular tóbelesedi. Nesin alısa almaydı eken túwe?!

Qolı moynına asılǵan jas jigit: Boldı starik! A to…

Ayaǵın asıp qoyǵan adam: Qoydıq, balam, qoydıq. Uyıqlap alaǵoy, ózińe kelerseń. Tóbelestiń qızǵını ele qaytpay turǵanǵoy.

Bası tańıwlı adam: Tandırdıń basında tóbelesti me eken? /kúlki/

Traktorın izeykeshke awdarǵan jigit: Onda biziń awıldıń qatınları menen tóbelesken shıǵar /kúlki/

Bası tańıwlı adam: Bet-awzındaǵı kósewdiń izleri me eken? /kúlki/ Awılıńnıń qatınları aybıqaddem be deymen, inim? Barǵan adamdı, sawashtag qaytqanday etip jibere berse, ol awılǵa iytlerdiń-ám keregi bolmay qalǵan eken. /kúlki/ Seniń jambasıńda solardıń tepkisinen shıtnap atırǵan bolmasın, inim! /kúlki/

Traktorın izeykeshke awdarǵan jigit: Olar jambasıma tebiw túwe, onı jalawǵa zar bolıp júr-aw, Dáwen aǵa. /kúlki/

Bası tańıwlı adam: Kelistir júdá! Jambasıńnan pal sorǵalap turǵan shıǵar?! /kúlki/ i Aytpaqshı, seniń atıń kim edi qosshım? Júzdiń júzin bilgenshe, birdiń atın bil degen.

Traktorın izeykeshke awdarǵan jigit: Doxodbay.

Bası tańıwlı adam: Kim? Doxodbay? /kúledi/ Bir doxodlı jılı tuwılǵan nárriń ekenseńǵoy! Úylendiń be?

Traktorın izeykeshke awdarǵan jigit: Qol tiymey júr.

Bası tańıwlı adam: Qolıńınń tiymegeni jaqsı. Epke kelse úylenbe.

Traktorın izeykeshke awdarǵan jigit: Úylenbe? Sen ábden qapılttıńǵoy Kempir dıńǵırlap shıdata ma?

Bası tańıwlı adam: Sol kempirdiń dıńǵırlısı qurttı bizdi! Uay-ey, Doxodbay qosshım, mına tańıwlı bas nelerdi kórmegen?! Sen ele jassań. /ornınan turıp sırtqa shıǵıp ketedi/