bayıtıwdaǵı áhmiyetleri túsindirildi. Olardı shólkemlestiriw metodikası izertlenip, bazıbir metodikalıq pikirler bildirildi.
Pán olimpiadasın ótkeriw metodikası, ádebiyat bólmesinde klastan tıs jumıslardı ótkeriw usılları, ádebiy sayahatlar shólkemlestiriw máseleleri metodikalıq jaqtan izertlenip, bazıbir pikirler bildirildi.
Qaraqalpaq ádebiyatı bólmesi klastan tıs jumıslardı ótkeriwdiń orayı ekenligi, onda oqıwshılardıń klastan tıs ótkergen jumıslarınıń juwmaǵı, kórgizbeler múyeshi, bólmeni bezew, bólmede metodikalıq hújjetler, tematikalıq hám janrlıq ádebiy kórgizbeler ótkerilip turatuǵınlıǵı haqqında metodikalıq pikirler aytıldı.
Klastan tıs jumıslardıń úlken bir túri – bul ádebiy sayahatlar shólkemlestiriw máseleleri haqqında metodikalıq pikirler aytılıp, sayahattıń túrlerine toqtap óttik. Sayahat jasawdıń jobaları, onıń maqseti hám wazıypaları, oqıwshılar ushın áhmiyetli tárepleri izertlendi. Oqıwshılar qaraqalpaq ádebiyatı boyınsha klastan tıs jumıslardı úyreniw arqalı bilim hám kónlikpelerdi iyelewi kerek. Klastan tıs jumıslar arqalı úyrenilgen kórkem shıǵarmalar boyınsha awızeki hám jazba túrde erkin pikir júrite alıwdı qáliplestiriw, úyrengen shırmalardan alǵan tásirlerin túsindire alıw, kórkem shıǵarmadaǵı qaharmanlardıń xarakterin, obrazın túsine alıwı kerek. Sonday-aq klastan tıs jumıslar arqalı úyrenilgen jazıwshı-shayırlardıń dóretpelerin, jazıwshılıq sheberliklerin, ózgesheliklerin ajırata biliw, ádebiy qaharmanlardıń xarakterlerin, múnásibetin bildire alıwdı úyreniw tiyis. Klastan tıs jumıslar arqalı úyrenilgen ádebiy materiallar tiykarında kórkem estetikanı seziw, onı sóz benen aytıp beriwi zárúr.
Oqıwshılarǵa baǵdarlamada berilgen materiallar ádebiy konferenciya, klastan tıs kórkem oqıw, dógerek jumısları, albom hám jurnallar, diywalı gazeta shıǵarıw, ádebiy sayahat ótkeriw arqalı da úyretip barıladı. Sol arqalı oqıwshılardıń sanasına watanǵa súyiwshilik, insanıylıq, kishipeyillik, mehir hám muhabbat sıyaqlı joqarı insanıylıq pazıyletlerdi sińdire alıw, olardıń ruwxıy dúnyasın hár tárepleme milliy ideyalarǵa say rawajlandırıw kerek.
