Kenesbay Raxmanov - Abiyga babiy

21

ÁNWAR:- Zorladı degenge men qosılmayman. Zayda degen bir túrli qız ǵoy. On jigitke de bash bermeydi. Onıń ústine ol bolajaq yurist. Zań-zakunnın bárin yadtan biledi. Ozi qayıl bolǵan.

XALQORAZ:- Dunyasına qızǵan shıǵar?

ÁNWAR:- Áne, Xalqoraz inim, jańa haqıyqatlıqtı ayttıń. «Altın perishteni de joldan azǵıradı» degen gáp ras. Áne, Atash aǵa, endi Xalekeńe basqasın izley beresizler.

ATASH:- Áy, usılay qarap shıqqanda-aq tabanım tartpap edi-aw. Xalqoraz balam, qapa bolma, dayılarıńnıń bir qızına jambas urarsań.

ÁNWAR:- Qızları kóp bolsa, men de qalıp qoymayın. Maǵan ebindey bolsa da, bola beredi. Júdá shırrıqları kempir-ǵarrıǵa jaqpaydı.

ATASH:- Tańlayım-ám jarıldı, balam.

ÁNWAR:- Shay qaynatıp beriwge úyde hesh kim joq. Meniń qollarım bolsa, qap-qara may. Bunı tazalayman degenshe Shımbayıńızǵa ketesiz.

XALQORAZ:- Jol boyında shayxanalar bar ǵoy, aǵa. Kete bereyik.

ÁNWAR:- Al, qurı awız kettik dep ókpelemeń. Biziń ǵarrı menen kempir de awqat alıp Shámen aǵanıń izinen ketip edi. Bir gáp bolıp qalmaǵay da dep janiymanımız qalmay otır.

ATASH:- «Mal ashıwı-jan ashıwı» deytuǵın edi. Qız ashıwı da jaman. ÁNWAR:- Mıń aytqanda da qızdıń atı -qız. Perzentiń ǵoy.

ATASH:- (Xalqorazǵa) Ne qılsaq eken, balam, bolniсaǵa barıp Shámendi kórip ketsek pe eken?

ÁNWAR:- Hálek bolmay-aq qoyıń. Házir ol adam tanımaydı. XALQORAZ:- Qolınan qusı ushıp ketken soń, endi nesin kóremiz.

ATASH:- Olay deme, balam. Mıń aytqanda da, qıyametlik qońsı bolıp sonsha jıl otırdıq. «Qızdı kim ayttırmaydı, qımızdı kim ishpeydi». Bunnan bir hápte burın Shámenniń ózi menen Shımbayda bir merekede keliskenbiz. Ol da yaq demedi. Ballar bir-birin qálesse, dırrıqshılıǵımız joq dedi. Búgin bara ǵoyıń dedi.

ÁNWAR:- Pay neteseń-áy, úydegi sawdanı bazardaǵı nırq buza qoyǵan eken. Áy, endi balań aman bolsın, bir shúyke bas qapılar deyseń be, Atash aǵa.

ATASH:- Al, balam, jaqsı onda. Bizlerdiń kelgenimizdi hesh kimge aytpay-aq qoy. Dártine duz sepkendey bolarmız.

ÁNWAR:- Aytıp ne qılayın. Biraq, Atash aǵa, burınǵı qatnasıǵıńızdı suwıtpań. Bular da bir qudaydan tilegen adamlar ǵoy. Bári Zaydanıń kesirinen. Óz teńine shıqsa da hesh gáp-aw. Tap, Shámen aǵalarǵa jeteǵaba birew menen qashıp ketkeni uyat

ǵoy.

XALQORAZ:- Áy, mektepte oqıǵanda da bir jeńiltek qız edi ǵoy. Tashkentke barǵan soń óz erkine ketip buzılıp...

ÁNWAR:- Onday bolsa, ap-ańsat qutılǵanıń da jaqsı bolǵan eken Xalqoraz inim. Eplep aq may satıp, aqsha jıynay ber.

ATASH:- Esapsız aq may qayda, balam-aw, eplep shaj-pajǵa alıp tursaq-ám, sonıń ózi ulken ǵániymet. Al, yaqshı, balam.

ÁNWAR:- Yaqshı aman bolıńlar.

XALQORAZ:- Zaydanı kórseń mennen sálem ayt.

ATASH:- Endi seniń sálemińe sabın alama, shıraǵım-aw! Qoy qarası batsın!

22

ÁNWAR:- Al yaqshı barıńlar! (olar ketedi) Qudaydıń ózi keshirsin, pay, qatırdıń-aw! (Ol temirleriniń qasına keledi) Nege óyttim? Túsinbeymen... Zaydanıń jaman atı Shımbayǵa jayılıp ketetuǵın boldı-aw. Ya bular qısınıp aytpas pa eken?

Aytpaytuǵın shıǵar. Maǵan da hesh kimge aytpay-aq qoy dedi ǵoy. (Kempirler keledi)

PERIXAN:- Asıǵıp qayttıq, balam.

ÁNWAR:- Nege asıqtıńlar? ÍQLÍYMA:- Búgin sársembi eken ǵoy . ÁNWAR:- Sársembi bolǵanda ne?

ÍQLÍYMA:- Úyge bir miymanlar keletuǵın edi. Soǵan keshe bazardan bir túyetawıq alıp edik ǵoy. Sonı soyıp ber, balam. Asıp otıra bereyin. Hesh kim kelmedi me?

ÁNWAR:- Haw, Íqlıyma apa, «qonaqtıń tóbesin kórmey malıńdı soyma» degen qarekeńniń aqılı ma, naqılı ma bar ǵoy.

ÍQLÍYMA:- Qudayım-aw, túyetawıqtan mal bolıp pa sol! Zayda ele turmadı

ma?

ÁNWAR:- Sırtqa shıqpadı. PERIXAN:- Járdemleseyin be?

ÍQLÍYMA:- Awa. Zaydanı qalaǵa jiberip alayın anaw-mınawǵa.

ÁNWAR:- Araq ishetuǵın qonaqlar ma?

ÍQLÍYMA:- Yaǵaw... ǵarrınıń joraları ǵoy.

ÁNWAR:- Haw, mańlayım! Umıtıp baratır ekenmen ǵoy, Íqlıyma apa. Bir shaqırtıwshı kelip ketti.

ÍQLÍYMA:- Qayaqtan?

ÁNWAR:- Shımbaydan, burınǵı otırǵan jerińizden eken. ÍQLÍYMA:- (qáweterlenip) Toydıń xabarı ma?

ÁNWAR:- Toy emes. Atash degen qońsıńız bar ma edi? Atı Atash pa? ÍQLÍYMA:- Awa, Atash.

ÁNWAR:- Sonıń ...

ÍQLÍYMA:- Úyge búgin keletuǵın sol Atash edi ǵoy.

ÁNWAR:- Endi Atash kele almaydı. Sonıń Xal... Xalqoraz degen balası qaytıs bolıp qalıptı ǵoy.

ÍQLÍYMA:- Ne deydi?! Ax! Shıraǵım, shıraǵım-aw... jalǵızı edi ǵoy. (jılap jiberedi) Zaydanı sorap kelmekshi edi búgin...

PERIXAN:- Shúkirshilik et, Íqlıyma. Awırǵan ba? ÁNWAR:- Awırmaǵan. Ol may zauıtta isleydi eken ǵoy.

ÍQLÍYMA:- Awa, may zauıtta edi... Qaraǵım-aw ózimniń balamday edi! ÁNWAR:- Túngi smenada islep júrip uyqısı kelgen be, ya aq mayǵa tayıp

ketken be, áytewir, ush tonnalıq presstiń astına túsip qalǵan. Hesh kim kórmegen. Há, shigitti sıǵıp mayın alatuǵın press kem-kem qısa bergen, qısa bergen, shigittey etip,

Xalqorazdıń da barlıq suyıqlıǵın sıǵıp alǵan. PERIXAN:- Biyshara-áy...

ÁNWAR:- Sıǵıp bolǵan soń anaw jer tesetuǵın burawlarday burawı boladı eken. Ol tap, duwramanıń góshindey etip maydalap taǵı iskenjege salıp qısadı eken. Súyekten-ám nawa qalmasa kerek. Sóytip, qup-qurǵaq qaldıqtı gúnjara dep sırtqa shıǵarıp taslaydı eken. Alla-áy, ele sol Xalqorazdıń gewdesinen islengen aq maydı-ám

23

ishemiz-aw. Biyshara. Azanda Xalqorazdıń súyekleriniń, etiniń qaldıqların zauıt boyınsha adamlar gunjaranı tintip, altınnıń qıyqımın jıynaǵanday bir salofan qaltaǵa salıptı. Yarım qalta-aq bolǵan qusaydı.

PERIXAN:- Onı ne qıladı eken?

ÁNWAR:- Onı ne qıladı eken degeniń ne, apa? Haw, jerleydi ǵoy. Moskvadaǵı orıslar órtep jiberip kúlin de shiyshe menen jerlep atır ǵoy.

(Íqlıyma eńirep jılay baslaydı. Onı Perixan jubatadı. Anasınıń dawısın esitken Zayda ishten juwırıp shıǵadı.)

ZAYDA:- Amanlıq pa? Ne bolıp qaldı, mama?! ÍQLÍYMA:- Sorlap qaldıq, balam...

ÁNWAR:- Zayda, táǵdirdiń isine shara joq. ZAYDA:- (jılawǵa qayımlanıp) Ne ózi? Pa-pam ba? ...

ÁNWAR:- Yaǵaw, qayaqtaǵını aytpasa... Saǵan kewil bildiremen, Zayda.

Shımbaydaǵı bayıń qaytıs bolıp qalıptı? ZAYDA:- Ne bay?!

ÁNWAR:- Aq may!

ZAYDA:- (Ánwarǵa tigilip qarap turadı da shaqalaqlap kúlip jiberedi) Sen uttıń, Ánwar. Bir nol!

ÁNWAR:- Yaq, ekige bir!

(kempirler ekewine qarap ań-tań bolıp qaladı)

PERDE

BESINSHI KARTINA

Ánwar skameykada jalǵız otır. Biytanıs bir jigit keledi. Atı Begimbay. BEGIMBAY:- Salawma áleykum!

ÁNWAR:- (oǵan ashıwlı qarap turadı) Salawma áleykum emes, assalawma áleykum dep sálemlesiw kerek.

BEGIMBAY:- Assalawma áleykum! (qolın sozadı. Ánwar tek ǵana qolınıń ushın tiygizedi) Zoyanıń úyi mınaw ma?

ÁNWAR:- Zoya? Onday qatın turmaydı. BEGIMBAY:- #atın emes, qız!

ÁNWAR:- Qız da turmaydı. BEGIMBAY:- Náp bále, kóship ketti me? ÁNWAR:- Kóship te ketken joq. BEGIMBAY:- Otırsam múmkin be?

ÁNWAR:- Dińkeń qurıp tursa, otır.

BEGIMBAY:- (otıradı) Qızıq boldı-aw! Maǵan bergen adresi usı edi ǵoy.

ÁNWAR:- Sen ózi qayaqtan kiyatırǵan balasań? BEGIMBAY:- Moynaqtan.

ÁNWAR:- Jaysha ma?

BEGIMBAY:- Áy, Zoyanı kórip kete qoyayın dep edim. ÁNWAR:- Zoya degen neń edi?

24

BEGIMBAY:- Nem bolatuǵın edi? Bılayınsha... tanıs... Tashkentte birge oqıp atırmız.

ÁNWAR:- Haa, Zoya dep otırǵanıń Zayda ma? BEGIMBAY:- Bizler Zoya dep aytıp ketkenbiz.

ÁNWAR:- Ol qız Tashkentte jaqsı oqıp atır ma ózi? BEGIMBAY:- Haw, ol hámmemizdiń atamanımız ǵoy.

ÁNWAR:- Ataman? Ataman degen bayaǵı baspashılardıń basshısı, sárdarı emes pe?

BEGIMBAY:- Solayı solay shıǵar. Biraq, bizlerdiń atamanımızZoya!

ÁNWAR:- Áy, qarq! Nashardan ataman bola ma, jataman bolıwı múmkin-dá. Sen ol qızdı ne maqset penen izlep kiyatırsań sonsha jerdiń túbi Moynaqtan.

BEGIMBAY:- Alıp keteyin dep edim.

ÁNWAR:- Moynaqqa ma? Hayallıqqa ma, ya aparıp qamıs orǵızasań ba? BEGIMBAY:- Basqalarǵa qaraǵanda bizlerdiń kewlimiz jaqınıraq edi-dá. ÁNWAR:- Seniń jasıń neshede? Ele awzıńnıń sarısı ketpegen palapanǵa uqsap

tursań ǵoy.

BEGIMBAY:- Jigirma úshke shıǵıp qaldım ǵoy.

ÁNWAR:- Aytaman-aw... Zaydanı aparıp kempir qılasań ba? Onıń jası otızǵa shamalasıp qalǵan ǵoy.

BEGIMBAY:- Otızǵa? Wáy, siz de tıǵının baspay soyleydi ekensiz-aw.

ÁNWAR:- Qaqpaǵın basıp soyleseń-dá, solay, ǵoshshım. Sen esapla, orta mektepti basqalar on jetisinde pitkerse, bular pitkereyin dep turǵanda on birinshi klassta oqıysız degen. Sóytip on segiz jasında mektepti pitkergen. Sóytip, pedinstitutqa tapsırmaqshı bolıp Shımbaydan Nókiske kelgen. Testten óte almay úyine qaytqan. Kelesi jılı eplep ótken. Sen, Begimbay inim, barmaǵıńdı búgip sanap otıra ber. Bul dáwirde ol jigirmaǵa kelip qaldı.

BEGIMBAY:- Durıs.

ÁNWAR:- Sonnan bes jıl oqıǵan. BEGIMBAY:- Eki jıl-aq oqıdım dep edi ǵoy?

ÁNWAR:- Nashar durısın ayta ma? Qızıq jigit ekenseń-áy. Sonnan bes jıl oqıydı. Jigirma tórtinde pitkeredi. Eki jıl Shımbaydaǵı bir mektepte muǵallimshilik etip, bala oqıtqan. Keyin bul kásipti unatpaǵan. Sonnan birewler sebepshi bolıp

Tashentke ketip, házirgi oqıwına túsken ǵoy. Al, óziń esaplay ber. Otız jasqa barmaǵan nesi qaldı?

BEGIMBAY:- Túri ele jap-jas ǵoy.

ÁNWAR:- Sen onı jaqsı kórip qalǵansań ǵoy. Alpısqa shıǵıp qalǵan kempirdi súyip qalsań da, on segiz jasarday bolıp kórine beredi. Bul mańlaydaǵı kóz degen satqın múshe ǵoy. Televizor kóreseń be?

BEGIMBAY:- Kórgende qanday!

ÁNWAR:- Kórseń, Moskvadan bir jetpiske, seksenge shıqqan artist kempirlerdi kórsetedi ǵoy. Júzleri tep-tegis, shashları buyra-buyra. Jasın aytpasa, pax, meniki bolsa eken dep otırasań. Kosmetika degen olardı restavraсiya etedi eken-dá.

Betińdegi jıyrıqların tartıp-tartıp, kórinbeytuǵın bir jerine tırmıshlap baylaytuǵın kórinedi. Al, shash degen ansat ǵoy. Boyaydı. Túsip qalǵan shashlardı-ám jeriniń alaǵat jerine nál tikken diyxanday etip otırǵızıp atır ǵoy.

BEGIMBAY:- Onıń durıs.

25

ÁNWAR:- Sen qız ákelemen dep uyińe aytıp qoyǵan joqpa ediń? BEGIMBAY:- Yaǵaw.

ÁNWAR:- Ol jeriń táwir eken. Zaydanı alıp barsań, taǵı bir pensionerdi

ákelipti-aw dep raysobestegiler zirlep qoya berer.

BEGIMBAY:- Sonsha jerden kele qoyıp edim, hesh bolmasa kórip keteyin.

ÁNWAR:- Kórmey-aq qoy. Ústinde jigitler bar shıǵar. Asıqpasań, ocheredke

tur.

BEGIMBAY:- Jigitler kóp kelip tura ma?

ÁNWAR:- Sorama! Gey kúnleri úydiń aldında mereke bolıp atırǵanday bolıp ketedi ǵoy. Jánjel-pánjel shıqpasın dep usı jerde retlestirip kirgizip turaman.

BEGIMBAY:- Bilet-ám satasız ba?

ÁNWAR:- Yaǵaw, quday saqlasın! Házirshe besplatno.

BEGIMBAY:- Qoy, shıdamım tawsılıp ketti! Kórip shıǵayın. (ornınan turıp pát penen ishke kirip ketedi)

ÁNWAR:- Háy, eneǵardıń balası-áy! Moynaqqa alıp ketemen deydi-aw. Sonsha iyt ólgen jerdegi Moynaq túwe, arası eki adım dárwazadan ishke kirgiziwge júregim dawamay otır. Adamlar halına qaramaydı eken-aw, bala. (ishten Perixan shıǵadı)

PERIXAN:- Ánwarjan, telefonnan birew sorap atır ǵoy. ÁNWAR:- Kim eken, apa?

PERIXAN:- Qáydem, bir nashardıń dawısı ǵoy.

ÁNWAR:- Nashar keselim joq, apa! Meni on kúnnen berli úyge kelmedi, miliсiya izlestirip atır de.

PERIXAN:- Qaydaǵı báleni tilińe baspa, balam. Tandırı shıqsın! ÁNWAR:- Jumısında dey ǵoy. Qaltasındaǵı telefonına zvonit ete ǵoy de. PERIXAN:- Nawmirin bile me?

ÁNWAR:- Bilmese qoyadı-dá! Onıń nawmiri ózimniń de yadımda joq. PERIXAN:- Yaqshı! (ishke ketedi. Usı waqta Zaydanıń dárwazasınan murnın

aq oramalı menen basqan Begimbay shıǵadı. Aq oramalı da qıp-qızıl qanǵa bılǵanǵan)

ÁNWAR:- Haw, haw ne boldı? Baqanǵa urıp aldıń ba?

BEGIMBAY:- Seniń aytqanlarıńdı aytıp edim, Zoya ayaǵı menen murnıma tewip jiberdi.

ÁNWAR:- Háy, átteń, ayaqları jetpeytuǵın jerde turıp sóylesseń boladı ǵoy. BEGIMBAY:- Qáydem bileyin.

ÁNWAR:- Bizler-ám tepkisiniń astında óskenbiz, inim. Sen onıń qayaǵın súyetuǵınıńdı-ám bilmeydi ekenseń-aw. Aldı menen onıń ayaǵın súyiw kerek. Bul quraqım murın menen qutılsań hesh gáp, Begimbay qoshshım. Orınsız jerge tumsıǵıńdı tıqpa degen usı. Ayaǵınıń ele de iyegine tiymegenin ayt. Iyegiń ornınan tayıp ketkende... ya sóyley almay, awzıń ǵajıp ketken qapıday durıslap jabılmay... bir nárse háreketlep ketken taza jillidey bolıp, ya Moynaǵıńa qaytıp bara almay, ya Nókiste júre almay...

BEGIMBAY:- Kettim, Zoyanı jelkemniń shuqırı kórsin!

ÁNWAR:- «Jarlınıń awzı jana asqa tiygende murnı qanaydı» degen usı. BEGIMBAY:- Awzım asqa emes, tasqa tiydi ǵoy, aǵa... Yaqshı! (ketedi)

ÁNWAR:- Qoy, garajıma barayın. Isleytuǵın isler kóp...

26

(ketedi. Azdan keyin úyinen Zayda shıǵadı. Ol bılay-bılay qarap, skameykada otıradı. Qolında bir kitap bar. Otırıp oqıy baslaydı. Bir qız keledi. Atı Nazlı.)

NAZLÍ:- Salamatsız ba?

ZAYDA:- (kitabın jawıp) Bir nárse dediń be?

NAZLÍ:- Saw barsız ba deymen.

ZAYDA:- (onıń túr-túsine anıqlap qarap) Qaydan kiyatırsań? NAZLÍ:- Ánwar degen jigitti izlep kiyatır edim.

ZAYDA:- Jaysha ma?

NAZLÍ:- Úsh jıllıqta bergen wádesi bar edi. ZAYDA:- Wáde? Ne wáde?

NAZLÍ:- Meni alaman dep edi. ZAYDA:- Alǵanı qalay?

NAZLÍ:- Qatınlıqqa dá! Ári-beri kúttim, wádesiniń ústinen shıqpaǵan soń qarap júre bermeyin dep basqa birewge tiyip kettim.

ZAYDA:- Tiyseń, Ánwardı ne qılayın dep ediń?

NAZLÍ:- Bir jılǵa jeter-jetpesten ajırasıp kettik-aw. Házir basım bos. Alatuǵın bolsań al dep aytajaqpan Ánwarǵa.

ZAYDA:- Balań joq pa?

NAZLÍ:- Túsip qaldı. Tiygen kúyewim pyańshik edi ǵoy. Ol azday anaw bir nárseni de shegedi eken. Ne azapların kórdim ǵoy. Tórt bes jorasın ertip keledi, túni menen ala burqan tútinniń ishinde ulı-qıyqıw. Tań atqansha maǵan da dem alıs joq.

Bárin támiyinlewim kerek. Qashanǵı shıdayın. Qashıp kettim. Kóp uzamay órtenip ólipti degen xabar esittim. Quwanıp kettim... Ele de Ánwardan gúderimdi úzgenim joq. Bul da gápin shaymalaytuǵın turaqsız jigitpe deymen.

ZAYDA:- Bul ushın... ne desem eken, jalǵız Ánwardı ayıplap bolmaydı. Atıń kim edi?

NAZLÍ:- Nazlı.

ZAYDA:- Atıń jaqsı eken. Ánwar úsh jıllıqta, yaǵnıy, saǵan wáde berip bolǵannan keyin bir jalataylarǵa qosılıp mashın urlaǵan. Sonnan bes jılǵa qamalıp ketti.

NAZLÍ:- Haw, biyshara... men oǵan ókpelep júrmen-aw. Házir turmede me? ZAYDA:- Jaq, turmede emes. Jaqında amnistiyaǵa ilinip qaytıp keldi. Biraq,

úsh jıldı bir iyinnen sanap beredi.

NAZLÍ:- Hee, túrmege túspey atırǵan adam bar ma? Aman-saw kelse boldı ǵoy. Oǵan tiyip ǵana alayın, bul júrisim bolmas.

ÁNWARDÍ; DAWÍSÍ:- Zayda, kim ol? ZAYDA:- (dawıslap) Nazlı!

ÁNWARDÍ; DAWÍSÍ:- Nazlı? Nazlı degen kim? ZAYDA:- Seniń ashıǵıń!

NAZLÍ:- Men ǵoy, janım! Men ǵoy, baxadırım! Seni izlep kelgen opadarıńman! Házir baraman! (ol garaj betke ketedi, Zayda izinen ashıw menen qarap qaladı)

ZAYDA:- Opadarıńman deydi-aw bir qalanıń jigitlerin támiynlep júrip...

(garajdıń ishinen ulı-bıǵırlı ájeptáwir dawıslar shıǵadı. Zayda ań-tań, ornınan turıp sol jaqqa qaraydı. Bir waqıtta ókirip jılawı menen betin uslap Nazlı shıǵadı. Onıń júzine Ánwar qap-qara may shappatı menen urǵan.)

27

NAZLÍ:- (jılap) Oy, tandırıń shıqqır, tyuremshik! Burın-ám qarq emes edi, turmege barıp qaytqalı ábden buzılǵan eken. (kóz jasın qolı menen sıpırıp, ol betindegi maydıń daǵına aralasıp, júzi ábden ala-bajaq boladı. Sumkasınan aynasın alıp qaraydı.) Way-way, mınaw men be? Gúldey Nazlıman ba? Yaq, yaq, bul men emes! Bir júzi qara bul, bir qara bet... beti qara bul! Endi kóshede qalay júremen? Adamlarǵa qaysı betim menen qarayman?!

(ol eńkildep jılawı menen kete beredi. Zayda lam-mim demesten onı kózleri menen shıǵarıp saladı. Keyin Ánwardıń garajına qaray ketedi. Ishten eki kempir, eki

ǵarrı shıǵadı)

AYTAN:- Jańa bir jılaǵan nashardıń dawısı esitildi me usı?

SHÁMEN:- Men de esitkendey boldım. PERIXAN:- Qońsılardıń balları shıǵar? ÍQLÍYMA:- Áy, ballar jılaydı, kúledi...

AYTAN:- Yaq, bala emes, úlken nashardıń dawısına megzeydi. SHÁMEN:- Zaydan qayda, kempir?

ÍQLÍYMA:- Zayda kóshede jılap bále kórinip pe, ǵarrı? Sen-ám ne bolsa soǵan...

PERIXAN:- Ánwarjan da kórinbeydi. AYTAN:- Anaw kiyatırǵanlar...

PERIXAN:- Bular taza kelin-kúyew ǵoy...

ÍQLÍYMA:- Haw, bular Zayda menen Ánwarǵa uqsaydı ǵoy! SHÁMEN:- Repetiсiya ótkerip júrgen shıǵar?

(olar áste júris penen ǵarrılarǵa jaqınlay beredi. «Qutlı bolsın toylarıńız» degen qosıq jańǵıradı. Kelinshektiń appaq lipasındaǵı Zayda, kúyew kostyumindegi Ánwar ǵarrılardıń aldına kelip, basları jerge tiygenshe iyiledi. Perixan Zaydanı, Íqlıyma Ánwardı Qushaqlap betlerinen súyedi. Aytan menen Shámen bir-biri menen qushaqlasadı. Spetakldi atqarıwshılar toyǵa jıynalıp atırǵanlarday saxnanıń eki tárepinen kele baslaydı. Olar jas kelin-kúyewge gúller usınadı. Dál ortada kelinkúyew, Zaydanıń qasında Perixan, Ánwardıń qasında Íqlıyma, eki tárepte eki ǵarrı, basqa da qatnasıwshılar bir sapqa dizilip, tamashagóylerge qaray jaqınlay beredi, jaqınlay beredi hám iyiledi. Qosıq jańǵırıp tura beredi)

TAMAM