Abulqasim Otepbergenov - Tanlamali shigarmalar 5
.pdfWah, ıshqında janǵan sayın, jáne jaǵar. Bul ne azap? Óz arzıwlı intizarın, dushpan sanar. Bul ne azap? Dos sanaydı basqalardıń bárin nigar. Bul ne azap? Tekte meniń bir ózimnen júzin burar. Bul ne azap?
Maǵan bir kúlip qaramas, basqalarǵa jazday kewli, Men jaqsılıq kútsem onnan, dım ózgerip barar peyli, Halım bilip azap berer, biraq bárin sezer zeyni,
Hám táǵdirdiń, yazmıshımnıń ǵarǵaǵanı azday meni, Meni taslap basqa menen bázim qurar. Bul ne azap?
Qoy-há kewlim, ol nigradı, azabınan janım toydı, Sózlerime juwap bermey, gáp-sózsiz pıshaqsız soydı, Wádesiniń opası yoq, óz wáde ıqrarın joydı,
Biraq maǵan búgingi kún jalǵız iret kúlip qoydı, Yardıń geyde minez qulqı shubar-shubar. Bul ne azap?
Búgin nigar baǵ seyline talpınıp tur. Qanday shadlıq, Usı kúndi arzıw etip, qıylandıq, sarǵaydıq, azdıq, Jollarına payandoz bop, gúllerden gilemler jaydıq, Sárwi boylım, jilwa taslap, qulpırıp tur, qanday baylıq, Qansha qılwa, qansha hiyle, qansha qumar. Bul ne azap?
Kirpikleri nishter yańlı qası jayday qayrılıpdur, Sulıwlıqta dańqı onıń, shar tárepke jayılıpdur, Onı kórip kóp ashıqlar aqıl-huwıshtan ayırılıpdur, Biraq jáne qılısh penen atı onıń ayralıqdur, Bawrım tiler. Oylan usı kimge unar. Bul ne azap?
Nigardıń jábir sitemi janıma batıp tur júdá,
Májnúndey májgún boldıy-aw, bul sorlı Jáyhún ıshqında, Aytıńızshı, shek bolmaspa, hásiret penen qayǵı-muńda, Áy Nawayı, ol názelim biráhimdur, biraq shıda,
Yaqshı adam kekshil bolmas. Shúkir qılar. Bul ne azap?
***
Duwtardurman, ah, shegermen, perdesiz, tiyeksiz, tarsız, Báhárdurman, tolǵanarman, quyashsız, aqqussız, ǵazsız, Baǵdurman, nala eteremn, gúlzarsız, almasız, narsız, Báhár keldi. Yar kelmedi. Páryad etermen ol yarsız, Sayray alarma búlbil, shámensiz, baǵsız, gúlzarsız.
Bir opalı ǵosh jigitsiz shashı súmbildiń halı ne? Almas doynaq, qos qanatsız, aytshı, dúldildiń halı ne? Ashılǵan menen gúller búlbilsiz gúldiń halı ne? Sayrar búlbil awanına gúlsiz búlbildiń halı ne?
Ah, aqıldan ayrıldım men, sol sárwi boylı nigarsız.
Biyik párwaz suńqar edim, qaldım qanattan qayrılıp, Jol shıdatpas tulpar edim, qaldım doynaqtan mayrılıp, Sóytip nigar ashıǵınıń kókiregin qoydı muń qılıp, Tań emes azap shekpek, tuwılǵan jerden ayrılıp, Dúnyada tek jalǵız nárse - shın periyzatdur hazarsız.
31
Shamday sónip tamam boldım, ıshqında jana-jana, Ármanım at basınday-aw, súymedim qana-qana, Kózden qanlı jas tógip, bawırım etti para-para, Gúldiń payasın otın bil, onıń ózin ot dep sana, Gúl sol gózzal nigarsız, baxıtlı etiwge halsız.
Ráhim áylep, lábińdi ber, arzıwlım jalǵız qushayın, Yar diydarı, posa keyipi, más bolıp, shalqıp yoshayın, Báhárdegi Ámiw yańlı, máwij urıp, tolıp-tasayın, Keselerge sharap toltır sırımdı saǵan ashayın,
Geyde paldıń pal ekenin bilip bolmaq joq záhársiz.
Máshrep yańlı yar ıshqında júrgen diywana sayılman, Baw-baqshalı, álwan dóngen - shámen, gúlzardan ayrılǵan, Elede sol yar jolında gúlli apatqa qayılman,
Áy nigar, ǵarǵa, jarılqa, erk ózińde. Men qayılman, Sebebi barma kórgeniń, gúl tikensiz bolmaydı hárgiz.
Májnún tallar basın iydi, kelip shadlı nawrız ayı, Lala gúlden lipas kiydi, bolıp pushtı reń, pashshayı, Biraq Jáyhun kewli bárhá, báhársiz, gúlsiz udayı, Bul dúnyanı tárk etiwdi, rawa kórmey tur Nawayı, Ardaqlań waqtı-xoshlıqtı etpeń ómirdi báhársiz.
***
Ax shegip, páriyad etermen, lápleri pallı kelmedi, Qumay kózli, qıpsha belli, júzleri qallı kelmedi, Jilwa menen janıń alǵan, mıń jılwa nazlı kelmedi, Keshe kelermen dep edi. Ol sárwi boylı kelmedi, Kózlerime tań atqansha hesh qanday uyqı kelmedi.
Juldız sennen jilwanı, ay arıw júzine nur aldı, Jamalıń kórip kóp arıw, bas iyip, únsiz lal qaldı, Sen ketkeli báhár ketip, jánede báhár aylandı, Wah, jolıńa qaray-qaray, janım awzıma taqaldı, Shepdur onıń minez-qulqı, jamandur peyli kelmedi.
Bilmedim arıw óziniń wáde ıqrarın joydıma,
Ya mennen basqa birewdiń súyikli yarı boldıma, Sóytip ayralıq otına bawırımdı daǵlap qoydıma, Ya ay jarıǵınan, ya gáp-sózlerden ol qorıqtıma?
Ótpes pıshaq penen qıynap, ol meni soydı kelmedi.
Basım sirá ayrılmadı, qayǵı-hásiret naladan,
Yarı pisent etpey ketken men bir sorlı biysharaman, Sabırım kesesi toldı sarǵayıp solıp baraman,
Men ol páriy dástinen qan ıǵladım, diywanaman, Keshe kórdim, uyaldıma, kúldi de qoydı kelmedi.
Ol ketti, biraq men ele, onnan kóp umiydiwarman, Ráhim áylep keler-ay bir, diydarına intizarman, Olsız men qanattan qayırılǵan ármanlı bir tárlanman,
32
Kózlerimnen yar ıshqıńda, ah urıp, jas aǵızarman, Meniń jubatar dostım yoq, ezdi ǵam-qayǵı kelmedi.
Tóbem kókke jeter edi, kúlip bir kelse gúl shıray, Sóytip kewlimdi shad etse, gózzalım kózleri qumay, Meniki tekte qam táme-aw, ármanım at basınday, Men kibi sadıq jan yoqdur, Biyopa yoqdur onıńday, Záhárli pal, tikenli gúl, dushpan shıraylı kelmedi.
Jayhun ashıq byuolsań eger, azap-uqıbetten qashpa, Ańsatlıqta yar diydarı, shiyrin posa yoqdur hasla, «Char dewan»dı qolǵa alıp, ayralıq qosıǵın basla, Áy Nawayı, sharap iship, óz kewlińdi óziń xoshla, Seniń-aq, baxtıńnıń bir, utırı, payıtı kelmedi.
***
Yar keler, júrisi qanday sumlıq. Áne kóriń, Gúller hám serpilip, eter qullıq. Áne kóriń. Jilwasına bul keń jáhán, eter tarlıq. Áne kóriń. Yar keler sonday ózimshil, jáne shırıq. Áne kóriń, Yar keler, mingen atı tákabbırlıq. Áne kóriń.
Ol sabır-taqatım, aqıl-xuwshım alıp ketti,
Bir baqıp, dawası joq, dártke janım jaǵıp ketti,
Ya ráb! Júziniń shuǵlası maǵrubtan mashruqqa jetti, Perishteniń párin julıp, taqıyasına pópek etti, Ráhim yoq, sonı kórip, táwbe qıldıq. Áne kóriń.
Nigar kókte sholpan menen jerde turıp sáwbet qurar, Afina hám Afrodita basın iyip tájim qılar,
Onda sirá ráhim yoq, dástinen mıń ashıq jılar, Misli uw tilli oq jılan. Meniń jan zárrem ushırar, Jiberer ókpe-bawırımdı nigar qırqıp. Áne kóriń.
Onda tákábbırlıq basım, qayrılıp bir qaramadı, Óz arzıwlı intizarın itibarǵa bir almadı, Shiyrin-sheker niyetlerim, tekte qıyal bolıp qaldı, Bellerine sadaq baylap, qolǵa ayır nayza aldı, Jan alıwǵa atınan yar tústi ırǵıp. Áne kóriń.
Yaqshı arzıw-úmit penen gúlimdi bersem qolına, Bir jirkip, nigar tasladı, onı tap ayaq jolına,
Kim shıdaydı, aytıńız-shı, yardıń bunday qılıǵına, Ol nigardıń kirpigi oq. Sol oq tiyip ashıǵına, Sonnan berli bir ayaǵın basar sıltıp. Áne kóriń.
Nigar jamalın kóre almay. Jáyhún jábirde qaldı, Jollarına qaray-qaray, janım awzıma taqaldı,
Kózden ráwshan, belden quwat, al dizden dimardı aldı, Nawayı basıń tómen al. Sarazban deyber ol yardı,
Ol yar ettirmey qoymaydı, saǵan qullıq. Áne kóriń.
***
Hesh kim men kibi ilayım yarǵa intizar bolmaǵay,
33
Tarı háwijinde úzilgen, ármanlı duwtar bolmaǵay, Shaqasında turıp solǵan, wax, almalı-nar bolmaǵay, Yarınan hárkim ayrılıp, mendey ahıw-zar bolmaǵay, Mendey bul aylı álemde ráswalıqqa duwshar bolmaǵay.
«Keldedimnigar sáwbetke, sharaptan alayıq azlap», «Kultay kewli qurt kúseydi» dedi ol meni mazaqlap, Sonda halım Májnún kórse, jılar edi bozlap-bozlap, Men áwere bolǵanman, ıshqı haqqında gáp qozǵap, Men kibi biykar ax urıw basqaǵa dárkar bolmaǵay.
«Senseń – dedimkewil xoshım maqtanıshım, áy nigar», Ráhim áylep bizgede bir, kóp qatarı názeriń sal, «Arǵısıńda joq eken-aw - dedi -barma, namıs-ar», Janıma zulım isledi hesh ráhim etpedi yar,
Hesh bendeniń keleshegi bunday biybáhár bolmaǵay.
Dedim ayaqqa bas urıp, «Nigar meniń halım túsin», Ol dedi: «májgúnbiseń, awzıńa jetpeyme kúshiń?» Yardan dákki jep men paqır, bolıp júrmen jalǵız qısım, Juldızlı kesh ayasında, áy saqıy, sen sharap usın,
Shad et meni azıraq, kewil biyqarar bolmaǵay.
Táripin dástan etiwge, sózimniń kúshi jetpedi, Qansha húrmet, qansha izzet isledim, yarǵa ótpedi, Kórse teris baqıp bárhá Jáyhundı piskent etpedi, Yarǵa qolım jetti dep men quwansam ol «Ket!» dedi, Nawayı pal dep ishkeniń inshalla záhár bolmaǵay.
***
Májnún yar jolında shóllerdi gezdi, Íshqı dárti onıń bawrın ezdi,
Tap sol táǵdir meniń basımda endi, Íshqı daǵı etti biyshara bizdi, Judalıq áyledi awara bizdi.
Onı jaqsı kórdik tándegi jannan,
Waz keshtik, shadlıqtan dúnyadan, maldan. Wah, átteń bir xabar almadı haldan,
Sóytip ayra túsip biyopa yardan, Watansız áyledi biygana bizdi.
Ol Patpanıń húr qızlarınıń biri,
Shıǵıstıń qubılǵan marjanı-dúri,
Yaq ol bir biykar gáp, álemniń gúli,
Yardıń qası oq jay, oqdúr kirpigi,
Hálsireter tánde mıń jara bizdi.
Dáwleti bar onda ay menen kúnniń, Íshqında bawrı qan kók penen jerdiń, Sonlıqtan tıńlamas arzın hesh kimniń, Juldızı janbadı Farxad, Májnúnniń, Sol táǵdirge etti muptala bizdi.
34
Sın-sımbatı qúdret-aw bir minsiz, Juldızlar kórkine kóz tiger únsiz, Shiyrin sulıw kórse bas iyer sózsiz, Biraq ráhim etpes gózzal miyrimsiz, Sen tas atıp, óytip, qıynama bizdi.
Yarda yoqdur haslan toyım-qanaat, Kókten juldızlardı jular danalap, Yar ózgege jánnet, al maǵan apat,
Áy nigar, yaqshıdur, miyrim shapaat, Eter mákkarlıǵıń diywana bizdi.
Jáyhun tur qolına gúlini uslap,
Kel nigar kúlimlep, kewildi xoshlap, Qoy ashıwdı, qáyteseń kóp azaplap, Áy Nawayı, dilwar bir jilwa taslap, Ol sóytip áyledi wayrana bizdi.
***
Yar dep, mendey hesh kim mıń nala etpes. Kewli ǵamlı, bawırın mıń para etpes, Sóytip óz baxıtın dım qara etpes,
Ǵamnan qutqarmaqqa yar shara etpes, Meni dushpan onday muptala etpes.
Ol miywalı, sán sawlatlı bir daraq, Sayası bizlerden kóp arı, jıraq, Kóz taldı kórkińe telmirip qarap,
Men shóllermen yar lábine. Ol biraq, Láb usınıp ózin awara etpes.
Láb qayda. Gáp-sózsiz janım alıp tur, Sulıwlar biyráhim, mennen xalıqdur, Dástinen mıń ashıq, datlap, nalıp tur, Meniń haq kewlime jara salıp tur, Jandı qıyıp onday mıń para etpes.
Dedim: «nigar óziń shuǵlalı aysań, Lábin qushıp, aq júzińe bir toysam, Ármansızban, keyin óltirseń, soysań», Ǵáripdurman, tas usındı qol jaysam, «Al-dedi- ol nigar hesh bále etpes».
Ol biyikte biz bárhulla pás bolıp, Júrmiz júregimiz hásiretke tolıp, Qaldıq, qazan bolǵan gúl yańlı solıp, Júregim usınsam kúldi más bolıp, Masqarapaz onday masqara etpes.
Pay neteseń!Kewil kúsep qıylı qal, Men onnan soradım jaǵday hám de hal, Ol meni kóriwden asıǵıs-máttal,
35
Maǵan záhár berdi, baxtalasqa-pal,
Táǵdir ádil emes, kim nala etpes.
Jáyhun umıt bolar, bul muńlı kúnler, Nigar rehim áylep baq-dáwlet kúler, Átteń! Pushqa shıqtı arzıw-úmitler, Nawayı ráhim sorap kózden jas tóger, Ayawsızlıq kimdi biyshara etpes.
***
Zevs qızlarında da hesh sendey shıray bolǵan emes, Taldırmash bel jipek shashlı, kózi qumay bolǵan emes, Láylidaǵı tap ózińdey mıń qızǵa tay bolǵan emes,
Bul aylı álemde hasla, júzińdey ay bolǵan emes, Lápleriń pisken miywe jemis onday bolǵan emes.
Qansha máni, qansha hiyle, qansha sır bar sózlerińde, Jánnetke nesip etpegen gúlzar kórdim izlerińde, Qurban bolıp ketsem dedim mıyıq tartıp kúlgenińde, Nigar, kózleriń jánnetdur, qanshelli muń kózlerińde, Kóz bunshenli álamatqa, mazmunǵa bay bolǵan emes.
Ay júzinde de daq bardúr, biraq sende bir de min yoq, Íshqıńda órtenip janbaǵan men paxırda birde kún yoq, «Dadımdı esit darıǵa» dep, datlasam sende ún yoq, Seniń ismińdi esitip, axmaq boldım. Mende min yoq, Bunshelli wayran bolǵan mendey gedey bolǵan emes.
Qayrılmay kek etip óttiń, sıbaǵamız sol boldıma?
Ya on gúlden bir gúl ashılmay, paymanamız toldıma? Ráhim áylep qolıńdı ber, gúl pitkey sol qollarıńa, Kóz jaslarım misli marjan, yar tóselgey jollarıńa, Hasla ǵárip janımdı qoyarǵa jay bolǵan emes.
Haw sende bir arz esitip, tıńlasesh bir tilegimdi, Mártlik islep lábińdi ber, moynıma sal bilegińdi, Sóytip ráwshan et, bir kúnimnen bir kúnimdi, Saǵan janım bereyin, iytiń alsın júregimdi,
Bunnan artıqtı soraǵan heshbir mártiń bolǵan emes.
Jáyxun «janım» dep jalınsa, ol «májgún» dep mazaq etti, Hám shayqalıp, kóp naz benen, kóp irkilmey ótip ketti, Yardıń jábir japası, etten ótip súyekke jetti,
Nawayı quwrayday azdı hám ol sonday úmit etti, Ráhim áyler dep ol yar. Biraq olay bolǵan emes.
***
A, nigarım ǵamnan búgin boldım azat. Maǵan inan. Arzıw-úmit, hám de hasıl boldı murat. Maǵan inan. Xattaǵı hár sóziń seniń sheker nabat. Maǵan inan.
Seniń xatıń alıp búgin boldım men shad. Maǵan inan. Ketti kewilden ǵam-qayǵı, boldım abat. Maǵan inan.
Xattaǵı hár sóziń seniń aqıl-xuwshım, esten ketpes,
36
Onnan sira hinji-marjan, álwan dóngen gúller ótpes, Gúlleri nes, táwbe ettik, sóziń seniń quyash tekles, Men erisken bul baxıttı táriplewge halım jetpes, Úndemeske mende sirá yoqdur taqat. Maǵan inan.
May ishpey-aq, más boldım men, qolım jetken sol baxıttan, Quwanıshtan qanat qomlap, álem boylap ushajaqpan, Átteń, kewlim seziklener álle qanday álemattan,
Xatıń alıp kózlerimnen jas sorǵalar hám sol xattan, Sezilip tur ayralıqtıń daǵı apat. Maǵan inan.
Mıń ishinen bul baxıttı táǵdir inam etti maǵan, Usı kúndi árman etip tap awızǵa taqaldı jan, Quwanıshtan kókregim qaq ayrılıp bolsam qurban, Meni qayta tiriltiwdi bergen deydi táǵdir saǵan, Kewilimde sensiz qayǵı qabat-qabat. Maǵan inan.
Bir baqıp nigar meni sen ǵáplet uyqısınan oyattıń, Sol boldı táshwishtiń bası, sol boldı bası apattıń,
Til ushında «arzıwlım» dep, men paxırdı kóp quwanttıń, Qurı sózden marjan dizip, men ǵáripti aldarqattıń, Sóytip meniń bawrımdı ettiń kábap. Maǵan inan.
Qoy-há, kewlim shúkir áyle, yar búgin seni yad etti, Yaxshı-yaxshı sózler aytıp ǵamlı kewlińdi shad etti, «Biraq, áy, bilmedim-aw» dep, Jáyhun qattı páriyad etti, Áy Nawayı, ol páriydiń xatı seni abad etti,
Endi qanday baxıt kerek, sonnan ziyat. Maǵan inan.
***
Men seniń dástińnen nigar, awara boldım, náyleyin, Misli qazan bolǵan gúldey sarǵayıp-soldım, náyleyin, Sen ózińseń jan alıwshım, maxıtabanım, náyleyin, Qále jan al, qále jan ber, Shaxısultanım, náyleyin, Óziń ǵarǵa, óziń jubat, ayawlı janım, náyleyin.
Qashan mende quwanarman, arzıw-ármanıma jetip, Seni bunsha kim ósirgen, ashıwshaq, mákkar, ór etip? Kóp kek etip qıynay berme, janım arzıwlıńdı óytip, Qále, janımnan ótip ket, qáddi boylarıń kórsetip,
Yaki kelgil, shámshıraǵım, janǵan ráwshanım, náyleyin.
Kásip-káriń aldaw seniń, sózińde joq heshbir juwmaq, Degen menen seniń sóziń meniń ushın sútten de aq, Aqır, seniń júzleriń ay, lábleriń quyılǵan quymaq, Aqıl-huwshım meniń sendur, aytarım ne bolmaq? Kewlimdegi qupıya sır, arzıw-ármanım, náyleyin.
Náyleyin, men aldap-arbap, alasań júrek sırımdı, Wáde menen kewil xoshlap, taslamaysań kóz qırıńdı, Mensinbey, qabıl etpediń mıń jırımnan bir jırımdı, Jilwa áylep hár zaman sen alasań kóz nurımdı,
Hám janıma nur quyarsań. Jaqtı nuranım, náyleyin.
37
Kewil xoshım hám taqatım aldıń qolda hárne barın, Ashshı-ashshı sózler aytıp, úzdiń kewil tilla tarın, Ayt-shı, qáne kim bar sendey pisent etpey júrgen yarın, Nigar maǵan sharap usın umıtayın jáhán-ǵamın, Meniń tawsılmas baylıǵım, jaqtı-jáhánim, náyleyin.
Óz qolıńnan sharap ishse, Jáyhun jáhán ǵamın bilmes, Óziń barda gúlli álem sulıwların kózge ilmes,
Júziń seniń quyash penen ana arıw ayǵa únles, Kúni-túni Nawayınıń kózlerine uyqı kelmes, Qolǵa qonar suńqar qusım, alǵır qıranım, náyleyin.
***
Wah, ıshqıńda júrek mıń para boldı, Dawası joq dártke muptala boldı, Sóytip Májnún yańlı diywana boldı, Wah, ıshqıńda kewlim biyshara boldı, Ǵáremet dástinde awara boldı.
Qáyteyin kózimnen aǵar qanlı jas,
Joqdur qol bergendey sadıq bir joldas,
Tuńǵıyıq ishinde qaldı sorlı bas,
Oǵan hárkim atar tas izinen tas,
Tánim hám bawırım mıń para boldı.
Endi kimge aytarman men dadımdı,
Dat esitip, kim soraydı halımdı,
Yarǵa inam ettim hárne barımdı,
Taslarǵa urarman sorlı basımdı,
Beglik hám inabat áshkara boldı.
Nigar aldı sabır-taqatım urlap,
Ayralıq otına qoyıptı daǵlap,
Máshreptey yarımdı júrippen jırlap,
Bálemáter tawı ústime qulap,
Shegerim ǵam-qayǵı hám nala boldı.
Gúl bersem gúlimdi nigar almadı,
Ax, neterseń, ol bir názer salmadı,
Náyleyin, ıǵbalım otı janbadı,
Ol meniń baxtıma qara bayladı,
Hám mendey ózide biyshara boldı.
Jáyhun ótirik sózge kóp boldıń alań, Jarısta jeńildiń, jetpedi shamań, «Májgún» boldı eń keyingi sıbaǵań, Nawayı sóziń kóp, yoqdur hesh shamań, Eki kózim jolıńda tórt ǵana boldı.
***
Ashıǵınıń kóbin qara, mıń jan qurban gózzal yarǵa, Átteń, hesh kim júreksinbes, sóz aytıwǵa ol nigarǵa, Sebebi ol teńer ózin, kóktegi sol arıw ayǵa,
38
Oynaqılıq, tenteklik, erkelik tán gózzal yarǵa,
Usı úsh háykel juwdırılap, beredi sán gózzal yarǵa.
Onı kórip aǵın suwlar qaldı áne kóriń tınıp,
Ayda oǵan tájim eter «gózzalım» dep bulttan shıǵıp, Mıń túrli jılaw-naz benen barar nigar beli sınıp,
Ótti názelim qasımnan bir sóz benen bende qılıp, Sóz aytpaq qanday jarasar ilmesultan gózzal yarǵa.
Onday qúdiret sulıwdı dúnya ele kórgen emes,
Jeti sulıw súygen Bahram onday sulıw súygen emes, Zulayhada ondaǵıday zer-zerbaraq kiygen emes, Jilwa menen gózzallıq, birge jasar. Múmkin emes, Meniń bermey qalıwım bul jerde jan gózzal yarǵa.
Dáryaǵa at yar júz márte, júz márte alǵıs aytaman, Bazarda sat, yar júz márte, júz márte alǵıs aytaman, «Axmaq» dep ayt, yar júz márte, júz márte alǵıs aytaman, Bálege shat, yar júz márte júz márte alǵıs aytaman, Iyneniń ushınday artsa bolar baham gózzal yarǵa.
Men ol yardan túńildim, hám de qam támeni qoydım, Sol dep arzıw-ármanlarım, sabır-taqatımdı joydım, Bendesi bop ketsem deymen kirpigi oq, qaysı jaydıń, Biraq iske asıwı qıyın-aw, ol oylaǵan oydıń, Jetemen dep bir bálege qaldım náhán, gózzal yarǵa.
«Láylim» desem, «Májnún bol-á» dep mazaqlap ol «ket» dedi, Kúnde ótip júrgen joldan kek etip búgin ótpedi,
Árman menen Jáyhunnıń qolı yarǵa bir jetpedi, Áy, Nawayı úmitiń úz, Juldızdur nigar kóktegi,
Hámdam bolar imkanı yoq, endi saǵan gózzal yarǵa.
***
Jamalıń kórsetpey janım alma kóp, Otqa kúygen janım otqa salma kóp, Menmenlik áylep tákabbır bolma kóp, Janıma jábir qılıp oq urma kóp, Kúlimdi kókke meniń suwırma kóp.
Mineziń mıń qubılǵan sırlı jumbaq,
Sózge juwap bermedi «yaxshı, ya, yaq»,
Usı erligiń maǵan dáwlet hám baq,
Lazımdur ıshqı otında kúyip-janbaq,
Ayralıq daǵı menen kúydirme kóp.
Aytshı nigar kegińniń shegi barma? Ashshı sóz benen hazar berme janǵa, Sende bizdi ardaqlap, aldap-arba, Áy gózzal naz áyleme ǵayrı yarǵa, Óz baxtıńa duzaqtı qurma kóp.
Dártińde yar jansam janıma ráhát,
39
Sennen sógis alsam janıma ráhát,
Moynıńa qol salsam janıma ráhát,
Lábiń sorıp alsam janıma ráhát,
Maǵan gúná ettiń dep óltirme kóp.
Bizdi kórip dem berme duwtarǵa sen, Qashpa, qamshı baspa tulparǵa sen, Óytip nishter shanıshpa bul janǵa sen, Kúter nigar ayralıq. Biywarǵa sen, Júzińdi qayǵı-ǵamda soldırma kóp.
Jek kórdiń-aw, bolsam saǵan pármana,
Kek etip, qayırılmay júrseń márdana.
Náyleyin, jetpedim arzıw-ármanǵa,
Men aldıńa barǵanda «áy, diywana,
Ket dedi bunda neń bar?» Turma kóp.
Jáyhun jayday búgildi sol sumlıqtan, Jan yoqdur, arzın esitip, dártin uqqan,
Qoy, waz kesh sen, sol biyopa sulıwlıqtan, Áy Nawayı, geda bol, qash qullıqtan, Shax aldına sen óytip bas urma kóp.
***
Kettiń bultqa batqan ayday, men shıdayman mende ún yoq. Óttiń jalǵız názer salmay, men shıdayman mende ún yoq. Urdıń janǵa qanjar qanday. Men shıdayman mende ún yoq. Shektim azaptı sonday. Men shıdayman mende ún yoq. Meyli wádeńdi shaysań-shay. Men shıdayman mende ún yoq.
Mensizdaǵı muradıńa biyopa menen jeteber,
Sonıń menen qol uslasıp bawırım daǵlap sen óteber, Meyli bunnanda awyırlaw, zulımıń bolsa eteber, Men sorlını ǵamǵa shatıp, basqalarǵa kórseteler,
Sen jıllı júz, jıllı shıray. Men shıdayman mende ún yoq.
Belleriń wah, qıyamet-aw, onı kórip, men tań qaldım, Sózleriń sıyqırlı qanday, onı esitip, men lal qaldım, Júzleriń, ah, júzlerińdi-ay, onnan janıma nár aldım, Shashıńnıń jupar iyisi, tásirinen men uyqıladım,
Yar áperer jánnetten jay. Men shıdayman mende ún yoq.
Yar kewlinde ándiyshe kóp, túsinip bolmaq oǵan qıyın, Sózinde shınnan hiyle kóp, túsinip bolmaq oǵan qıyın, Kózinde bizge giyne kóp túsinip bolmaq oǵan qıyın, Yar házilinde máni kóp, túsinip bolmaq oǵan qıyın,
Záhárlep bolıp jaǵar may, men shıdayman mende ún yoq.
Nigarım shadlı kóriner, sen jımıyǵan kún men ushın, Dártime dárman seziler sen sóylegen kún men ushın, Janǵa jábir isley bermey mıyıq tartıp kúl men ushın, Arzıwlım jaqtı kóriner, sen jamılǵan tún men ushın, Óytkeni júzleriń ay. Men shıdayman mende ún yoq.
40