Abulqasim Otepbergenov - Tanlamali shigarmalar 5

«Elim» dep kókti sharlar, Bizdi uslay jaratqan.

Onda shayırlıqqa háwes etpegil

05/06/2010j.

Óziń oqıǵanda lázzet almasań, Onda shayırlıqqa háwes etpegil. Óz gúzarıń, jańa soqpaq salmasań, Onda shayırlıqqa háwes etpegil.

Xár bir sóziń shaxmaqtıń tasınday,

Lárzege keltirgen kókte jasınday,

Bolmasa tereńde jatqan hasılday,

Onda shayırlıqqa háwes etpegil.

Jeti ólshep onnan keyin kespeseń,

Quyınlatıp, dawıllatıp espeseń,

Janǵa egew salıp házden keshpeseń,

Onda shayırlıqqa háwes etpegil.

Bul qol ushı isleytuǵın is emes,

Lázzet uyqısında shiyrin tús emes,

Qurı súlder bolıp júrseń, kesh emes,

Onda shayırlıqqa háwes etpegil.

Shayır degen filosof bolıw kerek,

Dáryadayın máwij urıp tolıw kerek,

Demeseń «Tarıyxta qalıwım kerek»,

Onda shayırlıqqa háwes etpegil.

Gomer yańlı gúńirentip jáhándi,

Ferdawsiydey ashıp jańa bir kándi,

Kóklerge kótere almasań eldi,

Onda shayırlıqqa háwes etpegil.

Platonnan, Arastudan xabardar,

Bolmasań qatarda júk qaldırmas nar,

Tek ataqqa satıp júrseń namıs-ar,

Onda shayırlıqqa háwes etpegil.

Shıǵısqa ıqlasıń artıp turmasa,

Niyet bolsa «Xafız babam qollasa»,

Jastıǵıń astında «Xamsa» bolmasa,

Onda shayırlıqqa háwes etpegil.

Berman keleberseń Maqtumqulını,

Jaza alsań buzbay usıl sınını,

Alalmasań eli-xalıqtıń sıyını,

Onda shayırlıqqa háwes etpegil.

Shayır maqtanbaydı, tekte jazadı,

Dúnyanı jańartıp ózi tozadı,

121

Oylasań házlikti, uyqı mazalı,

Onda shayırlıqqa háwes etpegil.

Shayırdıń ákesi, anası xalıq,

Bar baylıǵı, aqıl-sanası xalıq,

Demeseń «Kewlimniń qalası xalıq»,

Onda shayırlıqqa háwes etpegil.

Keyin kópler shayır bolıp baratır

25-02-2011j.

Qızǵanbayman dúnya degen keń nárse, Keyin kópler shayır bolıp baratır. Shayırlıq emesdur ermek, ep nárse, Keyin kópler shayır bolıp baratır.

Jazaber ózińde erkiń hám haqıń,

Shayırlıq kóktegi Iláhqa jaqın,

Shayır bolıw ushın Pushkindi oqıń,1

Keyin kópler shayır bolıp baratır.

Dem alısqa shıǵıp alıp jatqan soń,

Kewil qurǵır qıyallarǵa batqan soń,

Báribir tınıshıńa otqan jón,

Keyin kópler shayır bolıp baratır.

Bul qol ushı isler talapta emes,

Usta «shaytanında» sınapta emes,2

Emin-erkin isher bulaqta emes,

Keyin kópler shayır bolıp baratır.

Áwele artıńa, aldıńa qara, Jetpisteseń, dewge: «dostım ya jora», Baqırsań baqıraber «qoy sen bala», Keyin kópler shayır bolıp baratır.

Bul shaqırıq ya oylasıq emesti,

Aytılǵan bul ápiwayı keńesti,

Jıynap al jasúlken aqıl hám esti,

Keyin kópler shayır bolıp baratır.

Eger hámme shayır bola bergende,

Baxıt qusı basqa qonabergende,

Qaǵaz benen sıya qalmas álemde,

Keyin kópler shayır bolıp baratır.

Sensizdaǵı shayırsımaq kóp elde,

Usar bostandaǵı oshaǵan gúlge,

Arzır jazǵanların ushırsań jelge,

Keyin kópler shayır bolıp baratır.

Burın jazıp júrgen mıljıńarıńdı,

Salıstır solarǵa namıs-arıńdı,

122

Ibrat alıp, bilgil aǵa halıńdı,

Keyin kópler shayır bolıp baratır.

Gerbishtey onlaǵan kitabı bardı,

Xalıq shayır demes názerden qaldı,

Bul oǵırı jaman, qolaysız haldı,

Keyin kópler shayır bolıp baratır.

Qal burınǵı abırayda, ataqta,

Júrgeniń jaqsı-ǵoy sıyınıp Xaqqa,

Usınnan basqa bir gúymenish joq pa?

Keyin kópler shayır bolıp baratır.

1.Pushkinniń Aris degen shayırsımaqqa arnap jazǵan «Qosıq jazıwshı dostıma» qosıǵı názerde tutılmaqa.

2.Ustanıń teńlikti ólsheytuǵın áspabındaǵı (shaytan) sımap názerde tutılmaqta.

123