Abulqasim Otepbergenov - Tanlamali shigarmalar 2

Ata-anań bawırın giryan ettiń.

Úyińniń bereketin alıp atsań, Aqıl-esińdi bilmey talıp atsań, Janıńdı qoyarǵa jay taba almay, Basıńdı tamǵa urıp nalıp atsań.

On kúnlep, on bes kúnlep jatasań-aw, Óz qanıńa óziń záhár qatasań-aw, Bas ushıńda araǵıń bolmay qalsa, Hayalıń janın alıp, atasań-aw.

Ol sorlı keshe-kúndiz juwıradı, Azaptan, aqıretten buwıladı, Dúnyaǵa kelgenine pushayman bop, Gey-geyde ómirden de suwınadı.

Shertilip kamanda turǵan oqtay, Azaptan ózin otta órteyjaqtay,

Kózleri masaladay janıp turar, Ólimnen basqa sıra shara joqtay.

Ne ushın óz janıńa qas eteseń? Mártebe-dáwletińdi pás eteseń, Jaqın-juwıq, tuwısqan-tuwǵanıńdı, Bir óziń duyım-jurtqa nas eteseń.

Tońlaǵan shalajansar jılandaysań, Tosattan kelgen oba, ılańdaysań, Jaqın-juwıq shańaraq bılay tursın,

Óz-ózińe jaqsılıq qılalmaysań.

Ne degen jirkenishli bolıp qaldıń, Qazan urǵan gúl yańlı solıp qaldıń, Jurltar háwes etkendey jigit ediń, On juwılǵan bóz yańlı ońıp qaldıń.

Dúnyaǵa kelgenligiń ótiriktey, Araqsız qaldı, sira múdááń pitpey,

Jatasań keshe kúndiz buratılıp,

Esiktiń aldındaǵı kópek iyttey.

Ul dediń ul berdi qoshqar yańlı,

Qızlarıń sılanǵan suńqar yańlı,

Kemisiń ne, Qudaydan ne ókpeń bar?

Ediń, zerteń-zeberteń tulpar yańlı.

Búginligi barlıǵı yalǵan boldı, Ájelińnen burın paymanań toldı,

Kórmeymen-aw tiriler arsında, Tilde barmas, tirini dewge «Óldi!»

Mekemeni qarızdar etkeniń bar,

Hámeldi qoldan berip ketkeniń bar, Ózińnen páslerge jaltań bolıp,

Bir jerden ekinshige ótkeniń bar.

Al endi neshe pulıq kisi boldıń? Basqalar bir ólse sen kúnde óldiń, Basıńa baxıt qusı qonıp edi,

Átteń! Jaz ótip qıs jetkende bildiń.

03-12-2007-jıl.