Qaraqalpaq estrada - qosiqlari

NAZLARÍŃ BAR DA

Sózi: S.Jetkerbaev

Naması: A.Asqarov

Nazlarıń bar da, janım ,nazlarıń bar da,

Júregimdi oynatqan sazlarıń bar da,

Ózgesi kerek emes sen turǵanıńda, Mıyıq tartıp kúlkińdi, nazıńdı qoyma.

Bánt etip júregimdi,

Nazlanıp jáne oyna,

Júregim otka salıp,

Kúydirip jáne oyna.

Ay júzli jamalıń , Ózine bayladı, Monshaq kibi kózleriń, Meni tınısh qoymadı.

2012-jıl

320

ZAR QALDÍM MEN

Sózi: M. Asqarov

Naması: A. Asqarov

Birge ótken baxıtlı demler,

Esten ketpes shiyrin demler.

Sırtıńnan sóz ayttı kimler?

Nege alıslap kettiń sen?

Izlerińde zar qaldım men.

Júrekke otlar jayladıń,

Súymeseń nege sayladıń?

Bul kúnde kimdi oyladıń?

Nege alıslap kettiń sen?

Izlerińde zar qaldım men.

Ótken kúnler tús boldı ma? Bular jalǵan is boldı ma? Baǵımızda iz qaldı ma? Nege alıslap kettiń sen? Izlerińde zar qaldım men.

SAǴÍNDÍM

Sózi: S.Jetkerbaev

Naması: Q. Ámetov

Sırlı dawıs sazlar sherttiń, Biydárek sen alıs kettiń. Sıyqırlı sol qaras penen, janım, Saǵınıwǵa májbúr ettiń, Biydárek sen alıs kettiń, Sıyqırlı sol qaras penen, janım, Árman qaldı júregimde, Kózim taldı qádemińde, Saǵındım-aw, saǵındım, janım, Eles qaldı názerimde ,

Árman qaldı júregimde, Saǵındım-aw, saǵındım.

Súygenligim jasırmayman, Ózgege gúl usınbayman.

Tek ózińe arnaǵayman, janım, Ózińe bir shaqırǵaysań. Ózgege gúl usınbayman, Saǵındım-aw saǵındım.

Tek ózińe baǵınsam da,

Bárhá seni saǵınsam da,

Kózge ilmey óterseń, janım,

Atıń aytıp shaqırsam da,

Tek ózińe baǵınsam da,

Kózge ilmey óterseń, janım.

2013-jıl

322

QÍZ EDIŃ

Sózi: Ó.Xojanov

Naması: Sh. Tólegenov

Júregimde shoqtay bolıp jaynaǵan,

Qara kózlim, súmbil shashlı qız ediń.

Aq shabaqtay teńizinde tuwlaǵan,

Qara páreń, qara qallı qız ediń.

Atqan tańday shuǵla shashıp nurlanıp,

Tal shıbıqtay názik beliń tawlanıp,

Naz - jilwańa jipsiz ǵana baylanıp,

Bende bolǵan bir waqları biz edik.

Birge ósip, birge oynap kúlisken, Quwanıshtı-qayǵını bir bólisken, Jaslıq kewil berip súyisken,

El awzında ertek edik, sóz edik.

2013-jıl

MENIŃ JÚREGIMDESEŃ

Sózi: T.Seytjanov

Naması: A.Asqarov

Kel, dostıń bolayın, opadarlı qız,

Sen bárqulla meniń júregimdeseń.

Bálki bir ıǵbalǵa máńgi baǵlımız,

Sen bárqulla meniń júregimdeseń.

Sen kóz aldımdasań qayda júrsem de,

Kaysınday baǵlarda sayran etsem de.

Hátte álem gezip ayǵa jetsem de,

Sen barqulla meniń júregimdeseń.

Qolǵa taraq alıp shashın taraysań,

Jilwa taslap qıya baǵıp qaraysań,

Jaslıq muhabbettiń nesin soraysań?

Sen barqulla meniń júregimdeseń.

2014-jıl

324

ÁKEJAN , ANAJAN, RAXMET SIZLERGE

Sózi: P.Dabılov

Naması: A. Asqarov

Adam jaratılıp bawır etinen,

Bir qarap qoymasań bolmas izlerge,

Nár alıp kórkeydim miyrim sútinen,

Akejan , anajan, raxmet sizlerge.

Ey, doslar, asıǵıń úyge qaytıwǵa,

Jolıńda tórt bolıp turǵan kózlerge,

Waqıt tabalmayman bir sóz aytıwǵa,

Akejan , anajan, raxmet sizlerge.

Kókte ne bar maǵan jerge qaytpasam?

Onda meni kútken ısıq júzlerge,

Erteń kesh bolmay ma búgin aytpasam?

Akejan , anajan, raxmet sizlerge.

Súymeydi tek ǵana dáwletiń ushın,

Mútájdur pal tamǵan shiyrin sózlerge.

Qatarda nar bolǵan qáwmetiń ushın,

Akejan , anajan, raxmet sizlerge.

Ómirler aǵıstan qayta jańarǵan, Qartayıp baslańlar toqsan, júzlerde. Mehir kóriw ushın men de balańman, Minnetdar bolaman máńgi sizlerge, Áziyz ata-ana, Raxmet sizlerge!

2015-jıl

325

USTAZÍM

( RASHID XOJASOV ESTELIGINE )

Sózi: P. Dabılov

Naması: A.Asqarov

Túsken máhál sen oyıma,

Keldim jáne suw boyına,

Qarap aq quwlar toyına,

Sháwkildesip qurar bázim,

Joq onda tek quba ǵazım.

Ayra saldı yalǵan dúnya,

Sensiz húwlep qalǵan dúnya,

Ortamızda otlı dárya,

Wah, ne ájib qırǵaǵı joq,

Qosıǵımnıń ırǵaǵı joq.

Tınbay sayrap shaǵlar ediń,

Búlbúlsiz bul baǵlar jetim,

Eziledi bawır etim,

Tarı úzik tilla sazım,

Shertsem tıńlar kim hawazın?

Jan dúnyamdı jańlattıńaw,

Kókke qanat qomlattıń-aw,

Maǵan bárin ańlattıń-aw,

Bas iyemen saǵan tájim,

Minnetdarman, ustazım.

Qarap tursam súwretińe,

Quda bergen qáwmetińe,

Tákirar qayta sáwbetińe,

Ya basqası, ya men bolıp,

Sen qalarsań tek sen bolıp.

2015-jıl

326

KETPE, KETPE

Sózi: Á. Qaypov

Naması: A. Asqarov

Aqshamǵa sán bergen ayǵa qarasam,

Sonda sáwlelenip óziń turasań.

Erinbesten tań atqansha tigildim,

Mennen zerikkendey júziń burasań.

Íshqı shoǵına talpındım, Muxabbatqa baǵındım. Meni ıshq otına salǵan qız, Diydarıńdı saǵındım.

Ketpe, ketpe,

Mennen alıslarǵa ketpe.Intizar etpe,etpe, Jollarıńda zar etpe.

Aq siyneń aldında tánimdi iydim,

Sulıw júzlerińnen, lábińnen súydim,

Em bolsın sharap ber kesalar menen,

Más áyle zibanlı posalar menen.

2016-jıl

327

KÚYDIRESEŃ

Sózi: A. Ótemuratov

Naması: A. Asqarov

On minuttan qońıraw shalıp,

Qaydasań?- dep xabarım alıp,

Hátte biytanıstan qızǵanıp,

Janım, meni kúydireseń sen.

Ótkenlerge tússe de kózim, Ózgeredi sol máhál sóziń. Jánjel baslap ózińnen óziń,Janım meni kúydireseń sen.

Janım, meni otqa jaǵıp kúydireseń sen, Qıynap –qıynap, azap berip súydireseń sen, Muhabbatım bir ózińe arnasam da, Gúmanlanıp, janım, meni kúydireseń sen.

Tap islemey hesh qanday talap,

Otırayın júzińe qarap,

Desem dárriw sózdi burmalap,

Janım, meni kúydireseń sen.

Qızǵanısh-bul súyiwden derek,

Shın súyeseń ózimdi demek.

Sennen basqa maǵan kim kerek?

Janım, meni kúydireseń sen.

2017-jıl

328

MIYMANDUR

Sózi: X. Xalillaev

Naması: A.Asqarov

Bul dúnyanıń túbine hesh jetpeyseń,

Bul dúnyaǵa eki márte kelmeyseń,

Jıynaǵandı sen arqalap ketpeyseń,

Balań áziyz, ata - anań miymandur.

Saw waqtıńda awırǵannan xabar al, Bendelerdiń sózlerine qulaq sal. Ǵáriyplerge jaqsı , sóyle, kewlin al,

Den sawlıǵın saǵan kelgen miymandur.

Dushpanlardıń sózlerine más bolma,

Sál nársege eregisip qas bolma.

Tuwısqanǵa erimestey tas bolma,

Tuwǵan-tuwısqanıń saǵan miymandur.

At qádirin ayrılǵanda bilerseń,

Qanat qádirin qayrılǵanda bilerseń,

Tuwısqannan ayrılǵanda bilerseń,

Tuwǵan-tuwısqanıń saǵan miymandur.

2017-jıl

329