Qaraqalpaq estrada - qosiqlari

KEL, GÓZZALÍM

Sózi hám naması: O.Qalbaev

Aspandaǵı ayǵa qolım jetpeydi,

Sennen basqa qızǵa kewlim ketpeydi.

Dolanıp bir shıǵa qoysan aldımnan,

Mıń maqtayın, bári saǵan jetpeydi.

Kel, gózzalım ,kel, gózzalım,

Seniń ushın shalındı sazım,

Jaǵar maǵan súykimli nazıń,

Kel, gózzalım ,kel, gózzalım.

Júrgen jerde bárha seni oylayman,

Baxıt gúllerinen gúller saylayman,

Basqa janǵa, janım, seni qıymayman,

Sensiz bul jáhánge ózim sıymayman.

2000-jıl

180

QULÍNÍM

Hásiretli demler seziler, Júregimde táshwish diziler, Bawırım ábden eziler, Qaylarda júrseń, qulınım?

Dúnyaǵa seni ákelip, Nesibeńdi júrdim terip. Búginligi kimge erip, Qaylarǵa kettiń, qulınım?

Oylasam tańlar atpaydı, Tań atsa kúnim batpaydı, Qıyalım sınıp, shıtnaydı, Túsinseńo, qulınım.

Izleymen mudam jar salıp, Suwretińdi qolǵa alıp, Kettiń be máńgi joǵalıp? Bar bolǵaysań, qulınım.

Tırnadıń júrek jaramdı, Sen kettiń, jolın qarańǵı. Keshirgil ǵáriyp anańdı, Aynanayın, qulınım.

Aylanıp qonǵıl uyańa, Kewilim seni qıyarma? Anańdı bunsha qıynama, Saǵındımǵoy, qulınım.

181

Sózi: B.Uzaqov

Naması: J.Ermashov

Ayaqqa ózim zor berip,

Júrmen ǵoy tek te teńselip, Írzaman ólsem bir kórip, Kelegórshi, qulınım.

Saǵındım sawlat júzińdi, Saǵındım shiyrin sózindi, Saǵındım, balam, ózińdi, Kelegórshi, qulınım.

AYSÁNEM

Sózi: B.Uzaqov

Naması: S.Qosekeev

2007-jıl

NEGE KELDIŃ?

Sózi: B.Uzaqov

Naması: S.Qosekeev

Úylespey tur jazǵan xatım,

Bul kúnleri joq taqatım.

Biyopasań, muxabbatım,

Jas mingensoń nege keldiń?

Pútin dúnya malımdı al,

Ne qáleseń barımdı al,

Azaplamay janımdı al,

Qarańǵı kún nege keldiń?

Ey, muxabbat , maǵan bunshama,

Kórsettiń dártli tamasha? Jaǵdayım ne jasım qansha? Bilip turıp nege keldiń?

Ishimde ǵam qabat-qabat,

Waqıt óter, joqdur taqat,

Túńildim sennen, muxabbat,

Meni tańlap nege keldiń?

Uzın gáplerdiń qısqası,

Haqıyqattıń túp saǵası,

Jaslıqtın toy-tamashası,

Tawsılǵan soń nege keldiń?

2008-jıl

184

BIYQARARMAN

“Jaylawda toy” pesasınan Paraxattıń ariyası

Biyqararman ıshqım ketip ózińe,

Sırdı ashıp aytalmadım júzińe,

Sebep penen gezleskende ekewimiz,

Tartınaman kózim tússe kózińe.

Uzaq ketse qaytaraman qoyımdı,

Jollarıńa qarap sozıp boyımdı,

Kúlgen kóziń hár bir aytqan sózleriń,

Biylep aldı aqıl menen oyımdı.

Biyqararman ıshqım ketip ózińe, Sırdı ashıp aytalmadım júzińe, Yarım ushın gúldástesin tereyin, Gúlge qosıp júregimdi bereyin, Tartınbastan sırdı ashıp ózińe, Endi kórsem qushaǵımdı kereyin.

2009-jıl

ShAQÍLDAT BARMAǴÍŃDÍ

Sózi hám naması: Sh.Nuratdinov

Shaqıldat barmaǵıńdı,

Taslayın qarmaǵımdı.

Altın balıq ózińseń,

Orınla ármanımdı.

Kasıń seniń qıyılǵan,

Alma júzin oyılǵan,

Oynaǵanda jarasar,

Nazıńa más boyıńnan.

Shaqıldat barmaǵıńdı,

Taslayın qarmaǵımdı,

Altın balıq ózińseń,

Orınla ármanımdı.

Aqquw bolıp aspanda,

Kóterilip ushqanda,

Neler ótti oyıńnan?

Men belińnen qushqanda.

2010-jıl

186

BÚGIN BAYRAM

Búgin bayram elime, Qushaq ashıp kiyatır, Qulpı dóngen jerime, Gúller shashıp kiyatır.

Kewilleri aspanda, Kóterińki xalqımnıń, Alǵa qádem basqanda, Niyeti pák hár kimniń.

Jaylawında jańırar, Qozı menen marqası, Tórt túliktiń bári bar, Bul miynettiń arqası.

Shad turmısta el búgin, Miyman bárha tórimde, Sıylar adam birbirin, Bul ǵárezsiz elimde.

Qızları gil sulıwlar, Júzlerinde qalları. Er menen sapta turar, Zaman qaharmanları.

Insan ushın hár waqta, Watan qımbat, el qımbat, Júrer awıl aymaqta, Doslıq qosıǵın jırlap.

187

Sózi: Q.Táńirbergenov

Naması: E.Akimov

2011-jıl

ǴÁREZSIZ

WATAN

Sózi: S.Niyetullaev

Naması: E.Akimov

Qutlı bolsın aytıp turman men búgin,

Mende seniń bir ulıńman, gúlińmen.

Aynanayın basıńdaǵı nur shashıp,

Turǵan elim Ǵárezsizlik kúnińnen.

Hadal bolsa miynet bosqa ketpeydi, Aqıllınıń waqtı bosqa ótpeydi. Ǵárezsizlik alıp kelgen elime, Tınıshlıqqa hesh bir nárse jetpeydi.

Jigirma jasta tuwılǵan sol balalar,

Ishlerinde batır da bar, dana bar,

Erkin jurttıń ul-qızların ósirgen,

Baxtımızǵa aman bolıń, analar!

Ózińdiki búgin bári – jer, aspan, Adamlardıń kókireginde jır dástan, Kózlerinde quwanıshı, shadlıǵı, Seziledi dos penen men sırlassam.

2011-jıl

AWÍLLASLARÍM

Sózi: X.Seytjanov

Naması: Á.Paxratdinov

Búgin kóterińki kewil sarayım,

Búgin ǵarrı bolmay bala bolayın,

Diydar nesip ete bergey ilayım,

Sırlas-muńlas bolgan, awıllaslarım.

Bir qonısta dóńgelengen otawday,

Kewil quwanıshta bárha kewil bay,

Saqıylıqta mısal atım jorǵa attay,

Keń dástúrxan jayǵan awıllaslarım.

Topar-topar bolıp awıl arası,

Ulaması bolıp mereke bası,

Birewiniń kórinbese qarası,

Sorap shır-pır bolǵan awıllaslarım.

Búgin bas qosıp biz bázim qurayıq,

Ońar bolsa kewil xoshlıq qılayıq,

Bunnan soń da xabarlasıp turayıq,

Diydar nesip etse, awıllaslarım.

2011-jıl

GÓZZAL

EKENSEŃ

Sózi: Q.Dosanov

Naması: O.Barlıqov

Bilmedim nesiybeń kimge buyırǵan,

Qara shashıń tobıǵıńa quyılǵan.

Sonıńday haq kewil, sonday miyirman,

Dúnyaǵa kelgen bir gózzal ekenseń.

Qáddi-qáwmetińiz qoyǵanday quyıp,

Qalay júr ekenseń dúnyaǵa sıyıp?

Abaylap sóyleyin tilimdi tıyıp,

Aqıl-huwshım alǵan gózzal ekenseń.

Bir kúlip qarasań kewlińdi ashıp,

Tazarar kewlimniń shaytanı qashıp.

Er júrekli jigitlerge múnásip,

Júrer jolın bilgen gózzal ekenseń.

Bir suqlanbay ótpes tanıs kóz kórgen,

Saqlanıp júrgeyseń jaman kózlerden,

Qız ishinde aǵla mıńnan, júzlerden,

Perishtesi basım gózzal ekenseń.

2012-jıl

JAQSÍ QÍZ

Sózi: O.Begjanov

Naması: A.Asqarov

Hey, jaqsı qız, aytshı neshede jasıń?

Sır bermeydi hasla qıyılǵan qasıń,

Júregime jaqınsań-aw jaqsı qız,

Seni oylap, janım, qatıp tur basım.

Keshiriń ǵayıptan sóz ashtım únsiz,

Sorasayıq, dostım, qay jerden, kimsiz?

Juwap bergil sawalıma, jaqsı qız,

Meni basqa bilip tursań ba únsiz?

Hey, jaqsı qız, aytshı neshede jasıń?

Sır bermeydi hasla qıyılǵan qasıń,

Júregime jaqınsań aw jaqsı qız,

Seni oylap, janım, qatıp tur basım.

Mennen uzaqlama áy lábleri pal, Íqlasımdı jıǵa berme jaqsı qız, Taslap ketpe bir ómir janımda qal, Lázzetińe toydır, soń janımdı al.

2012-jıl

SÚYGENIM

Sózi: M.Naǵmetullaev

Naması: Q.Ámetov

Jarasıp tur ózińe oyma jaǵa kóylegiń,

Íntıq etip ózińe qoyma meni, súygenim.

Qanıp súygim keledi lábińdegi palıńdı,

Kórgim keler kózińde ıshqı tolı jalındı.

Sennen juwap alalmay,

Súygen yarıń bolalmay,

Men qay jerde aljastım,

Qálbińe jol tabalmay.

Kirsem deymen baǵıńa gúlshámenin teriwge, Shaqırsań qushaǵıńa tayarman jan beriwge. Qanıp súygim keledi lábińdegi palıńdı, Kórgim keler kózińde ıshqı tolı jalındı.

2015-jıl

NIGARÍM

Sózi: J.Ótegenov

Naması: Sh.Tólegenov

Nege maǵan sırlı baǵıp qaradıń?

Júregimdi tolqıttı sol janarıń,

Sayıl bolıp keteyin men izińde,

Qay awıldıń arıwısań, nigarım ?

Qay shámenniń arıwısań, jananım?

Ay júzińdey aǵla húsni – jamalıń.

Ertektegi páriylerge megzeyseń,

Qay awıldıń arıwısań, nigarım?

Nege sonsha ısıq seniń diydarıń?

Dım tartımlı kóksińdegi tumarıń,

Júregimdi bunsha daǵlı ettiń sen,

Qay awıldıń arıwısań, nigarım?

Meni delbe eter nazlı baǵıwıń,

Dártke toldı izley-izley bawırım.

Meniń ushın sennen artıq sulıw joq,

Qay awıldıń arıwısań, nigarım?

2016-jıl

BAXTÍM ÓZIŃSEŃ

Sózi: S.JetkerbaevNaması:

Q.Ámetov

Qollarıńdı tutpaq árman bolıp,

Qalmasın ótinish jalǵan bolıp.

Kel, baxtım, janıma dárman bolıp,

Gúl júzli erkeli, erketayım.

Kózlerińde baxtım sezilgendey,

Juplıqpız haqıyqat kóz ilgendey,

Birge biziń baxıt dúzilgendey

Ay júzli erkeli, erketayım.

Kel, ay júzlim, kel baxtım ózińseń

Dilde tákirar sen jalǵız sózimseń,

Baxıttan más qılǵan sırlı tuyǵı,

Muhabbat, ózi sen qanday sezimseń?

Júrek sırlarımnıń sebebi sen, Quwanıshımnıń da deregi sen, Kewlimniń tek jalǵız keregi sen,Kel, biybim, erkeli, erketayım.

2016-jıl

194

SULTAN QOSEKEEV

1981 - jıl 22 - oktyabr Kegeyli rayonında dúnyaǵa kelgen.1999 - jılı óz dóretiwshiligin baslaǵan.

Házirgi waqıtta Ózbekstan mámleketlik filarmoniyası Qaraqalpaqstan Respublikası bólimi qosıqshısı.

195

SÁRBINAZÍM

Sózi: Q.Tańirbergenov

Naması: S.Qosekeev

Seni kórsem shalqıp yoshaman,

Sırımdı men kimge aytaman?

Tigileseń turıp tasadan,

Kelshi, janım, háy cárbinazım.

Erke nazıń oylandırıp qoymay,

Diydarıńa ele bir toymay,

Júremen, janım, tek seni oylay,

Senseń barım, háy cárbinazım.

Sárbinazım, sárbi sárbinazım, Órter meni tek jilwa nazıń, Sárbinazım, sárbi, sárbinazım, Saǵan arnap jalınadı sazım.

Kózim tústi talay qızlarǵa,

Sulıwlıqta sennen ozar ma?

Bul dúnyada sendey qız bar ma?

Kelshi , janım, háy sárbinazım.

1999-jıl

196

SOL BIR QÍZ

Sózi: Q.Táńirbergenov

Naması: S.Qosekeev

Qara shash, jazıq mańlay,

Júziń qızıl almaday,

Kózdiń jawın alǵanday,

Awıldaǵı sol bir qız.

Kóp ishindegi juldız,

Juldız emes aw qundız.

Sulıwlardıń sárdarı,

Awıldaǵı sol bir qız.

Jigitler onı qıymay,

Júrer xanaǵa sıymay,

Arpa ishinde bir biyday,

Awıldaǵı sol bir qız.

Qaraǵanda jımıńlap,

Júregimdi biylep ap,

Júr ǵoy meni de qıynap ,

Awıldaǵı

AQ ARÍW

Sózi: Q.Tańirbergenov

Naması: S.Qosekeev

Ay júzińe jarasqan,

Noqatnoqat qalıń bar,

Juldızlarǵa talasqan,

Sulıw ayjamalıń bar.

Ayday arıw, aq arıw,

Men tárepke baq, arıw,

Shámendegi bir gúlseń,

Kewliń seniń pák, arıw.

Aytsam degen sózimdi, Kewlimde ármanım bar, Oylay -oylay ózińdi, Shıqpaǵan tek janım bar.

2008-jıl

198

SÁRWI TAL

Sózi: O.Eshmuratov

Naması: A.Saparova

On tórt kúnlik ay tuwǵanda kúlimlep,

Sárwi talǵa keler edin naz benen,

Intizarıń bolıp jolǵa telmirip,

Kúttim kewlim tolı sırlı saz benen,

Sárwi talǵa súyengen, dilbar.

Kewil tarım sen dep nama shaladı,

Dilbarım, jolıńda kózim taladı,

Sárwi talda dilgir bolıp jolıńa,

Meniń menen sırlasqanday boladı,

Sárwi talǵa súyengen dilbar.

Kózleriń kúlimlep, júzleriń jaynap,

Samallar shashlarıńdı sıypalap oynap,

Men seni joǵalttım, sonsha izledim,

Dáregińdi taldan sorayman qıynap,

Sárwi talǵa súyengen dilbar.

Aytshı keshegidey gózzallıq qayda?

Ol sennen ketkenbe bet burıp ayǵa,

Men keldim saǵınısh janımdı órtep,

Jaslıqtıń guwası sol nárwan talǵa,

Sárwi talǵa súyengen dilbar.

2008-jıl

199