DÓRETIWSHI TULǴALAR
.pdfjámiyetshilik dıqqatına usınıp bardı. 2002-jılı Xoja Axmet Yassawiy tariyqatınıń dawamshısı, ullı shayır hám danıshpan, biziń dańqlı jerlesimiz Hákim ata Sulayman Baqırǵaniydiń 880 jıllıq yubeleyin belgilewde, Qońırat qalasında xalıq aralıq ilimiy-teoriyalıq konferenciya ótkeriwde ilimpazlar menen teń turıp belsendilik kórsetti.
2014-jılı belgili alım, jámiyetlik isker Akmal Saidov Qaraqalpaqstanǵa kelgeninde Qońıratqa arnawlı barıp Ómirbay aǵa menen tanısıp, Hákim ata Sulayman Baqırǵaniydiń qábirin ziyarat etti hám Hákim ata haqqında maǵlıwmatlar aldı. Bunı alım óziniń «Házireti Záńgi ata» kitabında atap ótedi.
Kórnekli alımnıń «Házireti Záńgi ata» kitabında mınaday qatarlar bar: Záńgi ata ómiriniń belgili bir bólegi shayır hám danıshpan Sulayman Baqırǵaniy Hákim ata menen baylanıslı ótedi. Hákim atadan tasawwif táliymatın úyreniwin dawam etken. 615-(milodiy 1218) jılı Axmet Yassawiydiń shákirti bolǵan Hákim ata Sulayman Baqırǵaniy ıqtıyarında bolǵan. Dáreklerge qaraǵanda Záńgi ata Baqırǵan awılında bolıp Hákim atadan 15 jıl dawamında ilim alǵan.
Bul qatarlardı alım Ómirbay aǵanıń Qońıratlı belgili jazıwshı Japaq Shamuratov penen birgelikte jazıp, 2015-jılı Tashkentte «O’zbekiston» baspasında jarıq kórgen «Sulayman Baqırǵaniy Hákim ata» kitabınan alǵan. Biz Akmal Saidov jazǵan «Házireti Záńgi ata» kitabınıń nusqada shıqqanın sonıń menen birge, onıń ózbek tilinde latın imlasında rus, anglichan, arab, francuz tillerinde rezyumeleriniń berilgenin esapqa alsaq, Záńgi ataday ullı tulǵanıń biziń jerimizde on bes jıl jasaǵanın, Hákim ata Sulayman Baqırǵaniydey dańqlı jerlesimizden tálim alǵanın dúnya bilgenin, oǵan Ómirbay aǵaday pidayı el perzentiniń úles qosqanın tán alamız.
Ómirbay aǵa Ózbekstan hám Qaraqalpaqstan jazıwshılar awqamınıń aǵzası, shayır, dóretiwshi insan edi. Onıń qálemine tiyisli «Jıqqın», «Ishqı — muhabbat sawdası», «Erteńgi kún» gúrrińleri, «Nawrızdıń aqshaqarı» povesti, «Kewil terbelisleri» qosıqlar toplamı, sonıń menen birge Qońırat qáwiminiń tariyxı haqqında sóz etetuǵın «Birlikli Qońırat ellerim bardı» publicistikalıq toplamı, Qońırat rayonınıń tarıyxı, kelip shıǵıwı, tariyxıy orınları, Qońıratlı tulǵalar, rayonnıń jetiskelikleri, házirgi hám eski Qońırat haqqında ulıwmalıq maǵlıwmat beretuǵın J.Shamuratov penen jazǵan «Qońırat», «Kókdarya» fermer xojalıǵınıń ótmishi, geografiyalıq jaylasıwı, tariyxı, ótken ásirdegi turmısı haqqında «Kókdarya», shayır hám danıshpan dańqlı jerlesimiz haqqındaǵı «Sulayman Baqırǵaniy Hákim Ata» kitapları jarıqqa shıǵıp, óz oqıwshılarına barıp jetti. Sonday-aq, ol «Qaraqalpaqfilm» kinostudiyasi tarepinen súwretke alınǵan «Hákim ata Sulayman Baqırǵaniy» hújjetli filminiń scenariy avtorı. Ol ózi dóretiwshi insan bolǵanı ushın
91
da ádebiyattıń jankúyeri edi. Qaraqalpaqstan ziyalıların dúrliktirip dúnyaǵa kelgen «Qaraqalpaq Ádebiyatı» gazetasınıń jarıq kórgenine birinshilerden bolıp quwanıp, ózi de kóplegen maqalalar jazıp, Qońırat rayonı boyınsha gazetanıń haqıyqıy úgit násiyatlawshısı boldı.
Xalqımız tariyxında tereń ornı bar, Ájiniyazday shayırǵa tálim bergen, medrese ashıp xalqımız sawatın jetilistiriwge xızmet etken Elmurat axunnıń medresesiniń ornı kóp jıllar dawamında izlenip, lekin dáregi shıqpay júr edi. 2013-jılı Ájiniyaz babamızdıń kúnlerin ótkeriwge tayarlıq bolıp atırǵan kúnleri Ómirbay aǵa «Shárigúl qaraǵım, Elmurat axunnıń medresesin biletuǵın adamdı taptım, alıp baraman dep atır» dep quwanıp qońıraw etti. Bul xosh xabarǵa shańaraǵımız benen quwanıp Ózbekstan Qaharmanı, arxeolog Ǵayratdin Xojaniyazov penen oylastıq. Nátiyjede, Berdaq fondı atınan kishi ekspediciya shólkemlestirilip Ómirbay aǵanıń járdemi menen informator Námet aǵanı aldımızǵa salıp Elmurat axun saldırǵan medrese ornın hám axun atamızdıń máńgilik qonım tapqan ornı menen tanısıw imkaniyatına eristik.
Ómirbay aǵa usınday ullı islerdi ámelge asırǵan pidayı insan edi. 47 jıl dawamında Ómirbay aǵanıń qollap quwatlawshısı bolǵan jeńgemiz Matnazarova Gúlzira menen tárbiyalap kamalǵa keltirgen 4 perzentten 12 aqlıq súygen ádiwli ata.
Perzent ata isin dawam ettirer eken demek, atanıń tek ǵana ómiriniń dawamshısı bolıp qalmastan onıń islenbey qalǵan islerin de dawam ettiredi, degen sóz. Men Ómirbay aǵanıń qızı Mavludanı usı mısalda kóremen. Ol «Mavluda Qarlıǵash» turistlik kárxananıń baslıǵı. Qońırat rayonınan shıqqan birinshi turistlik operator. Onıń qolında Ómirbay aǵa sızıp bergen tariyxıy arxeologiyalıq hám arxitekturalıq estelikler kartası, qálbinde bolsa elimdi tanıtsam, tariyxıy dáreklerdi keń jámiyetshilikke jetkersem degen niyet bar.
Ózi bilgen ullılıqtı perzentleri qálbine sińdirgen, ózi húrmet etken insanlardı perzentlerine húrmet etiwdi násiyatlaǵan ullı insan Ómirbay aǵanıń isi de, ismi de umıtılmaydı.
Kimdur eldi táriyp etkisi kelse,
Miriwbet ruwxın sepkisi kelse,
Ármandı qıyalǵa jekkisi kelse,
Úyrensin Sizdegi bir ullılıqtı.
Toǵız ásir bálki onnan arıda,
92
El bolǵan Buǵraxan, Baqırǵanlı da, Duwa etip babalardıń haqqına, Adımlap shıqqansız bul aralıqtı. Sizdi tınshıtpadı ótmish izleri,
Miywalı daraqsız misli gúzdegi, Ilayım keyingi áwlad Sizdegi, Úlgi etse deymen mehriybanlıqtı.
Shárigúl Payzullaeva.
93
ESTELIGI MÁŃGI YADÍMÍZDA SAQLANADÍ: ÓMIRBAY
EMBERGENOV
Ómirbay Embergenov
Jazıwshı, shayır Ómirbay Embergenov 77 jasında qaytıs boldı.
Ó.Embergenov 1942-jılı 24-dekabrde Qońırat rayonınıń 9-awılında tuwılǵan.
1960-jılı Nókis awılxojalıq texnikumın, 1973-jılı Tashkent qalasındaǵı Respublika rus tili hám ádebiyat institutın pitkergen.
1973-jıldan napaqaǵa shıqqanǵa deyin Qońırat qalasındaǵı №53 sanlı mektepte rus tili hám ádebiyat páninen muǵallim bolıp isledi.
Onıń ―Erteńgi kún‖ (1987), ―Nawrızdıń aqshaqarı‖ (1990), povest hám gúrrińler jıynaǵı ―Ishqı – muhabbat sawdası‖, ―Táwipshilik sırları‖ (1991) atlı hár qıylı dáreklerden jıynaǵan toplamları, ―Jıqqın‖ (1995), ―Birlikli Qońırat ellerim bardı‖ (2002) kitapları basılıp shıqtı.
2007-jılı ―Qaraqalpaqfilm‖ kinostudiyası tárepinen túsirilgen ―Hákim – Ata‖ kinofilminiń scenariyin jazǵan.
J.Shamuratov penen birgelikte jazǵan ―Qońırat‖, ―Hákim-Ata‖ hám óziniń ―Tuyǵılar oyanǵanda‖ atlı qosıqlar toplamı jarıq kórdi.
Ol ―Miynet veteranı‖, ―Ullı Jeńistiń 20 jıllıǵı‖ medalları hám ―Ózbekstan xalıq bilimlendiriw aǵlası‖ kókirek nıshanı menen sıylıqlanǵan.
Ó.Embergenov 1999-jıldan Jazıwshılar awqamınıń aǵzası.
Ómirbay Embergenovtıń jarqın esteligi biziń yadımızda uzaq saqlanadı.
94
JASLARDÍŃ ÓMIR SHÍRAǴÍ: ROZA RZAEVA
Roza RZAEVA
Pedagog, oqıtıwshı, muǵallim, ustaz-jámiyet atlı bir saraydıń tiregi, keleshekke ómir shıraǵın jaǵıwshı, nur-ziya tarqatıwshı insan bolıp tabıladı. Xalqımız kóp ásirlerden muǵallim hám ustazlarǵa óz aldına húrmet kórsetip kelgen. Sebebi, atababalarımız perzentleriniń keleshegi hám kamalatında ustazlardıń ornı girewli ekenin júdá jaqsı túsingen. Bul ustazlarǵa degen húrmet hám izzet sezimi búgingi áwladlar júreginde de barq urmaqta.
Xalqımızdıń pedagogika tariyxında, ásirese shet tillerin oqıtıw tariyxında óz aldına girewli orınǵa iye húrmetli ustaz insanlardıń biri Ájiniyaz atındaǵı Nókis mámleketlik pedagogikalıq institutı inglis tili hám ádebiyatı kafedrası docenti
Rzaeva Roza Kamalovna edi.
Haqıyqatında da, Rzaeva Roza Kamalovna – biybaha insan, pedagog, tilshiádebiyatshı hám shın mánawiyatlı ustaz edi. Ol birinshi gezekte óziniń súygen kásibine juwapkershilik, shın ıqlas penen qalısana qatnas jasaytuǵın, kásipleslerin, shákirtlerin súyip jasaytuǵın bawırı keń, pidayı insan boldı.
Roza Kamalovnanı ápsanáwiy adam dep atasaq ta boladı. Sebebi, onıń tawsılmas kúsh-ǵayratı, minez-qulqı hámmege órnek bola aldı. Ondaǵı kóp uqıp-qábilet hám sheberliklerdiń hámmesi bir insanda jámlenip keliwi – bul Alla taalanıń oǵan bergen úlken inámı edi. Ol Qaraqalpaqstan Respublikasında shet tillerin oqıtıwda úlken bir mektep jarattı desek asıra aytqın bolmaymız hám bul mektep Roza Kamalovnanıń bergen tálim-tárbiyası negizinde ele kóp jıllar dawamında jumısın dawam etedi. Sebebi, ol óziniń átirapında kásipleslerin, oqıwshıları hám
95
shákirtlerin jıynap, ―Ustaz – shákirt‖ dástúrin jaratqanday edi. Fizika nızamlarına kóre Quyash óz jumısın toqtatqan jaǵdayda da, Quyash nurları million jıllar dawamında óz nurların shashıp turadı eken. Solay eken, Rzaeva Roza Kamalovnanıń ismide sol quyash nurları sıyaqlı shákirtleri yadında máńgi saqlanıp qaladı.
Shákirtleri júregindegi quyash nurlarınday názik shuǵla bolıp saqlanıp qalǵan mine, usı haqıyqıy insan, qádirdan ustaz Roza Rzaeva 1959-jılı 27-mart kúni Nókis qalasında zıyalılar shańaraǵında tuwıldı.
1976-jılı Nókis qalasındaǵı 1-sanlı orta mektepti ayrıqsha bahalar menen pitkerip, sol jılı Nókis mámleketlik universitetiniń Roman-german filologiyası fakultetine oqıwǵa kiredi. Ol studentlik dáwirinde de ziyrekligi, bilimi, adamgershilik páziyletleri menen basqa talabalardan ajıralıp turar edi. Universitetti 1981–jılı ayrıqsha diplom menen pitkeredi hám inglis tili muǵallimi – filolog qánigeligine iye boldı. R.Rzaeva ózi oqıǵan fakultetiniń aldınǵı studentleriniń biri bolǵanlıǵı sebebli onı Nókis mámleketlik universitetiniń basshılıǵı inglis tili kafedrası oqıtıwshısı lawazımına jumısqa alıp qaladı.
Bilim alıwǵa hám ilimge shın ıqlas qoyǵan Roza Rzaeva 1982-1983–jıllar aralıǵında Tashkent mámleketlik universiteti inglis filologiyası kafedrasında stajyor-izleniwshi bolıp bilim, ilim alıwdı dawam etedi. 1983-1987–jılları izleniwshi sıpatında «Sintagmaticheskie osobennosti publicisticheskogo funkcionalnogo stilya angliyskogo yazıka» (na materiale tekstov esse) atamasında kandidatlıq dissertaciyası ústinde jumıs alıp bardı.
R.Rzaeva mine, usı jıllardan baslap óz miynet jolın joqarı bilimlendiriw menen baylanıstırdı. Ol usı 80-jıllardıń baslarınan baslap 1994-jılǵa shekem Qaraqalpaq mámleketlik universiteti Roman-german filologiyası fakulteti inglis tili kafedrasınıń oqıtıwshısı lawazımında jumıs isleydi. 1994-1995–oqıw jılınan baslap Ájiniyaz atındaǵı Nókis mámleketlik pedagogikalıq institutı shet tiller kafedrasınıń úlken oqıtıwshısı lawazımında dawam etedi.
R.Rzaeva 1995-2010-jıllar aralıǵında instituttıń inglis tili kafedrasınıń baslıǵı lawazımında jumıs alıp bardı. 2010-jıldan baslap ómiriniń sońǵı kúnlerine shekem Ájiniyaz atındaǵı Nókis mámleketlik pedagogikalıq institutı inglis tili hám ádebiyatı kafedrasında jumıs isledi hám usı institutta bakalavr jónelisi, magistratura qánigelikleri boyınsha kóplegen shákirtler tayarlap, xalıq xojalıǵı ushın joqarı mamanlıqqa iye kadrlar jetilistiriwde ayanbay miynet etti. Sonıń menen birge, ol usı jıllarda NMPI shólkemlestiriwshisi bolǵan Respublikalıq ―Ilim
96
hám jámiyet‖ ilimiy metodikalıq jurnalında rus hám inglis tillerindegi materiallardı baspaǵa tayarlaytuǵın bólim redaktorı lawazımında inabatlı atqarıp bardı.
R.Rzaeva úlken pedagogikalıq stajǵa hám tájiriybege iye oqıtıwshı bolıp, ol respublikamızdıń birqansha belgili oqıw orınlarında hám shet mámleketlerde qánigeligin jetilistiriw kurslarında bilim hám kónlikpelerin rawajlandırdı. Atap aytqanda, onıń Moskva mámleketlik universiteti (1984-jıl), Ózbekstan mámleketlik jáhán tilleri universiteti (1989, 2007, 2010, 2013, 2016-jıllar), Samarqand MShTI (2000-jıl), M.Uluǵbek atındaǵı Ózbekstan milliy universiteti qasındaǵı Joqarı pedagogika institutı JOO kafedra baslıqlarınıń kursında (2005-jıl) alǵan bilim, kónlikpeleri hám tájriybe almasıwları usı aytqanlarımızdıń ayqın dáliyli.
1999-jılı Roza Rzaeva respublikalıq «Ustaz» (házirgi «Iste'dod») fondınıń pedagogika qánigeligi boyınsha tańlawda qatnasıp, grant jeńip alıwǵa miyasar boldı hám AQSHına qánigeligin jetilistiriw hám tájiriybe almasıw boyınsha saparǵa barıp keldi.
R.Rzaeva ziyrek hám intalı talabalar menen kóp islesti hám olardı tuwrı jolǵa baǵdarlap, oqıw-tárbiya jumıslarına úlken dıqqat awdarıp, belgili bir dárejede jetiskenlikke erisiwinde óziniń úlesin qostı. Ol óziniń miynet jolında birneshe talantlı jaslardı, ataqlı stipendiya iyelerin, olimpiada jeńimpazların hám sheber dilmashlardı tayarladı.
Til bilimin tereń meńgergen filolog sıpatında R.Rzaeva 90 ǵa shamalas ilimiy miynetler, oqıwlıq hám metodikalıq qollanbalar jáne ilimiy maqalalardıń avtorı boldı. R.Rzaeva awdarma boyınsha birqansha jumıslar alıp bardı. Kórkem awdarma boyınsha islegen jumıslarınan mısal keltirsek, 2009-jılı belgili qazaq dramaturgi S.Balǵabaevtıń «Eń sulıw kelinshek» atamasındaǵı pesasın rus tilinen inglis tiline awdarma etti. Nátiyjede Qaraqalpaq mámleketlik sazlı teatrı Mısr mámleketinde ótkerilgen XXI xalıqaralıq teatrlar festivalına qatnasıp qayttı, spektakl shet el tamashagóylerine saxnada qoyılıp, inglis tilinde tıńlawǵa imkaniyatlar boldı. Kórkem awdarma boyınsha miynetlerinen balalar folklorı boyınsha qosıqlar, erteklerdi, Qaraqalpaqstan hám Ózbekstan xalıq shayırı I.Yusupovtıń birqansha qosıqların hám massagetler tariyxın sóz etetuǵın «Tumaris» poemasın, Qaraqalpaqstan xalıq shayırı G.Matyakubovanıń «Stixi, sonetı, poemı, libretto dlya operı, poeziya v proze. Izbrannoe v II-x tomax» (Nukus, izd. «Bilim», 2015) atamasındaǵı kitabın ózbek hám qaraqalpaq tillerinen rus hám inglis tiline awdarmaladı. Qurbanbay-jıraw Tajibay ulınıń sózinen jazılǵan «Qırıq qız» dástanı tiykarında úsh akt, altı kartinadan turatuǵın «Libretto dlya operı» (Tashkent, Global Books baspaxanası, 2017) (213-267-betler) hám «Poeziya v proze» bólimi (269-358-betler) boyınsha jumıs alıp bardı. Belgili
97
qaraqalpaq jazıwshı hám shayırlarınıń ómir bayanı hám dóretiwshilik jolı haqkında maǵlıwmatlardı, gúrrińler, proza hám poeziya shıǵarmalarınan úzindilerdi sheberlik penen rus hám inglis tillerine awdarmalaǵanın atap ótsek boladı. Onıń kópshilik awdarma boyınsha miynetleri respublikalıq «Qaraqalpaq Ádebiyatı» gazeta betlerinde járiyalandı hám Internet saytlarına kirgizilgen. Bul iske asırılǵan jumısları, álbette, Qaraqalpaqstan Respublikasınıń ilim-pán tarawında úlken áhmiyetke iye boldı, jánede keleshek ilim-izertlewshilerine úlken ruwxıy azıq hám tájiriybe mektebi sıpatında ele de xızmet etedi. Sebebi, ullı jazıwshı Sholpannıń «Ádebiyat jasasa-millet jasaydı» dep aytqanınday, onıń qaraqalpaq tilinen inglis tiline awdarma etilgen jumısları shet el oqıwshılarına biziń elimizdiń úrp-ádet, dástúrleri, mádeniyatı hám qaraqalpaq ádebiyatınıń eń jaqsı úlgileri menen tanısıwǵa keńnen imkaniyat jaratıp, milletimiz, onıń ruwxıy dúnyası haqqında bay maǵlıwmatlardı beredi.
R.Rzaevaǵa bul kóp jıllıq ilimiy-pedagogikalıq xizmetleriniń nátiyjesi boyınsha 2011-jıl 15-yanvar kúni Antique World Xalıqaralıq Akademiyasi tárepinen docent ilimiy ataǵı berildi. Ol 2013-2014–oqıw jılınıń juwmaǵı boyınsha filologiya fakultetiniń «Eń talapshań hám isker muǵallimi» nominaciyası jeńimpazı boldı hám diplom menen sıylıqlandı. 2015-2016–oqıw jılında institut pedagogxızmetkerleriniń oqıw, ilimiy-metodikalıq baǵdarda ámelge asırǵan jumısların monitoring etiwde belsene qatnasqanlıǵı ushın arnawlı diplom menen sıylıqlandı.
Talantlı hám záberdes ustaz R.Rzaeva 1998-jılı kóp jıllıq miynetleri hám tálimtárbiya tarawında erisken tabısları ushın Ózbekstan Respublikası Xalıq tálimi aǵlası kókirek nıshanı menen sıylıqlandı, 2004-jılı oǵan «Bilimlendiriw haqqındaǵı Nızam» hám Kadrlar tayarlawdıń milliy dástúrinde belgilengen wazıypalardı orınlawǵa hám joqarı maǵlumatlı kadrlardı tayarlawda ayrıqsha xızmetleri ushın Ózbekstan Respublikası Xalıq bilimlendiriw ministrliginiń «Xúrmet jarlıǵı», 2016jılı kóp jıllıq nátiyjeli hám ayrıqsha miyneti hám óz xızmet wazıypalarına bolǵan sadıqlıǵı ushın Ózbekstan Respublikası joqarı hám orta arnawlı bilimlendiriw ministrliginiń «Xúrmet jarlıǵı» berildi.
Juwmaqlap aytqanda, insan kamalatında oǵan birinshi márte qálem uslatqan, háripúyretken, onı ilim-bilim nurlarına jeteklegen oqıtıwshınıń miyneti biybaha.
Álbette, bunday óz kásibiniń mamanı, menen shákirtleri, kásipleslerin shın berilip súygen insandı el – xalqı da, kásiplesleri de úlken xúrmet etiwi sózsiz. Sonlıqtan da R.Rzaevanıń ómir jolı, eń baslısı biybaha insaniylıq páziyletleri menen ustazlıq záberdes xızmetleri ilim hám bilimlendiriwdi rawajlandırıwǵa qosqan úlesi, jaslarımızdıń hár tárepleme kámil insan bolıp qáliplesiwine, elimiz abırayınıń
98
artıwına qosqan salmaqlı miyneti keleshek áwladlar ushın úlgi bolıp qala beredi hám dosları, kásiplesleri, shákirtleri yadında máńgi saqlanadı.
Keńesbay Allambergenov,
Qaraqalpaqstan xalıq jazıwshısı, filologiya ilimleriniń doktorı, professor. Gulzira Kdırbaeva, Filologiya ilimleri boyınsha filosofiya doktorı, docent. 2020, 30-sentyabr.
99
ESTELIGI MÁŃGI YADÍMÍZDA SAQLANADÍ: HIDOYAT AXMEDOV
Hidoyat Axmedov
«Qaraqalpaqstan Respublikasına miyneti sińgen jurnalist», «Xalq so’zi» gazetasınıń Qaraqalpaqstan Respublikası boyınsha óz xabarshısı Hidoyat Axmedov 51 jasında qaytıs boldı.
H.Axmedov 1969-jılı Mańǵıt qalasında tuwıldı. 1977-1982-jılları rayondaǵı Hamza atındaǵı muzıka mektebinde tálim aldı. 1986-1994-jılları rayondaǵı túrli kárxanalarda jumıs isledi. 1987-1989-jılları áskeriy xızmette boldı. 1994-jıldan baslap házirgi «Qoraqalpoǵiston tongi» (burınǵı «Amu tongi») gazetasında xabarshı bolıp isledi. Óndiristen qol úzbey Ájiniyaz atındaǵı Nókis mámleketlik pedagogikalıq institutın ózbek tili hám ádebiyatı qánigeligi boyınsha pitkerdi.
2004-jıldan baslap «Qishloq hayoti» gazetasında Respublika boyınsha óz xabarshısı, 2008-jıldan baslap «Xalq swzi» gazetasınıń Respublikamız boyınsha óz xabarshısı bolıp islep keldi. Usınıń menen qatar «Qoraqalpoǵiston tongi» gazetasınıń bas redaktor orınbasarı lawazımın birge alıp bardı.
Ol qálemi ótkir, pikiri keń, talantlı jurnalist edi. Respublikamızda alıp barılıp atırǵan social-ekonomikalıq reformalardıń ámelge asıwın keń túrde sáwlelendirip bardı.
Qaraqalpaq jazıwshı-shayırlarınıń shıǵarmaların kórkemlik penen awdarıp, ózbek oqıwshılarına jetkerip bardı.
100