Muratbay Nizanov Tanlamali shigarmalar_roman_gurrinler_drabller
.pdfGúrrińler |
201 |
|
Tuńǵısh márte bir mákemede jumıs basladım. Aradan úsh–tórt ay ótkennen keyin ulıwma jıynalıs bolatuǵın boldı.
—Jas qánigeler atınan sen shıǵıp sóyleyseń, — dedi jergilikli komitet baslıǵı maǵan.
—Men ne dep sóyleymen?
—Usı jerge kelip turmıstı úyrendim, deyseń. Bul ushın baslıqqa tereń minnetdarshılıq bildirip, uzaq ómir tileyseń.
Bul nárseler endi maǵan jańalıq emes, biraz úyrenip, ısılıpám qalǵanman.
Sóyledim. Usı mákemege jumısqa kelemen degenshe jaqsı-ja- mandı, ashshı-dushshını bilmeytuǵınımdı ayttım. Sonıń bárin úyretken direktorıma tereń minnetdarshılıq bildirip, dúnya turǵansha turıwın tiledim. Bir adam qalmastan qol shappatladı.
Kúnlerden bir kúni qalalıq keńeske deputat boldım.
—Búgin hákim saylawshılar aldında esap beredi, — dedi saylaw komissiyasınıń baslıǵı meni ońasha shaqırıp. — Sen hákimniń bayanatın maqtap shıǵıp sóyleyseń hám onı jáne bir shaqırıqqa deputat bolıp saylanıwı ushın kandidaturasın usınasań.
—Ne dep maqtayın?
—Bul hákim qalanı basqarǵalı berli sháhárimiz gúlzarlıqqa aylandı, kóshelerimiz shıraylandı, jańadan záwlim jaylar boy tikledi. Hámme kárxanalar is jobaların...
—Qoyıp turıń, — dep irktim men onı. — Qayaqta qala abadanlasadı? Eki kósheniń birinde úyin-úyin shıǵındı. Báhárde mıń terek otırǵızıladı, on bes kúnnen keyin hámmesi quwraydı. Salmalar kewip atır. Jayı buzılǵan adamlar qayaqqa bararın bilmey...
— Bunday gáplerińdi jıyıstır, — dedi ol maǵan kiyligip.
— Sennen onday ádet shıqpaydı dep edi ǵo. Shıǵındı-pıǵındı menen ne jumısıń bar?! Házirshe onı jerge–jámge tiygizbey maqtaysań! Gáp tamam!
Maqtadım. Hákim meni ıras aytıp atır dep túsindi me, xanasına sıymay kerilip otırdı.
Qullası, jumıs ornımnan napaqaǵa shıǵaman degenshe sóylemegen májilisim, minnetdarshılıq bildirmegen baslıǵım qalmadı.
Bir kúni húrmetli dem alısta kempirimniń qasında ájik– gújik bolıp áńgime qurıp otırsam, radiodan bir xabarshı qız keldi.
— Ata, kekseliktiń gáshti haqqında bes-altı awız sóylep berseńiz? — dedi ol.
202 |
Muratbay Nızanov |
|
—Ne dep sóyleyin?
—Ózińizdiń jeke pikirińizdi aytıń.
—Mende jeke pikir joq ǵo.
—Esitiwimshe, siz hámme waqıtta májilislerde shıǵıp sóyleydi ekensiz.
—Onda mennen hesh kim jeke pikir soraǵan joq. Ózleri úyretti, men tákirarladım.
Aqırında, bul qız da sol joldı tuttı. Men úsh jıldan beri kekseliktiń gáshtin súrip atırǵanımdı, kóshemiz abadanlasıp atırǵanın, ul-qızlarım jumıs penen támiyinlengenin, shańaraǵımız benen oǵada tatıw jasaytuǵınımızdı awız toltırıp ayttım.
—Hámmeniń háwesi keletuǵın sóz boldı! — dedi xabarshı qız quwanıp.
Kempir jarılıp keteyin dep otır eken.
—Aljıǵan seniń! — dedi qız shıǵar-shıqpastan. — Payǵambar jasına kelgenińde óytip ótirik aytıp ne degbirden sastıń! Kóshemiz abadanlastı deyseń, taslandılardı bir ayda bir áketpeydi, shamal bolǵan kúni tunshıǵıp óleyin deyseń. Ulı– qızıń jumısta mısh! Jalǵız balań shabashki izlep el gezip júr. Eki qızıń úyinde jumıs ornı qısqarıp bos otır. «Shańaraǵımız benen awızbirshilikte jasaymız» dediń awız toltırıp. Kelinniń
qabaǵı mushtay, «bólek shıqpadım» dep. Sháynekti stolǵa dúrs ettirip qoyǵanda qaqpaǵı eki barmaq eli kóteriledi.
—Endi ne deyseń maǵan?
—Ótirik aytpaǵanda bále bar ma?!
—Wáy, kempir-áy, aytpay júrgen ótirigim be?! Sen jańa esitip atırǵansoń shorshıp atırsań. Awzım qálip alıp ketken meniń!
08.06.2018-j.
SEBET
Birewler «baslıqlar wáde bere beredi, biraq, orınlamaydı» dep qustanı qıladı. Biykar gáp! Ol adamına paylı. Biziń baslıq wáde berdi me, tamam! Aspan jerge qulap tússe de orınlaydı.
Pul degenniń bet-júzine qaramaydı. Millionıń mıń som shelli kórinbeydi oǵan. Házir onıń mártligin aytıp bereyin, qızǵanıp ketesiz!
Jańa jıl aldınan ol hámmeni jıynap jıynalıs ótkerdi.
Gúrrińler |
203 |
|
—Bizde ózi neshe adam isleydi? — dedi qánigeler bóliminiń baslıǵı Qátiyra apaǵa.
—Seksen tórt, — dedi Qátiyra apa.
Qara, biziń baslıqtıń keńligine, mákemede neshe adam isleydi, olar jumısqa kelip-ketip júr me, isi joq ǵo!
Baslıq bir zaman oylanıp qaldı.
—Kóp ekenbiz, — dedi shekesin azımaz qasıp turıp. — Bárine jetkere almaymız. Bizde islep, napaqaǵa shıǵıp ketkenler neshew?
—On bes shıǵar deymen.. — dedi Qátiyra apa ekilenińkirep.
—Maǵan anıǵı kerek.
—Awa, on bes, jılda jańa jıl aldınan kishkene pakette sawǵa berip shıǵamız ǵo!
—Áne, sóytip meniń jeti nasırımdı jerge búgesiz! — dedi baslıq qabaq shıtıp. — Paket degen ne sol?! Uyat emes pe?! Biziń mákememiz qaysı mákemeden kem?! Basqa mákemeler nuranıyların sıylap, sebet penen sawǵa jiberedi. Qarap tursań háwesiń keledi. Ishinde alma deyseń be, apelsin deyseń be, shokolad, vafli, ortasında shampanskiy turadı. Qurǵa shıqqan palwanday gárdiyip! Sırtın gúlli plenka menen qaplaydı, ishinde hámme zat kórinip turatuǵın. Joqarısınan gúlin keltirip lenta menen baylaydı.
Áne, sawǵamısań-sawǵa! Biz nege sonı isley almaymız?!
—Ol qımbatqa túsedi ǵo, — dedi kimdúr.
—Qımbat bolǵanda qansha?
—Úsh júz mıń bar shıǵar.
—Bola bersin! On bes sebet qansha boladı?
—Oy-bu, aǵa, tórt yarım million bolıp ketedi ǵo, — dedi buxgalter Edenbay shorshıp túsip.
—Anańqara! Bugalter degen xalıq ózi anasınan qıyqım bolıp
tuwıladı, ne, taba almaymız ba tórt yarım million?! Bugalter tómen qarap qaldı.
—Neǵılamız, beremiz be nuranıylarǵa on bes sebetti sawǵaǵa?
—Xızmetkerlerdiń sawǵasına tásir etpeyme? — dedi Edenbaydan ún shıqpaǵannan keyin art betten birew.
—Yaq. Onı mákemeniń únemlengen qarjısı esabınan tóleymiz.
—Únemlengen qarjı oǵan jetpeydi ǵo, — dedi buxgalter.
—Jetpese endigi únemlenetuǵın qarjınıń esabınan beremiz.
Bul gelme-gezek sawda. Erteń biz-ám napaqaǵa shıǵamız. Sonda úyimizge sebet tolı sawǵa barıp tursa, ballarımızdıń aldında qan-
day abıray!
204 |
Muratbay Nızanov |
|
Abıray hámmege de kerek, úndemedik. Buxgalterge tórt yarım million puldı koorporativ plastikke ótkerip beriw tapsırıldı.
Edenbay jaman qatınday kabinetinde toqńıldap júrip ótkerdi. Tústen keyin Qátiyra apa qasına eki qız alıp, baslıqtıń
mashını menen on bes sebet sawǵanı alıp keldi.
—Men aytqan dúkánnan aldıńız ba? — dedi baslıq Qátiyra
apaǵa.
—Awa, sol 3-dúkánnan.
—Mańlayına aq fenoplast penen jazıp qoyıptı ya?
—Awa.
—Jaqsı dúkán. Hám arzan, hám qálegen zatıń tabıladı. Keleshekte de birge islesip turamız onıń menen. Endi bul sebetlerdi iyelerine jetkerip beriń.
—Erteń be? — dedi oylasıqtıń ishinde bolǵan mestkom Mır-
zabay.
—O nege erteń?! Házirdiń ózinde!
—Hár qaysısınıń úyin izlep júrgende tún bolıp ketedi ǵo!
—Bolsa boladı dá! Astıńızda pildey mashın.
Hesh kim bunnan keyin hesh nárse demedi. Baslıqtıń buyrıǵı dodalanbaydı.
— Mákemede pul bar eken ǵo, — dedi adamlar bılay shıǵıp.
— Qurı buxgalter jılana beredi. Erteń aldına kirip aytayıq, bizlerge sebet bolmasa da úlkenirek paket penen bersin.
—Qaydam, kewil xoshlıǵı jaqsı bolsa...
—Jaqsı bolmay ne qıladı?! Úyine sebet barǵanlar túni menen baslıqqa raxmet aytıp, telefonın tındırmaydı. Azanda kóreseń, qatını ul tuwǵanday quwanıp keledi.
Biziń adamlarımızdıń boljawı geyde palkerdiń gápindey kerisine ketedi. Azanda baslıq ózgerip keldi. Qabaǵı qatıńqı. Kireberiste sálemlespekshi bolǵanlarǵa barmaǵınıń ushın zorǵa tiygizip, kabinetine kirip ketti. Kirdi de xatker qızdan keshegi bazarǵa barǵanlardı hám oylasıqta bolǵanlardı shaqırdı.
—Sawǵanı qaysı dúkánnan aldıńız? — dedi Qátiyra apaǵa tesilip qarap.
—3-dúkánnan
—Biykar gáp! Basqa dúkánnan alǵansız!
—Mańlayına «Dúkan №3» dep jazıp qoyǵan eken ǵo, aq fenoplast penen.
Gúrrińler |
205 |
|
—Durıslap qaramaysız ba?! Sol «3» degen sannıń izinde «4» degen jazıw da bolǵan. Ol qoparılıp túsip qalǵan! Baslıqtıń gápin húrmet etip, dıqqat penen qaraǵanıńızda, túsip qalǵan sannıń ornın abaylaǵan bolar edińiz!
«Gúnakarlar» tómen qaraw menen boldı. Qarsı dálil ayta almadı. Baslıqlar qátelespeydi ǵo.
—Qaytadan tórt yarım million tabasań! — dedi baslıq Edenbayǵa suq barmaǵı menen shókelep. Edenbay dım úndemedi. Keshe bizlerge «ulıqpanda barı usı» dep atır edi, yaq, ulıqpanda
ele bar eken.
—Men aqırı ol dúkánǵa wáde berip keldim! — Baslıq ele háwirinen túse almay atır edi. Ashıwı kelgen adam birden suwıyǵoymaydı dá! — Sózimdi samalǵa ushırmayman! Sizler, Qátiyra apa, kózińizdi qattıraq ashıń. Asıqpay, albıramay úshinshi dúkándı tawıp alıń. Aysara degen kelinshek satıwshı — Ay-sa-ra!
—Boladı, boladı.
Jergilikli komitet baslıǵı ornınan turdı, Mırzabay aǵa. Ol mákemedegi eń jası úlken adam edi.
—Baslıq inim, sonda..a.. keshegi adamlarǵa jáne bir-bir sebetten berip shıǵamız ba?
Baslıq birden irkilip qaldı.
—Bizde sol on bes adam bolǵanı ma?
—Bolǵanı ǵo. Onıń-ám birewi jaqında qaytıs boldı. «Ele topıraǵı kepken joq ǵoy» dep onı bıyılsha dizimnen óshirmedik.
—ka-ak... Qızıq-áy, ya, on bes adam... Mákeme álimsaqtan beri bar bolsa... Sonda so, olardan burın hesh kim islemegen be bizde?
—Islegen, — jáne sol Mırzabay aǵa anıqlama berdi. — Biraq,
bári o dúnyalıq bolıp ketken ǵoy...
—Him-m, — dep baslıq eki barmaǵı menen shekesin qasıdı. Shekesin qasıdı ma, demek jolın tabadı. — Balları bar shıǵar?
—Birazıniki bar, birazlarıniki joq...
—Izlestiriw kerek. Ótmishke húrmet bunday bolmaydı. Izleń, tabıń! Al, sizler, Qátiyra apa, túske deyin on bes sebetti ákelip tayarlap qoyıń.
Ólip ketkenlerdi izlestiriwge úsh kún waqıt ketti. Baslıǵımız qalayda aqıllı adam ǵo, erteden qozǵaldı. Bolmasa jańa jıl ótip keter edi.
«Izquwarlıq»qa hámmemiz qatnastıq. Eń kekse úsh xızmetkerdiń aqlıqlarınıń jayı buzılıp, ústinen jol túsip ketken eken,
206 |
Muratbay Nızanov |
|
olardıń qayaqqa kóship ketkenin taba almay, dizimnen óshirdik. Altı xızmetkerdiń máplik bolıp otırǵan kempirleri tabıldı. Úshewiniń úrim-putaqları qayaqqadúr kóship ketipti. Olar da dizimnen óshti. Tórtewiniń shawlıqları, úshewiniń aqlıqları tabıldı. Eki sebetke jerdiń astı-ústin qıdırıp iye taba almadıq. Bunıń esabın Mırzabay aǵa taptı.
—Inim, sonsha millionlardı tawıp otırǵan óziń, — dedi baslıqqa kirip. — Bir sebetti kelinge apar, bir sebetti óziń sıylaǵanday birewge jibererseń! Restoranlarda da bolatuǵın edi ǵo, bir stoldan ekinshi stolǵa podnos jiberiw.
—Qolaysız bolmaspa eken, — dedi baslıq tartınǵanday bolıp. Lekin, ishinen qálep turǵanı júzinen bep-belgili edi.
—Hesh qolaysızı joq, inim! Toǵız millionnan toǵız júz mıń payıńız bar ǵo! Biz qayta bir sebet kem berip atırmız.
Baslıq mıyıqtan kúldi de, gúlli plenkaǵa oralıp, jasıl lenta menen baylanǵan eki sebetti shkabına salıp qoydı. Qalǵan on úsh sebetti tarqatıwǵa jigirma altı adam jol mashınǵa shıǵıp kettik. Baslıqtıń abırayı — hámmemizdiń abırayımız, aqırı.
Ol wádesiniń ústinen shıqsa boldı.
Keshe sol úshinshi dúkánnıń satıwshısınıń kim ekenin bilip aldıq. Biraq, aytpayman — sır!
13.12.2017-j.
KIM JEŃEDI?
—Aldımızdaǵı jıl meniń jılım eken, — dedi Hayal kúyewine maqtanısh penen.
—Bolsa boladı da, biziń jıl-ám keler, — dedi kúyewi.
—Meniń jılıma baylanıslı naqıl-maqal kóp. –Hayal teginlikte jeńislik bergisi kelmedi. Óziniń jılın maqtaw ushın dálil kerek boldı.
—Jılqı jılına baylanıslı da naqıl-maqallar bar!
—Kóp bolsa birew-ekew shıǵar.
—Yaǵaw, barshılıq!
—Ójetlespese!
—Neǵıladı ójetleskende?!
—Meniń menen ójetlesip jeńgen jeriń bar ma?
Gúrrińler |
207 |
|
—Básekileseseń be?! — dedi kúyewi shın kewli menen. Jambaslap, náshe qılıp shay iship atır edi, tikeyip otırdı.
—Básekilesemen! — dedi hayal da qaytpay. — Al, ayt, naqı-
lıńdı.
—Óziń basla. Birinshi bolıp aytsam bir naqıl jetpey qa-
lıwı múmkin.
—Sen baslasesh, erkekseń ǵo!
—Boladı, baslay beremen! «At jigittiń qanatı» — Jigit mardıyıp qoydı.
—«Iyt opa, qatın japa!»
—Áne, kórdiń be, ózińniń qanday ekenińdi! –dedi jigit mazatlanıp.
—Házir maǵızın shaqpay tur, márt bolsań jılıńa baylanıslı naqıl tawıp ayt.
—Aytaman! «At baspayman degen jerin úsh basadı»
—«Iytten bir súyek qarızım bar!». — Olar dásme-dáske ótti.
—«At tuyaǵın tay basar».
—«Iyt ókpeleydi, iyesi bilmeydi».
—«At tepkisin at kóteredi».
—«Iyttiń iyesi bolsa, bóriniń qudayı bar».
—«Jılqınıń piri jılqıshı ata».
—«Jaqsı iyt ólimtigin alısqa taslaydı».
—«Tayda tuyaq qalmay qatnastı».
—«Iyttiń eń arǵısında joǵı toqpaq jilik ǵayzadı».
—Bul naqıl emes, — dedi kúyewi uttım ba degendey mardıyıp.
—Pesada bar. At haqqında pesada bolsa sen-ám ayta ber.
—«Er jigittiń bir muradı at bolar» Qosıqta bar.
—«Iyt tólewi bir kúshik».
—Atlar on bes aylawǵa jiberildi.
—«Awılǵa jaqınlaǵanda iyt ozadı». Seniń jańaǵı aytqanıń naqıl emes, sonda da eregispedim.
Jigit at haqqında naqıl taba almay biraz irkilip qaldı.
—Jeńildiń be? — dedi hayal baspalatıp.
—Yaq, qoyıp tur... Házir... He, yadıma tústi, «at kisneskenshe, adam sóyleskenshe».
—«Úyikken iyttey nebbále!»
Jigit jańaǵı naqıl menen jeńdim degendey isenimde edi, hayalınıń qarsıma-qarsı juwabınan endi birotala tubalap qaldı.
208 |
Muratbay Nızanov |
|
—Qalǵanın erteń dawam etemiz, — dedi hayalına. —Jumıstaǵı jigitler menen oylasıp kóremen. Basqa da naqıllar bar bolıwı kerek.
—Oylasa ber, báribir meni jeńe almaysań! Jáne onlaǵanın aytıp taslayın ba? Ele iyttiń atı menen aytılatuǵın ǵarǵıslardıń bası buzılǵan joq. Aytayın ba?
—Ayt, ayt! Erkektiń jeńgen jeri bar ma, sirá!
Hayal sawdıratıp tasladı.
— «Há iyt shirkin seniń!», «Iyttiń áwladı!», «Iyt qorlıqtı kórsetemen ele!», «Basıńa iyttiń kúnin salaman!», «Há, iyttiń tuwǵanı seniń!».
— Háy-Háy! tilińdi tartıp sóyle, qatın! Iytiń ne? Bala ósirip, qatın áperip, endi men iyt boldım ba?!
Bosaǵada balasın bayram menen qutlıqlawǵa kiyatırǵan jigittiń anası kórindi!
12.12.2017-j
KÓSHENIŃ ABÍRAYÍ
Hákimiyatta isleytuǵın bir dostım bar edi, arzalardı esapqa alıp otıratuǵın. Oylamaǵan jerde ushıratıp qaldım.
—Pay, jaqsı boldı ǵo seni kórgenim, — dep quwanıp qoyaberdi ol. — Kósheńniń adamlarına aytsa, qayta-qayta arza jaza bermesin. Kózimizdi asha almay qaldıq ǵo!
—Ne dep jazıptı arzanı?
—Kóshemiz tar deydi, eki mashın qabatlasıp óte almaydı deydi, asfalt júrgizilmegenine qırq jıl boldı, dep yadına túsken sáneni jazıp qoyıptı.
—Durıs jazǵan! — dedim men kósheniń adamlarınıń jazǵan arzasın tastıyıqlap. — Kóshede mashın túwe velosipedler birbirine jol berip turmasa sıymaydı. Qazǵanaǵın aytpaysań ba, bıltır kúpá-kúndiz bir shuqanaqqa túsip ketip, belimnen mertilip úsh ay jattım.
Ótirikti quday keshirsin, kósheniń abırayı ushın qas qaqpay jalǵandı toqıp tasladım.
—Sol arzanı kórip shıǵa almay atırsaq, ekinshisi taǵı keldi. — Tok jıpılıqlap janıp óshe beredi, stolbalar qıysıq kómilgen.
Gúrrińler |
209 |
|
—Tuppa-tuwrı! Seni kórsem ózim-ám aytarman dep júr edim. Kósheniń shep jaǵına kómilgen stolba oń jaqtaǵı jaydıń shiferına tiyeyin dep tur. Ózlerimiz mańlayımızdı urıp alayın
dep zorǵa ótemiz.
Bir ótirigińniń tigisi bilinbey ketkennen keyin izi kele beredi eken. Sóytpeseń, kósheniń abırayı ketejaq.
—Gazdiń ústinen baz-bayaǵı arza kóp. Lekin, siziń kósheniń adamlarınıń jazǵanı basqasha.
—Qanday, basqasha bolǵanda?
—Birinshi kúni azanda ishetuǵın shay ushın altınshı kúni keshte plitanı jaǵıp jatamız deydi.
—Bunıń hesh tańlanatuǵın jeri joq, fakt! Inanbasań biziń
úyge qıdırıp kel. Háwlige oshaq qurıp, bir mashın jıńǵıl túsirip qoyıppan.
Aytarın aytıp bolıp, shorshıp kettim. Sonnan kelip qalsa… Gazdiń qulaǵın yarım taw qaytarıp qoymasań, sháynektiń tutqası janıp ketedi.
Ilaj joq, kósheniń abırayı ushın kózimdi jumıp ótirik ayttım. Jazbasa qolı qıshıytuǵın bir-eki arzagóydi jıǵıp bergenim menen shaq shıǵa ma –kósheniń abırayı ketedi, qurı.
—Yaqshı, ol-ám bara bersin, kirpitiken kóbeyip ketti degenine ne deyseńW Hákim kirpitikendi joq qılıp beriw kerek emish.
—Haqıyqatında da, sol kirpitiken degen báleni qalay joq etiwge boladı? Kúni keshe, azanda tufliyimdi kiyeyin dep atırsam, ishinde bir kirpitiken — pár tósekte jatqanday uyqılap atır.
Kirpitiken degendi mektepte sabaqlıqtan súwretin kórgenim bolmasa, názerim túsken maqluq emes. Neǵılasań, kósheniń abırayı
—hámmeniń abırayı.
—Aytpaqshı, jáne bir arzanı umıtıppan, «kóshemizdegi ja-
rılǵan trubadan aqqan suwǵa adamlar qarmaq qurıp otıradı» — depti.
—Durıs. Mına men — tiri gúwa, aldıńda turman-ǵo. Ótken jılı jazda biziń bala shıǵanaqtay eki balıq ákelip tur. «Qayaqtan aldıń?» desem, krannıń suwınan deydi.
—Wáy, qoyshı, krannıń suwında balıq bola ma?
—Ádebinde men-ám sóytip oylap edim, keyin bilsem, Túyemoyınnan iytbalıqlar aǵıp keledi de, trubanıń ishinde úlkeye beredi eken.
14 — M.Nızanov
210 |
Muratbay Nızanov |
|
Lapgóy degen-ám jerden kógerip shıǵa ma, usınday qısınıspanıń aqıbetinde payda bolatuǵın qusaydı. Meni de endi solardıń birligine esaplay berse boladı.
Dostım bunnan artıq dártin dasturxan etip tura bermedi. Ketti. Shaması, mennen de túńilgen bolsa kerek.
Aradan úsh-tórt ay ótip edi, bir merekede jáne kórisip qaldıq.
—Seniń kósheńniń adamları… — dep taǵı gáp baslap kiyatır edi, aldın oradım.
—Men ol kósheden kóship kettim. Taza posyolkadaman.
—Bilemen, seniń kóship ketkenińdi-ám jazǵan. Bul ret súyir shıbınnıń ústinen jazıptı. Uyqılatpaydı deydi. Qanǵa záhárin jayadı, adam bundayda ólip qalıwı múmkin. Ayrım xojalıqlar súyir shıbınnan qashıp, kóship ketip atır dep seni jazıptı.
—Aytsam, isenbeyseń jora, keyingi bes jıl dawamında balashaǵamız benen brezent peshexanada uyqıladıq-ǵo!
—Aytıp bolıp ózim-ám qısınıp kettim, bózden deyǵoysam boladı ǵo. Ne de bolsa awızdan shıǵıp ketti.
—Wáy, qoyshı! Peshexana brezentten bola ma, siyleden tigiledi ǵo, — dedi dostım qabaq shıtıp.
—Bul súyir shıbınnıń tuqımı basqasha, siyleńdi múlk eken demeydi, tesip kete beredi.
Dostımnıń arǵısında bolsa, endi qaytıp maǵan shaǵınbaytuǵın shıǵar. Men ne qılayın endi, «awa, kóshemizde arzagóyler barshılıq» dep, aldınları ólip ketken adamlardıń ústinen jazǵanların aytıp bereyin be? «Arıń ushın qara kiy» degen, kósheniń abırayı kerek bizge!
Aradan yarım jıldan kóbirek waqıt ótti. Toy-merekege barsam hákimiyattaǵı sol dostımdı ushıratıp qalmaǵayman dep qaltıraqlap júretuǵın boldım. Qayda saǵan!
Bir toyda pul jazılıp, dizimnen ótip atırsam, birew kelip shıǵanaǵımnan tartadı. Qarasam — sol.
—Jaqın arada kóship ketken kósheńe bardıń ba? — dedi ol.
—Yaq, barmadım. Altı ay boldı.
—Al, endi, kósheni pútkilley qayta qurdıq. Suwdıń tozǵan trubaların alıp taslap, polimer trubalar qoydıq. Stolbalardı qaytadan kómdirdik. Gazge kósheniń basına GRP qoyıp berdik. Kósheni keńeytip, ıssı asfalt penen asfaltlattıq.
—Áne, endi arzadan qutılıpsız? Qurı biziń kósheniń adamla-
rın ginalay bereseń!