103. Тері ішіне ине салу медбикелік технологиясы

Тері инъекцияны диагностикалық мақсатпен жасайды: туберкулин (Манту сынағы), аллергиялық сынақтар. Инъекция жасайтын орындары: білегінің ішкі ортаңғы бөлігі. Дәріні терінің эпидермальдық қабатына 0,1–1мм–ғе дейін ертіндіні жібереді.

Мақсаты: диагностикалық

Көрсеткіштері: түберкулезді және аллергиялық жағдайларды анықтау

үшін (Манту және аллергиялық сынамалар), аурудың алдын алу үшін

егулер кезінде қолданылады. Тері ішіне 0,1-ден 0,3мл сұйық жіберіледі.

Қарсы көрсеткіштері: иньекция жасалатын орынның тері аурулары және тері асты май қабатының ісінулері.

Асқынулары: қатаю (инфильтрат).

Жабдықтау: бір рет қолданылатын, сыйымдылығы 1мл шприц, иненің ұзындығы 15мм, дәрілік зат, төрт қабатты залалсыздандырылған дәкелермен жабылған залалсыздандырылған лоток, залалсыздандырылған пинцет, таңу материалдары бар бикс, 70% этил спирті, қолданылған заттарға арналған контейнерлер (ҚАК).

Іс-әрекет алгоритмі:

1.Пациентті ем- шара бөлмесіне шақырыңыз.

2. Гигиеналық деңгейде қолыңызды жуып, залалсыздандырылған қолғапты киіңіз.

3. Дәрілік заттың атын, концентрациясын, дозасын, сақтау мерзімін тексеріңіз.

4. Шприцтің сыртқы орауын ашып, оны жинаңыз, шприцке қажет мөлшердегі дәріні сорып алыңыз, ауасын иненің қалпақшасының ішіне шығарып алып, залалсыздандырылған лотокқа орналастырыңыз.

5. Пациентті отырғызыңыз немесе жатқызыңыз, қолын білектің ішкі жағы үстіне қарайтындай орналастырыңыз.

6.Қолғапты тері антисептигімен өңдеңіз.

7. Инъекция жасалатын орынды тері антисептигімен бір бағытта екі рет өңдеңіз: алдымен үлкен аймақты, сосын кіші – инъекция жасалатын орынды. Тері антисептигінің толық кебуін тосыңыз.

8. Шприцті оң қолыңызға иненің ұшын жоғары қаратып ұстаңыз: екінші саусақпен иненің канюлясын ұстаңыз; үшінші, төртінші және бірінші саусақтармен шприцтің цилиндрінен ұстаңыз.

9. Сол қолыңызбен білектің сырт жағынан терісін тарта ұстаңыз.

10. Иненің тесігін жоғары қаратып, шприцті қолға параллельді, 5⁰С бұрышта ұстап, тері ішіне иненің тек ұшын ғана енгізіңіз.

11.Шприцті ұстаған қолды ауыстырмай, сол қолдың 2 және 3-ші саусақтарын цилиндрдің ұстайтын бөлігіне орналастырып, 1-ші саусақпен поршенді итеріп, дәрілік затты енгізіңіз.

12.Тері ішіне дәрі жіберген жерде «лимон қабығына» ұқсаған кішкене төмпешік пайда болады.

13.Инені канюлясынан ұстай отырып, оны тез суырып алыңыз.

14. 30 мин-тан кейін сынаққа сипаттама беріңіз; егер гиперемия 0,5см артық болса, онда сынақ оң, антибиотикті қолдануға болмайды, егер 0,5см кем болса, онда сынақ күдікті болады, қалыпты жағдайда ешқандай реакция болмайды;

15.Қолданылған шприцті арнайы қалдықтарға арналған контейнер-ге

(ҚАК) салыңыз.

16. Қолғапты шешіп, арнайы қалдықтарға арналған контейнер-ге (ҚАК) салыңыз.

17. Қолыңызды жуып, құрғатыңыз.

18. Пациентке 3 күн бойы иньекция орнына су тимеу керектігін ескертіңіз.

104.Дәріні тері астына енгізудің медбикелік технологиясы

Тері астына дәрі жіберу сыйымдылығы 1-2мл шприцпен орындалады, иненің ұзындығы 30-40мм. Тері астына 3мл дейін сұйықтық жіберуге болады.

Мақсаты: емдеу мақсатымен дәрілік заттарды жіберу.

Көрсеткіші: дәрігердің нұсқауы.

Қарсы көрсеткіштері: дәрілік заттарға аллергиялық реакциялар, иньекция жасалатын орынның тері аурулары және тері асты май қабатының ісінулері.

Асқынулары: инфильтрат, дәрілік заттарды қателесіп енгізу, вирустық гепатит, ЖИТС, аллергиялық реакциялар, анафилактикалық шок, сепсис.

Жабдықтау : бір рет қолданылатын 1-2 мл шприц, залалсыздандырылған орамдағы

ауыстыратын ине, 4 қабатты залалсыздандырылған дәкемен жабылған залалсыздандырылған лоток, залалсыздандырылған пинцет, тану материалдары бар бикс, 70% этил спирті, дәрілік заттар, қолданылған заттарға арналған контейнерлер (класс А және Б)

Іс-әрекет алгоритмі:

1. Пациентті ем- шара бөлмесіне шақырыңыз.

2.Тағайындалған дәрі жайында білетін-білмейтінін анықтаңыз, оны қолдануға қарсы көрсеткіші жоқ екеніне көз жеткізіңіз.

3. Дәрілік заттың атын, концентрациясын, дозасын, сақтау мерзімін тексеріңіз.

4. Гигиеналық деңгейде қолыңызды жуып, тері антисептигімен өңдеп, залалсыздандырылған қолғапты киіңіз.

5. Сыртқы орауын ашып , шприцті жинаңыз, шприцке дәріні сорып алыңыз.

6. Шприцті лотоктағы залалсыздандырылған дәкенің арасына қойыңыз.

7. Пациентті жатқызыңыз немесе отырғызыңыз.

8. Ине салатын орынды саусағыңызбен басып көріңіз, ине салатын жердің терісін 70% спиртке малынған мақта түйіршікпен екі рет өңдеңіз: алдымен үлкен аймақта, содан соң – инъекция жасалатын орынды.

9. 3-ші спиртті мақта түйіршігін сол қолдың 4-ші және 5-ші

саусақтарының арасына орналастырыңыз.

10. Оң қолыңызға лотоктағы шприцті алыңыз, ине салатын жердің терісін

сол қолыңыздың екі саусағымен қысып ұстаңыз.

11.Шприцті теріге 45⁰С бұрышта ұстай отырып, иненің 2/3 бөлігін енгізіңіз.

12. Сол қолдың 2-ші және 3-ші саусақтарын цилиндрдің ұстайтын

бөлігіне орналастырып, 1-ші саусақпен поршенді итеріп, дәрілік затты енгізіңіз.

13. Ине салынған орынға 70% этил спиртіне малынған мақта түйіршікті қойыңыз, инені тез суырып алыңыз.

14. Қолданылған шприцті арнайы қорапқа салыңыз.

15.Қолғапты шешіп, арнайы қалдықтарға арналған контейнер-ге (ҚАК) салыңыз.

16. Қолыңызды жуып, құрғатыңыз.

17.Пациенттің хал-жағдайын сұраңыз.