20 Жылда біз қол жеткізген табыстар

Тәуелсіздік жылдары яғни, небәрі 20 жыл ішінде Қазақстан дамушы елден жылдық табысы орташа, экономикасы өрлеу үстіндегі елге айналды. Қазақстандықтардың өмір сүру деңгейі бірнеше есеге жақсарды. Мәселен, соңғы 10 жыл ішінде кедейшілік деңгейі 4 есеге азайды, ел экономикасы 16 есеге артты. Сардарлы сыртқы саясатының арқасында Қазақстан әлемдік аренаға шықты. Адам ресурстарын нығайтуға салынған күш-қуатымыздың арқасында, талантты әрі табысты жастарға кеңінен жол ашылды.

Біз осы сіздердің жақсы білім алып, өсіп-жетілулеріңіз үшін барлық жағдайды тудырдық, сол арқылы сіздердің Жер шарының кез-келген бұрышында жүрсеңіздер де, ХХІ ғасырда Қазақстанға тек табыс әкелетіндеріңізге кәміл сендік. Бұл сіздердің болашақ үшін, келешек ұрпақ үшін алдарыңызға қойған басты міндет, басты жауапкершілік болуы тиіс.

Мен, біздің жетістігіміз болып саналатын, қазақстандық табыстың үш кілтіне тоқталайын, деп тұрмын.

Бірінші, 140 этностың басын қосқан ерекше құндылық - Қазақстандықтардың бірлігі. Біздің мақсат – оны сақтау, қорғау, көбейту. Біз ешқашан, ешкімге әлемдік мұхитта өз бағытымен жүзіп келе жатқан кемені шайқауға мүмкіндік бермеуіміз керек.

Екінші. Толеранттылық. Этникалық және діни айырмашылықтарға түсіністікпен, құрметпен қарау. Бұл біздің айырмашылықтарымызды бөлмейді, керісінше, біріктіреді.

Егер біздің толеранттылығымыз болмаса, біздің кемеміз бағытынан жаңылып, суға батып кету қаупі туындайды. Ондай жағдайда, апатты жағдайға ұшыраған, суда «SOS» деп көмек сұрап жүзіп жүргендерге айналамыз.

Үшінші. Тарихи тағдырымыздың ортақтығы. Біздің мақсат - өзгермелі әлемдік жағдайда өмір сүріп қана қоймай, бұрынғы жетістіктерімізді жалғастыра отырып, өз мүмкіндіктерімізді арттыра отырып, дамуымызды жалғастыру.

Құрметті студенттер!

Гарвард университетінің ұрандарының бірі – «өмір бойы оқу балама емес, өте маңызды қажеттілік». Осыған байланысты, сіздер алатын білім- тек бастапқы интеллектуалдық капитал. Сіздер білімдеріңізді жетілдіру, кәсіби тұрғыдан білім толықтыру бойынша үздіксіз жұмыс істеулеріңіз керек.

Неміс философы Зиммелдің айтуынша, «білімді адам-білмейтін нәрсесін қайдан тауып алуды білетін адам». Мен баршаларыңызды жан-жақты дамуға шақырамын. Спортпен айналысыңыздар, шет тілдерін меңгеріңіздер, интернет ауыстыра алмайтын әлемдік және отандық бай әдеби мұраларды оқыңыздар. Сіздер, жақсы өмір, байлық, өмірде жаңа деңгейге көтерілу тек еңбекпен келетінін әрқашан есте ұстағандарыңыз жөн.

Қымбатты жастар!

Заманымыздың заңғар жазушысы Мұхтар Әуезов «Халық пен халықты, адам мен адамды теңестіретін – білім», деген. Біз өрлеуді өмірінің өзегі еткен халықпыз. Мына заманда, өнердің кілтін тапқан ғана өрге шабады. Сендер, тәуелсіз Қазақстанның келешегі үшін тарихи жауапкершілік арқалайтын азаматсыңдар. Осы жауапкершілікті сезіне біліңдер. Мемлекеттің ең ұлы мұраты - әрбір азаматының тауқымет көрмей, бақуатты тіршілік кешуі. Менің «Жалпыға Ортақ Еңбек Қоғамына қарай 20 қадам» атты мақаламның да түпкі мәні осында. Қазақ «бейнет түбі - зейнет», дейді. «Ауырдың үстімен, жеңілдің астымен» тіршілік жасау бізге жат қылық болуы тиіс. Біздің қоғамда адал еңбекті терең біліммен ұштастырған ғана табысқа жете алатынын қаперден шығармаған абзал. Бұл – заман талабы.

Сендер Қазақстанның өз ғылымы мен технологиясын, өзіндік ұстанымын жасайтын ғылым иесі болуларың керек. Кез-келген кәсіп иесі өз шаруасын тың тәсілмен, жаңа әдіспен істеуге ұмтылса ғана ешкім жетпеген табысқа жете алады. Өзгелер салған сүрлеуге түсіп, бөтен іздің шаңын жұту Қазақстан жастарының таңдауы емес. Сендер, тәуелсіз қазақ елінің білімді жастары, өз соқпақтарыңды салып, оны елді дамуға бастайтын даңғылға айналдыруға тиіссіңдер! Ел болашағының баянды болмағы, баста бұлықсыған білім мен қолда ойнаған еңбекке байланысты.

Ендеше, білімдерің толыссын! Еңбектерің жансын! Назарларыңа рахмет!