Тема. Г. Гомәрнең “аю әппәс” әкиятен уку.

Бурычлар:

1) балаларга әкиятнең эчтәлеген истә калдырырга һәм сорауларга җавап бирергә ярдәм итү, тәрбияче артыннан персонажларның кайбер фразаларын кабатлау, яшелчәләрнең характерлы билгеләрен ачыклауларына ирешү;

2) балаларның игътибарын, кабул итүләрен, күзәтүчәнлеген, хәтерен, конкрет-образлы фикерләвен, сыйфатлар хисабына сүзлекне (эшчән, бәләкәй, юмарт) үстерү;

3) балаларда бергә шөгыльләнү, сорауларга җавап бирү теләге, бер-береңә карата уңай сыйфатлар тәрбияләү.

Җиһазлар: кәрҗингә салынган яшелчәләр, аю баласының, кишер, кәбестә, чөгендер, кыяр, помидор, шалкан түтәленең контурлы сурәтләре

Эшчәнлек барышы

Тәрбияче. Балалар, мин сезгә кәрҗин алып кердем. Анда яшелчәләр. Нинди яшелчәләр икән анда? Мин сезгә табышмаклар әйтәм, җавабын табарга тырышыгыз.

Җир астында алтын казык,

Алдык без аны казып.

Бу нәрсә? (Кишер). Кишер икәнен ничек белдегез? (Балаларның җаваплары). (Тәрбияче кәрҗиннән кишер ала, тәлинкәгә куя).

Икенче табышмакны тыңлагыз.

Утыра бер ак чүлмәк,

Өстенә кигән йөз күлмәк.

Кем җавабын тапты? (Кәбестә). Ни өчен кәбестә? (Балаларның җаваплары). (Тәрбияче кәрҗиннән кәбестә ала, тәлинкәгә куя).

Өченче табышмак болай.

Җир астында кызыл әтәч.

Бу нәрсә? (Чөгендер). Кем аңлата ала табышмакның җавабын? (Балаларның җаваплары). (Тәрбияче кәрҗиннән чөгендер ала, тәлинкәгә куя).

Алдагы табышмакны тыңлагыз.

Кечкенә генә йорт,

Эче тулы корт.

Кем җавабын тапты? (Кыяр). (Тәрбияче кәрҗиннән кыяр ала, тәлинкәгә куя).

Игътибар белән алдагы табышмакны тыңлагыз.

Итләч, йомры, яшелен

Өзеп алдым, яшердем;

Гаҗәпләндем бераздан,

Кояшсыз да кызарган.

Кем белде , бу нәрсә? (Помидор). (Тәрбияче кәрҗиннән помидор ала, тәлинкәгә куя).

Соңгы табышмакны тыңлагыз.

Ите симез – мае юк,

Тиресе калын – йоны юк.

Балалар, кем әйтә табышмакның җавабын? (Шалкан). (Тәрбияче кәрҗиннән шалкан ала, тәлинкәгә куя).

Менә булдырдыгыз. Табышмакларның җавабын дөрес әйтә алдыгыз. Тәлинкәдә нинди яшелчәләр бар? (Балалар санап чыгалар). Бу яшелчәләр бик файдалы, сусыл һәм тәмле. Хәзер без ял итеп алырбыз.

Аюның өе зур (Кулларын өскә күтәрәләр)

Куянныкы кечкенә (Чүгәлиләр)

Аю бара алпан-тилпән, (Алпан-тилпән йөрү хәрәкәтен күрсәтәләр).

Ә куяннар сикерә (Алда кулларыннан тәпиләр ясап сикерәләр).

Балалар, мин сезгә бер аю баласы һәм яшелчәләр турында бер әкият сөйлим, тыңлагыз әле. (Тәрбияче “Аю Әппәс” әкиятен сөйли. Сөйләүне рәсемнәр күрсәтү белән бергә алып бара). Аю баласының исемен әйтегез әле. (Аю Әппәс). (Активлаштыру). Аю баласы нинди? (Бәләкәй, эшчән). (Активлаштыру). Аю Әппәс нәрсәләр утырткан? (Кишер, кәбестә, чөгендер, кыяр, помидор, шалкан). (Активлаштыру). (Балалар әйтергә онытсалар, тәрбияче тәлинкәгә күрсәтә). Көз җиткәч, аю баласы нишләгән? (Балаларның җаваплары). Әйтегез әле, яшелчәләрне ашаганда, Аю Әппәс нинди сүзләр әйткән? (Мәм-мәм мәм, баллы, тәмле, татлы мәми). Без дә Аю Әппәснең сүзләрен кабатлыйк әле. (Кабатлыйлар). Иң беренче булып аю баласы янына нәрсә килгән? (Куян). Куянга Аю Әппәс нәрсә биргән? (Бер кишер, бер кәбестә, бер чөгендер, бер кыяр, бер помидор, бер шалкан). Куян ничек итеп аю баласына рәхмәт әйткән? (Балаларның җаваплары). Аю Әппәс тагын нәрсәләрне яшелчә белән сыйлаган? (Керпене, тиенне). Аю баласы турында нәрсә әйтергә була? (Ул юмарт). (Активлаштыру). Юмарт кеше үзенең булган әйбере белән уртаклаша, бүлешә, ул бернәрсәсен дә башкалардан кызганмый. Сезгә әкият ошадымы? Нәрсәсе белән ошады? (Балаларның җаваплары). Сез дә бер–берегезгә карата ягымлы, дус, юмарт булыгыз! Хәзер кулларыгызны юыгыз, Аю Әппәс үстергән яшелчәләр белән сыйланыйк әле. (Балалар яшелчәләр белән сыйланалар).