Уникенче бүлек. Җәй Тема: Бөҗәкләр

Бурычлар:

1) балаларның бөҗәкләр турындагы күзаллауларын формалаштыруны дәвам итү;

2) сөйләмнең грамматик төзелешен камилләштерү, сүзлекне киңәйтү, кызыксынуын, төсләрне аера белү осталыгын үстерү.

3) бөҗәкләргә карата сакчыл караш тәрбияләү.

Җиһазлар: бөҗәкләр (май коңгызы, бал корты, күбәләк, чебен, черки, кырмыска) сурәтләнгән картинкалар.

Эшчәнлек барышы.

Тәрбияче. Балалар, без сезнең белән бүген бик кызыклы тереклек ияләре турында сөйләшербез. Нәрсәләр турында икән? Мин хәзер сезгә бер шигырь укыйм.Нәрсәләр турында икәнен шул шигырь аша белеп карагыз әле. Игътибар белән тыңлагыз:

Выжылдаган бөҗәкләрне

Күрсәм, жу итә йөрәк.

Миннән ярдәм көтәләр күк,

Җәлләтәләр бит бигрәк.(Мөҗәһит).

Балалар, шигырьдә нәрсәләр турында сүз бара? (Бөҗәкләр). Дөрес, бөҗәкләр турында. Сез нинди бөҗәкләр беләсез? (Балаларның җаваплары). (Балалар бөҗәкләрне атыйлар, тәрбияче бөҗәкләр төшерелгән картинкаларны җыелма кесәгә куя бара). Балалар, май коңгызы, бал корты, күбәләк, чебен,черки, кырмыска бер сүз белән ничек аталалар? (Бөҗәкләр). (Балаларны активлаштыру). Дөрес, балалар, бөҗәкләр. Бөҗәкләр зурмы әллә кечкенәме? (Кечкенә). Дөрес, кечкенә. Бөҗәкләр - иң кечкенә тереклек ияләре. Әйдәгез, бергәләп кабатлагыз: бөҗәкләр - иң кечкенә тереклек ияләре. (Активлаштыру). Бөҗәкләрнең тышкы кыяфәтенә игътибар итегез әле, аларның нәрсәләре бар? (Канатлары, мыеклары, аяклары бар). (Активлаштыру). Бөҗәкләр нәрсә белән тукланалар, алар өчен нәрсә азык булып тора икән? (Үсемлекләр). (Активлаштыру). Бөҗәкләр ничек хәрәкәтләнәләр? (Очалар, йөгерәләр, үрмәлиләр). (Активлаштыру). Әйдәгез, уйнап алыйк әле. Уен “Ул нинди ?” дип атала. Мин сезгә бөҗәкләр төшкән картинкалар күрсәтәм. Сез бөҗәкләрнең нинди икәнен әйтегез. Бу нәрсә? (Күбәләк күрсәтә). (Күбәләк). Дөрес, күбәләк. Күбәләк нинди? (Матур, җиңел, төрле төсле (төсле-төсле). (Активлаштыру). Май коңгызы нинди? (Алтынсыман, алтын кебек ялтырый). Черки нинди? (Бәләкәй, кечкенә, усал). (Активлаштыру). Булдырдыгыз! Балалар, бөҗәкләр төрлечә хәрәкәтләнәләр. Әйдәгез, кайсы бөҗәк ничек хәрәкәтләнгәнен әйтеп карагыз. Май конгызы - (үрмәли, оча). (Активлаштыру). Күбәләк - (оча). (Активлаштыру). Бал корты - (оча). (Активлаштыру). Хәзер бармакларыгызга гимнастика ясап, ял итеп алыгыз!.

Чәчәккә кунган күбәләк, (Ике кулның да кул чукларын чалыштырып, кул аркаларын бер-берсенә тәңгәл китерелә - күбәләк утыра).

Күзен йомып утырмый!

Канат җәеп очып китә, (Учлар туры һәм киеренке, бармаклар туры).

Еласаң да тоттырмый! (Кул беләзекләре белән җиңел һәм кискен хәрәкәтләр ясап, күбәләк очканын күрсәтергә).

Балалар, ничек уйлыйсыз, бөҗәкләрне рәнҗетергә, юк итәргә ярыймы? (Юк). Дөрес,бөҗәкләрнең тынычлыгын бозарга ярамый. Кырмыска ояларын туздырмагыз. Бөҗәкләр тәбигатькә матурлык өстиләр. Балалар, бүген сезнең янга да күбәләкләр очып килделәр. Күбәләкләр нинди төстә? (Кызыл, сары, яшел, зәңгәр, шәмәхә, ак). (Активлаштыру). Хәзер һәрберегез берәр күбәләк алыгыз! (Алдан ук тәрбияче келәмгә күбәләкләр төсендәге чәчәкләр куя). Балалар, күбәләкләргә кошлардан качарга ярдәм итәбезме? (Әйе). Кошлар күрмәсен өчен, һәр күбәләкне үз төсендәге чәчәккә кундырырга кирәк: кызыл күбәләк- кызыл чәчәккә, сары- сарыга, яшел- яшелгә һ.б. Балалар, булдырдыгыз! Төсләрне бик оста аерасыз икән. Балалар, сез бүген нәрсәләр белдегез? Сезгә бигрәк тә нәрсә ошады? (Балаларның җаваплары). Мин сездән бик канәгать. Барыгызга да матур көн телим!