Сигезенче бүлек. Сигезенче март Тема. Әниләр бәйрәме!

Бурычлар:

1) балаларның әниләр бәйрәме турындагы мәгълүматларын киңәйтү, әниләр бурында тасвирлау хикәясе сөйләргә өйрәтү;

2) балаларның игътибарын, кабул итүләрен, хәтерләрен, фотография кулланып, эзлекле сөйләүләрен үстерү;

3) әниләргә мәхәббәт һәм аларга ярдәм итү теләге тәрбияләү.

Җиһазлар: әниләрнең фотографияләре, кәгазьгә берничә ваза ябыштырылгын, чәчәкләр силуэтлары.

Эшчәнлек барышы.

Тәрбияче. Кадерле балалар, мин сезгә бер әкият сөйлим. Борын – борын заманда яшәгән ди бер тылсымчы. Ул гаҗәеп оста кеше булган. Бу тылсымчы кадаксыз йорт төзи алган, теләсә, кыш көне урамда чәчәкләр үстергән, җәен Кыш бабайны чакыра алган. Арысланны тычканга, чебенне – филгә әйләндерә алган. Ләкин әниләрен тыңламаган, аларның кәефен бозган балаларга ул булыша алмаган. Бу очракта аның тылсымлы сүзләре ярдәм итмәгән. Тылсымчы әйтә торган булган: иң якын кешеләр генә кешене бәхетле итә. Тылсымчылар бу очракта көчсез. Балалар, сез ничек уйлыйсыз, әниләр өчен иң якын кеше кем ул? Әни арган чакта кем аңа булыша ала, кәефен яхшырта, арганлыгын бетерә? (Балаларның җаваплары). Дөрес әйтәсез. Балалар, сез, әниләр яшь, матур, бәхетле, ягымлы булсын дисәгез, үзегез могҗизалар эшли аласыз. Моның өчен әниләргә игътибарлы булырга, аларны тыңларга, күбрәк ягымлы, иркәләү сүзләрен әйтергә кирәк. Сез әниләрегезгә нинди ягымлы сүзләр әйтәсез? (Балаларның җаваплары).

Сездә әниләрегезнең фотографияләре бар. Хәзер әниләрегез турында сөйләрсез. Минем дә әнием бар. Менә аның фотографиясе. Әнием турында сөйләгәнне тыңлагыз әле. Минем әниемнең исеме Әминә. Ул озын буйлы, сары чәчле, зәңгәр күзле. Әнием табиб булып эшли. Ул эшен бик ярата. Өйдә тәмле ашлар, бәлешләр пешерә. Мин аны яратам. Балалар, мин башта нәрсә турында сөйләдем, ә аннан соң? Мин хикәяне ничек тәмамладым? (Балалар әниләре турында сөйлиләр, тәрбияче аларның сөйләмен бәяли). Хәзер ял итеп алырбыз

Әнигә булышам – керләрне юышам, (Кер юу хәрәкәте ясыйлар)

Югачтын әйбәтләп чайкатып аламын (Кер чайкау хәрәкәте ясыйлар).

Чайкагач, көч белән ныгытып сыгамын (Керне сыгу хәрәкәте ясыйлар)

Һәм бауга эләмен. (Керне элеп кую хәрәкәте ясыйлар).

Кипкәчтен шәп итеп үтүкләп куямын. (Уң кулга үтүк “тотып” үтүкләү хәрәкәте ясыйлар).

Булдырдыгыз! Менә кер дә юып карадыгыз. Бик тырыштыгыз.

Балалар, тиздән нинди бәйрәм якынлаша? (Әниләр бәйрәме). (Активлаштыру). (Индивидуаль һәм күмәк кабатлаулар). Дөрес, балалар, әниләр бәйрәме якынлаша. Әниләр бәйрәме – иң ягымлы, иң гүзәл, иң матур бәйрәм, чөнки әниләр безнең иң кадерле кешеләребез. (Индивидуаль һәм күмәк кабатлаулар). Безнең әниләребез - ягымлы, гүзәл, иң матур затлар. Шуңа күрә әниләр бәйрәме - иң ягымлы, иң гүзәл, иң матур бәйрәм. Балалар, әниләр бәйрәмен елның кайсы вакытында билгеләп үтәләр? (Яз көне). (Индивидуаль һәм күмәк кабатлаулар). Дөрес, балалар, әниләр бәйрәмен яз көне бәйрәм итәләр. Яз билгеләрен әйтегез әле. (Кар эри, боз сөңгеләре барлыкка килә, көннәр җылына). (Индивидуаль һәм күмәк кабатлаулар). Балалар, 8нче Март әниләр бәйрәме генә булып торамы? Тагын кемнәр бәйрәме соң 8нче Март? (Әбиләр, апалар, кызлар бәйрәме). (Индивидуаль һәм күмәк кабатлаулар). Дөрес, балалар, 8нче Март - әниләр, әбиләр, апалар, кызлар бәйрәме. Икенче төрле аны хатын-кызлар бәйрәме диләр. Әйдәгез, бергәләп кабатлагыз: “Хатын-кызлар бәйрәме”. Булдырдыгыз! Балалар, әниләрегез бик тырышып эшлиләр. Эштән кайткач та, әниләрнең өйдә эше күп. Алар нәрсәләр эшлиләр? (Ашарга әзерлиләр. Кер юалар. Савыт-саба юалар). (Индивидуаль һәм күмәк кабатлаулар). Балалар, сез әниләрегезгә булышасызмы? Нәрсәләр эшлисез? (Балаларның җаваплары). Бик яхшы, балалар! Әйе, сез инде чәй өстәле әзерли беләсез, шуңа күрә өстәл әзерләгәндә кирәкле савыт-сабаны өстәлгә куярга, ашагач җыеп куярга ярдәм итә аласыз. Әниләргә, әбиләргә булышырга кирәк. Бәйрәмдә бүләкләр бирәләр. Әниләр өчен без гадәти булмаган букет ясарбыз. Менә бу ваза сурәте. Вазага чәчәкләр ябыштырырбыз. Эшләп бетергәч, вазаны әниләр почмагына эләрбез. (Балалар өстәл артына утыралар, контур буенча чәчәкне кисеп алалар, вазага ябыштыралар).