Икенче бүлек. Көз Тема. Басуга бару

Бурычлар:

1) балаларның транспорт (поезд) һәм аның төп билгеләре (төс, материал) белән таныштыруны дәвам итү, яшелчәләр (кишер, чөгендер) турындагы белемнәрне ныгыту;

2) яшелчәләрнең тышкы күренеше, тәме, формасы буенча (кишер, чөгендер) аера белү осталыгын, игътибарын, кабул итүләрен, диалоглы сөйләмен, сенсор сәләтләрен үстерү, [у] авазын дөрес әйтүләренә ирешү;

3) балаларда табигатькә уңай караш тәрбияләү.

Җиһазлар: паровозы һәм вагоннары төрле төстә булган поезд, “басу” күренеше, кәгазьдән ясалган кишер һәм чөгендер “түтәле”, яшелчәләр: кишер, чөгендер.

Эшчәнлек барышы

Тәрбияче өстәлендә паровозы һәм вагоннары төрле төстә булган поезд тора.

Тәрбияче поездга күрсәтә: балалар, бу нәрсә? (Поезд). (Балаларны активлаштыру). Әйе, бу поезд. Поездның паровозы һәм вагоннары бар. Әйдәгез, поездны игътибар белән карыйк әле. Бу паровозның нәрсәсе? (Балалар паровозның өлешләрен атыйлар: торба, тәгәрмәчләр). Паровоз нинди төстә? (Балаларны активлаштыру). Вагоннар нинди төстә? (Тәрбияче балаларны өстәл янына чакыра һәм кулга вагонны алып, аны карарга һәм өлешләрен атарга тәкъдим итә). Сез ничек уйлыйсыз, безнең поезд кая бара икән? (Балаларның җаваплары). Кемнең поезда барганы бар? Илдар, син поезда кая бардың? Кем белән? Поезд нинди иде? (Активлаштыру). Балалар, поездны нинди материалдан ясаганнар? (Балаларны активлаштыру). Әйе, поездны металлдан ясаганнар. (Индивидуаль һәм күмәк кабатлаулар). Балалар, поездның тәгәрмәчләрен нинди материалдан ясаганнар? (Индивидуаль һәм күмәк кабатлаулар). Тәрбияче сөйли: Балалар поезда баралар. Поезд зур һәм матур. Поездның тәрәзәләре чиста һәм якты. Поезд тиз бара. Балалар, хәзер без дә поезда барырбыз. Мин паровоз булам, сез вагоннар булырсыз. (Балалар, тәрбиячегә тотынып, берсе артына икенчесе басып, поезд кебек баралар). Поезд китте.

Алга таба барабыз

Тик – так - так!

Тик – так - так!

Гөрләп чаба паровоз.

Юл тап – тап,

Юл тап – тап,

Ак төтен артта кала:

Пух – пах – пух!

Пух – пах – пух!

Вагоннар җырлап чаба:

Ах – ах – ух!

Ах – ах – ух!

Сыбызгы яңгырап китә:

Ту – ту – ту!

Ту – ту – ту!

Тавышы еракка җитә:

Уу – уу – уу!

Уу – уу – уу!

Менә килеп тә җиттек. Поезд безне басуга алып килде. (Тәрбияче балаларны басу кебек ясалган урынга алып килә. Анда “кишер”, “чөгендер” өемнәре). Балалар, мин сезгә бер табышмак әйтәм, тыңлагыз. Җавабын табарга тырышыгыз.

Өсте яшел, асты кызыл,

Җирдә үсә.

Кем белә, бу нәрсә? (Кишер). (Балаларны активлаштыру). Әйе, бу кишер. (Кишер күрсәтә). Кишер кайда үскән? (Кишер басуда үскән). (Индивидуаль һәм күмәк кабатлаулар). Бергәләп кабатлагыз әле: “Кишер басуда үскән”. (Индивидуаль һәм күмәк кабатлаулар). Балалар, һәрберегез берәр кишер алыгыз. Кишер нинди төстә? (Кызгылт сары). Әйе, кызгылт сары кишер. (Балаларны активлаштыру). Балалар, кишерне кулыгыз белән тотып карагыз әле. Менә шулай. (Тәрбияче үзе күрсәтә). Ул шомамы? (Шома). (Балаларны активлаштыру). Ә хәзер бармакларыгыз белән басып карагыз. Ул йомшакмы яки катымы? (Каты). (Балаларны активлаштыру). Дөрес, балалар, кишер үзе шома, үзе каты. Әйдәгез, бергәләп кабатлыйбыз: шома һәм каты кишер. (Индивидуаль һәм күмәк кабатлау). Кишердән нәрсәләр ясыйлар? (Сок, салат ясыйлар, пирог пешерәләр, ашка салалар, кәбестә тозлаганда салалар, пылау пешергәндә турыйлар һ.б.). (Индивидуаль һәм күмәк кабатлаулар).

Балалар, бу нәрсә? (Тәрбияче балаларга чөгендер күрсәтә). Әйе, чөгендер. (Балаларны активлаштыру). Чөгендер нинди төстә? (Кызыл). Әйе, кызыл чөгендер. (Индивидуаль һәм күмәк кабатлау). Чөгендер нинди формада? (Шар формасында). Әйдәгез, кулларыгыз белән шар ясап күрсәтегез әле. (Балалар күрсәтәләр). Балалар, чөгендер шарга охшаган. Ә тагын нәрсәгә охшаган? (Түгәрәккә охшаган). (Индивидуаль һәм күмәк кабатлаулар). Балалар, бармакларыгыз белән чөгендергә басып карагыз әле. Менә шулай. Чөгендер катымы яки йомшакмы? (Каты). (Балаларны активлаштыру). Чөгендерне кулыгыз белән тотып сыйпап карагыз әле. Чөгендер кытыршымы әллә шомамы? (Шома). (Балаларны активлаштыру). Балалар, чөгендер нинди? (Чөгендер кызыл, түгәрәк, каты, шома). (Балаларны активлаштыру). Чөгендер кайда үсә? (Чөгендер басуда үсә). (Индивидуаль һәм күмәк кабатлаулар). Чөгендердән нәрсәләр ясыйлар? (Салат,винегрет ясыйлар, борщ пешерәләр). (Индивидуаль һәм күмәк кабатлаулар). Балалар, кишер һәм чөгендер - яшелчәләр. Яшелчәләрне язын утырталар, җәй буе аларга су сибәләр, аларны карыйлар. Көз җиткәч казып алалар. (Индивидуаль һәм күмәк кабатлаулар). Яшелчәләрне һәрвакыт юып ашарга кирәк. Ә хәзер мин сезне кишер белән сыйлыйм. Ашап карагыз әле, кишернең тәме нинди? (Баллы, тәмле). (Балаларны активлаштыру). Кишер кетер-кетер киләме? Әйе, кишер кетер-кетер килә. (Балаларны активлаштыру). Булдырдыгыз, балалар! Хәзер бакчага кайтабыз. Бер - берегезгә тотыныгыз. Менә шулай.