Бишенче бүлек. Яңа ел бәйрәме Тема. Кыш бабай турында хикәя төзү

Бурычлар:

1) тәрбияченең сүзле күрсәтмәләре (схема) буенча күмәк хикәя төзү күнекмәләре формалаштыру, балаларны тәрбияче һәм яшьтәшләре белән ирекле аралашырга өйрәтүне дәвам итү;

2) игътибарны, фантазияне, сөйләмдә еш кулланыла торган исемнәрне, сыйфатларны, фигыльләрне куллану, күмәк эшләү осталыгы үстерү;

3) яңа елга карата кызыксыну тәрбияләү.

Җиһазлар: аерым картиналарда чыршы, Кыш бабай, конфет, Кар кызы сурәтләнгән, туп.

Эшчәнлек барышы

Тәрбияче. Балалар, мин сезгә кечкенә картина күрсәтәм, сез картинада сурәтләнгән предметка сүзләр уйлагыз. (Тәрбияче чыршы сурәтләгән рәсем күрсәтә). Бу нәрсә? (Чыршы). Чыршы нинди? (Матур, яшел, чәнечкеле,купшы, исле, биек һ.б.). (Әгәр балалар предметның билгеләрен атауда авырсынсалар, тәрбияче өстәмә сораулар бирә: чыршыга кагылсаң, ул ... (чәнчи). Димәк, чыршы чәнечкеле.

Кыш бабай, конфет, Кар кызы сурәтләнгән рәсемнәр белән тәрбияче шундый ук эш үткәрә

.

Тәрбияче. Хәзер без Кыш бабайның балалар бакчасына юл эзләве турында хикәя төзәрбез. Мин җөмләне башлыйм, сез дәвам итәрсез. “Күптән көтелгән ...(кыш) җитте. Бөтен җирне... (кар) каплады. Кыш бабай капчыгына... (бүләкләр) салды. Зур ...(чанасына) утырды да ... (балалар бакчасына) ашыкты. Кыш бабай барды, барды һәм... (адашты). Як - ягына карады, кайсы...(якка) барасын белмәде. Кинәт кенә башын тавыш ишеткән якка...(борды) һәм...(Кар кызын) күрде. Кар кызы да ...(Кыш бабайны) күреп алды. Кар кызы бабайдан сорады: “Син урманда нишлисең?” Кыш бабай аңа болай диде: “Мин...(адаштым). Балалар бакчасына юлны таба алмыйм”. Кар кызы бабайны тынычландырды: “Юлны табарга мин булышырмын. Юлда минем...(эзләремне) күрәсеңме? Мин балалар бакчасында булдым, балаларның ничек итеп Яңа елга әзерләнгәннәрен карадым. Минем эзләр буенча барсаң, ...(балалар бакчасын табарсың)”. Кыш бабай шулай эшләде дә. Ул Кар кызы эзләре буенча барды, барды,...(балалар бакчасын тапты), балаларга...(бүләкләр) бирде”. (Сөйләү барышында тәрбияче коврографта хикәя фрагментларын күрсәтә ала).

Сезгә хикәя ошадымы? Кич белән әтиегезгә, әниегезгә сөйләрсез. Истә калдыру өчен, мин тагын бер тапкыр эчтәлеген сөйләргә кушам. Балалар, хикәя ничек башланды? Кыш бабай нәрсә эшләде? Юлда аның белән нәрсә булды? Урманда Кыш бабай кемне очратты? Кыш бабай аннан нәрсә сорады? Кар кызы ничек дип җавап бирде? Кар кызы Кыш бабайны ничек тынычландырды? Кыш бабай балалар бакчасына барып җитә алдымы? Ул балаларга нәрсә алып килде?

Хәзер уйнап алабыз. Кыш бабайның капчыгында ниләр барын без белмибез. Нәрсәләр бар икән анда, уйлыйк әле. Мин сезгә сорау бирәм һәм туп атам. Җавап биргәч, тупны миңа атыгыз. Кыш бабайның капчыгында түгәрәк бүләкләр бар. Нәрсә икән ул? (Апельсин, алма, шарик, туп, сәгать, күзлек һ.б.). Кыш бабайның капчыгында турыпочмаклы предметлар да бар. Нәрсә булырга мөмкин? (Китап, буяулар, фото өчен рамка, компьютер, картина, блокнот һ.б.). Кыш бабайның капчыгында баллы бүләкләр бар. Нәрсә икән ул? (Апельсин, алма, конфет, туңдырма, шоколад, торт һ.б.).

Балалар, без бүген нәрсә белән шөгыльләндек? Нәрсә истә калды?