Икенче бүлек. Көз Тема. “песи балалары белән” дигән сюжетлы картина карау һәм хикәя төзү.

Бурычлар:

1) балаларның көзге үзгәрешләр турындагы белемнәрен ныгыту, сюжетлы картина персонажларын игътибар белән карау, эчтәлек буенча сорауларга җавап бирү, иҗадилык элементларын күрсәтү осталыгын формалаштыру, песи һәи аның балалары исемнәрен сөйләмдә куллану, җәнлекләр гамәлен билгеләүче сүзләр хисабына сүзлек запасын киңәйтү һәм активлаштыру;

2) балаларның игътибарын, кабул итүләрен, хәтерен, сенсор сәләтләрен, уен кагыйдәләрен үтәү теләген үстерү;

3) песиләргә карата сакчыл мөнәсәбәт, кайгыртучанлык тәрбияләү.

Җиһазлар: “Песи балалары белән” дигән сюжетлы картина, туп.

Эшчәнлек барышы.

Тәрбияче. Балалар, урамда елның кайсы вакыты? (Көз). (Балаларны активлаштыру). (Күмәк кабатлаулар). Көз турында нәрсә беләсез? (Яфраклар саргая, яңгырлар ява, кошлар җылы якка китәләр, бакчада җиләк-җимешләр, яшелчәләр өлгерә). Урамда салкын. Ә менә песигә һәм аның балаларына өйдә бик җылы. Нинди песигә дисезме, хәзер белерсез. Балалар, килегез монда. Мин сезгә бер картина күрсәтәм. Бу картинаның исеме “Песи балалары белән” дип атала. Башта без картинаны карарбыз, аннан соң картина буенча хикәя төзербез. Картинада нәрсә сурәтләнгән? (Песи һәм аның балалары). (Балаларны активлаштыру).. Песи нинди? (Зур, матур, йомшак, йонлач). (Балаларны активлаштыру). Песи балалары нинди? (Кечкенә, шук, йонлач). (Балаларны активлаштыру). Песи нәрсә эшли? (Ул ята, ял итә). (Балаларны активлаштыру). Песигә нинди исем бирергә була? (Тамчы, Йомшаккай). Бу песи баласы нәрсә эшли? (Тәрбияче йомгак белән уйный торган песи баласына күрсәтә). (Йомгак белән уйный). (Балаларны активлаштыру). Бу песи баласына нинди исем бирергә була? (Йонлач, Шук, Пескәй, Мырау).(Активлаштыру). Ә бу песи баласы нәрсә эшли? (Тәрбияче сөт эчүче песигә күрсәтә). (Сөт эчә). (Балаларны активлаштыру). Дөрес, балалар, бу песи сөт эчә. Телен чыгара да, сөтне теленә тидерә. Ул сөтне ялап эчә. (Балаларны активлаштыру). Бу песи баласына нинди исем бирик? (Йонлач, Шук, Пескәй). (Балаларны активлаштыру). Өченче песи баласы нишли? (Тәрбияче әнисе янында ятучы песигә күрсәтә). (Әнисе янында ята, ял итә). (Балаларны активлаштыру). Әйдәгез аңа исем уйлыйк. (Йонлач, Шук, Пескәй, Каракай). Балалар, картинада сурәтләнгән песиләрне ничек атарга була? (Песи гаиләсе). (Балаларны активлаштыру). Ничек уйлыйсыз, әти песи кайда икән? (Ауга киткән, башка бүлмәгә чыгып киткән). (Балаларны активлаштыру).. Уйлагыз әле, кәрҗинне бүлмәгә кем алып килде икән? (Әби, әни, өй хуҗасы). (Балаларны активлаштыру). Әйе, өй хуҗасы песине, песи балаларын бик ярата, алар турында кайгырта.

Түгәрәккә басыгыз әле. Хәзер уйнап алабыз. Мин сезгә туп ыргытам, песи нәрсә эшли белә? дип сорыйм. Тупны тоткан бала, сорауга җавап бирә. Мәсәлән, тырный (уйный, сикерә, чаба, сөт эчә, йоклый, ашый һ.б.). Бер ишеткән сүзне кабатламаска кирәк. (Уен берничә тапкыр кабатлана).

Хәзер картина буенча хикәя сөйләргә өйрәнәбез. Өйгә кайткач, әниегезгә песи һәм аның балалары турында сөйләрсез. Аңа бик күңелле булыр. Мин сезгә булышырмын. Картинада ...(песи балалары белән) сурәтләнгән. Ана песи зур ...(матур, йонлач, йомшак). Аның янында өч... (песи баласы). Алар кечкенә... (шук, йонлач, уйнарга яраталар). Бер песинең исеме...(Йонлач). Ул... (йомгак белән уйный). Икенче песинең исеме...(Мырау). Ул ...(сөт эчә). Өченче песинең исеме... (Шук). Шук ашап туйган һәм ...(әнисе янына яткан). Әти песи...(ауга киткән). Өй хуҗасы кәрҗингә йомгаклар салган. Песи балалары... (йомгак белән уйнарга яраталар). Бу картина миңа ошады, чөнки песи балалары...(матур, йомшак, җылы, шаян, шук).

Без бүген нәрсә турында сөйләштек? Нәрсәләр турында хикәя төзедек? Песи һәм аның балалары сезгә ошадымы? Кемгә нинди песи баласы ошады? Сез бүген булдырдыгыз. Сез дә миңа бик ошадыгыз. Сорауларга матур итеп җавап бирдегез, картина буенча хикәя төзәргә өйрәндегез.