Беренче бүлек. Белем бәйрәме Тема. Безнең уенчыклар

Бурычлар:

1) балаларда предметларны тасвирлау, вак моториканы камилләштерү, исем, сыйфат кулланып гади җөмләләр төзергә өйрәтү, предметлар атамасы, аларның өлешләрен атау, нинди материалдан ясалуы турында сөйләү хисабына сөйләмнәрен активлаштыру, “ш” авазын ныгыту;

2) балаларның кызыксынучанлыгын, игътибарын, хәтерен, фикерләвен үстерү;

3) балаларда уенчыкларга карата сакчыл караш, үзара дустанә мөнәсәбәт тәрбияләү.

Җиһазлар: видеоплеер, “Лунтик” мультфильмы видеоязмасы, Лунтик уенчыгы, “серле янчык”, уенчык машина, йомшак куян уенчыгы, курчак, төркемдә уенчык почмагында агачтан, балчыктан ясалган уенчыклар, һәр бала санынча квадрат формасында киселгән кәгазьләр.

Эшчәнлек барышы.

Өстәлдә “серле янчык” тора. Тәрбияче балалар белән (Лунтик: “Мин тудым”- дигән өлешкә кадәр) “Лунтик” мультфильмы видеоязмасын карыйлар. Тәрбияче видеоязманы сүндерә һәм балаларга Лунтик уенчыгын күрсәтә.

Тәрбияче. Исәнме, Лунтик! (Балаларны активлаштыру).

Лунтик. Исәнмесез, балалар! Мин сезнең балалар бакчасын күрергә килдем. Сез монда ниләр эшлисез соң? (Уйныйбыз, җырлыйбыз, биибез, саф һавада йөрибез, шөгыльләнәбез, әкиятләр укыйбыз, китаплар карыйбыз). Монда бик рәхәт икән. (Лунтик өстәлдәге “серле янчыкны” күреп ала). Ә бу нинди матур әйбер? (“Серле янчык”). (Балаларны активлаштыру). Монда могҗизалар бармы әллә? Ә аның эчен карарга ярыймы? (Индивидуаль һәм күмәк җаваплар).

Тәрбияче. Әлбәттә, Лунтик, син бит кунак. Балалар, аңа рөхсәт итәбезме? ((Балаларны активлаштыру).

Лунтик. “Серле янчыкта” нәрсә бар икән? Ай, монда ниндидер дүрт тәгәрмәчле, кузовлы, кабиналы предмет бар. Нәрсә икән ул?

Тәрбияче. Балалар, Лунтикка ярдәм итегез әле, нәрсә икән ул? (Машина).

Лунтик. Ә нәрсә соң ул – машина?. Безнең Айда машиналар юк.

Тәрбияче. Балалар, кайсыгыз машина турында сөйли? Кәрим, кил, машина турында сөйлә.

Кәрим. Бу машина. Бу йөк машинасы. Аның тәгәрмәчләре, кузовы, кабинасы бар. Кабинасында руле, урындыгы, тизлек рычаглары бар. Машина белән йөк ташып уйнарга була.

Лунтик. Бигрәк матур итеп сөйләдең, мин барысын да аңладым.

Тәрбияче. Ә хәзер Лунтик, мин машина сүзен әйтәм һәм бер авазга басым ясыйм. Балалар, сез тыңлагыз һәм нинди аваз икәнен әйтерсез. Маш-шина. Балалар, сез нинди аваз ишеттегез? (Ш авазы). (Индивидуаль һәм күмәк җаваплар). (Балаларны активлаштыру). Дөрес. Хәзер “ш” авазын кызлар гына әйтә. (Ш). Булдырдыгыз! Хәзер “ш” авазын малайлар гына әйтә. (Ш). Булдырдыгыз!

Лунтик Сез бик матур итеп әйтәсез, мин алай булдыра алмыйм.

Тәрбияче. Балалар, әйдәгез Лунтикны “ш” авазы белән дөрес суларга өйрәтәбез. Сулыш гимнастикасы ясыйбыз: сулыш алганда кулларны як-яктан өскә күтәрәбез, сулышны чыгарганда кулларны аска төшерәбез һәм “ш” авазын чыгарабыз. (Күнегү берничә тапкыр кабатлана). Булдырдыгыз! Лунтик, син дә дөрес иттең.

Лунтик.. Әйдәгез, тагын “серле янчык” эчен карыйк, тагын нинди уенчык бар икән?

Тәрбияче. Балалар, кайсыгыз Лунтикка ярдәм итә? Марат, кил, син ярдәм ит.

Марат. (Бала кулын янчыкка тыгып уенчыкны капшый). Башы бар, ике күзе, күзе зур, авызы бар. Колагы озын. Койрыгы кечкенә. Тәпиләре дә кечкенә.

Тәрбияче. Балалар, нәрсә икән соң ул? (Куян). (Балаларны активлаштыру). Булдырдыгыз, балалар! Марат бик дөрес, матур итеп куянның билгеләрен әйтте. (Тәрбияче куянны янчыктан ала).

Лунтик. Бигрәк матур уенчык, минем беркайчан да куян күргәнем юк иде.

Тәрбияче. Балалар, кайсыгыз куян турында сөйли? Азалия, кил әле, куян турында сөйлә.

Азалия. Бу уенчык куян. Ул йомшак. Аның башы, ике күзе бар , күзләре зур, кыек карыйлар, авызы бар - кызыл. Колагы озын. Койрыгы кечкенә. Тәпиләре дә кечкенә. Куян бик куркак.

Лунтик. Куян турында бигрәк матур итеп сөйләдең, мин барысын да аңладым.

Тәрбияче. Балалар, әйдәгез куллар белән куян ясап күрсәтик. (Балалар куллары белән куян ясап күрсәтәләр). Балалар, Лунтик, безне куян уйнарга чакыра.

Ап-ак куян утыра, (Балалар чүгәләп утыралар).

Колакларын селкетә. ( Куян колакларын ясап, кулларын башка куялар һәм селкетәләр).

Менә шулай, менә шулай,

Колакларын селкетә,

Аңа тик тору кыен,

Җылыта ул тәпиен.(Кулларын сыйпыйлар, уалар).

Һап, һап, һап.(Кулларын чәбәклиләр).

Җылыта ул тәпиен,

Куян тик торса туңа.(Сикерәләр).

Сикергәли ул шуңа.

Һап, һап, һап.(Кулларын чәбәклиләр). Булдырдыгыз! Балалар, паласка утырыгыз.

Лунтик. Бу янчыкта тагын нәрсәдер бар. Миңа кайсыгыз ярдәм итә?

Рания. Аның башы бар, ике кулы, ике аягы, гәүдәсе бар.

Тәрбияче. Балалар, бу нәрсә? (Курчак). Булдырдыгыз! Рания курчак турында бик дөрес итеп сөйләде. Румия, кил әле, курчак турында сөйлә.

Румия. Бу курчак, аның белән уйныйлар. Курчакның башы, башында чәче, колаклары, матур күзләре, кашы, борыны, авызы бар. Аның гәүдәсе бар, муены, ике кулы, ике аягы бар. Мин курчак белән уйнарга яратам.

Тәрбияче. Булдырдыгың Румия!

Лунтик. Курчак, куян, машина – алар миңа барысы да ошадылар. Сез дә алар турында матур итеп сөйләдегез.

Тәрбияче. Балалар, машинаны, куянны, курчакны без бер сүз белән ничек атыйбыз? (Уенчыклар). (Балаларны активлаштыру). Уенчыкларны сакларга кирәк.

Лунтик. Ә безнең Айда уенчыклар юк.

Тәрбияче. Лунтик, тирә-ягыңа кара әле, безнең төркемдә уенчыклар бик күп һәм алар барысы да төрле материалдан ясалганнар. Балалар, килегез әле, әйдәгез Лунтикка төркемдәге уенчыкларның нинди материалдан эшләнгәнен күрсәтик, аңлатыйк. Без уен уйныйбыз.

Балчыктан ясалган уенчыклар – балчык уенчыклар, (күрсәтә).

Агачтан ясалган уенчыклар – агач уенчыклар, (күрсәтә)

Пластмассадан ясалган уенчыклар – пластмасса уенчыклар, (күрсәтә)

Резинадан ясалган уенчыклар – резина уенчыклар, (күрсәтә).

Лунтик. Ничек кызык, ә кәгазьдән ясалган уенчыклар буламы? (Була, алар кәгазь уенчыклар. Без кәгазьдән уенчыклар ясадык). (Балаларны активлаштыру). Ә мин ясый белмим.

Тәрбияче. Балалар, Лунтикка кәгазьдән уенчыклар ясарга өйрәтәбезме? (Балаларны активлаштыру). Балалар, бу кәгазьләр нинди формада? (Квадрат).

Балалар тәрбияче ярдәмендә квадрат формасындагы кәгазьләрдән оригами ысулы белән уенчык ясыйлар.

Лунтик. Бигрәк матур уенчыклар, ә минем дусларымның беркайчан да кәгазь уенчыклар күргәннәре юк.

Тәрбияче. Балалар, Лунтикның дуслары кәгазь уенчыклар ясарга өйрәнсен өчен, без нәрсә эшли алабыз? (Үзебез ясаган уенчыкларны бүләк итә алабыз). (Балаларны активлаштыру). Булдырдыгыз, балалар!

Тәрбияче балалар ясаган уенчыкларны матур бүләк сумкасына сала һәм Лунтикка бирә.

Тәрбияче. Лунтик, мә бу бүләк синең дусларыңа.

Лунтик. Балалар, миңа Айга кайтырга вакыт. Сез мине бик күп нәрсәләргә өйрәттегез: уенчыклар турында сөйләдегез, уеннар уйнадыгыз, уенчык ясарга өйрәттегез. Рәхмәт сезгә! Мин үземнең дусларыма сезнең хакта сөйләрмен һәм бүләкләрегезне тапшырырмын. Сау булыгыз!