Уникенче бүлек. Җәй Тема: Чәчәкләр

Бурычлар:

1. балаларны җәйге табигатьтәге үзгәрешләр, чәчәкләрнең характерлы билгеләре белән таныштыруны дәвам итү, сорауларга тулы җәенке җөмләләр белән җавап бирү осталыгын ныгыту;

2. логик, образлы фикерләүләрен, хәтерен, игътибарын, вак моториканы үстерү;

3. чәчәкләргә карата сакчыл караш тәрбияләү.

Җиһазлар: чәчәкләр (василек-күкчәчәк, ромашка, мәк, ландыш, тузганак) сурәтләнгән предметлы картинкалар; ландыш чәчәге 4 өлешкә киселгән сүрәтләнгән картинка; чәчәк өлешләре (тамыры, сабагы, яфраклары, чәчәкләре).

Эшчәнлек барышы.

Тәрбияче. Балалар, хәзер елның кайсы вакыты? (Җәй). Дөрес, җәй. Сез җәй турында нәрсәләр беләсез? (Кояш нык кыздыра, кызынырга, су коенырга була, урманда җиләкләр, гөмбәләр өлгерә, чәчәкләр күп була һ.б.). Балалар, бик яхшы! Сез табигатьнең җәй көне ничек үзгәрүен беләсез. Җәй билгеләрен дөрес атадыгыз. Сезнең өстәл өстендә конвертлар бар. Конвертны ачыгыз, эчендәге әйберләрне алыгыз. (Балалар конверт эченнән киселгән картинка өлешләрен алалар). Балалар, бу картинка таралган. Әйдәгез, җыеп карагыз әле. (Балалар дүрт киселгән өлештән ландыш чәчәге сүрәтләнгән картинка җыялар). Балалар, картинкада нәрсә ясалган? (Ландыш чәчәге). (Активлаштыру). Балалар, ландыш чәчәген энҗе чәчәк дип тә атыйлар. (Активлаштыру). Ландыш чәчәге кайда үсә? (Урманда. Ландыш чәчәге урманда үсә).(Активлаштыру). Дөрес, яхшы! Ландыш чәчәге урманда үскәч,ул нинди чәчәк була инде? (Урман чәчәге. Урманда үсә торган чәчәк). (Активлаштыру). Ландыш чәчәгенә игътибар белән карагыз. Ландыш чәчәге нинди? (Ландыш чәчәге кечкенә кыңгыраулар кебек, аның зур яшел сабагы нечкә, чәчәкләре кечкенә ак). (Активлаштыру). Кем ландыш чәчәге турында матур итеп сөйләп бирә ала? (Тәрбияче бер баладан сорый). Бик яхшы, ландыш чәчәге турында матур итеп сөйләдегез. Хәзер картинкаларыгызны өстәл кырына куегыз. Игътибар белән тактага карагыз! (Җыелма кесәгә чәчәкләр сурәтләнгән предметлы картинкалар куелган). Балалар, картинкаларда нинди чәчәкләр сурәтләнгән, исемнәрен атагыз әле. (Балалар чәчәкләрнең исемнәрен атап (күкчәчәк, ромашка, мәк, ландыш, тузганак), бер-бер артлы җавап бирәләр). Балалар, күкчәчәк, ромашка, мәк, ландыш, тузганак бер сүз белән ничек аталалар? (Чәчәкләр). (Активлаштыру). Балалар, исегезгә төшерегез әле, чәчәкләр нинди өлешләрдән торалар, аларның нәрсәләре бар? (Тамыры). Дөрес, тамыры бар. (Тәрбияче җыелма кесәгә тамыр сурәтләнгән картинка куя). Менә ул тамыр. Чәчәкнең тагын нәрсәсе бар? (Сабагы). (Тәрбияче сабак сурәтләнгән картинканы куя). Менә чәчәкнең сабагын да куйдык. Ә тагын нәрсәсе бар? (Яфраклары). (Тәрбияче яфрак ясалган картинка куя). Чәчәкнең яфраклары да булды. Чәчәкнең тагын нәрсәсе бар? (Чәчәге). Бик дөрес, матур чәчәге бар. (Тәрбияче чәчәк ясалган картинка куя). Хәзер, балалар, чәчәкне тасвирлап, аның турында сөйләп карагыз. Мин сезгә күкчәчәкне тасвирлап күрсәтәм. Игътибар белән тыңлагыз. “Күкчәчәк- кечкенә генә зәңгәр чәчәк, аның сабагы нечкә, яфраклары бик матур. Ул басуда (кырда) үсә”. (Алга таба тәрбияче балаларны чакыра, алар һәр чәчәкне тасвирлыйлар). Балалар, ә хәзер уен уйнап алыйк. Сез чәчәкләр булырсыз. Күктә кояш елмая. Матур итеп басыгыз. Бармакларыгызны җәеп, кулларыгызны өскә - кояшка күтәрегез! (Балалар кулларын күтәрәләр). Чәчәкләр кояшка карыйлар, аның җылысын тоялар. (Балалар аяк очларына басып, кояшка таба үреләләр). Кояш йокларга ята, чәчәкләр дә йоклый. (Чүгәлиләр, кулларны аска төшерәләр). (Уен 2-3 тапкыр кабатлана. Музыка куярга да була). Балалар, мин сезгә “Бу чәчәк кайда үсә?” уенын тәкъдим итәм. Мин сезгә чәчәкләр сурәтләнгән картинкалар күрсәтәм, ә сез аларның кайда үсүен әйтерсез. (Тәрбияче мәк (ландыш, күкчәчәк) күрсәтә). Бу нинди чәчәк? (Мәк). Мәк кайда үсә? (Бакчада). Бу нинди чәчәк? (Ландыш). Ландыш кайда үсә? (Урманда). Бу нинди чәчәк? (Күкчәчәк). Ул кайда үсә? (Басуда яки кырда). Бик дөрес, балалар. Бакчада үсә торган чәчәкләрне махсус утырталар, аларны карыйлар, тәрбиялиләр. Алар бакча чәчәкләре дип аталалар. (Активлаштыру). Урманда үсә торган чәчәкләрне беркем дә утыртмый, алар үзләре үсәләр һәм урман чәчәкләре дип аталалар. (Активлаштыру). Басуда (кырда) үсә торган чәчәкләрне дә беркем дә утыртмый, алар үзләре үсәләр һәм басу (кыр) чәчәкләре дип аталалар. (Активлаштыру). Балалар, җирдә чәчәкләр күп булса, җиребез матур, һава саф була. Чәчәкләрне яратыгыз һәм саклагыз! Чәчәкләрне өзмәгез! Урманнар, болыннар һәм бакчалар чәчәкләргә күмелсен! Безне сокландырсын!