Тема. 9 майны каршылап...

Бурычлар:

1) балаларның Җиңү көне турында күзаллауларын формалаштыруны, хәрби һөнәрләр, аларның баш киемнәре белән таныштыруны дәвам итү, сугышчыларның батырлыгы турында сөйләү, хәрби техника турында белемнәрен киңәйтү;

2) балаларның диалогик сөйләмен, конкрет-образлы фикерләвен, игътибарын, кызыксынуын, конструктив осталыкларын үстерү;

3) хәрби һөнәрләргә, ветераннарга карата хөрмәт, патриотик, горурлык хисләре тәрбияләү.

Җиһазлар: марш аудиоязмасы, Ватан сугышы сурәтләнгән рәсемнәр, Җиңү бәйрәме сурәтләнгән рәсемнәр: мәңгелек ут, һәйкәлләр, сугыш ветераннарын котлау, диңгезчеләр, танкистлар, очучылар, чик сакчылары төшкән рәсемнәр, аларның баш киемнәре, таякчыклар. Самолетлар, корабллар, танклар, пушкалар, ракеталар рәсеме.

Эшчәнлек барышы.

Аудиоязмада марш яңгырый. Балалар урыннарына утыра.

Тәрбияче. Җиңү көне уңаеннан безнең илебезне саклаучылар турында сөйләшик. Бөек Ватан сугышы бик озак барган. Илгә, аның кешеләренә зур кайгылар, җимерүләр алып килгән. Бу сугыш турында нәрсә ишеткәнегез бар? (Балаларның җаваплары). Бүген без тыныч илдә яшибез. Җиңү көнендә сугыш ветераннарын, олы яшьтәге әби – бабайларны бәйрәм белән котлыйбыз, аларга саулык – сәламәтлек телибез. Бөек җиңүне фронттагы солдатлар, авыл-шәһәрдә эшләүче кешеләр яулаган. Бик күпләр сугыш кырында үлеп калганнар. Аларның батырлыгын искә алып, һәйкәлләр куялар. Һәйкәлләр янында һәрвакыт тере чәчәкләр. Бу чәчәкләр сугышта катнашкан, батырлык күрсәткән, гаиләләренә кайта алмаган солдатларга рәхмәт билгесе һәм истәлеге. Сугыш ветераннары елдан - ел азая бара. Алар сез яшәгән йортта, подъездда да яшәргә мөмкин. Аларны күрсәгез, бәйрәм белән котларга онытмагыз. “Бәйрәм белән! Җиңү өчен сезгә рәхмәт”, - дип әйтегез.

Безнең солдатлар диңгездә, коры җирдә, һавада да дошманнар белән сугышканнар. Безнең илнең солдатлары нинди? (Кыю, көчле, курку белмәс, илне яратучан). (Балаларны активлаштыру). Балалар, самолетта, вертолетта очучы сугышчыларны кем дип атыйлар? (очучы, очучылар). (Балаларны активлаштыру). Парашют белән сикерүчеләрне кем дип атыйлар. (Парашютчы). (Балаларны активлаштыру). Танкта хезмәт итүчеләрне кем дип атыйлар? (Танкистлар). (Балаларны активлаштыру). Корабта, су асты көймәләрендә хезмәт итүчеләрне кем диләр? (Диңгезчеләр). (Балаларны активлаштыру). Дәүләт чиген саклаучыларны кем дип атыйлар? (Чик сакчылары). (Балаларны активлаштыру). (Тәрбияче әңгәмәне рәсемнәр күрсәтү белән бергә алып бара). Балалар, һәр гаскәр төренең хәрби киеме бар. Өстәлдә хәрбиләрнең баш киемнәре ята. Әйдәгез аларның кемнеке икәнен билгелик. Шлем кемгә... (танкистка). Бескозырка кемгә...(диңгезчегә). Пилотка кемгә...(солдатка). Яшел фуражка кемгә... (чик сакчысына). Зәңгәр фуражка кемгә...(очучыга). Булдырдыгыз. (Тәрбияче дөрес җавап биргән балаларга өстәлдә яткан баш киемнәрен кидерә).

Хәрбиләргә хәрби техника ярдәмгә килә. Солдатлар, офицерлар төрле хәрби техника белән эшлиләр. Әйдәгез нинди хәрби техника бар икәнен карыйк әле. (Тәрбияче рәсемнәр күрсәтә: танк, самолет, вертолет, ракета, корабль, су асты көймәсе. Балалар техниканы атыйлар һәи кабатлыйлар). Балалар, сезнең өстәлләрдә таякчыклар ята. Шулардан үзегезгә ошаган хәрби техниканы ясагыз. (Балалар биремне үтиләр).

Әйдәгез “Очучылар һәм очкычлар” дигән уенны уйнап алыйк. (Балалар уйныйлар).