Тема. Җиңү бәйрәме

Бурычлар:

1) балаларның Җиңү көне турында күзаллауларын формалаштыру, кайбер хәрби һөнәрләр: диңгезчеләр, танкистлар, очучылар, чик сакчылары белән таныштыруны дәвам итү;

2) балаларның сорауларга тулы фразалар белән җавап бирү осталыгын, игътибарын, кызыксынуын, сүзлеген үстерү;

3) хәрбиләр һөнәренә хөрмәт, патриотик, горурлык хисләре тәрбияләү.

Җиһазлар: диңгезчеләр, танкистлар, очучылар, чик сакчылары төшкән рәсемнәр (алар үзләренә хас булган эш гамәлләрен башкаралар), Очкычлар, корабльләр, танклар, пушкалар, ракеталар сурәтләнгән рәсемнәр. Д.Тухмановның “Җиңү көне” (День Победы) җырының аудиоязмасы.

Эшчәнлек барышы.

Тәрбияче. Балалар, карагыз әле безнең бүлмә бәйрәмчә бизәлгән: шарлар, төрле төстәге флажоклар, плакатлар эленгән. Ни өчен шундый бәйрәмчә һәм тантаналы бүген төркемдә? (Иртәгә зур бәйрәм – Җиңү көне). Булдырдыгыз. (Тәрбияче “Җиңү көне” (День Победы) җырының аудиоязмасын куя, балалар аның бер куплетын тыңлыйлар). Әйе, иртәгә безнең халкыбыз Җиңү көнен билгеләп үтәчәк. Бик озак еллар элек сугыш булган, ул безнең илгә зур кайгылар һәм җимерелүләр алып килгән. Бу сугышта дошманга каршы солдатлар батырларча көрәшкәннәр. Алар арасында очучылар, танкистлар, диңгезчеләр булган. (Тәрбияче рәсемнәр күрсәтә). Сугышта катнашкан кешеләр хөрмәтенә һәйкәлләр куялар. Һәйкәлләр янында һәрвакыт тере чәчәкләр. Бу чәчәкләр белән безнең солдатларны искә алабыз, аларга батырлыклары өчен рәхмәт әйтәбез, алар белән горурланабыз. Хәзер сугышта катнашкан әби-бабайлар инде бик картайган. Җиңү көнендә алар орден-медальләрен кияләр, бәйрәмдә катнашалар. Карагыз әле бу орден-медальләр аларны ничек бизи! (Тәрбияче рәсемнәр күрсәтеп сөйли). Бу әби-бабайлар сугыш ветераннары. (Балаларны активлаштыру). Әгәр дә сезнең подъездда, сезнең гаиләдә сугыш ветераннары булса, аларны бәйрәм белән котларга онытмагыз. “Сезне бәйрәм белән котлыйм”, дип әйтегез. Җиңү көнендә без үлгәннәрне искә алабыз, исәннәргә саулык телибез, алар алдында, аларның батырлыгы алдында баш иябез. (Тәрбияче сөйләмен рәсемнәр белән алып бара).

Безнең армия зур һәм көчле. Россия армиясе үз халкын дошманнардан һәрвакыт саклаган, хәзер дә саклый. Безнең армиядә төрле гаскәрләр хезмәт итә.

Тәрбияче балаларга иллюстрацияләр күрсәтә. Бу рәсемнәрдә төрле хәрби гаскәрләрнең хезмәте сурәтләнгән: диңгезчеләр, танкистлар, очучылар, чик сакчылары.

Тәрбияче. Балалар, бу рәсемнәргә карагыз әле. Солдатлар нәрсә эшлиләр? Ни өчен солдатларга шөгыльләнергә, тренировкаларда булырга кирәк? (Балаларның җаваплары). Илне саклау һәм яклау өчен солдатлар нәрсә эшлиләр? (Балаларның җаваплары). Безнең илнең солдатлары көчле булу өчен, аларга тренировкаларга йөрергә, хәрби хезмәткә өйрәнергә кирәк. Аларны оста итеп атарга, каршылыкларны җиңәргә, сикерергә, үрмәләргә, йөзәргә өйрәтәләр. Солдат булу өчен бүген үк әзерләнергә кирәк. Хәзер без “Сигнальщиклар” дигән күнегү ясарбыз.

Без җирдә басып торабыз (Аяклар азрак аерылган, куллар артта),

Корабльдә йөзәбез (Куллар алга куела һәм тиз генә артка җибәрелә).

Һәрвакыт сигнал бирәбез, шундый приказ безгә бирелгән (Ике кулны да аркага куялар)

Уңга – борыл (Баш уңга борыла, уң кул аркага куела)

Сулга - борыл (Баш сулга борыла, сул кул аркага куела)

Йоклама, сигнал бирергә онытма! (Катып калырга: смирно).

Балалар, сугыш вакытында һәм хәзер дә безнең солдатларга хәрби техника ярдәмгә килә. Хәрби техникага нәрсәләр керә? (Очкычлар, корабльләр, танклар, пушкалар, ракеталар). (Тәрбияче балалар атаган техниканың рәсемнәрен күрсәтә). (Балаларны активлаштыру). Балалар, Җиңү бәйрәме уңаеннан әйдәгез “Россия армиясе” дигән макет төзибез. Бу макетта зәңгәр төс белән нәрсәне билгелик? (Диңгезне билгелик). (Балаларны активлаштыру). Яшел төс белән нәрсәне билгелик? (Коры җирне). Ни өчен коры җирне яшел төс белән билгеләдек? (Җирдә яшел үлән, агачлар, куаклар үсә). (Балаларны активлаштыру). Һаваны нинди төс белән билгеләргә була? (Күк төс белән). Әйе, күк (голубой) төс белән һаваны ясыйк. (Балалар тәрбияче белән бергә биремне үтиләр). Балалар, хәзер хәрби техниканы, хәрбиләрне тиешле урынга куярга кирәк. Очкыч янына...(очучы) килде. Очкычны кая куябыз? (Һавага). (Балаларны активлаштыру). Һавадан парашютта ...(парашютист) төште. Танк янына ...(танкист) басты. Танк белән танкистны кая куябыз? (Җиргә). (Балаларны активлаштыру). Корабль янында...(диңгезчеләр) тора. Корабльне кая куябыз. (Диңгезгә). (Балаларны активлаштыру). Машинага...(солдатлар утыра). Дәүләт чиген ...(чик сакчылары) саклый. Балалар, карагыз әле, нинди матур макет барлыкка килде! Төрле гаскәре булган армия – көчле армия. Ул үз илен диңгездә, коры җирдә, һавада да саклый ала.