Беренче бүлек. Белем бәйрәме Тема. Без балалар бакчасында

Бурычлар:

1) балаларда үз-үзеңне тоту кагыйдәләрен формалаштыруны дәвам итү, ягымлы сүзләр куллану хисабына сүзлекләрен активлаштыру;

2) балаларның кызыксынуын, игътибарын, хәтерен үстерү;

3) балаларда дустанә мөнәсәбәт тәрбияләү.

Җиһазлар: балалар кычкырган, шаулаган тавыш язылган аудиоязма, А4 форматында иллюстрацияләр: балалар аш өстәле артында матур итеп утыралар, балалар калакны дөрес итеп тотканнар, пөхтә итеп ашыйлар, балалар уечыкны урынына куялар, уенчыкны бер-берсенә бирәләр. Бергә дус уйныйлар.

Эшчәнлек барышы.

Балалар кычкрган, шаулаган тавыш язылган аудиоязма яңгырый. Төркемгә Йомшаккай (уенчык кулланырга мөмкин) килеп керә.

Тәрбияче. Балалар, сез берәр нәрсә аңлыйсызмы? Бу нинди тавыш? Безгә кем килгән? (Йомшаккай). Йомшаккай, син нишләп шулкадәр кычкырып сөйләшәсең?

Йомшаккай. Мин һәрвакыт шулай кычкырып сөйләшәм. Ай, мин кая килеп эләктем соң әле?

Тәрбияче. Балалар, Йомшаккайга ярдәм итик әле, ул кая килде? (Балалар бакчасына). (Балаларны активлаштыру). Безнең янга килеп кергәч, Йомшаккай нәрсә эшләргә онытты? (Балаларны активлаштыру). Дөрес, ул исәнләшергә онытты. Әйдәгез Йомшаккайны исәнләшергә өйрәтик әле. Йомшаккай, безнең балалар исәнләшә белә, алар бакчага килгәч, төркемгә башка кеше керсә, һәрвакыт исәнләшәләр. Балалар, исәнләшеп күрсәтик әле. (Исәнмесез, исәнме, Йомшаккай!). (Индивидуаль һәм күмәк җаваплар). Белмәмеш, син дә җавап бир.

Йомшаккай. Исәнмесез!

Тәрбияче. Балалар, Йомшаккай безгә кунакка килгән. Ә кунакны чәй белән сыйлыйлар. Йомшаккай, әйдә утыр, чәй эч.

Йомшаккай өстәл артына утыра, ләкин үз-үзен тота белми: урындыкта селкенә, авызын чапылтата.

Тәрбияче. Балалар, Йомшаккай өстәл артында үз-үзен дөрес тотамы? (Юк). (Балаларны активлаштыру). Өстәл артында үз-үзеңне ничек тотарга кирәк? (Матур итеп, утыралар, ашаганда сөйләшмәскә, авызны чапылтатмаска, ашыкмыйча, ризыкны яхшылап чәйнәргә кирәк). (Балаларны активлаштыру). (Балалар җавап биргәндә тәрбияче иллюстрацияләр күрсәтә). Йомшаккай, балаларның киңәшләрен ишеттеңме, исеңдә калдырдыңмы? Булдырдыгыз! Йомшаккай, әйдә уйнап алабыз.

Йомшаккай ашыга, йөгерә, абынып егыла, елый.

Тәрбияче. Балалар, ни булды? Йомшаккай ник елый? (Ул егылды). Йомшаккай, син ашыктың, шуңа егылдың. Балалар, бу хәл башка кабатланмасын өчен нәрсә эшләргә кирәк, Йомшаккайга сөйлик әле. (Бүлмәдә син йөгермә, тыныч итеп йөр генә). (Балаларны активлаштыру). Йомшаккай, син исеңдә калдырдыңмы? Кабатла әле. (Йомшаккай кабатлый). Әйдәгез хәзер бергәләп уйныйк инде.

Йомшаккай уенчыкларны ыргыта, балаларның уенчыкларын тартып ала.

Тәрбияче. Балалар, безнең төркемгә ни булган? Уенчыклар таралып ята. Йомшаккай уенчыкларны урынына куя белми икән. Әйдәгез аны уенчыклар белән уйнарга өйрәтик. (Уенчыкны ташлама, һәрвакыт урынына куй. Уенчык белән үзең генә уйнама, иптәшеңә дә бир. Бергә дус уйнарга кирәк). (Балалар җавап биргәндә тәрбияче иллюстрацияләр күрсәтә). Булдырдыгыз балалар! Балалар, Йомшаккай, әйдәгез уенчыкларны бергәләп урынына куйыйк. Йомшаккай, безнең балалар сине балалар бакчасында үз-үзеңне тоту тәртибенә өйрәттеләр, аларга рәхмәт әйт.

Йомшаккай. Балалар, сез бик зурлар, акыллылар, тәртиплеләр икәнсез, үз-үзеңне тоту кагыйдәләренең барысын да беләсез. Мине дә күп нәрсәгә өйрәттегез: исәнләшергә, өстәл артында үз-үзеңне тотарга, дус уйнарга, рәхмәт әйтергә. Рәхмәт сезгә! Миңа китәргә вакыт, сау булыгыз!